Seer Nen Mcivir U Civir Aôndo Sha Ishima I Taver Yen la
Seer Nen Mcivir U Civir Aôndo Sha Ishima I Taver Yen la
“Sha jighjigh wen u nan la, . . . seer nen ishima i taver; sha ishima i taver la, seer nen mcivir u civir Aôndo.”—2 PETERU 1:5, 6.
1, 2. (a) Ka ivesen i nyi i ver ishima ér wanye nana vese? (b) Ivesen i ken jijingi ngi a inja nena?
KWAGH u injaa hen wanye yô ka ivesen, kpa kwagh ngu u a hembe di ivesen i sha iyol tsô la. I ver ishima ér nana vese ken mhen man sha mnenge kpaa. Ken masejime yô, wanye la nana de aeren a uye la nahan nana vese nana hingir orvesen shin kwase kpaa. Apostoli Paulu ôr kwagh sha kwagh ne ken washika na, a kaa wener: “Zum u m lu wanye la yô, m ôron kwagh er wanye nahan, m henen kwagh er wanye nahan, m nengen kwagh ken ishima er wanye nahan. Kpa hegen er m hingir orvesen ne yô, m de akaa a uye la.”—1 Mbakorinte 13:11.
2 Mkaanem ma Paulu ma ôr kwagh u a lu a inja sha kwagh u ivesen i ken jijingi la. Gba u Mbakristu vea mough hen u lun anikundanev ken jijingi vea hingir ior mba ‘lun mbavesen ken mhen.’ (1 Mbakorinte 14:20) Vea ker gbenda shi vea nôngo u za aren sha “ikaren i mluyol u m-iv u Kristu la.” Tsô vea kera lu “mbayev mba ka i daase a ve i yem a ve wue wue sha ahumbe a ityesen” la ga.—Mbaefese 4:13, 14.
3, 4. (a) Kanyi kwagh se er sha u hingir mbavesen ken jijingii? (b) Ka aeren a Aôndo a nyi i doo u se ere, man nga a inja nena?
3 Se hingir ior mba vesen ken jijingi nena? Er ivesen i sha iyol ka i nôngo u zan hemen kpilididi nahan kpa, ivesen i ken jijingi yô ka i gba u or nana nôngo kwagh tsung ve nana vese ye. Ka i hii sha u henen mfe u vough u Mkaanem ma Aôndo man u eren sha kwagh u se hen la. (Mbaheberu 5:14; 2 Peteru 1:3) Kwagh ne ngu a gema a wase se u eren aeren a Aôndo la. Er ka a lu ivesen i sha iyol man akaa agenegh ve i lu nahan la, aeren a Aôndo kpa nga a vesen kure kure. Apostoli Peteru nger wener: “Nôngo nen ngeelee je, sha jighjigh wen u nan la, seer nen aeren a dedoo, sha aeren a dedoo la, seer nen kwaghfan; sha kwaghfan la, seer nen u kôron iyol tsaha; sha tsaha u kôron la, seer nen ishima i taver; sha ishima i taver la, seer nen mcivir u civir Aôndo; sha mcivir u civir Aôndo la seer nen u doon a anmgbianev man sha u doon a anmgbianev la yô, seer nen dooshima.”—2 Peteru 1:5-7.
4 Hanma ieren i Peteru a ter i cii ngi a inja, man môm kpa ka u a ta i kera ga. A seer wener: “Aluer akaa ne aa lu ken a ven man á ngee je, á dumbur yô, aa na er ken mfe u ne fa Ter wase Yesu Kristu la né kera lu gbilin shin mbaumen atam ga, ze.” (2 Peteru 1:8) De se har ishima sha kwagh u i gbe u se seer mcivir u civir Aôndo sha ishima taver yase la.
Ityôkyaa I Se Lu a Ishimataver La
5. Hii nan kwagh a gbe se sha ishimatavera?
5 Peteru man Paulu cii ve zua mciviraôndo vea ishimataver. (1 Timoteu 6:11) Ikyav i u lun a ishimataver la hemba di u kangen ishima gban gban ken ican man sôghor her dông la. Kwagh ne kua ishimawan man uwegh gban ga man mtil u tilen dông yinan ishima ga shighe u se tagher a atsan man mbamzeyol man ameen shin tôvacan la ker. Er se lu ior mba se lu a “mciviraôndo ken Kristu Yesu cii” yô, se̱ fa tsô ser a tôv se aa ican keng. (2 Timoteu 3:12) Ka u se taver ishima aluer ka u se tese ser Yehova doo se ishima man se mba dondon aeren a i gbe u se zua a myom la yô. (Mbaromanu 5:3-5; 2 Timoteu 4:7, 8; Yakobu 1:3, 4, 12) Dugh ishimataver kera yô, se fatyô u zuan a uma u tsôron ga.—Mbaromanu 2:6, 7; Mbaheberu 10:36.
