Mimi Je, U Na Loho U Dedoo Jighjigh Kpa?
Mimi Je, U Na Loho U Dedoo Jighjigh Kpa?
“Tartor u Aôndo mgbôghom ve; gema nen asema, na nen Loho u Dedoo ne jighjigh.”—MARKU 1:15.
1, 2. Ú pase kwaghôron u Marku 1:14, 15 la nena?
YESU KRISTU yange hii tom na u vesen la ken Galilia ken inyom i 30 S.W. la. Lu pasen “Loho u Dedoo u Aôndo” kaan ér: “Ayange kuma, tartor u Aôndo mgbôghom ve; gema nen asema, na nen Loho u Dedoo ne jighjigh.” Mkaanem nam man yange ma sagher Mbagalilia kpishi ken asema.—Marku 1:14, 15.
2 “Ayange kuma” aa Yesu una hii tom na shi ior vea tsua gbenda u Aôndo una lumun ve yô. (Luka 12:54-56) Yange “Tartor u Aôndo mgbôghom” sha ci u Yesu u i Tsegh un Tor la lu hen atô ve. Tom na u pasen kwagh la yange u mgbegha mbaasemaamimi nahan ve gema asema. Kpa yange ve ‘na Loho u Dedoo jighjigh’ nena, man se kpaa se na loho u dedoo jighjigh nena?
3. Kanyi nahan ior ve lu eren sha u tesen ér ve na loho u dedoo jighjigh?
3 Apostoli Peteru yange taver ior asema ér ve gema asema di er Yesu kpa er nahan. Zum u Peteru lu ôron kwagh a Mbayuda ken Yerusalem sha iyange i Pentekosti u 33 S.W. la yô, á akaa a ve ér: “Gema nen asema, i̱ er hanmô wen batisema ken iti i Yesu Kristu sha mde u asorabo a en, tsô né ngohol Icighan Jijingi iwua je.” Ior udubu udubu yange ve gema asema ve er batisema shi ve hingir mbadondon Yesu. (Aerenakaa 2:38, 41; 4:4) Atôatyev a yange va gema asema ken inyom i 36 S.W. la kpaa er nahan vough. (Aerenakaa 10:1-48) Sha ayange ase ne kpaa mne u ior udubu udubu ve lu nan loho u dedoo jighjigh ne ngu mgbeghan ve mba geman asema sha asorabo a ve, tseghan ayol a ve sha ci u Aôndo shi eren batisema kpaa. Ve ngohol loho u dedoo u myom ne shi mba tesen jighjigh u nan ken naagh ku ipaa ku Yesu la. Heela tsegh ga, mba eren akaa a perapera shi ve ta ikyar a Tartor u Aôndo kpaa.
4. Kanyi i lu jighjigh u nan na?
4 Kanyi i lu jighjigh u nan na? Apostoli Paulu nger ér: “Jighjigh u nan yô, ka u fan kwagh u ishimaverenkeghen yase i lu sha mi la dedoo a akpelan a tan ga, ka ikav i akaa a i nengen a mi ga la.” (Mbaheberu 11:1) Jighjigh wase u nan ngu a na se lu a vangertiôr sha hanma kwagh u Aôndo a tendezwa ken Mkaanem nam cii inja er kwagh shon vande eren nahan. Ka di vough er se mba a takerada u tesen ér se mba a ma ikyav mbì mbí lu mbi yasev nahan. Shi jighjigh u nan “ka ikav i akaa,” shin ikyav i vangertiôr u or lu a mi sha akaa a i nengen a mi ga la. Shin er se lu a nenge a akaa la ga nahan kpaa mhen wase man ishima yase i i̱ lu a iwuese la ka i na se lu a vangertiôr ser akaa la a̱ er kpôô kpôô.—2 Mbakorinte 5:7; Mbaefese 1:18.
Gba u Se Lu a Jighjigh u Nan!
