Mbakristu Mba̱ Tilen Paleghaa Ken Ayange A Masejime
Mbakristu Mba̱ Tilen Paleghaa Ken Ayange A Masejime
“Ve mba ior i tar ne ga, er Mo kpaa M lu or u tar ne ga nahan.”—YOHANE 17:16.
1, 2. Yange Yesu kaa er nyi sha kwagh u mlu u mbadondon nav vea tara, man mkaanem nam mara va a mbampin mba nyi?
YESU yange er msen gôgônan sha ato a mbahenen nav ken tugh mbu masejime mbu uma na u vough shin tar ne la. A ôr kwagh ken msen la u á pase mlu u uma u Mbakristu mba mimi cii yô. Er lu ôron kwagh u mbadondon nav yô, a kaa ér: “M na ve kwaghôron Wou, kpa tar kôr ve ihom, sha ci u ve lu ior i tar ne ga yô, er Mo kpaa M lu or u tar ne ga nahan. M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer. Ve mba ior i tar ne ga, er Mo kpaa M lu or u tar ne ga nahan.”—Yohane 17:14-16.
2 Kwa har cii, Yesu kaa wener mbadondon nav mba ior i tar ne ga. Heela tseegh ga, mlu u lun kposo la una va a myam ma tan sha ishima kpishi—gadia tar ua kôr ve ihyom. Kpa, ka u ishima i de ze Mbakristu iyol ga; sha ci u Yehova una lu nengen sha a ve. (Anzaakaa 18:10; Mateu 24:9, 13) Sha kwagh u Yesu a ôr la yô, se pine ser: ‘Hii nan Mbakristu mba mimi ve lu ior i tar ne ga? Ikyav i lun ior i tar ne ga la er nyi? Aluer tar kôr Mbakristu ihyom yô, ve di mba nengen tar nena? Hemban cii je yô, mba nengen ugomoti mba tar ne nena?’ Mbamlumun mba Ruamabera a ne sha mbampin mban ne mba a inja kpishi gadia ve bende a vese cii.
“Se Due ken Aôndo”
3. (a) Kanyi i ne ve se pav a tara? (b) Ka ikyav i nyi i lu i tesen ér “tar cii ngu sha ikyev i orbo”?
3 Mlu u se lu vea Yehova sôngo sôngo la ka ityôkyaa i i ne ve se lu ior i tar ne ga je la. Apostoli Yohane nger wener: “Se fa se due ken Aôndo, kpa tar cii ngu sha ikev i Orbo.” (1 Yohane 5:19) Kwagh u Yohane a er sha kwagh u tar ne la ngu shami vough. Ityav man ifer man tswam kua mkighir u kighir ior man anyighe man idya cii tese ikyav wang er i lu Aôndo ga, kpa i lu Satan a lu ave sha akaa a a lu zan hemen ainge ne yô. (Yohane 12:31; 2 Mbakorinte 4:4; Mbaefese 6:12) Shighe u or ka nana hingir Orshiada u Yehova yô, ka nan de u eren aeren a dang shin lumun a aeren a dang la kpaa, nahan kwagh la ngu a na nan kera lu or u tar ne ga.—Mbaromanu 12:2; 13:12-14; 1 Mbakorinte 6:9-11; 1 Yohane 3:10-12.
4. Ka sha igbenda i nyi se tese ser se mba kwagh u Yehovaa?
4 Yohane kaa wener Mbakristu “due ken Aôndo,” kpa tar yô due ken a na ga. Ior mba ve tsegh ayol a ve sha ci u Yehova cii mba sha ci na. Apostoli Paulu kaa wener: “Sea lu uma, kpa ka sha ci u Ter se lu uma ye, shin sea kpe kpaa, ka sha ci u Ter se kpe ye, nahan yô, shin sea lu uma shin sea kpe kpaa se mba kwagh u Ter.” (Mbaromanu 14:8; Pasalmi 116:15) Er se lu sha ci u Yehova yô, ka un tswen je se civir ye. (Ekesodu 20:4-6) Sha nahan yô, Orkristu u mimi gem uma na cii haren sha u zendan akaa a taregh ga. Shi er ngu a wa ikyo sha akav a á til sha ityough ki tar na nahan kpa, gem civir akav ne sha ieren shin sha ma gbenda ugen ga. Civir ior mba ve ze ati sha anumbe a eren shin ior mbaduenati mbaainge mbagenev ga. Nahan kpa, ze ior mbagen iyol sha ian i ve lu a mi i eren kwagh u ve soo u eren la ga, kpa civir Orgbanakaa tseegh. (Mateu 4:10; Mpase 19:10) Sha ingin ne kpaa á pav a tar ne.
