Yehova We Ne Ikyo
Yehova We Ne Ikyo
‘Haa nen ishima i nyian yen cii sha a Na, gadia ka Un A lu koson ne ye.’ —1 PETERU 5:7.
1. Ka ken gbenda u injaa u nyi nahan Yehova a kaha kposo a Satana?
YEHOVA kaha kposo a Satan. Anti or u i sar nan u kporom ikyua a Yehova cii yô, Diabolo a fatyô u lumun a nan ga. I ôr kwagh u mkposo ne ken Takerada u timen sha akaa u gen. Takerada ú i yer ér Encyclopædia Britannica (1970) la ôr kwagh u ityom i Satan di er Bibilo i ôr kwagh u í ken takerada u Yobu la nahan, ér: ‘Tom u Satan yô, ka u zenden shin tar wue wue keren u eren akaabo shin tuur ior ér ve er akaabo; nahan, iertom na kaha kposo a “ashe a Ter” a á ningir shin tar ne cii sha u taver hanma kwagh u a lu u dedoo cii la. (2 Kron. 16:9). Satan gba ahon kpishi sha ieren i dedoo i orumace eren kwagh u a lu u mimi la, nahan Aôndo na un ian ér a tese mimi u kwagh ne, kpa ngu nengen kwagh u a lu eren la shi a ver un akighir kpaa.’ Sha mimi yô, mkposo ngu hen atô ve kehe!—Yobu 1:6-12; 2:1-7.
2, 3. (a) Inja i ishemberti i “Diabolo” la zua tsembelee sha kwagh u yange er Yobu la nena? (b) Bibilo tese ér Satan ngu a mem u senden mbacivir Yehova ityough shin tar ga nena?
2 Ken zwa Grika yô, inja i ishemberti i “Diabolo” la ér “oraie” man “ormsende.” Takerada u Yobu kaa ér Satan wa Yobu ortom u Yehova u jighjigh kwagh iyol ér ngu civir Un sha ci u zuan a mtsera na iyolna, á kaa ér: “Ka gbilin Yobu a cie Aôndo yee?” (Yobu 1:9) Kwaghôron u a lu ken takerada u Yobu la tese ér shin er Yobu tagher a ameen man akaren nahan je kpaa, seer sôsom a sôsom a Yehova cii. (Yobu 10:9, 12; 12:9, 10; 19:25; 27:5; 28:28) Atsan a yange lu yan la cii nga been yô, á kaa a Aôndo ér: “Lu m ungwa agwa Wou sha m-ongo u ken ato; kpa hegen yô, ashe am nenge a We.” (Yobu 42:5)
3 Hii sha shighe u Yobu la je, Satan mem u senden mbacivir Aôndo mba jighjigh ityough vee? Ei. Takerada u Mpase tese ér Satan ngu senden anmgbianev mba Kristu mba i shigh ve mkurem la ityough shi akar a ve a jighjigh la kpaa ngu eren a ve nahan ken shighe u mkur ne je ka ashe tugh ga. (2 Timoteu 3:12; Mpase 12:10, 17) Nahan, gba hange hange u se Mbakristu mba mimi cii se wa ayol a ase sha ikyev i orkuran wase Yehova Aôndo, se civir un sha dooshima tsung nahan se gema se tese ser sendetyo u Satan la ka gbilinkwagh. Aluer se er nahan yô, se na a saan Yehova iyol. (Anzaakaa 27:11)
Yehova Ngu a Ker Igbenda i Wasen Se
4, 5. (a) Er Yehova a kaha kposo a Satan yô, a ver ashe sha u una nenge nyi shin tar nee? (b) Aluer se soo ser Yehova a lumun a vese yô, kanyi i lu hange hange i se ere?
4 Diabolo ngu zenden shin tar wue wue keren or u una sende nan ityough shi una ya nan yô. (Yobu 1:7, 9; 1 Peteru 5:8) Nahan kpa, Yehova yô ngu a ker gbenda u una wase mba kwagh a gbe ve aa ageegh a na la. Profeti Hanani yange ôr a Tor Asa ér: “Ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” (2 Kroniku 16:9) Nenge imba mkposo u a lu hen atô u mkenger u Satan a nger se sha ihyom man ikyo i wan i sha dooshima i Yehova la sha wono!
