Msurshima Sha Ci U Mba Ve Lu Yan Ican La

MPIN u sha kwagh u i hii ve Aôndo a ne ican i yan ian la za mbafankwagh tsura man mbatimen sha akaa a kwaghaôndo kpishi iyol uderimbaanyomov imôngo hegen. Mbagenev kaa ér, er Aôndo a hembe agee cii yô, á lu un je á lu ityough sha ican i ior ve lu yan ne ye. Or u yange nger takerada u kwaghalôm u̱ i yer ú ér Clementine Homilies ken derianyom u sha uhar la, senge wener Aôndo hemen tar ne, kôr ú ave ahar. Diabolo ngu ken “uwegh nagh ku imesegh,” nahan ngu nan ior ican shi ngu van a mnyoon kpaa, Yesu di ngu ken “uwegh nagh ku yanegh” ngu waren ior shi ngu nan ve iveren kpaa.

Ior mbagenev yô nyiman ér ican i yan ngi a ngi ga jimin cii, gadia taver ve u lumun ér Aôndo una na ican i yan ian shi ka un a ve a ican i yan kpaa ga. Mary Baker Eddy yange nger wener “ifer ka kwagh u ken mhen tseegh tsô, ka kwagh u a lu kpôô kpôô ga yô, aluer i nenge isholibo man angev man ku ér ka akaa a a lu jim jim ga yô, akaa ne cii a kera lu ga.”—Science and Health With Key to the Scriptures.

Sha ci u akaa a vihin a a er ken ashighe a karen la hemban cii yô, hii shighe u ityav mbi tar sha won cii mbi sha môm la zan zan ar sha shighe wase ne yô, ior kpishi kure ken ishima ér Aôndo ngu a tahav mbu yangen ican ga. Oryuda u fantakerada u i yer un ér David Wolf Silverman la yange nger wener “sha m nenge wam yô, Atemtyo u Nazi la na yô taver u kaan ér Aôndo hemba agee cii.” A seer kaan wener “aluer ka u se kav Aôndo sha ma gbenda yô, . . . saa erdoo Na una gba a zua sha ifer i í lu zan hemen ne, man saa aluer A hemba agee cii ga tseegh ve kwagh a fatyô u lun nahan ye.”

Nahan kpa, akaa a ior ve ôr kposo kposo imba er Aôndo ngu uwegh sha ican i yan shin ngu a tahav mbu yangen ican ga shin ican ka kwagh u kpôô kpôô ga la cii na mba ve lu yan ican la msurshima kpuaa tsô. Man kwagh ugen u vesen yô, amba a jighjigh u nan la nahan zua sha ieren i vough man tahav man ikyo i wan i Aôndo, un u Bibilo i pase se kwagh na la ga. (Yobu 34:10, 12; Yeremia 32:17; 1 Yohane 4:8) Nahan yô, kanyi Bibilo i ôr se ér ka ityôkyaa i í hii ve i̱ ne ican i yan iana?

Ican i Yan Yange i Hii Nena?

Aôndo yange gba uumace ér ve ya ican ga. Kpa, yange na Adam man Ifa, nom man kwase u hiihii la mhen u vough man iyol i vough shi er sule u dedoo na ve sha u ú lu ya ve shi na ve tom u injaa, u ua na ve mkom yô. (Genese 1:27, 28, 31; 2:8) Nahan kpa, lu u vea wa ayol a ve sha ikyev i mtemtor u Aôndo shi vea fa er a lu a ian i wan ve tindi sha kwagh u a lu u dedoo man kwagh u a lu u bo la sha er vea za hemen u lun ken msaanyol yô. Kon u i̱ yer ú ér “kon u mfe u fan kwagh u dedoo man kwagh u bo la” yange u tese ian i Aôndo a lu a mi u wan ve tindi la. (Genese 2:17) Adam man Ifa yange ma ve tese m-ongo ve u ungwan imo i Aôndo la luun e̱r yange ve ungwa tindi u á wa ve ér ve de ye kon la ga la yô. *

Kwagh er vihi di yô, Adam man Ifa yange ve venda u ungwan imo i Aôndo. Or u ken jijingi u hembanato, u yange i va yila un ken masejime ér Satan Diabolo la bume Ifa ér una  ungwa imo i Aôndo kpa ia wase un sha ma kwagh môm ga. Jighilii je yô, Aôndo ngu nyumen un kwagh u dedoo je zua ga: Ka u lun sha tseeneke na, nahan tsuan kwagh u a lu u dedoo man u a lu u bo sha ci na iyolna la. Satan senge wener aluer á ya kon la yô, ‘ashe na aa bugh, una hingir er Aôndo nahan, una gba fan kwagh u dedoo man kwagh u bo.’ (Genese 3:1-6; Mpase 12:9) Er ishimaveren i lun sha tseeneke na la sar Ifa yum yô, a ya ityamegh ki kon u i ta icin ér ve̱ de ye ga la, shi Adam kpa ya ú.