“Tartor Wam Ka u Shin Tar Ne Ga”
5, 6. Mwe u wan iyol yase sha ikyev i Tartor u Aôndo la pav se kposo a tar ne nena?
5 Mbakristu ka mbadondon mba Kristu Yesu man mba ityô i Tartor u Aôndo, shi ka kwagh u a ne ve vé lu ior i tar ga kpaa je la. Zum u Yesu tile ken kwavjir sha ishigh ki Pontiu Pilatu yô, á kaa wener: “Tartor Wam ka u shin tar ne ga. Tartor Wam ua lu u shin tar ne yô, mbayev Av ma ve nenge ityav sha u i̱ de nem sha ikev i Mbayuda ga yô; kpa hegen yô, tartor Wam ka u heen ga.” (Yohane 18:36) Ka sha ikyev i Tartor ne man a tsegha iti i Yehova shi a kende a hementor na sha, shi a er ishima na shin tar kpaa vough er i eren i sha nahan ye. (Mateu 6:9, 10) Ken tom u Yesu shin tar cii, á pase loho u dedoo u Tartor, shi á kaa wener mbadondon nav vea pase ú zan zan mkur u tar ne. (Mateu 4:23; 24:14) Kwaghôron u profeti u ken Mpase 11:15 la kure vough ken inyom i 1914, ér: “Tartor u shin tar hingir u Ter wase man u Kristu Na ve, Una tema tor gbem sha won.” Yange sev mbua av nahan a lu Tartor u sha la tseegh ua lu hemen sha orumace cii ye, man shighe la kera shi ica ga. (Daniel 2:44) Iyange ngi van i mbahemenev mba tar je kpaa kwagh a hemba ve vea kav tahav mbu Tartor shon yô.—Pasalmi 2:6-12.
6 Kohol akaa angara la nahan cii yô, mba ve lu Mbakristu mba mimi ainge ne cii mba ityô i Tartor u Aôndo, man mba dondon kwaghwan u i we ve ér ‘vande keren nen tartor man perapera u Aôndo hiihii la’ la. (Mateu 6:33) Kwagh la gema na ve u hendan a ityar i ve lu sha ikyev i í la ga, kpa gema na mba a mba kposo a tar ne ken jijingi. Tom u Mbakristu ve lu a mi ainge di vough er mba sha derianyom u hiihii la kpôô kpôô yô, ka u ‘pasen inja i tartor u Aôndo la vindi vindi.’ (Aerenakaa 28:23) Gomoti u uumace môm kpa ngu a ian i cirin tom u i lu Aôndo a ne nè ga.
7. Hii nan Mbakristu mba mimi ve til paleghaa, man ve tese kwagh ne nena?
7 Sha u tesen ikyav i ve lu sha ci u Yehova man ve lu mbadondon mba Yesu man ityô i Tartor u Aôndo yô, Mbashiada mba Yehova paregh u lun wegh ken ityav mbi akuraior man mbi ityar a ityar i lu nôngon ayol a ve ken derianyom u sha 20 man u sha 21 ne. Ve ta ikyaa a ma vegher ga, shi ve tôô ikyav mbi tswamev a ma or kpaa ga shi ve wase u gbidyen konjo sha u samber a ma kwagh u taregh ga. Mba tesen jighjigh u nan u kpilighyol shin er ahendan a lu den ve ga nahan kpaa, mba dondon imokwagh i yange ve ôr mbahemenev mba Nazi mba ve lu hemen tar u Jamani ken inyom i 1934 la, ér: “Kwagh gba se sha akaa a patii ga, gadia se na uma asev cii sha ikyev i Kristu u a lu Tor u tartor u Aôndo la. Sé er or ma kwagh ga, shi sé vihi ma or iyol kpaa ga. A doo se kpishi u teman ken bem man eren a ior cii dedoo sha hanma ian i se zough a mi la cii.”