5 Yehova gba mee ngu nengen se mker sha er una kôr se a hanma kwaghbo man mshi wase ga. Orpasalmi nger ér: “TERE, aluer Wea we aferakaa iko yô, ka an ma nan til sha, Tere?” (Pasalmi 130:3) Mlumun u a lu yô ka un ne: or môm kpa ma nan til ga. (Orpasenkwagh 7:20) Aluer se sôsom a Yehova a ishima i môm yô ashe na a̱ lu sha avese, a lu u nan se a na ibo ga, kpa a lu sha u una nenge uiniôngon asev shi una ungwa mbamsen asev mba se pin un iwasen la shi una de se a asorabo kpaa. Apostoli Peteru nger ér: “Ashe a Ter yô, nga sha mbaperapera shi veren ato sha zamber ve kpaa. Kpa Ter gem tsuhur ishigh sha [a] mba ve eren ifer yô.” (1 Peteru 3:12)
6. Kwagh u yange er Davidi la ka se kwagh u surun ishima man u tan se icin nena?
6 Davidi lu perapera ga shi er kwaghbo u ndôhôrshima kpishi. (2 Samuel 12:7-9) Nahan kpa gema pase Yehova ishima na shi kporom ikyua hen a na sha u eren msen a ishima i môm. (Pasalmi 51:1-12, nenge kwagh u i nger sha ityough ki Pasalmi ne la) Yehova ungwa msen na la shi de un a kwaghbo, kpa gema sunda uinjar mba vihin tsung sha ci u isholibo na la. (2 Samuel 12:10-14) Kwagh ne á lu se msurshima man icintan kpaa. U se fan ser Yehova wa iyol kegh a kegh u den se asorabo a ase aluer se gema ishima sha mimi mimi la ka kwagh u nan se msurshima, kpa ka i kunda se iyol u kaven ser ashighe kpishi asorabo nga a va a akaa a vihin tsung. (Mbagalatia 6:7-9) Aluer sar se u kporom hen Yehova yô, a gba u se nyagh nyityô kwagh i vihin Yehova ishima cii.—Pasalmi 97:10.
Yehova Kohol Ior Nav Va a Ve hen A Na
7. Ka ambaaior a nyi nahan Yehova ngu a ver ishima sha a ve, man ka á urugh ve a va a ve hen a na nena?
7 Davidi nger ken pasalmi na ugen ér: “Er TER A lu Sha, nahan kpaa, we mbahiden ayol ijime iko, kpa mbagengeseayol yô, fe ve ken ica je.” (Pasalmi 138:6) Pasalmi ugen kpa ôr sha zwa la ér: “Ka an nan lu er TER, Aôndo wase, u A tem Sha, Un u ka A shir ashe shin sha u Una nenge Sha man tara? Ka A dugh icanor shin vuulevu kera.” (Pasalmi 113:5-7) Een, Orgbanakaa uhemban u a gbe akaa sha won cii la shir ashe shin sha u una nenge shin tar, shi ashe a na nga nengen aa “mbahiden ayol ijime” man ‘atsanaior,’ ior mba ve lu a “asema a shirin man ve vaa sha ci u akaa a ndôhôrshima a i eren” la cii. (Esekiel 9:4) Ngu a urugh ambaaior ne a va a ve hen a na sha ikyev i Wan na. Yesu yange ôr kwagh shighe u lu shin tar la ér: “Ma or nana fatyô u gban van her a mo ga, saa Ter u A tindim la, Una urugh nan; . . . Ma or nana fatyô u van her a mo ga, saa Terem Una na nan.” —Yohane 6:44, 65.
8, 9. (a) Er nan ve i gbe u se cii se va hen Yesu? (b) Ka kwagh u tseer tseer u nyi a lu sha mserkwagh u ipaa laa?
8 Doo u uumace cii vea va hen Yesu shi vea na naagh ku ipaan la jighjigh, gadia i mar ve ken isholibo, mba paleghaa a Aôndo. (Yohane 3:36) Gba u a hime ve a Aôndo. (2 Mbakorinte 5:20) Aôndo yange kegh ér mbaasorabo ve zamber un sha u a ker ve gbenda u vea fatyô u lun ken bem a na ga. Apostoli Paulu nger ér: “Aôndo tese se dooshima Na sha ku u Kristu A kpe sha ci wase er se lu mbaasorabo her la. . . . Aluer i hime se a Aôndo sha ku u Wan Na zum u se lu mbaihomov la yô, nahan hegen er i him se kera yô, á va hemba yiman se sha uma Na cii.”—Mbaromanu 5:8, 10.
