Jighjigh Wou Taver Nena Je?
Jighjigh Wou Taver Nena Je?
“Ka sha jighjigh u nan man ne til taveraa ye.”—2 MBAKORINTE 1:24.
1, 2. Hii nan ve i gbe kpee u se lu a jighjigh u nan na, man una hemba taver a taver nena?
MBACIVIR Yehova fa ér gba kpee u vea lu a jighjigh. Sha kpôô yô, “á fatyô u doon Aôndo ishima [tsung] ga, saa sha jighjigh u nan.” (Mbaheberu 11:6) Sha ci u nahan yô, ka a inja u se sônon icighan jijingi man jighjigh u nan, u a lu ityamegh ki dedoo ki jijingi la. (Luka 11:13; Mbagalatia 5:22, 23) U dondon jighjigh u nan u mbananjighjigh a vese imôngo la kpaa una nyôôso ieren ne ken a vese.—2 Timoteu 1:5; Mbaheberu 13:7.
2 Aluer se za hemen u dondon gbenda u Mkaanem ma Aôndo ma ver sha ci u Mbakristu cii la yô, jighjigh wase u nan una hemba taver a taver. Se fatyô u seer lun á jighjigh u nan sha u ôron Bibilo ayange ayange shi yaren tom a ityakerada i “orkuranya u jighjigh” a ne la sha u timen ken Ruamabera kpoghuloo. (Luka 12:42-44; Yoshua 1:7, 8) Shi ka se zua a ishima i taver sha jighjigh u nan u mbagenev sha u zan mbamkombo mba Mbakristu man mbamkohol mbakiriki man mbavesen nduuruu. (Mbaromanu 1:11, 12; Mbaheberu 10:24, 25) Shi jighjigh wase u nan ka a seer taver zum u ka sea lam a mbagenev ken tom u kwaghpasen yô.—Pasalmi 145:10-13; Mbaromanu 10:11-15.
3. Ka iwasen i nyi ka se zua a mi sha ikyev i mbatamen mba ken Kristu mba ve lu a dooshima la sha kwagh u jighjigh u nan na?
3 Mbatamen mba ken Kristu mba ve lu a dooshima ka ve wase u maan jighjigh wase u nan sha u nan se kwaghwan u ken Ruamabera shi taver se ishima kpaa. Mbá a ieren i apostoli Paulu kpa lu a mi la, yange kaa a Mbakorinte ér: “Se mba eren tom a ven imôngo sha ci u né ember yô, gadia ka sha jighjigh u nan man ne til taveraa ye.” (2 Mbakorinte 1:23, 24) Mgem ugen kaa nahan ér: “Se mba eren tom a ven imôngo sha u se na i saan ne iyol, sha ci u jighjigh wen u nan la taver.” (Contemporary English Verson) Ka sha jighjigh u nan man orperapera nana lu uma ye. Sha mimi yô, ma orgen kposo nana fatyô u nan jighjigh sha ci wase ga shin nana na se hingir mba tilen sha mimi ga. Sha gbar ne yô, ‘se tôô ikyav yasegh iyol yase.’—Mbagalatia 3:11; 6:5.
4. Akaa a mbacivir Aôndo mba jighjigh aa i nger ken Ruamabera la aa wase u taver jighjigh wase u nan nena?
4 Akaaeren a ior mbananjighjigh nga ken Ruamabera kpishi. Alaghga se fa akaa kpishi je a yange ve er aa a lu tseer tseer yô, kpa gema jighjigh u nan u ve tese sha akaa a yange ve eren hanma sev, shin sé kaa ser, ken ayange a uma ve cii la di ye? Hegen se time nen sha er yange ve tese ieren ne ken mbamlu mba ve lu kwagh môm a mba se kpa se lu ker nyian ne yô, man kwagh ne una wase u taver jighjigh wase u nan.
Jighjigh u Nan Ne Se Ishimataver
5. Ka ikyav i ken Ruamabera i nyi i lu i tesen ér jighjigh u nan ka a na se ageegh a pasen mkaanem ma Aôndo sha ishima i tavera?
