Za Nen Hemen U Civir Sha Ishima I Môm
Za Nen Hemen U Civir Sha Ishima I Môm
“Me gema zwa u ior ua hingir zwa u wang, sha u ve cii ve̱ yila sha iti i TER, man ve̱ er Un tom sha ishima i môm yô.”—SEFANIA 3:9.
1. Ka nyi i lu eren sha u kuren kwaghôron u Sefania 3:9 laa?
IJÔ ngi je kuma er 6,000 nahan í ior ve lamen tar sha won cii hegen yô. Dugh ingin kera je kpaa ijô i kiriki shin ijô i ior ve lamen hen ipaventar ve tseegh la ngi kpishi. Ior vea lamen ijô kposo kposo er hii ken zwa Arabia zan zan zwa Zulu nahan kpa, sha mimi yô, Aôndo er kwagh u a kpilighyol yô. A bugh gbenda sha er hanma ijiir cii uumace ve hen shi ve lam zwa u i lu ú tseegh u lu u wang yô. Kwagh ne ngu eren nahan ka sha u kuren kwaghôron u ityendezwa u i er sha ikyev i profeti Sefania la, ér: ‘Mo Yehova Aôndo me gema zwa u ior ua hingir zwa u wang, sha u ve cii ve̱ yila sha iti i TER, man ve̱ er Un tom sha ishima i môm yô.’—Sefania 3:9.
2. Kanyi i lu “zwa u wang” la, man ú wase sha nyi gbenda?
2 “Zwa u wang” la ka mimi u Aôndo u a lu ken Bibilo, Mkaanem nam la. Mimi la hemba haren sha kwagh u mtsegh u Tartor u Aôndo ua va tsegha iti i Yehova shi ua paa hementor na iyol, shi ua gema ua va a averen sha ci u orumace la. (Mateu 6:9, 10) Akuraior man iniongoior cii mbá lamen zwa u wang ne sha ci u ka ú tseegh u lu zwa u wang u ken jijingi shin tar ye. Ngu u wase ve u civir Yehova sha “ishima i môm.”
De Lu Nen Mba Sangen a Sange Ga
3. Ka nyi i wasen se u civir Yehova ken mzougho?
3 Se Mbakristu se mba lamen ijô kposo kposo kpa se mba a iwuese sha ijoughave i i lu hen atô wase la. Shin er se pasen loho u dedoo u Tartor ken ijô kposo kposo i uumace ve lamen nahan kpa, se zua se mba civir Aôndo ken mzough môm. (Pasalmi 133:1) Kwagh ngu nahan sha ci u hanma ijiir i se lu shin tar cii se mba lamen zwa môm u ú lu u wang la sha u wuese Yehova.
4. Hii nan ve i gbe kpee u ior mba Aôndo vea lu ior mba sangen a sange ga?
4 Mayange je, ior mba Aôndo ve de lu mba sangen a sange ga. Ken inyom i 36 S.W. la apostoli Peteru pase kwagh ne wang shighe u pase kwagh ken ya u torutya Korneliu u lu Ortyôtyev la, yange saan un iyol nahan á kaa ér: “Mimi je, m kav, Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.” (Aerenakaa 10:34, 35) Er kwagh ne a lu mimi yô, tiônnongo u Mbakristu ka ijiir i sangen a sange shi paven nongo ga, shin ka ijiir i hemban wan mbagen ikyo a mbagen kpaa ga.