9 Apostoli Yohane lumun a mimi u kwagh u i kaa ér Aôndo ngu himen uumace a na la sha mkaanem ma a nger ne ér: “Ka sha kwagh ne man i pasen dooshima u se doo Aôndo ishima la ye, er Aôndo tindi Wan Na u môm môm shin tar, sha u se̱ lu uma sha a Na. Ka hen ape dooshima a lu ne: ka Aôndo man A doo se ishima ga, kpa ka se, se doo Aôndo ishima ye, man A tindi Wan Na hingir iwom sha asorabo ase.” (1 Yohane 4:9, 10) Nahan ka Aôndo yange hii keren gbenda ye, lu or ga. Ishima mgbegha ú u van ikyua a Aôndo u a tese ér “mbaasorabo” mba ve lu “mbaihomov” kpaa la doo un ishima kpishi la ga he?—Yohane 3:16.
Gba u Se Ker Yehova
10, 11. (a) U se ker Yehova yô, kanyi i gbe u se ere? (b) Doo u se nenge tar u Satan ne nena?
10 Er se fe nahan, Yehova kighir se ér se va hen a na ga. Sar se ker un, se ‘pev Un se zua a Na, shin er A lu ica a hanmô wase ga nahan kpaa.’ (Aerenakaa 17:27) Gba u se kav ian i Yehova a lu a mi i kaan ér se wa ayol a ase sha ikyev na la. Orhenen Yakobu nger ér: “Gema nen ayol a en, na nen sha ikev i Aôndo man hendan nen a diabolo tsô una yevese ne. Kporom nen hen Aôndo, Un kpaa, Una kporom her a ven. Wanger nen ave a en, ne mbaasorabo, man shi kile nen asema a en, ne mba asema a lu ne ahar ne.” (Yakobu 4:7, 8) Mayange je, se timbir nen u hendan a Diabolo dông ga, shi se timbir nen u tilen ken vegher u Yehova ga.
11 U eren kwagh ne inja na yô ka u se lun paleghaa a tar u bo u Satan ne. Yakobu shi nger ér: “Ne fa er u yan ikar a tar i lu u lun ihom a Aôndo gaa? Nahan yô, or u i sar nan ka lun ikar a tar yô, nan hingir orihom u Aôndo je ve.” (Yakobu 4:4) Aluer se soo u lun akar a Yehova di kpaa, gba u se ver ishima ser tar u Satan ua kôr se ihyom kpee je.—Yohane 15:19; 1 Yohane 3:13.
12. (a) Ka mkaanem ma surun ishima ma nyi nahan Davidi yange ngere? (b) Ka icintan i nyi Yehova a te sha ikyev i profeti Asaria?
12 Shighe u tar u Satan u mough ahendan a vese sha ma gbenda cii yô, gba u se kporom ikyua a Yehova ken msen, se pine un se a wase se. Davidi u Yehova yima un acin imôngo la nger ér: “TER ngu ikua ikua a mba ve yer Un cii, mba ve yer Un sha mimi la cii. Una na mba ve cie Un la kwagh u a sar ve yô, man shi Una ungwa mliam vem, Una yima ve kpaa. TER kor mba A doo ve ishima la cii, kpa mbaaferev yô, Una tim ve kera.” (Pasalmi 145:18-20) Pasalmi ne tese ér Yehova una yima se shighe u i mee se asange asange la shi una va yima ior nav jimin cii sha shighe u “zegecan” la. (Mpase 7:14) Aluer se sôsom a Yehova yô, un kpaa una sôsom a vese. Yange “Jijingi u TER” hemen profeti Asaria ôr kwagh u se cii se fatyô u lumun ser ka u vough yô, ér: “TER ngu a ven, er ne lu a Na yô; aluer né ker Un yô, né zua a Na je; kpa aluer né undu Un yô, Un kpaa Una undu ne.”—2 Kroniku 15:1, 2.