6. Ikyav i taver ishima zan zan mkur la er nyi?
6 Aluer sea hii a doo nan kpa, kwagh u kwagh a hembe gban sha mi yô ér se lu a ishimataver. Yesu kaa wener: “Or u nana taver ishima zan zan mkur yô, ka nan á yima nan ye.” (Mateu 24:13) Een, se taver nen ishima zan zan mkur, aluer ka mkur u uma wase u hegen ne shin ka mkur u tar u ifer ungun ne je kpaa. Er i lu cii kpa, se tile sha mimi wase hen Aôndo her. Aa u seer mciviraôndo sha ishimataver yase shio yô, se kan shio u eren kwagh u a lu sha ishima i Yehova shi se zua a uma u tsôron ga. Kpa mciviraôndo kanyi?
Kwagh u Mciviraôndo a Lu Yô
7. Mciviraôndo kanyi man ngu a mgbegha se u eren nyi?
7 Mciviraôndo inja na yô ka mcie u cian man civir man eren Yehova Aôndo tom sha u suen hemen na u tar sha won cii la. Sha er se yar tom a mciviraôndo wase u civir Yehova yô, gba u se lu a mfe u vough sha kwagh na man igbenda na. Doo u se ker gbenda u fan Aôndo jim jim man fan un doo doo kpaa. Kwagh ne una na se hii u lun vea na biishii, mlu u una due ken igbar ken aeren a ase shi a nenge a mi ken uma wase la. Se ker gbenda u eren kwagh vough er Yehova nahan—sha u kaven igbenda na shi eren aeren na man anza a na la. (Mbaefese 5:1) Kwagh u a lu kpôô kpôô yô, mciviraôndo ngu a na i lu se ken ishima er ma se eren hanma kwagh cii sha gbenda u ua doo Aôndo ishima yô.—1 Mbakorinte 10:31.
8. U nan iyol sha ci u Aôndo ngu a er tom kwagh môm vea mcivir u civir Aôndo tswen la nena?
8 Sha er se fatyô u henen mne u nan iyol sha ci u Aôndo sha mimi yô, saa se civir Yehova tswen, se na ma kwagh ugen ian ken asema a ase mayange ga. Er a lu Orgban yô, á kuma u se na un icivir tswen je. (Duteronomi 4:24; Yesaia 42:8) Nahan kpa, Yehova kighir se ér se civir un ga. A soo ér ior ve tsua u civir un a asema a ve. Se mba civir Aôndo ser a doo se ishima, gadia mfe u vough u se lu a mi sha kwagh na la ngu a mgbegha se u kôôm uuma asev man tseghan iyol yase sha ci na man eren sha iyoltseghan yase kpaa.
Kôr Ikyar vea Aôndo
9, 10. Se fatyô u maan shi kuran mlu u kôôsôô vea Aôndo nena?
9 E̱r se er batisema sha u tesen ikyav i iyoltseghan yase sha ci u Aôndo se been yô, shi á gba u ikyar yase vea na kpaa ia hemba taver a taver cii. Ishima veren yase i eren kwagh ne man u civir Yehova a ishima yase i môm la ia mgbegha se u zan hemen u timen ken Mkaanem nam man gbidyen kwar sha mi. Er se na jijingi u Aôndo ian se a yar tom ken asema a ase man ken mbamhen asev yô, nahan mdoo u Yehova a doo se ishima la una hemba taver a taver cii. Mlu wase vea na una za hemen u lun kwagh u hemban lun a inja ken uuma asev cii. Se tôô Yehova ser ka Huror wase u hemban cii man se ker u eren kwagh sha ishima na hanma shighe cii. (1 Yohane 5:3) Msaanyol u a lu ken ikyar yase vea Aôndo la ngu a seer a seer man ka i saan se iyol ser ngu tesen se sha dooshima man ngu a tsaha se ape i doo u tsahan se la.—Duteronomi 8:5.
