‘Deen Nen Ayol a En Kwaghbo’

ÚNA jighjigh wer Aôndo de ú a asorabo ou kpa? Ka inja er mbaganden kpishi ken tar u United States na jighjigh nahan. Ikpurorfantakerada Loren Toussaint, u hii ngeren kwagh sha kwaghtôvon u yange i tôv ken University of Michigan Institute for Social Research la kaa nahan ér, ingyegh ki mbaganden mba ve hembe anyom 45 nahan ki kuman e̱r 80 sha ityough ki deri ken ingyegh ki ior i Amerika 1,423 ki mba i tôv ve yô, kaa ér Aôndo de ve asorabo a ve.

Nahan kpa doo u fan e̱r i lu iorov 57 sha ityough ki deri ken mba i tôv kwagh a ve la tseegh ve kaa ér ve de mbagenev a kwaghbo nahan ye. Ingyegh ki kwaghtôvon ne umbur se mkaanem ma Yesu ma ken Ityesen i sha Uwo la: “Aluer nea deen ior akaabo a ve yô, Ter wen u Sha di kpaa Una de ne. Kpa aluer nea deen ior akaabo a ve ga yô, Ter wen di kpaa Una de ne akaabo a en ga.” (Mateu 6:14, 15) Een, mde u Aôndo deen se akaabo a ase la har sha u se di kpaa keghen iyol u deen mbagenev akaabo a ve er se la.

Apostoli Paulu yange umbur Mbakristu mba ken Kolose kwaghwan ne. Yange kaa a ve nahan ér: “Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la.” (Mbakolose 3:13) Sha mimi yô, ka i lu zange u eren kwagh ne ga. Ikyav i tesen yô, aluer or ôr kwagh a we sha ilyahan gayô sha tswam nahan, a fatyô u lun we ican kpishi u deen nan a kwagh la.

Nahan kpa, mbamtsera mba kpishi mba ve̱ ve sha u deen or a kwaghbo yô. Ikpurorfantakerada u timen sha aeren a ior, David R. Williams, ôr sha kwagh u yange tôv yô, ér: “Se nenge ser mlu u kôôsôô ngu hen atô u mde u deen mbagenev asorabo man mkpeyol u ken ityough u ior i Amerika mbakaven ishigh man mba beenyol.” Kwagh la zua sha mkaanem ma Tor u fan kwagh Solomon, ma yange nger i tse hegen i kom anyom 3,000 nahan la, a kaa ér: “Ishima i bem bem ka uma u iyolough je.” (Anzaakaa 14:30) Er jijingi u den or a kwaghbo la ka a maa mlu u dedoo vea Aôndo man mba wan ndor a vese yô, se mba a ityôkyaa i dedoo i lun a ishima i den mba ve eren se akaabo la kwaghbo gbar gbar.—Mateu 18:35.