Saa Yehova Una Lu Or Kpôô kpôô hen Vese
13. Se tese ser Yehova ngu or kpôô kpôô hen a vese nena?
13 Apostoli Paulu nger ôr kwagh u Mose ér, “a taver ishima er ngu nengen a u i nengen a Na ga la nahan.” (Mbaheberu 11:27) Sha kpôô yô, Mose lu a vande nengen a Yehova kpôô kpôô ga. (Ekesodu 33:20) Kpa Yehova lu or kpôô kpôô hen a na inja er á nenge a Na nahan. Kape Yobu kpaa, shighe u ameen a na bee kera la, nenge a Yehova sha ashe a na a jighjigh la wang ér ka Aôndo u ngu a na ian ican i er mbacivir un kpa mayange á gem ijime a ve ga yô. (Yobu 42:5) Shi i ôr kwagh u Enoki man Noa kpaa ér ‘ve zenden vea Aôndo.’ Yange ve er kwagh ne sha u nôngon u eren kwagh u doon Aôndo ishima shi ungwan imo na kpaa. (Genese 5:22-24; 6:9, 22; Mbaheberu 11:5, 7) Aluer Yehova ngu or kpôô kpôô hen a vese e̱r lu hen Enoki man Noa kua Yobu man Mose nahan yô, se “Umbur Un sha ijende [yase] cii, Un kpaa Una kôôm igbenda [yase].”—Anzaakaa 3:5, 6.
14. Ikyav i “var” a Yehova la ér nyi?
14 Cii man Mbaiserael nyôr ken Tar u Ityendezwa la yô, Mose wa ve kwagh ér: “Dondo nen TER, Aôndo wen, cian nen Un, waan nen atindi Na iko, ungwa nen imo Na, civir nen Un, var nen a Na.” (Duteronomi 13:4) Yange lu u vea dondo un shi vea cia un shi vea waan atindi na ikyo shi vea var a na kpaa. Or u timen ken Bibilo ugen ôr kwagh sha gbar u ishemberti i i gem heen ér “var” ne, á kaa ér “ ikyav i ishemberti ne tese mlu u lun ikyooso ikyooso man mlu u kôôsôô.” Orpasalmi nger ér: “Kwaghmyer u TER ngu a mba ve cie Un yô, Una tese ve ikyuryan Na.” (Pasalmi 25:14) Se kpaa se fatyô u lun a imba mlu u civirigh u lun vea Yehova kangenaa ne aluer ngu or kpôô kpôô hen a vese shi aluer a doo se ishima tsung shi se mba cian u eren kwagh u vihin un ishima sha ma gbenda yô.—Pasalmi 19:9-14.
Ú Fa Er Yehova A We Ú Ikyo Kpa?
15, 16. (a) Pasalmi 34 tese ér Yehova we se ikyo nena? (b) Aluer se mba a mzeyol u umbur aeren a dedoo a Yehova a er a vese yô, se er nena?
15 Ayom a Satan agen yô, ka u meen se sha u se hungur ser hanma shighe yô Yehova Aôndo wase ka a lu wan ikyo a mbacivir un mbajighjigh la. Davidi, Tor u Iserael yange fa kwagh u agee a Yehova a myom la doo doo shighe u tagher a mbamzeyol mba vihin tsung la. Yange dugh icam zum u hingir keng keng u una er ayom sha ishigh ki Akishi, Tor u Gati ér un hunde la, lu pasalmi u doon tsung u a kou mkaanem ma sha jighjigh ma má lu heen ne, ér: “Kehe nen iti i TER a mo imôngo; sé kende nen iti Na sha imôngo. M ker TER, A ungwam, A maa A dughum ken mciem am cii. Ortyom u TER ka a haa afo a wa mbacian Un atô, a yima ve kpaa. Bende, nenge nen, TER ka u doon je; saan or u nan suur sha a Na la, iyol. TER ngu ikua a mba asema a vihin ve la, yem mba ve lu a ishima i zamber yô. Atsan a orperapera ngee, kpa TER ka A dugh nan ken a cii.”—Pasalmi 34:3, 4, 7, 8, 18, 19; 1 Samuel 21:10-15.
16 Ú na jighjigh a agee a Yehova a myom la kpa? Ú fa er mbatyomov nav ve kor se kpa? Ú bende Yehova u nenge er á lu ú doon je kpa? Ka hanma shighe nahan lu kwa u masetyô u baver we ken ishima er Yehova eren akaa a doon a wee? Nôngo umbur. Lu ken ya u masetyô u ú za her shighe u ú due tom kwaghpasen ve ú hen wer ú vôr je u kera fatyô u pasen kwagh ga laa? Kpa alaghga tsô u kôr cio ú lam a orya la gbar gbar je. Nahan ú umbur u wuese Yehova sha agee a á seer nan we man iveren i á ne ú la kpa? (2 Mbakorinte 4:7) Ken vegher ugen di yô, alaghga mzeyol wou yô, ka u umbur aeren a dedoo jighilii a Yehova a er a we la. Alaghga a gba u ú hide u hen sha akaa a ken sati môm, shin uwer môm, shin inyom i môm gayô a hemba nahan je kpaa. Aluer ka mzeyol wou ne yô, er nan ú nôngo í hingir ikye you u seer kporom ikyua a Yehova nahan nengen er una hemen shi una kôôm we la ga? Apostoli Peteru taver Mbakristu ishima ér: “Hide nen a ayol a en ijime er uwegh ku Aôndo ku ageegh ku lu sha a ven nahan, . . . Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Peteru 5:6, 7) Sha mimi yô, a kpiligh we iyol er a we ú ikyo tsung nahan!—Pasalmi 73:28.