Sha iyange shon la je, Adam man Ifa hii u nengen a injar i ihyembeato ve la. Er ve̱ venda mtemtor u Aôndo yô, ve̱ kera zua a mkor man iveren i yange ma ve zua a mi luun er yange vea ungwa imo i Aôndo la ga. Aôndo zenda ve ken Paradiso kera shi á kaa a Adam wener: “Tar u̱ lu a ifan iyol sha ci wou, ka sha ican je man ú ya u, sha ayange a ou cii ye, ka sha iusa i sha ishigh yough man ú ya kwaghyan ye, zan zan ú hide hen inya.” (Genese 3:17, 19) Adam man Ifa hingir u lun ken uange man mnyoon, kua ken iyolbeen man ku. Ican i yan maa hingir vegher u mlu u orumace.—Genese 5:29.

U Sôron Mzeyol La

Alaghga or nana pine ér, ‘Aôndo yange ma fatyô u gban den Adam man Ifa a isholibo ve tsô gaa?’ Ei, u eren nahan ne yange ma seer van a va a ihyembeato sha hementor na la, alaghga je yô, u eren nahan ne yange ma taver mbagenev ishima ken hemen u ve kpa hembanato, nahan kwagh ne ma hemba van a va a ican i yan cii. (Orpasenkwagh 8:11) Heela tseegh ga, u Aôndo gban den imba ihyembeato ngira nahan la yange ma tese ér un kpa ngu ave sha kwaghbo u eren. Orngeren Bibilo Mose umbur se wener: “Tom [u Aôndo] ngu vough; gadia igbenda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi.” (Duteronomi 32:4) Aôndo yange de Adam man Ifa ér ve ya ican sha ihyembeato ve la u tesen ér un eren kwagh sha atindi a na vough.

Er nan ve Aôndo yange tim nomsoor man kwase u hiihii la kua Satan u i̱ nengen a na ga la, un shon u yange lu ken ijime i ihyembeato ne kera fese je ga? Ngu a tahav mbu eren kwagh nahan. Adam man Ifa yange ma ve mar ônov mba vea ya dyako i ican man ku ga. Nahan kpa, u Aôndo tesen tahav imba ne la yange ma tese er i lu shami u un hemen akaa a lun a mfe a a gbe á la ga. Heela tseegh ga, luun er Adam man Ifa yange vea kpe atseen nahan kwagh ne ma a tese ér awashima u Aôndo a soo wener tar ne u iv a ônov vev mba lun vough la una fatyô u kuren sha mi ga. (Genese 1:28) Man “Aôndo ngu er ior ga . . . Hanma kwagh u a tende zwa yô, una er; ka a ôr kwagh, kwagh la a kure sha mi vough.”—Numeri 23:19, Mgem u Bibilo i Today’s English.

Yehova Aôndo yange yar tom a kwaghfan na u vough la, nahan de wener ihyembeato la i za hemen sha anshighe kpuaa. Mbahembanato mban vea zua a ian doo doo je i vea nenge a kwagh u u̱  tilen sha tseeneke ve, vendan u wan ayol a ve sha ikyev i Aôndo la a ve a mi yô. Akaa a a er hii shighe u yange i gba or la je tese wanger wanger er i gbe u orumace nana lu sha ikyev i Aôndo man er mtemtor u Aôndo a hembe u orumace shin u Satan yô. Sha shighe la je Aôndo ver ishima ér akaa a un we shima a tar ne sha hiihii la kure sha mi vough. Yange er ityendezwa wener “vor” ua va u̱ ua ‘cagh Satan ityough,’ nahan ua bee a ihyembeato man akaa a vihin a ihyembeato i ve a mi la vindi vindi.—Genese 3:15.

