Msurshima ken Ashighe A Ican

ABAVER a ainge ne nga surun se ishima ga cii. Orgen yange nger wener: “Akaa a á lu eren ainge ne vihi je gande yô, ashighe kpishi ka i taver se u kaan ser se ungwa abaver a sha ahwa ataratar la.” Tar ne mgbough a ityav man aeren a tswam man ican man ipila kua angev—akaabo aa alaghga ica a gba ga tsô aa bende a vese jighilii, aluer hegen je kpa nga a bende a vese ga yô la.

Bibilo i tsengaôron mlu u akaa a lu eren nahan ne vough. Yesu yange pase akaa aa va er sha ayange a ase ne ér, ityav mbi nôngon mbi vesen mbia lu man ubombauangev man ijen man ityartenger kpaa. (Luka 21:10, 11) Apostoli Paulu kpaa nger kwagh u “ashighe a ican,” shighe u ior vea lu anomaior a bo man mba inyaregh ki doo ve ishima man mba kwagh u dedoo a doo ve ga yô. A yila ashighe la ér “ayange a masejime.”—2 Timoteu 3:1-5.

Nahan abaver kpa nga a̱ ôron akaa aa a lu zan hemen sha tar yô, nga a nôngo u lun kwagh môm a kwagh u Bibilo i tsengeôron la. Kpa ka sha gbenda u ngun tseegh abaver man Bibilo a ôr kwagh a zough ye. Mnenge u Bibilo i nengen kwagh la ngu a kaha kposo a u abaver nga a naan la. Sha ikyev i Mkaanem ma Aôndo a ne i nger la yô, se hingir ú fan er i hii ve kwaghbo a ngee yum yô, shi se fa er mlu u ken hemen una va lu la kpaa.

 Er Aôndo a Nengen Iferkwagh La

Bibilo i pase mnenge u Aôndo a nengen kwagh u ashighe a ican a sha ayange a ase ne la. Shin er á tsenga nengen a mbamzeyol mba ve lu zan hemen sha ayange ne nahan kpa, a lumun a mi shin a wa ishima ér una de a̱ za hemen gbem sha won kpaa ga. Apostoli Yohane yange nger wener: “Aôndo ka dooshima.” (1 Yohane 4:8) Kwagh gba Yehova sha kwagh u ior kpen kpen man a kôr hanma kwaghbo cii ihyom. Ka a inja kpishi u se keren msurshima hen Aôndo, gadia eren akaa a dedoo man ngu a mhôônom ma zungwen kpaa shi ngu a tahav shi á washima u karen a ifer shin tar ne kera. Orpasalmi nger wener: “[U Aôndo a ver un Tor sha la] una yima oribanave zum u nana vaa yô, man icanor kua or u nan lu a orwasen ga kpaa. Mhôônom maa kôr un a mbaatsanev man mbaibanave, una yima uuma mba mbaibanave kpaa. Una paa uma ve sha mkighir man ipira; awambe a ve aa lu kwagh u injaa sha ishigh nagh.”—Pasalmi 72:12-14.

Mhôônom ma ker ú a mba ve lu yan ican la kpa? Alaghga ma ker. Mhôônom ma zungwen ka ieren i Yehova a ne se yô, gadia a er se sha ibeen na. (Genese 1:26, 27) Sha nahan yô, se fatyô u lun a vangertiôr ser, kwagh gba Yehova sha ican i uumace ve lu yan ne. Yesu u yange fa kwagh u Yehova tsung je hemba hanma or cii la tese ér kwagh gba Yehova a vese kpishi shi a mgbogh a mhôônom ma kôron.—Mateu 10:29, 31.

Igbetar iyol i í kpaa tese ér kwagh gba Aôndo a uumace. Yesu kaa wener Aôndo “ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mbaperapera ga kpaa.” (Mateu 5:45) Apostoli Paulu yange kaa a ior mba ken gar u Lisetera ér: “Mayange [Aôndo] de u pasen iyol Na ga, eren akaa a dedoo, A nôôn ne ura u senen sha, A ivin asema a en a kwaghyan man msaanyol kpaa.”—Aerenakaa 14:17.

Nahan Ka An Nan Ve a Aferakaa?

Doo u se fa ser Paulu shi yange ôr a ior i Lisetera ér: “Wen u sha ayange a a kar la, A de akuraior cii a zenden sha igbenda i a la.” Nahan yô, ka akuraior—shin ior ayol a ve—vé ve a akaa kpishi a a lu zan ve iyol la ye. Ka u se na Aôndo ibo ga.—Aerenakaa 14:16.

Er nan ve Yehova a ne ian ér akaabo a ere? Una er kwagh sha kwagh ne je kpa? Se fatyô u zuan a mbamlumun sha mbampin mban ken Mkaanem ma Aôndo tseegh. Ityôkyaa yô, mbamlumun mba sha mbampin mban ne gba zua sha kwagh u or u ken jijingi ugen man sha ikyaa i yange va a mi ken tar u ujijingi u i nengen a ú ga la.

[Pictures on page 4]

Uumace mba zungu mhôônom. Man gema Aôndo ve, mhôônom ma a kôr un a uumace mba ve lu yan ican ne ga yee?

 [Picture Credit Line on page 2]

Cover: Indyergbuuka: UN PHOTO 158181/J. Isaac; tar-tenger: San Hong R-C Picture Company

[Picture Credit Line on page 3]

Sha ityough ken imese, Croatia: UN PHOTO 159208/S. Whitehouse; Wan u a gbe ijen yô: UN PHOTO 146150 BY O. MONSEN