5. Hii nan ve jighjigh u nan a lu hange hange?
5 I mar se a mgbe u kwagh u ken jijingi gban se ishima la, kpa i mar se a jighjigh u nan ga. Sha kpôô yô, “ka ior cii ve lu a jighjigh u nan ga.” (2 Mbatesalonika 3:2) Nahan kpa, gba kpee u Mbakristu vea lu a jighjigh u nan cii man vea ya dyako u uityendezwa mba Aôndo mbara ye. (Mbaheberu 6:12) Zum u Paulu tér akav kpishi a tesen jighjigh u nan bee kera yô, á nger ér: “Er ikpela i mbashiada i vesen ve kase se yô, sé shir nen hanma ikav kua isholibo i ka i tseren se abur abur la, sé gba nen ayem sha ishima i taver tsung sha gesa u ayemegh u i ver se sha ishi la. Sé veren nen ashe sha Yesu Orhemen man Orkuren u jighjigh wase u nan” la. (Mbaheberu 12:1, 2) “Isholibo i ka i tseren se abur abur” la kanyi? Ka m-ban u jighjigh u nan, shin m-undu u or undun jighjigh u nan u yange nan vande lun a mi la. U se nyôôso jighjigh u nan wase dông yô, sar se ‘ver ashe sha Yesu’ shi se dondo ikyav na keng je. Shi gba u se nyagh dang u eren shi se hendan a asaren a iyolough shi se palegh ieren i veren ishima sha uyôughyôughmbaakaav kua mbamhen mba tar ne man aeren a tyôô aa ruamabera a vende la. (Mbagalatia 5:19-21; Mbakolose 2:8; 1 Timoteu 6:9, 10; Yuda 3, 4) Heela tseegh ga, gba kpee u se na jighjigh ser Aôndo ngu a vese shi mimi je akaawan aa á we ken Mkaanem nam la nga a inja tsung.
6, 7. Er nan i doo u eren msen sônon jighjigh u nan na?
6 Sha tahav asev tseegh yô, se yina u maan jighjigh u nan ken vese. Jighjigh u nan ka vegher u ityamegh ki icighan jijingi shin tahav mbu tomov mbu Aôndo. (Mbagalatia 5:22, 23) Man aluer gba u se nyôôso jighjigh u nan wase di ye? Yesu kaa ér: “Aluer . . . ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:13) Een, se sôn nen icighan jijingi ken msen gadia una wase u maan jighjigh u nan u i gbe u se lu a mi ve se er ishima i Aôndo la shin sea lu ken mbamlu mba taver tsung je kpaa.—Mbaefese 3:20.
7 Ka a inja u eren msen sha u seer lun a jighjigh u nan. Zum u Yesu lu wan iyol u una dugh jijingi u bo ken wanakiriki ugen yô, ter na zamber kaa ér: “M na jighjigh, wasem sha myina u jighjigh wam u nan ne.” (Marku 9:24) Mbahenen mba Yesu kpa yange ve kaa a na ér a ‘seer ve jighjigh u nan!’ (Luka 17:5) Nahan yô, de se er nen msen se sôn nen ser i na se jighjigh, se lu nen a vangertiôr ser Aôndo ongo amba a msen la.—1 Yohane 5:14.
Ka Kwagh u Hange Hange u Nan Mkaanem ma Aôndo Jighjigh
8. U se nan Mkaanem ma Aôndo jighjigh la una wase se nena?
8 Er ayange shi di kpuaa u Yesu una kpe sha u nan naagh yô, á kaa a mbadondon nav ér: “Asema a̱ de kera te ne kwe ga; na nen Aôndo jighjigh, Mo kpaa nam nen jighjigh.” (Yohane 14:1) Se Mbakristu se na Aôndo jighjigh shi Wan na kpa se na un jighjigh. Kpa gema Mkaanem ma Aôndo di ye? Aluer se time sha ma shi se mba a jighjigh u nan tsung ser ma a kwaghwan u a hembe doon cii shi ma gbenda u kôôm se yô, ma a lu a iwasen ken uuma asev tsung je.—Mbaheberu 4:12.
9, 10. Ú pase kwagh u i ôr sha kwagh u jighjigh u nan ken Yakobu 1:5-8 la nena?