5 Jighjigh u nan ka a na se ageegh a pasen mkaanem ma Aôndo sha ishimataver. Enoki yange tsengaôron ijirôron i Aôndo a ishimataver. Yange kaa ér: “Ter va a uicighan Nav udubu udubu, sha u Una ôr ior cii ijir; mba ve vende Aôndo la cii Una na ve ibo sha aeren a ve a vendan Aôndo la cii, a ve er ve venda Aôndo la man shi sha akaaôron a vihin cii a mbaasorabo mba ve vende Aôndo la ve lu ôron sha a Na yô.” (Yuda 14, 15) Zum u mbaihyomov nav mba vendan Aôndo ungwa mkaanem nam man yô, ve hendan ér vea wua un kpee. Nahan kpa, er lu a jighjigh u nan yô, ôr kwagh vangertiôr, ken masejime yô “Aôndo yem a na,” kar a uma na kera sha u a de ye ican i kuugh ga yô. (Genese 5:24; Mbaheberu 11:5) Se mba zough a imba ivande la hegen ga, kpa Yehova ongo mbamsen asev sha er se pase mkaanem nam sha jighjigh man sha ishimataver yô.—Aerenakaa 4:24-31.
6. Jighjigh man ishimataver i Aôndo na Noa la wase un nena?
6 Ka sha jighjigh u nan man Noa “gba tso sha u yiman ya na” ye. (Mbaheberu 11:7; Genese 6:13-22) Noa yange lu or u “yôôn kwagh u perapera,” u yôô icintan i Aôndo hen kov na sha ishimataver yô. (2 Peteru 2:5) A̱ shi nan kpa ior yange vea naha un tar sha loho u lu pasen sha kwagh u Mngerem ma Deemee la, vough er se kpa ior ka ve naha se tar shighe u ka sea tesen ve akav a Ruamabera a tese ér shi côhiin tsô a tim tar ne kera la nahan. (2 Peteru 3:3-12) Nahan kpa, sha ci u jighjigh man ishimataver i Aôndo a ne se yô, se kpa se fatyô u yôôn imba loho la er Enoki man Noa yange ve yôô nahan.
Jighjigh u Nan Ka a Wase Se u Wan Ishima
7. Aberaham man mbagenev tese jighjigh u nan man ishima i wan nena?
7 Gba u se lu a jighjigh u nan man ishima i wan, hemban cii yô, er se lu keghen mkur u bo tar ne yô. Môm ken “mba [vea] ya dyako i uityendezwa sha jighjigh u nan man sha ishima i wan” yô, ka tertamen Aberaham or u cian Aôndo. (Mbaheberu 6:11, 12) Ka sha jighjigh u nan man a undu tar u Ur, kua yôughyôugh u ú jimin cii va hingir shiror ken tar u Aôndo tôndozwa u nan un la ye. Isaka man Yakob kpaa ve hingir mbayandyako u ityendezwa shon môm môm la. Nahan kpa, lu “ken jighjigh u nan man mban cii ve kpe ye, ve lu a ngohol uityendezwa ga.” Lu sha jighjigh u nan man ve ‘ar sha ijir i i hembe doon la ye, inja na yô, ka Sha je la.’ Nahan Aôndo “sôr ve gar.” (Mbaheberu 11:8-16) Een, Aberaham man Isaka man Yakob—man kasev vev mba cian Aôndo mbara cii—yange ve wa ishima ve lu keghen Tartor u sha u Aôndo la, u a lu sha ikyev i ú a va nder ve shin ku vea hide a lu uma shin tar ne la.
8. Aberaham man Isaka man Yakob yange ve tese ishima i wan man jighjigh u nan nena?
8 Aberaham man Isaka man Yakob yange ve gbihi jighjigh ve u nan la ga. Yange ve nenge a Tar u ityendezwa la ga, shi ve nenge shighe u akuraior cii zua a iveren sha ikyev i tsombor u Aberaham la kpaa ga. (Genese 15:5-7; 22:15-18) Shin er uderimbaanyomov kar imôngo man ‘gar u Aôndo sôr’ la lu a hingir kwagh jim jim ga nahan kpa, ior mban za hemen u tesen jighjigh u nan man ishima i wan ken ayange a uma ve cii. Sha kpôô yô, er yange ve tese jighjigh nahan, se kpa se er nahan vough hegen u Tartor u Mesiya u sha la u lu jim jim ne.—Pasalmi 42:5, 11; 43:5.
