“M Zua a Hanma Kwagh u Kwagh a Gbem Sha Mi Cii”

SHA kwagh u ibaver igen i Mzough u Nengen sha Mkpeyol sha Tar cii i̱ er yô, ishimayinan bende aa iorov miliôn 120 sha tar jimin cii hegen. Hanma inyom yô, iorov miliôn môm ka ve sende ayol a ve, man mbagenev mba ve kom iyenge er miliôn 10 zan zan miliôn 20 nahan ka ve nôngo ér vea sende ayol a ve. Ka iwasen i nyi i lu sha ci u mbara mba ve lu a ishimayinan laa? Twersôron ua fatyô u panden ishimayinan, shi u nan or ishimasurun kpa ka kwagh u hange hange. Nahan kpa, mbagenev mba ve lu a ishimayinan seer zuan a iwasen ken ityakerada i Mbashiada mba Yehova i í har sha Bibilo shi í lu a inja er washika u ken tar u France u i nger shin heen ne a tese nahan.

“Semberee ne, m kera nenge a ityôkyaa i shi me lu uma ga. M er msen mer Aôndo una lumun yô, á de me kpe kera. Yange lum inja er m kpe ken atô nahan. Tsô m gba keren iwasen, nahan m er msen hen Yehova kpoghuloo je. Shi m nenge mer doo u me ôr takerada u sha inyom u i yer ér 2002 Yearbook of Jehovah’s Witnesses la, nahan m ôr ú m bee ken ayange atar. Sha mimi yô, ú taver mo ishima kpen kpen je shi ú taver jighjigh wam u nan kpaa.

“M time ken magazin u Iyoukura man Awake! la, man kwagh u m nenge a mi la kpiligh mo iyol kpishi je! Hanma shighe yô, ka m shi ôron umagazin mban ne man m ôr ve je hemba anyom 15 hegen, kpa mayange je m kav er ungeren mba ve lu ker la i lu mba taver or ishima kpishi shi nan or tahav nahan ga. Ungeren mban ôr akaa sha kwagh u dooshima u á lu ieren i i̱ ban sha ayange ne yum ne. M zua a hanma kwagh u kwagh a gbem sha mi cii.”

Bibilo kaa ér: “TER ngu ikua a mba asema a vihin ve la, yem mba ve lu a ishima i zamber yô.” (Pasalmi 34:18) Akperan nga ga, hanma or u ‘ishima i vihi nan’ shin nan “lu a ishima i zamber” cii nana fatyô u zuan a ishimataver man ishimaverenkeghen i kwagh u ken hemen ken Bibilo. Mbashiada mba Yehova mba samber a ityakerada i i̱ har sha Bibilo yô, sha u wasen mba ve lu a zayol la sha er vea zua a mtsera ken Bibilo i Aôndo a ne i nger, i i̱ lu imbor i msurshima la.