9 Er se lu uumace mba ve yen yô, uma wase mgbough a mzeyol. Nahan kpa, Mkaanem ma Aôndo ma a fatyô u wasen se sha mimi aluer se na ma jighjigh yô. (Yobu 14:1) U tesen ikyav yô, se tôô ser se tagher a ma ikyaren nahan se fa gbenda u se kar sha mi ga. Mkaanem ma Aôndo na se kwaghwan ne ér: “Aluer kwaghfan una yina mô wen yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je. Kpa nana̱ sôn sha jighjigh u nan, nana̱ de te akpelan sha ma kwagh ga, gadia or u tan akpelan yô, nan bee igôndomnger i ahumbe a mough a mi a yemen a mi yô. Imbaor la yô, nana̱ de kera henen er nana zua a ma kwagh hen Ter ga, ka or u asema ahar, nan ngu ta ta ta sha igbenda i nan cii.”—Yakobu 1:5-8.
10 Aluer kwaghfan yina se man se sôn Yehova Aôndo ser a na se yô, una kôhô se ashe ga. Kwagh u una er yô, una wase se u nengen imeen la sha gbenda u vough. Alaghga mbananjighjigh mba se civir a ve imôngo la vea wase se u umbur avur a ruamabera a a wase se yô, shin se umbur á shighe u se lu timen ken Bibilo la. Shin alaghga icighan jijingi u Yehova una hemen se sha ma gbenda ugenegh. Aluer se za hemen u ‘sônon sha jighjigh u nan, se̱ ta akpelan sha ma kwagh ga’ yô, Ter wase u sha una na se kwaghfan u una wase se u wan ishima a ameen yô. Aluer yange sea lu er agôndoamnger a ahumbe nga a daase a mi la yô, ma i lu kwagh u se ver ishima ser se zua a ma kwagh hen Aôndo ga. Sha ci u nyi? Sha ci u ieren ne tese ér se lu mba asema ahar shi se lu mba eren msen a ishima i môm ga, shi se lu mba eren nahan sha igbenda igen—een, kua sha jighjigh wase u nan la je kpaa. Nahan gba u se na mkaanem ma Aôndo jighjigh taveraa shi se dondo mkôôm u ma ne la kpaa. De se time nen sha akav agen aa a tese er ma ne iwasen shi ma tesen gbenda la.
Jighjigh u Nan man Kwaghyan
11. U nan mkaanem ma Aôndo jighjigh la ngu a na se vangertiôr u nyi sha gbar u ugbayol asev mba sha ayange ayange laa?
11 Aluer ican i kwaghyan shin ibanave tser se di ye? U nan mkaanem ma Aôndo jighjigh la ngu a na se fa dedoo a akpelan a tan shio ser, Yehova una wa ikyo sha ugbayol asev mba sha ayange ayange la, shi se fa ser ken tar u he la yô, una na mba a doo ve ishima la cii akaa mgbeghaa. (Pasalmi 72:16; Luka 11:2, 3) Alaghga ishima ia taver se ker aluer se time sha gbenda u Yehova yange na Eliya kwaghyan sha shighe u ijen gba la yô. Ken masejime yô, Aôndo er ivande seer mwem man mkurem, akaa ne war uma u kwase ugen man wan na kua Eliya. (1 Utor 17:2-16) Zum u Mbababilon kase Yerusalem sha uitya la kpaa kape Yehova koso profeti Yeremia je la. (Yeremia 37:21) Shin er Yeremia man Eliya ve lu a kwaghyan côhiin nahan kpaa, Yehova koso ve. Nyian kpaa, mba ve lu a jighjigh u nan hen a na yô kape a lu eren a ve vough je la.—Mateu 6:11, 25-34.
12. Jighjigh u nan una wase se u zuan a ugbayol asev mba hange hange la nena?
12 Mne u nan jighjigh shi eren sha atindiakaa a Bibilo la una na se hingir yôughyôugh ga, kpa una wase se u zuan a kwagh u se kure ugbayol asev yô. U tesen ikyav yô: Bibilo wa se kwagh ér se lu ior mba lun a mimi iyol mba eren kwagh sha inja, shi se lu ior mba eren tom kpoghuloo kpaa. (Anzaakaa 22:29; Orpasenkwagh 5:18, 19; 2 Mbakorinte 8:21) Mayange je, se nenge nen iti i dedoo i lun a mi ape se eren tom la ser ka beerkwagh ga. Sha ajiir a ityom i sha tôndo i i kimbin inyaregh kpishi i ban je kpaa, mbatomov mba ve lu a mimi iyol, ve fe tom shi ve eren tom kpoghuloo la mba hembe zuan a kwagh a mbagenev. Shin er alaghga mbatomov mban vea lu a kwagh ave kpuaa nahan kpa, mba zough a ugbayol vev mba hange hange, shi mba zough a mkom sha u yan kwaghyan u sha iusa ve.—2 Mbatesalonika 3:11, 12.