Jighjigh u Nan Ka a Har Ishima Yase sha Akaa a A Hembe Lun a Inja Cii La
9. Jighjigh u nan ka a bende a akaa a or tsua u eren la nena?
9 Uter mba tamen mba jighjigh mbara yange ve dondo gbenda uma u hôngorough u Mbakanaan eren la ga, sha ci u yange ve har ishima sha akaa aa a hembe lun a inja yô. Kape se kpaa jighjigh u nan ngu a wase se u tsuan akaa a ken jijingi aa a wase se u palegh u nyôron iyol ken tar u ú lu sha ikyev i orbo Satan Diabolo je la.—1 Yohane 2:15-17; 5:19.
10. Hii nan ve se fe ser Yosev yange tsua akaa aa a hembe lun a inja aa akaa a zan gwa aa tar nee?
10 Aôndo yange bugh gbenda Yosev wan u Yakob hingir orhemen u nengen sha kwaghyan ken tar u Igipiti, nahan kpa u ngu wer lu awashima na u lun ityagheror u tar ne ga. Yosev lu a jighjigh sha uityendezwa mba Yehova, man sha shighe u lu anyom 110 la kaa a anngôôv nav ér: “M ngu kpen; Aôndo Una va sôr ne kpee je, Una due a ven ken tar ne, Una yem a ven ken tar u A bum er Una na Aberaham man Isaka man Yakob yô.” Yosev yange kaa ér i za ii un ken tar u ityendezwa la. Kpen yô, i shighe un icigh ki yangen mhee, i wa un ken akwati ken Igipiti. Nahan shighe u i va due a Mbaiserael ken uikyangen ken Igipiti kera la, Profeti Mose na zwa wener i̱ tôô ikyom i Yosev sha u a za ii ken Tar u Ityendezwa la yô. (Genese 50:22-26; Ekesodu 13:19) Imba jighjigh u nan u Yosev la a mbgbegha se u tsuan akaa aa a hembe lun a inja a u tsuan akaa a zan gwa aa tar ne la.—1 Mbakorinte 7:29-31.
11. Ka ken gbenda u nyi nahan Mose yange tese ikyav ér un tsua u eren akaa a ken jijingii?
11 U Mose yange ma hingir ikpuror u fan takerada u ken tsombor ú tor u Igipiti yô, gema tsua “u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la.” (Mbaheberu 11:23-26; Aerenakaa 7:20-22) Kwagh ne yange na yô, shagba u taregh kar un, shi er alaghga yange ma i er ku na sha civir ma i ii un ken akwati u doonashe tsung hen ma ijiir i civirigh i ken Igipiti la yô, lu nahan ga. Kpa ka nyi kwagh u injaa je yange ma zua a mi u a tôô a kar sha ian i civirigh i̱ hingir “or u Aôndo” man orhimen u Tindi u ikyuryan man profeti u Yehova man môm ken mba ngeren Bibilo laa? (Esera 3:2) Kwagh u a hembe gban we ishima yô, ka u keren shagba u tar ne, shin jighjigh u nan wase u ú tsuan akaa a ken jijingi a a hembe lun a injaa laa?
Jighjigh u Nan Ve a Uma u Injaa
12. Jighjigh u nan yange bende a uma u Rahabi nena?
12 Jighjigh u nan ngu a na ior ve tsua u eren akaa aa a hembe lun a inja tseegh ga, kpa ngu a va ve a uma u injaa. A̱ shi nan kpa Rahabi u lu ken gar u Yeriko la yange una nenge uma na u ijimbagh la ér ka gbilinkwagh. Nahan kpa, zum u va hingir u nan jighjigh yô, uma na gema! Yange “i na un ishô sha aeren [a jighjigh u nan] la gadia a nyôr a mbatyomov [Mbaiserael] man a due a ve sha gbenda ugen kposo,” nahan ve war sha ikyev i mbaihyomov vev Mbakanaan. (Yakobu 2:24-26) Shi Rahabi yange va kaven ér Yehova ka Aôndo u mimi yô, tese jighjigh u nan nahan undu uma na u idyaa la. (Yoshua 2:9-11; Mbaheberu 11:30, 31) Yange vôso or u civir Yehova, lu ma or u Kanaan u nan jighjigh ga la ga. (Duteronomi 7:3, 4; 1 Mbakorinte 7:39) Rahabi yange zua a ian i civirigh i lun ngôtamen u Mesiya. (1 Kroniku 2:3-15; Rutu 4:20-22; Mateu 1:5, 6) Shi er mbagenev mba ve kpa ve undu uma u ijimbagh nahan, una va zua a injar igen kpaa—ka mnder u shin ku u a nder un una lu ken paradiso shin tar je la.
