U Eren Iyua Je Kungun Ican

“Ú FATYÔ u yilan mo wer m ngu or u sônon kwagh; kpa ishima a vihim ga. M ngu sônon kwagh ka sha ci u Yesu.” Mkaanem ma ortom u Mbaprotestanti a er ma heen gbar gbar ne ma tese zayol u a lu sha kwagh u uiyua mba kwaghaôndo mba i eren la. Ka inja er ka sha inyaregh kpishi ki ior ve lu eren uiyua la tseegh ukwaghaôndo ve har sha mi nahan. Gba u a kimbin ior inyaregh sha uwer, shi gba u a maa utempel shi a nengen sha ve, shi a sue ivangeli i zenden pasen la kpaa. A zua a inyaregh ki kwagh a gbe sha mi yum la nena?

Ucôôci kpishi har ishima sha u ngohol môm-ken-upue. * Orpasen ivangeli Norman Robertson senge sha kwaghôron na wener, “ieren i nan môm-ken-upue la ka gbenda u Aôndo a suen tartor Na u shin tar ne sha inyar yô. Ka gbenda Na u eren akaa a inyar, man ka ú wase u pasen Ivangeli.” Nahan á kera cia kunya ga je á umbur mbadondon un ér mba a tom u eren iyua, á kaa a ve var var wener: ‘U nan môm-ken-upue la ka kwagh u or nana er sha shighe u nan fetyô tseegh ga. U eren nahan ne ka tindi u ungwan. Aluer u ngu nan môm-ken-upue ga yô, u ngu peren atindi a Aôndo jighilii. Kwagh ne ka iv mbu iin.’—Tithing—God’s Financial Plan.

Alaghga u lumun wer, doo u iyua i eren ia lu vegher u mcivir u Mbakristu. Nahan kpa, ú nenge wer u zeren wan ior uiyua la ka u zan ve a za iyol, shin alaghga je yô ka kwagh u vihin we ishima kpishii? Ortimen sha akaa a kwaghaôndo u ken tar u Brazil Inácio Strieder na ucôôci ibo wener ve tôô kwagh u môm-ken-upue hingir ve gbenda u “sôron mbamzeyol mba sha ajiir a ve,” nahan a kaa ér imba ieren la ka i “shami ga, ka i nzughul a nzughul kwagh, shi ngi goom a kwaghaôndo yemen a mi kpe kpaa.” Á nenge wener ieren ne na yô, “ior mba ve lu a tom ga man kasev mba côgholov man mba ve tem ken ugar mbavesen sha ajiir a doon ashe ga sha ci u ibanave la, kua mba kwagh a̱ gbe ve u henen sha kwagh vighe vighe ga la cii, kure ikyaa ken ishima ér Aôndo undu ve shi mba kighir ve ér ve na ‘ortese’ iyua kpishi, je yô, icombor ve kera ngi zuan a kwagh u yan ga.”

Alaghga a kpiligh we iyol ú kaa wer: ‘Ucôôci mba ka ve kighir a kighir ior ér ve na môm-ken-upue vev la mba yaren tom sha kwagh u Ruamabera a er je kpa? Shin alaghga tsô mbahemenev mba kwaghaôndo mbagenev tôô mciem ma tan ior ér Aôndo una tsaha ve la mba tôndon iyôngo ve aive shinii? Sha kpôô yô, Aôndo ver ishima ér se er iyua zan zan je se kunguu?

[Footnote]