Jighjigh u Nan Wase Se u Wan Ishima a Ijungwen
13, 14. Jighjigh u nan ngu a wase se u wan ishima a ijungwen nena?
13 Mkaanem ma Aôndo pase se sha mimi ér u zungwen zum u or u doon se ishima nan kpe la ka kwagh u sha gbaaôndo. Tertamen Aberaham u lu orjighjigh la yange zungwe ku u Sara kwase na u doo un ishima la. (Genese 23:2) Zum u Davidi ungwa ku u wan na Abesalom yô, zungwe kpishi. (2 Samuel 18:33) Yesu u lu or u lun a isholibo iyol ga la je kpa vaa ku u ijende na Lasaru. (Yohane 11:35, 36) Zum u or u doon se ishima nan kpe yô, alaghga se zungwe je er se wua iyol yase nahan, kpa u nan uityendezwa mba ken Mkaanem ma Aôndo jighjigh la una wase se u wan ishima a imba ijungwen la.
14 Paulu kaa ér, ‘m ngu a ishimaverenkeghen sha Aôndo mer mbaperapera kua mba ve lu perapera ga vea nder shin ku.’ (Aerenakaa 24:15) Doo u se na jighjigh sha kwagh u Aôndo a ser a ver u va nderen ikpelaior i i sar ku la. (Yohane 5:28:29) Ken ve mba a va nder ve la yô, a lu Aberaham man Sara, Isaka man Rebeka kua Yakobu man Lea—ve mba ve lu yaven shin ku keghen mnder u a va nder ve ken tar u he la. (Genese 49:29-32) Nenge er a lu kwagh u doon, zum u a va nder mba ve lu yaven shin ku la vea lu uma shin tar ne sha wono! (Mpase 20:11-15) Kpa hegen ne yô, jighjigh u nan una bee a ijungwen kera cii ga, kpa una na se kporom ikyua a Aôndo u a wasen ser u wan ishima a ijungwen ne.—Pasalmi 121:1-3; 2 Mbakorinte 1:3.
Jighjigh u Nan Taver Mbayinanasema Asema
15, 16. (a) Hii nan ve se fatyô u kaan ser u mbananjighjigh yinan shima la ka kwagh u kpiligh se iyol ga? (b) Kanyi se fatyô u eren sha u hemban ishimayinan na?
15 Mkaanem ma Aôndo tese ér ior mba ve ne Aôndo jighjigh je kpaa alaghga vea hingir u yinan asema. Yobu yange hen ér Aôndo ta un kera shighe u tagher a ikyaren kpoghuloo la. (Yobu 29:2-5) Yerusalem man girgar na cii yange hingir ice nahan kwagh ne na ishima vihi Nehemia kpishi. (Nehemia 2:1-3) Peteru kpaa shighe u nyiman Yesu kera la ishima za un iyol nahan ‘vaa tsung.’ (Luka 22:62) Paulu yange taver mbananjighjigh a na imôngo mba ken tiônnongo u ken Tesalonika la ishima ér ve “taver . . . mba ve yen ishima la asema.” (1 Mbatesalonika 5:14) Nahan yô, ka kwagh u kpilighyol u mba ve lu a jighjigh u nan nyian ne yinan ishima ga. Tsô kanyi se fatyô u eren sha er se hemba ishimayinan na?
16 Shighe u se lu tagher a mbamzeyol kpishi mba vihin tsung yô, alaghga se yina ishima. Kpa er ma se nenge mbamzeyol mbara ser ka ikyaa i vesen je i va te sha avese la yô, se fatyô u sôron mbamzeyol mban sha adondo adondo sha u yaren tom a atindiakaa a Bibilo. U eren nahan ne una wase u heghem ishimayinan yase la. U sôron akaaeren a ase veren vough shi nan iyol yase m-mem kpishi la kpaa a lu kwagh u wasen. Kwagh u a lu u bunden ga yô, ka un ne: Mne u nan Mkaanem ma Aôndo jighjigh la ngu a va a mkpeyol ken jijingi sha ci u ngu a nyôôso vangertiôr u se lu a mi ser sha mimi je we se ikyo la.