5. Hii nan ve i lu sha mi ga u suen ieren i paven nongoior ken tiônnongo laa?
5 Wanyekwase u zan makeranta u kôleeji ugen za ken Iyol i Tartor, nahan á kaa ér: “Ucôôci mbagen ka ve hemba kohol ma nongoior shin ma ikyurior. . . . Kpa Mbashiada mba Yehova yô, hanmô ve nan tema ijiir môm, i pav nongoior ugen i ver kposo a ugen ga.” Nahan kpa, mbagenev ken tiônnongo u ken Korinte yange ve lu paven nongo ken atô ve. Sha ci u anyiman a yange ve gba ayol a ve la yô ve lu yangen m-ertom u icighan jijingi u Aôndo, gadia ngu a va a mzough man bem. (Mbagalatia 5:22) Aluer se mba paven nongo ken tiônnongo yô, se lu hendan a hemen u jijingi a lu hemen la. Nahan se lu nen a mkaanem ma apostoli Paulu nger hen Mbakorinte ne ken ishima, á kaa ér: “M ngu zamber a ven anmgbianev, ken iti i Ter wase Yesu Kristu mer: Ne cii, lu nen zwa môm, mbampav ve̱ de lu her a ven ga, kpa zua nen, lu nen ishima i môm man mhen môm kpaa.” (1 Mbakorinte 1:10) Ken washika u Paulu nger hen Mbaefese la kpaa á ôr kwagh u lun ken mzough la var var.—Mbaefese 4:1-6, 16.
6, 7. Ka kwaghwan u nyi Yakobu a we sha kwagh u sangen a sange mba wan ve ikyo, man mkaanem man ma a inja nena?
6 Kera je, i soo ér Mbakristu ve de lu mba sangen a sange ga. (Mbaromanu 2:11) Mbagenev ken tiônnongo u sha derianyom u hiihii la lu tesen msange u sha dooshima sha mba ve lu mbainyarev la, sha nahan yô, orhenen Yakobu nger wener: “Anmgbianev av, de lu nen a jighjigh u nan u hen Ter wase Yesu Kristu Ter u iengem la, a msange u sha dooshima imôngo ga. Gadia aluer or u nan we ikunya i zenaria sha ave kua riga u icivirigh nana va nyôr ken mkohol wen, man shi icanor nana va nyôr a ajav iyol yô, ne gema ne kenger or u nan hee riga u icivirigh la ne kaa a nan ner: We yô, ikagh ki teman ki dedoo kin, kpa ne gema ne kaa a icanor la ner: We, tile keera, shin: Va tema shin ankwagh wam u pendan angahar sha mi ne— kera ka mpav ne nyer a mi ken atô wen gaa? Man shi ne kera hingir mbaajiriv mba ve henen aferakaa gaa?”—Yakobu 2:1-4.
7 Aluer mbananjighjighga mba ve lu a inyaregh wa ikyunya ken ave shi zer akondo a icivirigh man mbananjighjighga mba ve lu atsanaior mba ve zer akondo a doon ashe ga va mkombo u Mbakristu yô, í hemba wan mbanyarev ikyo. Yange í na ve “ikagh ki teman ki dedoo,” kpa a gbaan sha atsanaior yô, í kaa a ve ér ve tile sha gayô ve̱ tema shin ankwagh u pendan angahar sha mi. Kpa Aôndo na naagh ku ipaan ku Yesu a msange shio sha ci u mbanyarev man atsanaior cii. (Yobu 34:19; 2 Mbakorinte 5:14) Aluer ka u se za hemen u eren kwagh u doon Yehova ishima shi civir un a ishima i môm yô, mayange se sangen a sange mba wan ve ikyo ga shin se lu mba “nyohon zwa sha u zuan a mtsera” ga.—Yuda 4, 16.
Palegh Ahon a Gban
8. Lu nyi i er Mbaiserael sha ci u ahon a ve a gban laa?
8 U se lun ken mzough her shi Aôndo lumun a vese yô, gba kpee u se yar tom sha kwaghwan u Paulu ne: “Eren nen akaa cii, ahon a̱ de lu sha mi ga.” (Mbafilipi 2:14, 15) Mbaiserael mba banen a jighjigh mba i due a ve ken uikyangen ken Igipiti kera la yange ve gba ahon a Mose man Aron, nahan lu Yehova Aôndo je ve lu gban ahon a na ye. Sha ityôkyaa ne yô, mba yange ve kuma anyom 20 man mba ve hemba nahan cii ve nyôr ken Tar u Ityendezwa la ga, saa di Yoshua man Kalebu man Mbalevi tseegh ve sar ku ken zende u Iserael zende ken taaikyôngo anyom 40 la ga ye. (Numeri 14:2, 3, 26-30; 1 Mbakorinte 10:10) Nenge ase injar i ve kimbi sha ahon a ve a gban la sha wono!