13. Davidi yange er isholibo a̱ Batesheba nena, kpa ka ieren i nyi yange tese?
13 Ikyav tese ér Rahabi yange za hemen u dondon gbenda u perapera shighe u undu uma na u isholibo kera la. Nahan kpa, mbagenev mbá mba ve tsegh ayol a ve sha ci u Aôndo ica i gbe kpa ve gem ve er isholibo i vihin tsung yô. Tor Davidi yange er idya a Batesheba shi na i wua nom na ken utya maa kua a Batesheba hingir kwase na. (2 Samuel 11:1-27) Davidi yange gema ishima zungwe tsung, zamber a Yehova ér: “De ngohol Icighan Jijingi Wou her a mo kera ga.” Davidi za hemen u lun a jijingi u Aôndo her. Yange na jighjigh ér sha mhôônom ma Yehova yô, una laha “ishima i zamber, [man] i uren tsung” sha ci u isholibo la ga. (Pasalmi 51:11, 17; 103:10-14) Jighjigh u nan u Davidi man Batesheba la yange na yô ve zua a ian i civirigh i lun ken mbamaren mbatamen mba Mesiya.—1 Kroniku 3:5; Mateu 1:6, 16; Luka 3:23, 31.
Ibumun Ngi i Taver Jighjigh u Nan Wase
14. Ka akav a nyi nahan Gidion yange zua a mi, man kwagh u za hemen ne una fatyô u benden a jighjigh u nan wase nena?
14 Er se zenden sha jighjigh u nan nahan kpa, alaghga ashighe agen se soo ser ma se zua a ibumun i tesen ér Aôndo una wase se. Ka kwagh u Orjir Gidion u lu môm ken mba “ve hemba ityartor ityav sha jighjigh u nan” la kpa yange er je la. (Mbaheberu 11:32, 33) Zum u Mbamidian man akar a ve va ta ityav sha Iserael yô, jijingi u Aôndo va iv ken Gidion. Er sar un u ma un zough a ibumun hen Yehova u tesen ér ngu a na yô, á kaa wener una ver aive a iyôngo sha vande u gbidyen alakema sha mi a lu her zan zan sev puaa sha er una kar a nenge aluer ngu a na yô. Sha ikyaren i hiihii la, avure gba sha aive la tseegh kpa inya yô, gema lu tseghe tseghe. Sha ikyaren i sha uhar la, lu aive tseegh lu tseghe tseghe ye, kpa inya yô, gba avure. Kwagh u za hemen ne na Gidion u suran kwagh la ishimataver, nahan á er kwagh u tesen jighjigh u nan, tsô á hemba mbaihyomov mba Iserael. (Mbaajiriv 6:33-40; 7:19-25) Aluer se soo u tsuan kwagh u se er man se ker ser se nenge a ikyav i ia taver se ishima yô, kwagh ne tese ér se ban a ban a jighjigh u nan je ve ga. Sha kpôô yô, ka se tese ser se mba a jighjigh u nan sha u timen ken Bibilo man ityakerada i Mbakristu shi eren msen sônon hemen u icighan jijingi zum u se lu tsuan akaa a se soo u eren yô.—Mbaromanu 8:26, 27.
15. Aluer se gbidye kwar sha jighjigh u nan u Baraki la yô, se zua a iwasen nena?
15 Yange i nyôôso jighjigh u Orjir Baraki sha kwaghwan, man kwaghwan ne lu ibumun hen a na. Profeti u kwase Debora yange taver un ishima ér a ker gbenda u una yima Mbaiserael sha mkighir u Yabin Tor u Mbakanaan lu kighir ve la. Baraki yange lu a jighjigh u nan, shi yange i taver un ishima acin imôngo ér Aôndo una sue un, nahan á hemen iorov 10,000 mba ve lu a ikyav mbi uityaav myen, ve za hemba akumautya a ageegh a Yabin á kurutya Shisera hemen á la. Tsô ve wa icam i ember mhembe i Debora man Baraki dugh la. (Mbaajiriv 4:1–5:31) Debora yange taver Baraki ishima ér a hingir orhemen u Aôndo a tsough un yô, nahan yange lu môm ken mbacivir Yehova mba yange ve “zenda akumautya a akuraior agen, yevese” sha jighjigh u nan yô. (Mbaheberu 11:34) Aluer se gbidye kwar sha gbenda u Aôndo yange ver Baraki doo doo sha jighjigh u nan na la yô, se kpa alaghga ishima ia mgbegha se ker shighe u iyol i kpe se u eren tom u Yehova u se nenge ser u taver se yô.