17. Er nan ve se fe ser Yehova we se ikyo?
17 Peteru na se mkaanem ma surun ishima man ér: “Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha. Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Peteru 5:6, 7) Orpasalmi wa icam ér: “TER ka A kôr mba ve gbe la cii, kenden a mba ve lu ngugh ngugh la sha.” (Pasalmi 145:14) Se na nen uityendezwa mban ne jighjigh, gadia ka ken Mkaanem ma Aôndo ve dugh ye. Shin er alaghga ishimayinan yase ia za hemen her nahan kpa, nenge er i lu kwagh u taver jighjigh wase u nan u se fan ser se fatyô u haan ishima i nyian yase sha ikyev i Ter wase u sha u dooshima la sha wono!
Jighjigh u Nan man Ameen Agenegh
18, 19. Jighjigh u nan ngu a wase se u wan ishima a mnyoon shi surun mbauange mba ve civir a vese imôngo la ishima nena?
18 Shighe u se shin or u doon se ishima nan kôô ikyôr inya sha ci u côron uange yô, alaghga kwagh ne una lu ikyaren i vesen i karen jighjigh wase u nan. Shin er Bibilo i ôr kwagh u tesen ér yange i bee Mbakristu amba er Epafroditu man Timoteu man Terofimu angev sha ivande i eren ga nahan kpa, Yehova yange wase ve u wan ishima je ka u henen a hen ga. (Mbafilipi 2:25-30; 1 Timoteu 5:23; 2 Timoteu 4:20) Heela tseegh ga, orpasalmi wa icam sha kwagh u “Or u nan we mbaatsanev iko” la, ér: “TER Una suwe nan sha gambe u nan u uange; Úna gema myavinya u nan la sha iyange i angev mbu nan.” (Pasalmi 41:1-3) Mkaanem ma orpasalmi ne ma a wase se u surun mbauange mba ve civir a vese imôngo la ishima nena?
19 Gbenda môm u wasen mba ve lu uange ken jijingi la yô, ka u eren msen a ve imôngo shi eren msen sha ci ve kpaa. Er sha ayange ne se sônon ser i bee se angev sha ivande i eren ga yô, se fatyô u sônon Aôndo ser a na ve ageegh u wan ishima a angev vev shi a na ve ageegh a ken jijingi a vea wa ishima sha ashighe a ve vôr yô. Yehova una sue ve, shi aluer mba veren ashe gbenda a shighe u “ma or . . . nana kera kaa er: kwagh nyoon mo, ga,” la yô, jighjigh u nan ve la una hemba taver cii. (Yesaia 33:24) Ka kwagh u surun se ishima u fan ser sha ikyev i Yesu Kristu u i nder un shin ku man Tartor u Aôndo la yô, a pase uumace mba kuran tindi a tuhwa sha ikyev i isholibo man angev kua ku kera cii! Se wuese Yehova ‘un u una bee angev asev cii’ la sha ishimaveren i a ne se i kpilighyol ne.— Pasalmi 103:1-3; Mpase 21:1-5.
20. Hii nan a fatyô u kaan ér jighjigh u nan una fatyô u wasen se u wan ishima ken shighe u “ayange a bo” a iyolbeen laa?
20 Jighjigh u nan shi una wase se u wan ishima a “ayange a bo” a iyolbeen, shighe u mkpeyol man gbong gbong wase ngu a pande la. (Orpasenkwagh 12:1-7) Nahan mbabeenyol mba ve lu avese imôngo cii vea fatyô u eren msen er orpasalmi u hingir orbeenyol ve wa icam ér: “Gadia ka We je U lu ishimaverenkeghen yam ye, . . . De tem kera sha shighe u iyolibeen la ga, de undun mo shighe u agee am a bee la ga” la. (Pasalmi 71:5, 9) Orpasalmi yange nenge ér doo u una pine iwasen hen Yehova di er Mbakristu kpishi mba ve civir avese imôngo mba ve beeyol ken tom u Aôndo ve eren nahan. Sha ci u jighjigh ve u nan la yô, vea fatyô u lun a vangertiôr ér ave a tsôron a Yehova nga suen ve gbem sha won.—Duteronomi 33:27.