Mbaôronkwagh sha ci u Kristu man Mbatomov Nav
8, 9. Ka sha nyi gbenda Mbashiada mba Yehova ainge ve lu mbaôronkwagh man mbatomovo, man kwagh ne bende a mlu ve vea ityar nena?
8 Paulu pase wener un man Mbakristu mba i shigh ve mkurem a na imôngo la vé “mba mbaôronkwagh sha ci u Kristu za iyol er ka Aôndo A lu ôron kwagh a ven ken a vese” nahan. (2 Mbakorinte 5:20; Mbaefese 6:20) Hii ken inyom i 1914 la je, a fatyô u kaan er Mbakristu mba i shigh ve mkurem mbara ka mbaôronkwagh sha ci u Tartor u Aôndo, u̱ ve lu “ônov” la. (Mateu 13:38; Mbafilipi 3:20; Mpase 5:9, 10) Heela tseegh ga, Yehova kohol “zegeikpelaior” i “iyôngo igen” ken akuraior ve hingir Mbakristu mba ve lu a ishimaverenkeghen i lun shin tar la, ér ve sue ônov mba i shigh ve mkurem ken tom ve u ôronkwagh sha ci na la. (Mpase 7:9; Yohane 10:16) A fatyô u yilan “iyôngo igen” ne ér ka “mbatomov” mba Tartor u Aôndo.
9 Or u ôronkwagh sha ci u tar u nan man mbatomov mba nanev mba we ave sha akaa a a lu zan hemen hen tar u ve lu eren tom her la ga. Mbakristu kpaa, mba ve tile paleghaa a akaa a patii a akuraior a tar ne. Mba te ikyaa a vegher ugen shin mba hendan a ma ikyurior shin ma zwa man kweior shin ma nongo u eren kasua ga. (Aerenakaa 10:34, 35) Kpaa, mba ‘eren akaa a doon a ior cii.’ (Mbagalatia 6:10) Mtil u tilen paleghaa u Mbashiada mba Yehova la na yô or môm ngu u nana fatyô u vendan loho u ve lu pasen la sha mimi ér ve magh a ior mbagen mba ken vegher u kweior shin ikyurior shin ma zwa u mbaihyomov mba nan yum ga.
Í Fa Ve sha Dooshima Ve La
10. Dooshima ngu a inja hen Orkristu nena?
10 U seer sha kwagh u i lu ôron van ne yô, Mbakristu mba paleghaa sha akaa a tar u lu eren la sha ci u mlu ve vea Mbakristu mbagenev la. Yange Yesu kaa a mbadondon nav wener: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:35) Dooshima u anmgbian a anmgbian la ka gbenda u vesen u lun Orkristu je la. (1 Yohane 3:14) Dooshima ne bende aa mlu u Orkristu lun kôôsôô vea Yehova man Yesu la, nahan mlu u Orkristu aa Mbakristu mbagenev la ngu kangenaa kpishi. Dooshima na saan sha mba ve lu ken tiônnongo vea nan tseegh ga. Kpa a kua “anmgbianev [nav] sha won cii kpaa.”—1 Peteru 5:9.