9. Lu nyi i er Miriam sha ci u ahon na a gban laa?
9 Kwagh ne tese kwagh u una fatyô u eren ikyurior i gban ahon jimin cii yô. Man gema ior asange asange mba ve gbe ahon sha kwagh la di ye? Miriam anmgbian u Mose u kwase kua anmgbian na Aron cii ve gba ahon ér: “Ka Mose tsô, TER A er kwagh a na yee? Se yô, er kwagh a vese gaa?” Kwaghngeren la seer ér: “Nahan TER ungwa.” (Numeri 12:1, 2) Lu nyi i due kereghe? Aôndo na Miriam u ikyav i tese tseer tseer je ér ka un je yange hemen ahon shon la kunya. Yange na un kunya nena? Yange gba imande shi i wuhe un ken akôngoafogh ayange ataankarahar zan zan iyol na kar hiden her.—Numeri 12:9-15.
10, 11. Ka nyi nahan aluer i kar a ahon a gban kera fese ga ve aa fatyô u van a mi? Tese ikyav.
10 Ahon a gban ka di u hunan kwagh kaan ér ngu shami ga tsô ga. Mba zeren gban ahon sha kwagh la ka ve hemba haren ishima sha mbamhen vev shin sha ian i ve lu sha mi la, kwagh ngu a hemba gban ve a iyol ve a i Aôndo. Ka a̱ kar a ieren ne kera ga yô, i̱ va a ahendan hen atô u anmgbianev shi i̱ yange ve u civir Yehova a ishima i môm. Ityôkyaa yô, mba gban ahon ka ve zer hunan kwagh gbem, ve ver ishima ér mbagenev vea dondo ve ijime.
11 U tesen ikyav yô, alaghga or nana puu gbenda u ma ortamen nan ne kwaghôron u nan ken tiônnongo shin nan eren ityom i í we nan sha ikyev la. Aluer se kegh ato a or u hunan kwagh la yô, alaghga se kpaa se hii u lun a mhen u nan kpa nan lu a mi la. Alaghga sha hiihii la gbenda u ortamen la nan eren ityom i nan la lu sha ishima yase, kpa er i va lôô vor u hunan kwagh la ken avese hegen yô, m-ertom u nan cii kpa una kera kuman se ga. Ken masejime yô, hanma kwagh u ortamen la nan er cii una doo se ga, nahan se kpaa se hingir u lamen sha iyol i nan dang. Doo u imba ieren ne ia lu ken tiônnongo u ior mba Yehova ga.
12. Ka nyi kwagh nahan ahon a gban aa fatyô u van a mi sha mlu wase vea Aôndo?
12 U gban ahon sha mba i lu tom ve u kuran iyôngo i Aôndo la una fatyô u van a ilyahan. Imba ahon a gban angara shin u tômon kwaghbo sha iyol ve shi vihin ve iti la una fatyô u vihin mlu wase vea Yehova vindi vindi. (Ekesodu 22:28) Mbauityuhwanev mba ve gem ishima ga cii vea ya dyako u Tartor u Aôndo ga. (1 Mbakorinte 5:11; 6:10) Orhenen Yuda yange nger kwagh sha kwagh u mba gban ahon mba ve ‘venda mbautahav, ve tuhwan mba ve engem,’ shin mba ve nengen sha tiônnongo la. (Yuda 8) Aôndo yange lumun a mba gban ahon mbara ga, nahan doo u se er kwagh sha kwaghfan sha u palegh ieren ve i bo la.