10 Aluer se ker gbenda u taver mlu wase u injaa vea Yehova ga yô, una fatyô u saan ishe. Aluer kwagh er nahan yô, ka ibo i Aôndo ga, gadia ‘ngu ica a hanmô wase ga.’ (Aerenakaa 17:27) Saan se iyol kpishi er Yehova a paase se gbenda u zan hen a na wang nahan! (1 Yohane 5:14, 15) Nahan kpa, saa se ker gbenda u lun vea Yehova kôôsôô her. Ngu a wase se u kporom ikyua a na sha u nan se akaa a kwagh a gbe se sha mi u hiin shi lun a mciviraôndo her la. (Yakobu 4:8) Se fatyô u yaren tom a akaa a a ne se sha dooshima ne cii nena?
Taver ken Jijingi Dông Her
11. Ka igbenda igen i nyi i lu i tesen mciviraôndoo?
11 Mdoo u Aôndo a doo se ishima tsung la una na se tese mze u mciviraôndo wase a ze shimi la sha gbenda u kwaghwan u Paulu la, wener: “Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô, or u nan pasen kwaghôron u mimi la jighilii.” (2 Timoteu 2:15) U eren kwagh ne yô, gba u se ver shighe tsembelee u timen ken Bibilo man zan mbamkombo man duen kwaghpasen. Shi se fatyô u lun vea Yehova sha u ‘eren msen gbem.’ (1 Mbatesalonika 5:17) Ka igbenda i injaa i se tese mciviraôndo wase je ne. Aluer se gbihi môm ken ijime yô, alaghga se gba angev mbu ken jijingi man kwagh la una na se gba ken to u Satan kpaa.—1 Peteru 5:8.
12. Se fatyô u wan ishima a akaren doo doo nena?
12 U taver ken jijingi dông her shi lun tsevaa la una wase se u tagher a ameen kpishi a a ze se iyol la kpaa. Igbenda ngi i alaghga ameen a va sha u karen se jim jim yô. Tôvacan man ahendan man u kenger or dang la ka akaa a taver u wan ishima a mi kpishi shighe u i lu ior mba ken tsombor wou shin anmgbianev ou shin ior mba ve we ndor a we je ve lu eren kwagh ne la. Alaghga mbamkighir mba sha ifer mba kighir se ér se hide ijime sha akaawan a ase a Mbakristu a se ne jighjigh a mi la vea kange sha a vese ken ijiir tom gayô ken makeranta. Iyol kpen man angev man ishimayinan vea fatyô u kpen se iyol man kwagh la una na a hemba taver se u wan ishima shighe u i lu karen jighjigh wase u nan la. Kpa aluer se wa ishima ‘ken icighanmlu man mcivir u sé lu civir Aôndo er se lu keghen mve u iyange i Aôndo yô,’ se fatyô u wan ishima a akaren za kuren doo doo. (2 Peteru 3:11, 12) Man se eren kwagh ne a iember, se lu a vangertiôr je ser Aôndo una ver se.—Anzaakaa 10:22.
13. Kanyi kwagh se er aluer ka u se za hemen a mciviraôndo wase?
13 Shin er Satan a an vanger a mba ve lu ior mba civir Aôndo nahan kpa, gba u se cia ga. Sha ci u nyi? Sha ci u “mba ve civir Aôndo la Ter fa u yiman ve ken imeen.” (2 Peteru 2:9) U wan ishima a ameen man zuan a imba myom la yô, ka keng saa se “venda mwe u i wa Aôndo iko ga la man asaren a taregh kpaa, se̱ zenden tsev tsev man sha jighjigh man sha mciviraôndo kpaa ken tar u ainge ne.” (Titu 2:12) Er se lu Mbakristu yô, saa se lu tsevaa sha er ma kwagh u kpen se iyol u a kough isharen i sha iyol man aeren agen una bende a mciviraôndo wase shi una saa un ishe ga yô. De se time sha akaa agenegh a a anger se yô.