11. Dooshima u Mbashiada mba Yehova ve doo ayol a ve la bende a ieren ve nena?
11 Ainge ne kpa, Mbashiada mba Yehova mba tesen dooshima u anmgbianev la sha u kuren mkaanem ma ma lu ken Yesaia 2:4 la; ér: “Vea gema usanker vev, vea var indyuhar a mi, awange a ve kpaa aa hingir ahô a sôron ikon a mi; ikurior igen ia kera tsuwa sanker a ikurior igen ga, vea kera hen ityav mbi nôngon kpaa ga.” Mtese u Yehova a tese Mbakristu mba mimi la na mba ken bem vea Aôndo man mba ken bem a ayol a ve kpaa. (Yesaia 54:13) Mdoo u Aôndo a doo ve ishima kua anmgbianev vev la na yô, mhen tsô kpa mba henen ken asema a ve u tôôn ikyav mbi tswamev sha mba ve lu Mbakristu a ve imôngo mba ken ityar igen shin ma orgen ga. Bem man mzough u ve lu a mi la ka vegher u mcivir ve u hange hange man ka gbenda u tesen ér mimi mimi je jijingi u Aôndo ngu a ve yô. (Pasalmi 133:1; Mika 2:12; Mateu 22:37-39; Mbakolose 3:14) Ka ve ‘ker bem, ve zenda un ityô,’ ve faan je er “ashe a TER nga sha mbaperapera.”—Pasalmi 34:14, 15.
Mnenge u Mbakristu Ve Nengen Tar La
12. Kanyi ieren Yehova a lu a mi sha ior mba tar ne i Mbashiada mba Yehova ve dondono, man mba dondon nena?
12 Yehova kaa ér una tsaha tar ne, kpa ngu a ôr ior mba ve lu shin tar ijir asange asange ve ga. Una er kwagh la sha ikyev i wan na Yesu sha shighe Na u a ver la. (Pasalmi 67:3, 4; Mateu 25:31-46; 2 Peteru 3:10) Hegen ne yô, a tese ér orumace doo un ishima tsung. Je yô a na Wan na u môm môm la sha er hanma or nana zua a ian i zuan a uma u tsôron yô. (Yohane 3:16) Er se lu Mbakristu yô, aluer kwagh u se lu eren la una gba ior kwagh ga kpa, se mba dondon dooshima u Aôndo la sha u pasen ior mbagenev kwagh sha igbenda i Aôndo a ser a ver sha ci u ior ve zua a myom la.
13. Doo u se nenge mbahemenev mba tar ne nena?
13 Doo u se nenge mbahemenev mba tar ne nena? Paulu yange na mlumun sha mpin ne ken kwaghngeren na wener: “Hanma or u uma nana̱ ungwan imo i tahav mbu nan lu mbu sha ikev la, gadia ma tahav mbu ga, saa mbu mbu dugh her Aôndo la, mbu mbu lu her ne kpaa, ka Aôndo je A ver ye.” (Mbaromanu 13:1, 2) I “ver” uumace sha aan a utaha, (mbagen hemba mban a tahav a mbagen, kpa vea kuma sha Yehova ma shighe môm ga) sha ci u ka un u a lu Uhembanagee la a ver ve ye. Orkristu nan we iyol i nan sha ikyev i mbautahav sha ci u u̱ eren nahan la ka gbenda u ungwan imo i Yehova. Nahan kpa, kanyi ia er aluer kwagh u gomoti u uumace ve soo ér se er la hendan a kwagh u Aôndo a soo ér se ere?
Tindi u Aôndo man Tindi u Shisar
14, 15. (a) Ka sha nyi gbenda yange Daniel palegh mzeyol sha kwagh u m-ongo u ungwan imo i oro? (b) Kanyi kwagh Mbaheberu mbautar mbara yange ve er shighe u gbenda lu u palegh mzeyol u yange due sha kwagh u or u a ungwa imo i nan la ga laa?
14 Daniel kua akar a na atar ver ikyav i dedoo sha gbenda u vough u or nana kura tindi u gomoti u uumace shi nana kura tindi u Aôndo kpa vough yô. Shighe u mbayevikyaior mba Mbaheberu mba unyiin mban lu shir ken Babilon la yô, ve kura atindi a tar la nahan i tsua ve fese je sha u za henen kwagh ugen kposo. Daniel kaven ér alaghga tsô kwaghhenen la una hendan a Tindi u Yehova yô, a lam a or u nengen sha a ve la sha kwagh ne. Kwagh la na yô, i ver mserakaa ugen kposo sha u eren kwagh sha asema a Mbaheberu mba unyiin mban. (Daniel 1:8-17) Mbashiada mba Yehova mba dondon ikyav i Daniel la shighe u ve yar tom sha kwaghfan sha u pasen mbahemenev mnenge ve sha gbenda u palegh u van a mbamzeyol mba gbilinigh yô.