13. Hii nan ve i lu ahon a gban cii a lu a bo ga?
13 Nahan kpa, ka ahon a gban cii a vihi Aôndo ishima ga. Yange gema ijime a “mliam ma i vaa” sha kwagh u gar u Sodom man Gomora la ga, kpa tim agar a ifer dumbur ker kpishi la. (Genese 18:20, 21; 19:24, 25) Ken Yerusalem kpaa shighe u Pentekosti u sha 33 S.W. la kar ica lu a gba ga tsô, “ahon gba Mbayuda mba ve lu ken Mbagrika la a Mbaheberu sha ci u i wa kasev mba côgholov vev iko sha gbayol ve u ayange ayange ga yô.” Nahan “mba pue kar uhar” sôr mzeyol la, ve tsua ‘iorov utaankaruhar mba i wuese ve’ yô ve “ver ve sha tom” u karen kwaghyan. (Aerenakaa 6:1-6) Gba kpee u sha ayange a ase ne kpaa, mbatamen vea ‘cir ato a ve’ sha u ungwan ahon a gban a sha mimi a mbagenev ve lu gban la ga. (Anzaakaa 21:13) U mbatamen puun a puu mbacivir a ve imôngo yô, hemba doon u vea taver ve a taver asema shi vea wan ve kwagh kpaa.—1 Mbakorinte 8:1.
14. Ka ieren i nyi i lu hange hange u a lu a mi sha u palegh ahon a gbana?
14 Gba u se cii se palegh ahon a gban, gadia ieren i gban ahon la ngi i vihi mlu u ken jijingi. Imba ieren la ia tim mlu u se lu gungur môm la. Hemba doon u se na icighan jijingi ian a shiishi dooshima ken vese. (Mbagalatia 5:22) U se eren sha ‘tindi u tartor u dooshima’ la una wase se u civir Yehova ken mzough.—Yakobu 2:8; 1 Mbakorinte 13:4-8; 1 Peteru 4:8
Kura Iyol You sha Angereke
15. Ú pase mkposo u ukôson mbagenev man angereke a eren nena?
15 Gba kpee u se kura nombor wase gadia ahon a gban aa fatyô u van a iliam i lamen sha mbagen geseghee. U kôson mbagenev ka ieren i teman gban lamen sha iyol i ior man sha akaa á ve eren la. Kpa angereke yô, ka u eren aiegh sha iyol i orgen sha u vihin nan iti. Imba iliam i sha aiegh la ka kwaghôron u vihin or iti man ka ieren i or u Aôndo ga. Sha ityôkyaa ne yô, Aôndo yange kaa a Mbaiserael ér: “De zenden anger hen ior ou ga.”—Levitiku 19:16.
16. Paulu yange ôr nyi sha kwagh u mbaangereve, man kwaghwan ne una bende avese nena?
16 Er Paulu kpa yange fa wener iliam i lamen sha iyol i or ken ijime la ia va a angereke yô, venda ibumegh a mbaangerev mbagen wanger wanger je. Yange ôr kwagh tér kasev mba côgholov mba i gbe u tiônnongo una nenge sha ve yô, been yô, shi a ôr kwagh u kasev mba côgholov mba ve hen u “gbaan zenden sha uya uya tsô, man ve kera lu gbilin tseegh ga, ve eren angereke shi ve amber sha akaa, ve lamen ve teren akaa a a doo ga yô.” (1 Timoteu 5:11-15) Aluer kwase Kristu nenge ér ka i taver nan ga u nyôron iyol ken kwaghôron u una fatyô u van a angereke yô, doo u nana yar tom sha kwaghwan u Paulu a we ér kasev “ve̱ de lu mbaangerev ga, ve̱ lu mbakundunasema” la. (1 Timoteu 3:11) Sha mimi yô, doo u nomso mba ve lu Mbakristu kpaa vea palegh angereke a eren.—Anzaakaa 10:19.
De u Nan Nen Or Ibo Gaegh!
17, 18. (a) Yesu ôr nyi sha kwagh u nan mbagenev ibo laa? (b) Se yar tom sha mkaanem ma Yesu a ne sha kwagh u nan or ibo la nena?