Wa Ikyo sha Akaa aa Lu Anger Mciviraôndo La
14. Kanyi kwagh se umbur aluer to u uyôughyôughmbaakaav la ngu meen se yôô?
14 Ior kpishi ka ve gba ken to u keren uyôughyôughmbaakaav la. Alaghga se lu tsughun iyol yase je kpaa, “henen er, u civir Aôndo yô, ka gbenda u zuan a mtsera [sha uyôughyôughmbaakaav].” Nahan, ishima ia er se ker u kera eren kwagh u a kuma sha jighjigh u anmgbianev asev ve lu a mi ken a vese a. (1 Timoteu 6:5) Alaghga se tôô ser u zan Orkristu u nan lu a inyaregh iyol ser nana na se injô i se fe ser se fatyô u kimbin ga la, kwaghbo ngu sha mi ga. (Pasalmi 37:21) Kpa ka mciviraôndo a lu “a ityendezwa sha uma u hegen ne kua uma u a lu van la” ye, ka mkohol u kohol uyôughyôughmbaakaav ga. (1 Timoteu 4:8) Er ‘se nyer ken tar ne a ma kwagh môm ga, shi se fatyô u tôôn kwagh duen a mi kpaa ga’ yô, de se ker nen a ishima môm cii “u civir Aôndo man kwagh a kuman” se man se na iyol yase sha er “aluer sea lu a kwaghyan man akondo yô, i̱ kuma se” yô.—1 Timoteu 6:6-11.
15. Kanyi kwagh se fatyô u eren aluer msaanyol u zendan ngu nôngon u imbishi mcivir u se civir Aôndo yôô?
15 Msaanyol u zendan una fatyô u imbishi mcivir u se civir Aôndo la. Ka inja er gba u se sôr se tile sha imba igbenda nee? Sha mimi yô, mbamtsera mbá sha anumbe a eren man iemberyolough. Kpa, mbamtsera mbara kuma u karen ve sha uma u tsôron la ga. (1 Yohane 2:25) Ainge ior kpishi ka ‘mba iember i iyolough i hembe doon ve a Aôndo yô, sha ashe yô mba a mlu u civir Aôndo la kpa mba geman mba nyiman agee la’ man gba u se gema ijime a ambaaior la nahan. (2 Timoteu 3:4, 5) Ior mba ve ver mciviraôndo ken hemen yô mba ‘wan imagh ki dedoo sha ci ve ayol a ve ken hemen, sha u vea kôr ave sha uma u a lu uma jim yô.’—1 Timoteu 6:19.
16. Ka asaren a bo a nyi ka a yange se u keren perapera u Aôndo, man se fatyô u hemban asaren shon ne nena?
16 Ikyôhô man u menan icimbiv mbi bov man dang u eren man asaren a isholibo aa fatyô u vihin mciviraôndo wase. Aluer se na ian yô akaa ne aa fatyô u yangen se u aren sha perapera u Aôndo la. (1 Mbakorinte 6:9, 10; 2 Mbakorinte 7:1) Paulu je kpa yange wa ishima a num u iyol i isholibo lu nôngon a na la. (Mbaromanu 7:21-25) Gba u se yar tom tsembelee sha u wuan asaren a bo la. Kwagh u a lu yô, saa se kange ishima u lun wang sha aeren a dedoo. Paulu kaa a vese wener: “Wua nen alegh a en a shin tar la kera, ka idya man hôngor man ityoronshima man isharen i bo man hua u eren, ka akombo a civir je la.” (Mbakolose 3:5) U se wuan alegh a iyolough a ase sha akaabo angara la gba u se kange ishima sha er se kar a á kera, se dugh a sha jimin cii yô. Se eren msen hen Aôndo tsung ser a wase se u vendan asaren a bo la man u tôvon perapera ityô man mciviraôndo ken atô u tar u ifer ungun ne.
17. Doo u se nenge tsaha nena?
17 Iyolkpen ia fatyô u vôron se ishima man kwagh la una saa mciviraôndo wase ishe. Iyolkpen ka mzeyol u ior mba civir Yehova kpishi. (Numeri 11:11-15; Esera 4:4; Yona 4:3) Kpa u hemban yô, iyol ia hemba kpen se aluer ishima ngi vihin se sha ci u or hii se shin í kôôm se yum shin í tsaha se yô. Nahan kpa, mkôôm man tsaha cii ka ikyav i tesen ér kwagh gba Aôndo sha kwagh wase shi se doo un ishima. (Mbaheberu 12:5-7, 10, 11) I de nengen mtsaha sha gbenda u vihin tseegh ga kpa i nenge un er ka gbenda u tsaase or sha er nan lu perapera yô. Aluer se hide a iyol ijime yô, se lumun shi se lu a iwuese sha kwaghwan, se fan ser “myange u sha mtsaha ka gbenda u uma.” (Anzaakaa 6:23) Kwagh ne una wase se u vesen ken jijingi sha mcivir u civir Aôndo la.