Na Jighjigh ken Mkaanem ma Aôndo Her
21, 22. Mlu u se lun a jighjigh u nan la ngu a bende a ikyaryan yase vea Aôndo nena?
21 U nan loho u dedoo man Mkaanem ma Aôndo jimin cii jighjigh la una wase se u seer sôsom a Yehova. (Yakobu 4:8) Sha kpôô yô, ngu Aôndo wase Uhembancii, shi ngu Orgban wase man Ter wase kpaa. (Yesaia 64:8; Mateu 6:9; Aerenakaa 4:24) Orpasalmi wa icam ér: “Ka We, U lu Terem ye, Aôndo wam, man vande u myem wam.” (Pasalmi 89:26) Aluer se na Yehova man Mkaanem nam ma a ne i nger la jighjigh yô, se kpaa una lu se “vande u myem.” Nenge imba ian i civirigh ne sha wono!
22 Yehova ngu Ter u Mbakristu mba i shigh ve mkurem la kua akar a ve aa a lu a ishimaverenkeghen i va yan dyako shin tar ne la. (Mbaromanu 8:15) Mayange je mne u nan Ter wase u sha jighjigh la ve or ahenge ga. Davidi kaa ér: “Gadia terem man ngôm undum, kpa TER Una tôôm.” (Pasalmi 27:10) Heela tseegh ga, se mba a ibumun ne nahan ér: “TER Una gbihi ior Nav kera ga, sha ci u iti Na i vesen la.”—1 Samuel 12:22.
23. Aluer ka u se ember ikyaryan i tsôron vea Yehova yô, kanyi i gbe u se ere?
23 U se ember ikyaryan i tsôron vea Yehova yô, sar se na loho u dedoo jighjigh shi se lumun a akaa a mimi a Ruamabera a ôr la ser—ka Mkaanem ma Aôndo. (1 Mbatesalonika 2:13) Gba kpee u se na Yehova jighjigh taveraa shi se lumun ser Mkaanem nam ma lu iwanger i gbenda wase kpaa. (Pasalmi 119:105; Anzaakaa 3:5, 6) Aluer se mba eren msen hen a na man se mba a vangertiôr ser una tese se erdoo shi una zungwe se mhôônom shi una wase se kpaa yô, jighjigh wase una seer vesen a vese cii.
24. Ka mkaanem ma surun ishima ma nyi i ôr ken Mbaromanu 14:8?
24 Jighjigh u nan mgbegha se se tsegha ayol yase gbem sha won sha ci u Aôndo. Aluer se mba a jighjigh u nan u a taver yô, shin sea kpe je kpaa se mba mbatomov nav mba se tsegh ayol ase sha ci na, mba ve lu a ishimaverenkeghen i mnder u shin ku yô. Een, “sea lu uma shin sea kpe kpaa se mba kwagh u Ter.” (Mbaromanu 14:8) De se kôr mkaanem ma surun ishima man se lu a mi ken asema a ase e̱r se lu nôngon ser vangertiôr wase sha Mkaanem ma Aôndo a lu her ne, shi se za hemen u nan loho u dedoo jighjigh kpaa.
Ú Na Mlumun Wer Nyi?
• Jighjigh u nan kanyi, man hii nan ve i gbe u se lu a ieren nee?
• Hii nan ve i lu hange hange u nan jighjigh ken loho u dedoo man Mkaanem ma Aôndo jimin ciilii?
• Jighjigh u nan ngu a wase se u hendan a ameen kposo kposo nena?
• Kanyi ia wase se u lun a jighjigh u nan here?
[Study Questions]
[Pictures on page 6]
Yehova yange sue Yeremia man Eliya sha ci u ve na un jighjigh
[Pictures on page 7]
Yobu man Peteru man Nehemia yange ve na Aôndo jighjigh taveraa je
[Pictures on page 9]
U se ember ikyaryan i tsôron vea Yehova yô, saa se na loho u dedoo jighjigh