17 Aluer se er anger sha iyol i or ga je kpaa, gba u se nôngo kpoghuloo se palegh u hingir ior mba gban nan mbagenev ibo gaegh la. Yesu venda imba ieren la, á kaa nahan ér: “De gbe nan nen or ibo gagh ga, er ne kpaa á na ne ibo gagh ga yô. Gadia imbajir i ne er ne, ka i á ôr ne ye; man ikaren i ne karen a mi ne kpaa, shi ka sha i je á kar ne mi ye. Inja na nan man u nengen anivurkon u a lu anmgbian wou ken ishe, kpa gungurkon u u lu ken ishe you yô, u we u iko ga? We, orimangeregh ne, vande dughun gungurkon ken ishe you kera, nahan man u nenge dedoo sha u ú za dugh anivurkon la ken ishe i anmgbian wou kera ye.”—Mateu 7:1-5.
18 Mayange je, se hen nen ser doo u se dugh “anivurkon” u a lu ken ishe i anmgbian wase ser se mba wasen nan zum u “gungurkon” u sha injakwagh u yange se u nengen kera kuren kwagh vough ga. Sha kpôô yô, aluer se kav er Aôndo a lu u mhôôn yô, mayange je a maa se iyol u gban nan anmgbianev asev mba nomso man mbakasev mba ken jijingi ibo gaegh ga. Se fatyô u fan mlu ve doo doo er Ter wase u sha la nena? Kape i lu ve Yesu a te se icin ér se ‘de gbe nan or ibo gaegh ga, sha er se kpaa á na se ibo gagh ga’ je ne! Aluer se hen sha mbamyen asev dedoo yô, vea yange se u ôron akaa a nan or ibo sha gbenda u Aôndo una nenge ér se ôr ka sha ifer la.
Se Taver Iyol ga, kpa Se Mba a Icivir
19. Se nenge mba ve civir a vese imôngo la nena?
19 Aluer se kange ishima u civir Aôndo a mbananjighjigh a vese imôngo a ishima i môm yô, a lu u nan ve ibo gaegh la tseegh se palegh ga. Se hemen sha u nan ve icivir kpaa. (Mbaromanu 12:10) Sha mimi yô, se ker kwagh u a lu u doon se la ga kpa a lu kwagh u a lu u doon ve la, shi se er ityom i civirigh sha ci ve a iember. (Yohane 13:12-17; 1 Mbakorinte 10:24) Se za hemen u lun a ieren i dedoo ne nena? Ka u se fa ser, hanma or u nan jighjigh cii nan ngu Yehova kwagh u civirigh, shi se fa ser gba u se wasen ayol a ase di er hanma ilyeghegh ki yolough cii ki har sha ki gen nahan.—1 Mbakorinte 12:14-27.
20, 21. Inja i mkaanem ma ken 2 Timoteu 2:20, 21 hen vese yô ér nyi?
20 Mimi je, se Mbakristu se mba ikyav mbi inyaav mbi taver ga mbi i we mbi tom u injaa u pasen kwagh sha ikyev la. (2 Mbakorinte 4:7) Aluer ka u se er icighan tom ne sha ci u iwuese i Yehova yô, se lu a ieren i wang sha ishigh nagh man sha ishigh ki Wan na. Ka sha u se lun wang sha ieren yase man sha mlu wase u ken jijingi la ve se lu ikyav mbi injaa mbi Aôndo una er kwagh a mi ye. Paulu ôr kwagh sha gbar ne ér: “Ken ya u vesen yô, ka ikav mbi sha zenaria man azurfa tseegh mbi lu ker ga, kpa mbi sha kon man mbi sha inyatyuu kpaa mbi. Mbigenev ka mbi eren akaa a icivirigh a mi, mbigenev yô, ka u eren akaa a a lu a icivir ga la a min. Aluer or nana dugh akaa ne ken iyol i nan kera yô, nana lu ikagh ki icivirigh ki i tsegha ki, ki lu or u ki a inja kpishi yô, ki i ser ki sha ci u hanma tom u dedoo yô.”—2 Timoteu 2:20, 21.
