Mimi u ken Ishima La Ka Kwagh u Doon Tsung, kpa Un Tseegh kpa Kuma He?

SHA mimi yô, mimi u ken ishima la gba kwagh ken uma wase u ayange ayange la jee? Í pase inja i “mimi u ken ishima la” ér ka “u eren ayom ga, shin atseregh kpaa ga; u lun a mimi; eren kwagh jighilii; lun a icugh ga.” Nahan wanger, ieren ne ngi a inja sha u maan mlu u dedoo vea mbagenev. Apostoli Paulu yange wa kwagh wener: “Ungwan nen imo i uter enev mba ken iyol ken akaa cii, i̱ de luun tom u sha ashe a ior er mbadoon ityough a ior nahan ga, kpa i̱ lu sha ishima i môm man sha u cian Ter.” (Mbakolose 3:22) Ka anti or je a doo nan u eren kwagh imôngo a imba or u nan eren kwagh a ishima i môm nahan la ga sha wono? Nyian kpa, ior mba í fe ér mba eren kwagh sha mimi la vea hemba zuan aa tom fefa, shi vea hemba lun sha tom ve her gbem kpaa.

Kpa, kwagh u a ne ve mimi u ken ishima la á hembe lun kwagh u injaa cii je yô, ka er ka a bende a mlu wase vea Aôndo la. Yange Mbaiserael mba sha ayange a ngise la vea dondo atindi a Aôndo vighe vighe, shi vea kura uiniongo nav mbara kpaa yô, ve zua a iveren hen a na. Yange Paulu ngur ôron kwagh u mlu u wang u ken tiônnongo yô, a taver Mbakristu asema wener: “Se ya nen iniongo i̱ de lu sha kwa u tse ga, shin sha kwa u bo shin u ifer kpaa ga, kpa i̱ lu sha bredi u i we kwa sha mi ga yô, u wang man u mimi.” (1 Mbakorinte 5:8) Aluer ka u Aôndo una lumun a mcivir wase yô, mimi ka a ka kwagh u injaa tseegh ga, kpa ka kwagh u hange hange je. Nahan kpa, fa wer u lun a mimi ken ishima la tseegh kuma ga. Kwagh ngu hemba nahan.

Ikyav tese ér ior mba yange ve gba zegetso u í yilan ér Titanic la, kua mba yange ve nyôr tso shon kpaa cii, yange vea tôô ken ishima ve ér mimi je tso la una fatyô u urun sha won ga. Kpa, yange moughon zende na u hiihii, ken inyom i 1912 la je tsô, maa za ta sha mngerem ma kôrough sha wuhe hingir awen mara, iorov 1,517 kpe. Alaghga Mbayuda mbagenev mba sha derianyom u hiihii la yange vea na gbenda u ve civir Aôndo la jighjigh a ishima ve i môm ér ka ú mimi, kpa ishima i tseen ve la i̱ lu “sha gbenda u kwaghfan ga.” (Mbaromanu 10:2) Aluer ka u Aôndo una lumun a mcivir wase yô, saa akaa a se ne jighjigh a mi a ishima yase i môm la aa har sha kwaghfan u vough. Á doo Mbashiada mba Yehova mbà ve lu hen ningir wou la u wasen we, sha er ú hen ú fa akaa a á kou ken mcivir u civir Aôndo a ishima i môm man sha mimi kpaa la yô.