18. Kanyi tom se lu a mi i eren shighe u iyongo i zough se?
18 Aluer ayongo nga zuan se man ior mba hiin se yum yô, alaghga kwagh la una na mciviraôndo wase mzeyol kpishi. Akaa ne aa na se ishimanyian shin aa na se hii kwagh u a lu u shami ga sha u palegh anmgbianev asev mbanomso man mbakasev mba ken jijingi la. (Anzaakaa 18:1) Kpa a doo kpishi aluer se umbur ser u wan iyongo ishima shin wan kwagh ishima a mbagenev la una fatyô u van a mzeyol hen atô wase vea Yehova yô. (Levitiku 19:18) Jim yô, “or u anmgbian u nan, u nan nenge a nan la, a doo nan ishima ga yô, Aôndo u nan nengen a Na ga la, A fatyô u doon nan ishima ga.” (1 Yohane 4:20) Ken Ityesen na i sha Uwo la, Yesu ôr gbenda u i gbe u se kar sha u kuren mbamzeyol la var var. Yange kaa a ior mba ve lu ungwan kwaghôron na la er: “Nahan yô, aluer wea va a iwua you u va nan sha atse a nanden nagh sha mi la, man wea umbur her er kwagh a zua anngôu a we yô, undu iwua you her hen kpe atseegh la, za vande himen a anngôu la, man ú hide, ú va na iwua you ye.” (Mateu 5:23, 24) Alaghga zamber una bee mzeyol u nombor wou shin aeren a ou a ve a mi la. Aluer u sôn we i de u a kwaghbo u ú er shi ú lumun wer u er kwagh sha gbenda u injaa ga yô, kwagh la una fatyô u sôron mzeyol shi bem a hide a gba kpaa. Yesu shi tese igbenda igenegh i a kar sha u kuren mbamzeyol yô. (Mateu 18:15-17) Shighe u iniôngon i se nenge u been a mbamzeyol la ka ia ume atam yô, kwagh la ka a na msaanyol je i zua ga!—Mbaromanu 12:18; Mbaefese 4:26, 27.
Dondo Ikyav i Yesu La
19. Hii nan i lu kwagh u injaa u dondon ikyav i Yesuu?
19 Ameen aa cinge sha a vese, kpa a de danen se sha ayem a se gbe a uma u tsôron ne ga. Umbur wer Yehova una fatyô u waren se sha ikyev i hanma imeen cii. Er ‘sé shir hanma ikyav’ shi ‘sé lu gban ayem sha ishima i taver tsung sha gesa u ayemegh u i ver se sha ishi la’ nahan yô, de se “veren nen ashe sha Yesu Orhemen man Orkuren u jighjigh wase u nan” la. (Mbaheberu 12:1-3) U se timen sha ikyav i Yesu vighe vighe shi nôngon sha u se dondon mkaanem nam man ieren na la una wase se u maan mciviraôndo man tesen un sha gbenda u vesen kpaa.
20. Ishima i taver man mciviraôndo vea va se a uiyua mba nyiivi?
20 Ishimataver man mciviraôndo mba eren tom imôngo sha u wasen sé se zua a myom. Sha u tesen anza a injaa ne yô, se fatyô u zan hemen a tom wase u civir Aôndo sha er se fetyô la cii. Aluer ka shighe u imeen i lu num a vese je kpaa, se lu nen saan saan ser mhôônom ma ker Yehova a vese shi ne se iveren sha ishima i se taver man mciviraôndo wase la. (Yakobu 5:11) Bee kera yô, Yesu iyol na wa se kwagh wener: “Ka sha ishima yen i wan man né zua a uma wen ye.”—Luka 21:19.
Ú Na Mlumun Wer Nyi?
• Hii nan ishimataver i lu kwagh u injaa yumu?
• Kanyi i lu mciviraôndo, man mba tesen un nena?
• Se hii shi se za hemen a ikyar yase vea Aôndo nena?
• Ka akaa a nyi nahan aa anger mciviraôndo wase, man se fatyô u palegh a nena?
[Study Questions]
[Pictures on pages 6, 7]
Mba tesen mciviraôndo sha igbenda kpishi
[Pictures on page 8]
Wa ikyo sha akaa a a lu anger mciviraôndo wou la