21 Ior mba ve eren sha atindi a Aôndo a soo la ga yô, mba er ‘ikyav mbi mbi lu mbi icivirigh’ ga nahan. Nahan kpa, sha u dondon gbenda u Aôndo a soo la yô, se lu er ‘ikyav mbi icivirigh mbi i tsegha mbi, shin i ver mbi sha u eren Yehova tom a mi shi i ser mbi sha ci u hanma tom u dedoo yô.’ Nahan hanma wase nana pine iyol i nan ér: ‘Mo yô m ngu “ikagh ki icivirigh” kpa? M ngu a ieren i dedoo i i̱ lu i ia wase mbananjighjigh a mo imôngo kpa? M ngu or u ken tiônnongo u nan eren kwagh sha ishima i môm a mbacivir a nan imôngo kpa?’
Za Nen Hemen u Civir ken Mzough
22. A fatyô u tôôn tiônnongo karen sha nyi?
22 Tiônnongo u Mbakristu ngu er tsombor nahan. Zum u ior mba hen tsombor cii ve lu mbacivir Yehova yô, dooshima man iwasen i nan mbagenev man mlu u saan saan ngu a lu hen tsombor la. Tsombor ka u lu a ior mba ve lu a aeren kposo kposo yô, kpa hanma or yô, ka nan lu a tom u injaa u eren. Kape ken tiônnongo kpa i lu vough je la. Shin er se cii se lu inja i môm ga—shi se yen nahan kpaa—Aôndo va a vese cii hen a na sha ikyev i Kristu. (Yohane 6:44; 14:6) Se doo Yehova man Yesu cii ishima, shi er tsombor u ú lu ken mzough nahan, gba kpee u se tese dooshima hen ayol a ase.—1 Yohane 4:7-11.
23. Ka nyi i gbe u se umburu, shi gba u se kange ishima u eren nyi?
23 Shi tiônnongo u Mbakristu u a lu er tsombor la ngu ijiir i se fatyô u veren ashe ser se zua a mba ve til sha mimi yô. Apostoli Paulu nger ér: “Nahan yô, sarem pe nomso ve̱ eren msen sha hanma ijiir, ve̱ kenden ave a wang sha, i̱ de lu sha ishima i vihin ga, ayôôso kpaa ga.” (1 Timoteu 2:8) Paulu kar mtil u tilen sha mimi sha msen u eren “hanma ijiir” cii ape Mbakristu ve kumba imôngo yô. Ka ior mba ve lu wang tseegh vea er msen ken igbar sha ci u tiônnongo ye. Aôndo soo ér se lu ior mba mimi sha ishigh nagh man hen ayol a ase kpaa. (Orpasenkwagh 12:13) Er alegh a yolough nga a eren kwagh imôngo nahan se kpaa se kange nen ishima u lun gungur môm u eren kwagh ken mzough. Shi er se lu tsombor u civir Yehova yô, se za nen hemen u civir ken mzough. Hemban cii yô, se umbur nen ser gba u se wasen ayol a ase shi aluer se za hemen u civir Yehova ken mzough yô una lumun se shi se zua a averen.
Ú Na Mlumun Wer Nyi?
• Ka nyi ngi i wase ior mba Yehova u civir un ken mzougho?
• Hii nan ve Mbakristu ve palegh ieren i sangen a sange?
• Ú kaa wer ahon a gban doo ga sha ci u nyi?
• Hii nan ve i doo u se naan mbananjighjigh a vese imôngo iciviri?
[Study Questions]
[Picture on page 15]
Peteru kav ér “Aôndo ka u sangen a sange ga”
[Picture on page 16]
Ú fa er i hii ve Aôndo yange na Miriam kunya kpa?
[Picture on page 18]
Mbakristu mba ve til sha mimi yô mba a iember u civir Yehova ken mzough