Ka Yesu Kristu yange lu vor la ye. I ôr ken 1 Yohane 3:8 ér, “i pase Wan u Aôndo . . . sha u vihin aeren a diabolo kera.” Yange er kwagh ne nahan sha u nan uma na u vough u yange lu orumace la, nahan a kimbi ishe i paan ônov mba Adam sha ikyev i isholibo man ku u ve ya dyako u ú la. (Yohane 1:29; 1 Timoteu 2:5, 6) I̱ er ityendezwa a mbara mba ve ne naagh ku Yesu jighjigh sha mimi la ér vea zua a myôhôryol sha ikyev i ican i yan gbem sha won. (Yohane 3:16; Mpase 7:17) Kwagh ne una er hanma shighee?

Ican Ia Bee

Mvende u vendan mtemtor u Aôndo ne va a ican i yan je gande ôron. Nahan yô, ka kwagh u shami je u Aôndo yaren tom a tahav nav sha gbenda u dedoo sha u been a ican i uumace ve lu yan ne shi kuren sha awashima na u yange hii lun a mi sha ci u tar ne la kpaa. Yesu yange tér mserakaa u Aôndo ne zum u á tese mbadondon nav u eren msen la, ér: “Ter wase u Sha, . . . tartor Wou u̱ va, i̱ er ishima You shin tar kpaa vough er i eren i Sha nahan.”— Ka se se nger i yier ye; Mateu 6:9, 10.

Shighe u Aôndo a ne ian ér uumace ve hemen ayol a ve ne sôôn kuren. U kuren sha kwaghôron u profeti u Bibilo yô, á ver Tartor na sha ken inyom i 1914 la, Yesu Kristu ngu Tor u ú. * Ica a gba ga tsô, ua hembe shi ua tim ugomoti mba orumace cica cii avur avur.—Daniel 2:44.

Sha anshighe kpuaa u Yesu pase kwagh shin tar ne la, yange tese averen a hemen u Aôndo ua va a mi sha shighe u una hide a hemen uumace la. Ityakerada i Ivangeli la tese ikyav ér Yesu yange lu a mhôônom ma zungwen sha ior mba yange ve lu ken ibanave shi i eren a ve dang dang la. Yange bee mbauangev angev shi koso mba ijen kôr ve la shi nder mbakpenev kpaa. Akaa a  utaha a sha gbaaôndo je kpa yange ungwa imo na. (Mateu 11:5; Marku 4:37-39; Luka 9:11-16) Hen ase ken ishima kwagh u Yesu una er zum u una yar tom a tahav mbu been a mzeyol mbu naagh ku ipaa ku yange na la sha u van uumace mba ungwan tindi a mtsera la sha wono! Bibilo er ityendezwa ér sha ikyev i mtemtor u Kristu la Aôndo “Una ese [uumace] mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga.”—Mpase 21:4.

Mba Ve Lu Yan Ican Vea Zua a Msurshima

Nenge er i lu kwagh u taver se ishima u fan ser Aôndo wase u dooshima man u hemban agee Yehova a we ikyo a vese, shi ica a gba ga tsô una va uumace a myôhôryol sha wono! Kera cii cii je, or u nan lu uange tsung yô ka nan lumun twersôron u ua bee nan angev la a ishima i nan, aluer ka u twersôron la ua nyoon nan je kpaa. Sha gbenda shon môm, aluer se fa ser gbenda u Aôndo a lu eren kwagh ne ua va se a averen a lun gbem sha won yô, mfe ne una fatyô u taver se zum u se tagher a nyityô mbamtaver mba ve hira lu hegen ne cii.

Ricardo ngu môm ken mba ve hen u zuan a msurshima ken uityendezwa mba ken Bibilo yô. A kaa wener “zum u kwase wam kpe kera yô, m kera soo u lun imôngo a ior ga, kpa m kav fese je mer u eren kwagh nahan ne una hide a kwase wam ga shi ieren ne ia hemba nan mo ishima vihin kpaa.” Sha nahan yô, Ricardo gema za hemen a ieren na i zan mbamkombo mba Mbakristu shi samber a loho u ken Bibilo hen mbagenev la her. Ricardo kaa wener “er m nenge mer Yehova ngu suen mo sha dooshima shi ngu ungwan mbamsen av sha akaa a a lu inja er nga cuku kpaa yô, m seer kporom ikyua a na. Ka er yange m fa mer Aôndo ngu tesen mo dooshima nahan ve m fetyô u wan ishima a ikyaren i hemban vihin i ngôm a maren je m lu a vande tagher a mi ga ne ye.” A̱ lumun wener: “Hegen je kpa ku u kwase wam nyoon mo kpishi, kpa m na jighjigh taveraa nahan mer ma kwagh môm u Yehova a ne ian a er se u una fatyô u van se a mvihi u lun gbem je kpa ngu ga.”

