Hii Nena Ka I Taver u Kaan Ér Yam Anyi?

IYOUGH i Idyu i ken Ipaventar i California ken tar u United States la kange tindi ugen ken uwer u Julai 2000 la, i ver ishima ér aluer aikyôr er man ior mba aikyôr la a er ve la zamber a or u nan vihi iyol la ér nana ya anyi yô, i de kera nengen ér ka ibo je ve lu lumun la ga. I za wa a wa tindi je er nyi? I nenge ér zum u aikyôr ka una vihi ior ayol shin akaa yô, ka i za ior iyol u kaan ér i ya ve anyi sha ci u atejir una nenge imba ieren la ér ka mlumun u lumun ibo. Mba aikyôr a er man i lu ibo ve ga la di kpaa, alaghga ishima ia vihi ve ker, sha ci u vea nenge ér ma í zamber ve ave ave la je, nahan vur vur maa una hingir zegeura.

Sha igbetar yô, aluer u er or kwagh ga yô, ityôkyaa ngi i kaan wer nana ya ú anyi ga. Shi alaghga kwagh u una hemba doon u eren ashighe agen yô, a lu u wan zwa wou ikyum. Ngise i ôr injakwagh igen ér: “Akaaôron kpishi yum la, kwaghbo ban sha mi ga, kpa u nan kusu zwa u nan yô, nan er sha kwaghfan.” (Anzaakaa 10:19; 27:12) Nahan kpa, u fatyô u lamen sha kwaghfan shi nan iwasen kpaa.

Kpa sha mimi yô, dugh mciem ma ior cian ér mbagenev vea wa ve ijir la sha je kpa, ior kpishi de a de kuaa je u zamber a mbagenev ér ve ya ve anyi ga zee? Alaghga  kwaseya nana vaa iyol ér ‘Mayange je nomom lumun ibo sha ma kwagh môm ga cii.’ Alaghga orhemen sha tom nana vaa iyol ér: ‘Mbatomov av mba lumun kwagh u ve er sha ar la ga, shi ka i taver ve u kaan ér ve er ka sha apera ga kpen kpen.’ Ken makeranta kpa alaghga tica nana kaa ér: ‘I tese mbayev u kaan ér yam anyi ga.’

Mcie u cian ér ior a va sem la una fatyô u lun ityôkyaa i môm i ia na or a ta anu u kaan ér i ya nan anyi yô. Mhen u henen ér ior vea se nan la tseegh kpa alaghga una na nana kera pase er ishima i lu nan shimi la ga. Tsô alaghga or u i er nan kwagh la maa nana hingir u palegh or u á er nan kwagh la kuaa je, nahan a taver u himen iyôngo la je a gande.

Ikyo i wan i ior ve kera we sha mnenge u ior mbagen ga la kpa una fatyô u lun ityôkyaa igen i i ne ve mbagen ve te anu u kaan a mbagenev ér ve ya ve anyi yô. Alaghga vea hen ér: ‘U kaan ér yam anyi ka icigh ki been kwagh u m vande eren u vihin la ga.’ Mbagen mbá mba ka i taver ve u kaan ér ve er ka sha apera ga yô sha ci u vea palegh akaa aa alaghga kwagh u ve er la una va a mi la. Ka ve hen ér: ‘A kaa ér ka mo m er kwagh ne nahan mo mkimbi shinii?’ Kpa, imanger hemba kan tamen kwagh u a ne ve ka i taver ior u lumun ér ve er kwagh sha lan yum yô. Or u ka i taver nan u kaan ér “Yam anyi” la alaghga nana lu kaan ér, ‘M soo u hiden a iyol yam ijime sha u lumun mer m er kwagh sha lan ga. Kwagh la una pandem icivir.’

Ior kpishi mba fetyô u kaan ér i ya ve anyi ga sha ci u atôakaa wue wue. Kpa ka kwagh u hange hange u zamber a or wer nana ya ú anyi? U zamber a or wer nana ya ú anyi la ngu a iwasen sha nyi?

[Picture on page 3]

“‘I tese mbayev u kaan ér yam anyi ga”

[Picture on page 3]

“Mbatomov av mba lumun kwagh u ve er sha ar la ga”

[Picture on page 3]

“Mayange je nomom lumun ibo ga cii”