15 Nahan kpa, sha anshighe ugen la, mzeyol due sha kwagh u or u a ungwa imo i nan la je gbenda lu u palegh ga. Tor u Mbababilon er eev ver shin pev u Dura man a wa tindi wener mbatomov nav cii, kua mbakurantar mba atôôn a tar la cii ve kohol sha u tseghan mbu. Hen shighe ne nahan, i ver akar a Daniel a atar ne lu ken mbakurantar mba atôôn a tar a ken Babilon, nahan ve kpa tindi ne kôr ve. Er i lu eren iniongo ne zan a mi ave la je gba u mkohol la jimin cii una gure inya sha ishigh ki eev mbura la. Kpa Mbaheberu mban fa er u eren imba kwagh la i lu u peren tindi u Aôndo yô. (Duteronomi 5:8-10) Nahan shighe u hanmaor ugen cii gure inya la, ve tile sha her. Sha mhembe u ve hemba tor ato la yô, ve lumun u kpen ku u kpilighyol, man lu sha ivande je i war uuma vev ye; kpa yange ve tsua ér u hemban Yehova ato la yô guda vea kpe.—Daniel 2:49–3:29.
16, 17. Shighe u yange i wa mbaapostoli tindi ér ve de u pasen kwagh yô, ve er nena man lu sha ci u nyi?
16 Ken derianyom u hiihii la, mbahemenev mba Mbayuda yila mbaapostoli mba Yesu Kristu ken Yerusalem, ve wa ve tindi ér ve mem u pasen kwagh ken iti i Yesu. Yange ve er nena? Gadia Yesu tsua ve ér ve gema akuraior cii a hingir mbahenen, man kwagh ne kua Yudia kpa ker cii. Shi á kaa á ve kpaa ér vea lu mbashiada nav ken Yerusalem man ken akighir a tar kpaa. (Mateu 28:19, 20; Aerenakaa 1:8) Mbaapostoli fa er kwagh u Yesu a er cii i lu ishima i Aôndo nahan. (Yohane 5:30; 8:28) Tsô, ve kaa ér: “Ka u sé hemba ungwan imo i Aôndo keng a imo i ior.”—Aerenakaa 4:19, 20; 5:29.
17 Mbaapostoli lu hemban a hembaato ga. (Anzaakaa 24:21) Kpa, shighe u yange mbahemenev kaa ér ve de eren ishima i Aôndo ga yô, ve kaa di tsô ér ‘sé hemba ungwan imo i Aôndo a imo i or.’ Yange Yesu kaa wener se ‘na Shisar akaa a a lu a Shisar yô, Aôndo di kpaa se na Un akaa a a lu a na yô.’ (Marku 12:17) Aluer se hemba Aôndo ato sha ci u orumace kaa avese ér se er nahan yô, se lu geman kwagh u a lu sha ci u Aôndo la nan orumace. U ma se er nahan yô, ka se na Shisar hanma kwagh u a lu u na la cii, kpa se fa ser ka Yehova a hembe tahav sha won cii ye. Ka un a lu Tor u Hemban Cii ye, ngu Orgban, ka un a lu Ityôgh ki tahav cii ye.—Mpase 4:11.
Sé Tile Dông
18, 19. Ka ieren i dedoo i nyi anmgbianev asev kpishi ve lu erene, man se fatyô u dondon ikyav i ve ver la nena?
18 Hegen ne ugomoti kpishi kav mtil u Mbashiada mba Yehova ve til paleghaa la, man se mba a iember sha kwagh ne kpishi. Nahan kpa, tôvacan ngu num a Mbashiada ken ityar igen her. Ken derianyom u sha 20 la cii man hen shighe u hegen ne kpaa, anmgbianev mba nomso man mbakasev mba nôngon kwagh ken jijingi kpoghuloo u nôngon “ityav mbi dedoo mbi jighjigh u nan.”—1 Timoteu 6:12.