Ú ngu tômon shighe u ‘ú kera umbur ican i uumace ve lu yan hegen ne ga man shi ia kera va ú ken ishima kpaa ga’ er Ricardo man ior mbagenev umiliôn imôngo kpa ve lu tômon nahana? (Yesaia 65:17) Fa ken ishima wer u fatyô u zuan a averen a Tartor u Aôndo aluer u dondo kwaghwan u Bibilo u a kaa ér: “Ker . . . TER er ian i zuan a Na i lu her yô, yila . . . Un er A lu ikua ikua ne.”—Yesaia 55:6.

U ôron Mkaanem ma Aôndo shi henen ma vighe vighe la i hingir kwagh u vesen ken uma wou sha er u fatyô u eren kwagh ne yô. Fa Aôndo shi fa un u a tindi la, ka Yesu Kristu je la. Nôngo kpoghuloo u yaren tom sha atindi a Aôndo, nahan tese wer ú soo u wan iyol you sha ikyev i hementor na la. U eren kwagh sha imba gbenda ngun ne una va ú a msaanyol u vesen hegen je, shin er alaghga ú tagher a ican sha igbenda kposo kposo nahan kpaa. Man ken hemen yô, ú ember uma ken tar u ican i yan ia kera lu ker ga la.—Yohane 17:3.

[Footnotes]

[Box on pages 4, 5]

Se Fatyô u Wan Ishima a Ican i Yan Nena?

“Gema nen ishima i nyian yen la cii, haa nen sha a [Aôndo].” (1 Peteru 5:7) Sha gbaaôndo yô, zum u se lu wan ishima a ican shin se nenge or u doon se ishima nan lu yan ican yô, ka i kondo se iyol shi ishima i vihi se ker shi i lu se er se mba a or ijime ga nahan. Nahan kpa, lu a vangertiôr wer Yehova fa er ishima i lu se ker yô. (Ekesodu 3:7; Yesaia 63:9) Er ior mbajighjigh mba sha ayange a tsuaa la nahan, se fatyô u bughun ishima yase hen a na shi se pase un akperan a se lu a mi man ishimanyian yase kpaa. (Ekesodu 5:22; Yobu 10:1-3; Yeremia 14:19; Habaku 1:13) Alaghga una er ivande sha u been a atsan a ase ga, kpa una ungwa mbamsen asev mba se er a ishima yase cii la, nahan una fatyô u nan se kwaghfan man tahav mbu nôngon a atsan ne.—Yakobu 1:5, 6.

“Bocan u a ve sha a ven sha u karen ne a kar la, a̱ de kpiligh ne iyol er ka kwagh u cier iyol man a va tser ne ga.” (1 Peteru 4:12) Heen ne Peteru ngu ôron kwagh u tôvacan, kpa mkaanem nav man ma a inja hen orjighjigh u nan lu wan ishima a nyityô ican cii la kpaa. Uumace mba ye ican i ibanave man angev man ku u or u doon ve ishima la. Bibilo kaa ér “shighe man aikor” mba ve sha gbenda u hanma or cii. (Orpasenkwagh 9:11) Amba akaa ne cii nga vegher u mlu u orumace nan lu ker hegen ne. U fan kwagh ne nahan la una wase se u wan ishima a ican i yan kua ma kwagh ugen u vihin u una er se cii. (1 Peteru 5:9) U hemban cii yô, u se umbur ishimataver i í ne se ér “ashe a TER nga sha mbaperapera, A kegh ato sha u ungwan myer ve” la, hemba kan kwagh u nan se msurshima cii.—Pasalmi 34:15; Anzaakaa 15:3; 1 Peteru 3:12.

“Ember nen sha ishimaverenkeghen.” (Mbaromanu 12:12) A u geman haren a har ishima yase sha msaanyol u yange se vande lun a mi la yô, se fatyô u gbidyen kwar sha ityendezwa i Aôndo i been a ican i yan kera la. (Orpasenkwagh 7:10) Ishimaverenkeghen i í lu dông ne ia kura se er agunduutya ngu a kura ityough nahan. Ishimaverenkeghen ka i pande mbamnyoon mba vihin mba ken uma la shi ka i̱ wase se u veren ishima nengen ser akaa ne vihi mhen wase man mkpeyol wase u ken ishima man u ken jijingi la ga.—1 Mbatesalonika 5:8.

[Picture on page 4]

Adam man Ifa yange ve venda hemen u Aôndo

[Picture on page 6]

Aôndo er ityendezwa ér una va a tar u ican i yan ia kera lu ker ga yô