Jighjigh u Nan Ve a Bem
16. Ka ikyav i dedoo i nyi Aberaham a ver sha u keren bem a Loti?
16 Jighjigh u nan ve a bem man mlu u kundu kundu di vough er ngu a wase se u kuren tom u Aôndo u ú taver se u eren la nahan. Zum u mbakuranilev mba Aberaham man mba Loti mough num ayol a ve man hingir u vea pav yô, Aberaham u lu tamen a Loti wan u anngô na la na un ian ér a tsôr tar u hemban doon u u lu gwergwer yô. (Genese 13:7-12) A̱ shi nan kpa Aberaham yange una er msen hen Aôndo sha jighjigh ér a wase un u sôron mzeyol la. U yange ma hemba veren mtsera na ken hemen yô, gema sôr ikyaa ne ken bem. Aluer ayôôso zua se a anmgbian wase u ken Kristu yô, se er msen sha jighjigh u nan shi se “ker bem” kpaa, se umbur ikyav i Aberaham i yange tese ikyo i wan sha dooshima la.—1 Peteru 3:10-12.
17. Hii nan ve se fatyô u kaan ser ayôôso a Paulu man Barnaba man Marku la yange kure ken beme?
17 Time ase nenge er u eren sha atindiakaa a Mbakristu sha jighjigh u nan la i lu kwagh u una wase se u keren bem yô. Zum u Paulu wa iyol u moughon zende na u mishen u sha uhar la yô, Barnaba lumun a mhen u ve er ér vea hide a za sôr atôônanongo a ken Shiperu man Ashia u Kiriki la. Nahan kpa Barnaba gema soo ér una za a anmgbian na Marku. Paulu yange venda sha ci u Marku yange undu ve ken Pamfilia. ‘Anyiman gba hen atô ve tsung,’ nahan anyiman ne na yô ve pav zende. Barnaba yange kua a Marku ve yem ken Shiperu, Paulu di tsua Shila hingir huror na ve yem ken ‘Shiria man Shilishia, ve lu nyôôso iniongo i Kristu asema.’ (Aerenakaa 15:36-41) Ica i gba ga tsô ayôôso la kure, gadia Marku lu vea Paulu ken Roma man apostoli ne ôr kwagh na sha gbenda u dedoo. (Mbakolose 4:10; Filemon 23, 24. 23:24) Zum u Paulu lu orkwar ken Roma, ken inyom i 65 S.W. la, ôr kwagh a Timoteu kaa ér: “Kua a Marku, va a na, gadia ngum a inja kpishi sha tom.” (2 Timoteu 4:11) A̱ shi nan kpa Paulu yange gema mlu na vea Barnaba man Marku hingir itinekwagh i una teren ken mbamsen nav mba jighjigh la, nahan kwagh ne yange va a mlu u kundu kundu hen atô ve u a gbe a zough a “bem u Aôndo” la.—Mbafilipi 4:6, 7.
18. Yuodia man Suntuki yange ve kure ayôôso a hen atô ve la nena?
18 Sha mimi yô, er se yen yô, “se mba nenge gbev sha akaa kpishi.” (Yakobu 3:2) Anzughul yange gba hen atô u kasev Mbakristu uhar mba Paulu nger kwagh ve yô, ér: “M ngu wan Yuodia kwagh shi m ngu wan Suntuki kwagh kpaa mer, ve̱ zua, ve̱ lu kwagh môm ken Ter. . . . Wase kasev mban. Ve er tom sha u pasen Loho u Dedoo a mo imôngo tsung.” (Mbafilipi 4:1-3) A̱ shi nan kpa, kasev mbaciviraôndo mban yange ve sôr ayôôso ve la ken bem sha u yaren tom a kwaghwan u i we ken Mateu 5:23, 24 la. Nyian kpaa u yaren tom a atindiakaa a Ruamabera sha jighjigh la una wase kpishi u van a bem.