19 Se fatyô u tilen dông er ve nahan nena? Hiihii yô, ka se umbur ser ka keng se tagher a ahendan. Aluer se tagher a ahendan ne kpa iyol i de kpen se shin i kpiligh se iyol ga. Paulu ta Timoteu ikyur ice wener: “Mba i sar ve pe zenden sha mciviraôndo ken Kristu Yesu cii, á tôv ve a ican.” (2 Timoteu 3:12; 1 Peteru 4:12) Ken tar u Satan a lu hemen sha hanma ijiir ne nahan, a er nan ve se tagher a ahendan ga sha wono? (Mpase 12:17) Er se lu a jighjigh u nan her je, hanma shighe ior vea lu mba a ‘kpiligh ve iyol vea gba lamen sha a vese dang tsô yô.’—1 Peteru 4:4.
20. Ka mimi mba taver se ishima mba nyi i umbur se?
20 Sha uhar yô, se fa dedoo ser Yehova man mbatyomov nav mba suen se. Er Elisha u ngise la kpa lu kaa nahan, wener “mba ve lu a vese, hemba mba ve lu a ve la iyenge.” (2 Utor 6:16; Pasalmi 34:7) Alaghga ka sha ci u awashima u dedoo u Yehova a lu a mi la á ne ve a de ér ior mba hendan a vese ve za hemen a tom ve u hendan a vese la sha anshighe kpuaa ye. Kpa, una na se agee a se wa ishima yô. (Yesaia 41:9, 10) Iyol i de kpen se sha ci u i wua mbagen yum ga. Yesu kaa wener: “De cie nen mba ve woo iyol tseegh, kpa ve fetyô u wuan uma ga la ze; guda cia nen Un u A fetyô u timin uma kua iyol cii ken gehena” la. (Mateu 10:16-23, 28) Se mba di “ushirmbaiorov” ken tar ne tsô. Ka se yar tom a shighe u se lu a mi heen ne sha er se “kôr ave sha uma u a lu uma jim la” yô, ka uma u tsôron ken tar u he u Aôndo je la. (1 Peteru 2:11; 1 Timoteu 6:19) Orumace môm kpa nana fatyô u tagher se u zuan a iyua la ga aluer se za hemen u lun a jighjigh u nan ken Aôndo yô.
21. Kanyi kwagh i lu kwagh u se hungur a mi ma shighe môm ga?
21 Nahan, de se umbur nen mlu u injaa u sôngo sôngo u se lu a mi vea Yehova la. Se lu nen a iwuese sha mbamtsera mba se zough a mi u lun mbadondon mba Kristu man u lun ityô i Tartor la. Anmgbianev asev ve doo se ishima a ishima yase i môm cii, shi se lu nen a iwuese sha akaa a dedoo a ve lu eren avese sha dooshima la kpaa. Kohol cii yô, de se ver nen ishima sha mkaanem ma orpasalmi ma ma lu heen ne: “Kegh TER, lu dông, ishima you i̱ taver; een, kegh TER.” (Pasalmi 27:14; Yesaia 54:17) Tsô se, er ikpela i Mbakristu mba ve vande lun avese la nahan, se tile nen dông ser ishimaverenkeghen yase ka kwagh u bunden ga—se lu nen Mbakristu mba jighjigh mba tilen paleghaa mba ve lu ior i tar ne ga yô.
U Fatyô u Pasen Kpa?
• Mlu wase vea Yehova na se mba kposo a tar ne nena?
• Er se lu ityô i Tartor u Aôndo yô, se tile paleghaa a tar ne nena?
• Mdoo u anmgbianev asev ve doo se ishima la ngu a ver se paleghaa, kposo a tar sha nyi igbenda?
[Study Questions]
[Picture on page 25]
M-we u se we iyol yase sha ikyev i Tartor u Aôndo la bende a mlu wase vea tar nena?
[Picture on page 26]
Orhutu man Ortutsi mba eren tom imôngo saan saan
[Picture on page 27]
Anmgbianev Mbakristu mba mar u Mbayuda man u Mbaarabia
[Picture on page 27]
Saan Mbakristu mba ve lu ior i Serbia man Bosnia man Crotia la iyol u lun imôngo
[Picture on page 28]
Shighe u mbahemenev ve we se tindi ér se per tindi u Aôndo yô, kanyi i doo u se ere?