Za Hemen u Keren Yehova
17. Aluer ka u se za hemen u keren Yehova yô, kanyi i̱ lu hange hange i se eree?
17 Gba kpee u se nôngo i hingir ikye yase u kuran ikyaryan yase vea Yehova la. Yange Yesu er msen hen Ter na kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Saa se nôngo tsung ve se fatyô u zuan a mfe u Yehova man Wan na ye. Gba u se zua a iwasen sha msen u eren kua icighan jijingi sha er se kav “akaacimin a Aôndo” yô. (1 Mbakorinte 2:10; Luka 11:13) Shi gba u se lu sha ikyev i hemen u “wanakiriki u jighjigh man u fan kwagh” la sha er se iv asema ase a kwaghyan u ken jijingi u a ne sha “ashighe ashighe” la kpaa. (Mateu 24:45) Yehova ngu yaren tom a gbenda ne sha u wan se kwagh sha u se ôron Mkaanem nam ayange ayange shi se zaan mbamkombo mba Mbakristu nduuruu shi se pasen “Loho u Dedoo u tartor” kpa kpoghuloo. (Mateu 24:14) Aluer se er nahan yô, se za hemen u keren Aôndo wase Yehova u a we se ikyo la.
18, 19. (a) Gba u se kange ishima u eren nyi kwagha? (b) Aluer se tile dông se hendan a Diabolo shi se gema se gba uwer u keren Yehova ga yô, se zua a injar nena?
18 Satan ngu nôngon sha afatyô na jimin cii sha u van ior mba Yehova a tôvacan man ahendan kua mbamkighir sha igbenda wue wue. Ngu nôngon sha u una imbishi bem wase shi una vihi mlu wase u se lu vea Aôndo doo doo la. Á soo ér se mem u eren tom u keren mbaasemaamimi shi wasen ve u tilen ken vegher u Yehova sha ikyaa i or u nan kom u teman tor sha won cii la. Kpa se kange nen ishima u tilen sha mimi sha ishigh ki Yehova her, se suur sha a na sha u a yima se sha ikyev i orbo la. Aluer se na ian sha u Mkaanem ma Aôndo ma hemen se shi se mba eren tom a nongo na u i nengen a mi la ikyooso ikyooso yô, se lu a vangertiôr ser una lu avese sha u wasen se sha hanma shighe cii.—Yesaia 41:8-13.
19 Nahan se jimin cii, se tile nen dông se hendan nen a Diabolo man ayom a na, shi hanma shighe yô se keren nen Yehova, Aôndo wase u mayange je una mem u ‘taver se, shi Una tim se u lun dông kpaa’ la ga. (1 Peteru 5:8-11) Aluer se er nahan yô, se lu ‘kuran ayol a ase, lun ken dooshima u Aôndo. Keghen mhôônom ma zungwen ma Ter wase Yesu Kristu a ishima i veren keghen uma u tsôron la.’—Yuda 21.
Ú Na Mlumun Wer Nyi?
• Ikyav i ishemberti i “Diabolo” la ér nyi, man iti la kôr un nena?
• Yehova kaha kposo a Diabolo sha gbenda u á nengen uumace mba ve lu shin tar la nena?
• Er nan ve i gbe u saa or nana lumun a ipaa sha u kporom ikyua a Yehova?
• Ikyav i “var” a Yehova ér nyi, man se za hemen u keren un nena?
[Study Questions]
[Picture on page 15]
Er Yobu tagher a atsan nahan kpaa, á lumun a ikyo i wan i Yehova wa un la
[Pictures on pages 16, 17]
Bibilo i ôron ayange ayange shi zan mbamkombo mba Mbakristu nduuruu shi eren tom u kwaghpasen sha gbashima la cii umbur se ér Yehova we se ikyo