Jighjigh u Nan Ka a Wase Se u Wan Ishima
19. Ka zayol u nyi yange kanshio u vihin jighjigh u nan u Isaka man Rebeka?
19 Jighjigh u nan una wase se u wan ishima a ican. Alaghga or u nan er batisema ken tsombor wase nan per tindi u Aôndo nan vôso or u nan jighjigh ga, nahan kwagh ne na ishima za se iyol kpishi. (1 Mbakorinte 7:39) Ishima yange i za Isaka man Rebeka iyol tsung, sha ci u wan ve Isou vôso kasev mba civiraôndo ga. Kasev nav mba ve lu ityô i Mbahiti mbara ve “na Isaka vea Rebeka ishima i vihin kpishi”—je yô, Rebeka kaa wener: “Nyôrom iyol a ônkasev mba Mbahiti mban. Aluer Yakob una er kwase ken ônkasev mba Mbahiti, inja mban nahan, ken ônkasev mba hen tar ne yô, me shi me lu uma sha won sha ci u nyi?” (Genese 26:34, 35; 27:46) Nahan kpa, zayol u Isaka man Rebeka ve tagher a mi ne vihi jighjigh ve u nan mayange ga. Se kpa se taver nen a taver jighjigh wase u nan shighe u se tagher a mbamzeyol mba taver tsung mba ve hagher se u nôngon a ve yô.
20. Ka ikyav i jighjigh u nan i nyi se zough a mi ken Rutu man Naomi?
20 Naomi lu kwase u beenyol u ken tar u Yuda, nahan fa wener kasev mbagen ken Yuda vea mar ônov mba vea lu tertamen u Mesiya la. Nahan kpa er ônov nav kpe a tseen shi un kpa kar mar yô, ishimaveren i alaghga tsombor na ua ver tse u Mesiya una due her la lu kpeghee tsô. Nahan cii kpa, Rutu kwase u wan na kpe undu la gema er igyandenor Boashi, mar wan a na u nomso, nahan maa hingir ngôtamen u Yesu, u lu Mesiya la! (Genese 49:10, 33; Rutu 1:3-5; 4:13-22; Mateu 1:1, 5) Jighjigh u nan u Naomi man Rutu la wase ve vé hemba ican, nahan kwagh ne va ve a iember. Aluer se kpaa se mba a jighjigh u nan taveraa shighe u se tagher a ican yô, se zua a iember ngôgh.
21. Ka akaa a nyi nahan jighjigh u nan ka a er sha ci wase, man ka nyi i gbe u se kange ishima u erene?
21 Er se fe kwagh u kper ga nahan kpa, sha jighjigh u nan yô, se fatyô u hendan a nyityô mtaver u se tagher a mi cii. Jighjigh u nan ngu a na se ishimataver man ishimawan. Ngu a na se har ishima sha akaa a a hemba lun a inja la, shi ngu a na se mkom ken uma kpaa. Jighjigh u nan ve aa akaa a dedoo sha ikyaryan yase a mbagenev, shi hembe mbamzeyol kpaa. Nahan se lu nen “mbananjighjigh sha er uma una war yô.” (Mbaheberu 10:39) Sha a agee a Aôndo u dooshima Yehova, man sha ci u iengem na kpaa yô, se za nen hemen u lun a jighjigh u nan taveraa.
Ú Na Mlumun We Nyi?
• Ka akav a tesen a ken Ruamabera a nyi a tese ér jighjigh u nan una wase se u lun a ishima i tavera?
• Hii nan ve se fatyô u kaan ser jighjigh u nan ka a wase se u lun a uma u injaa?
• Jighjigh u nan ve a bem nena?
• Ka ikyav i nyi i lu i tesen ér jighjigh u nan ka a wase se u wan ishima a icana?
[Study Questions]
[Pictures on page 10]
Jighjigh u nan yange na Noa man Enoki ishimataver i yôôn loho u Yehova
[Pictures on page 11]
U lun a jighjigh u nan imba i Mose la ka a mgbegha se u tsuan akaa a ken jijingi a se we ishima u eren yô
[Pictures on page 12]
Ibumun i Aôndo yange na Baraki man Debora kua Gidion ér una wase ve la yange taver jighjigh ve u nan