Sur Mba Ve Lu Zungwen La Asema
Sur Mba Ve Lu Zungwen La Asema
‘TER shighem mkurem sha u M̱ sur mba ve zungu cii asema’—YESAIA 61:1, 2.
1, 2. Ka unô i doo u se sur ve asema man ka sha ci u nyi?
YEHOVA, Aôndo u a lu a ishimasurun i mimi cii la, tese se ér se wa mbagenev ikyo shighe u kwagh a tser ve yô. A tese se ér se “taver . . . mba ve yen ishima la asema” shi se sur mba ve zungu la cii asema. (1 Mbatesalonika 5:14) Zum u kwagh a gbe mbacivir a vese imôngo sha imba iwasen ne yô, ka se wase ve nahan. Shi ka se tese dooshima hen mba ve lu ken tiônnongo ga la kpaa, ka a̱ lu mba alaghga ve lu a vande tesen se ma ieren i dooshima ma shighe môm ga je kpaa.—Mateu 5:43-48; Mbagalatia 6:10.
2 Yesu Kristu yange ôr kwagh u tom u sha inja i profeti u yange i tsengaôron yô, nahan á kar ú sha iyol na, wener: “Jijingi u Ter AÔNDO ngu sha a Mo, sha ci u TER shighem mkurem; A verem er M̱ sur mba asema a vihi ve la asema, . . . mba ve zungu cii, M̱ sur ve asema.” (Yesaia 61:1, 2; Luka 4:16-19) Mbakristu mba i shigh ve mkurem mba sha ayange a ainge ne kav er i gbe u ve kpa vea er tom ne nahan ica i gba hegen, man “iyôngo igen” la kpa kohol ve ken tom ne saan saan je.—Yohane 10:16.
3. Zum u ior ve pin ér, “Er nan ve Aôndo a ne akaa a tseren ior iana?” yô, se fatyô u wasen ve nena?
3 Zum u uaahe ve er man ishima i lu vihin ior ker yô, ashighe kpishi ka ve pine ér: “Er nan ve Aôndo a ne akaa a tseren ior iana?” Bibilo na ikyar sha mpin ne wang. Nahan kpa, alaghga a tôô or u nan henen Bibilo ga la shighe gôgônan u kaven ikyar i sha kwagh ne tsembelee. Ityakerada i Mbashiada mba Yehova na iwasen sha kwagh ne. * Nahan kpa, hen ior mbagen yô, u hiin kwaghôron a ve sha u tesen ve a tese ivur Bibilo imba er Yesaia 61:1, 2 la tseegh kpa ka kwagh u nan ve ishimasurun, gadia ijiir ne tese er i sar Aôndo pe uumace ve zua a ishimasurun yô.
4. Kwaseshiada ugen ken tar u Poland yange wase wankwase makeranta ugen u yange ule la nena, man vande-eren ne una wase ú sha er we kpa ú wase mbagenev nena?
4 Kwagh gba mbayev man mbaganden kpaa a ishimasurun. Wankwase ugen ken tar u Poland ule tsung nahan a kaa a kwase ugen u lu ijende na yô ér a̱ wa un kwagh u una er yô. Ijende na u lu Kwaseshiada u Yehova ne pine un akaa kure kure, tsô á mase kaven er wankwase ne a lu a mbampin kpishi man ahon a gban sha akaa kpishi yô, inja er: “Er nan ve ifer i ngee yumu? Er nan ve ior ve ye icanaa? Er nan ve anmgbian wam u kwase u a kpe alegh la á lu yan icanaa? Er nan ve m lu a angev mbu shimava? I ôr ken Côôci ér Aôndo soo wener kwagh a lu nahan. Kpa aluer kape kwagh a lu ne yô, me kera na un jighjigh ga!” Kwaseshiada ne er msen hen Yehova ving ving, tsô á kaa wener: “Doom kpishi er ú pinim kwagh ne nahan. Me nôngo me na ú iwasen.” Nahan á kaa a na wener, un kpa yange un lu a ahon a gban sha akaa kpishi shighe u yange un lu anye la, kpa Mbashiada mba Yehova wase un. A pase wener: “I tesem m fa er i lu Aôndo a ne ior ican ga yô. Ve doo un ishima shi ka kwagh u a hembe doon la a soo sha ci ve ye, man ica a gba ga tsô una va a mbamgem mba vesen shin tar ne. Angev man mbamzeyol mba iyolbeen man ku vea kera lu ga, shi uumace mba ungwan tindi vea lu uma gbem sha won—shin tar ungun ne.” Á tese wankwase ne kwagh u a lu ken Mpase 21:3, 4 man Yobu 33:25 man Yesaia 35:5-7 man 65:21-25 la. Mba lamen imôngo shighe gôgônan mba kur yô, wankwase ne maa shir ishima teghelee, kaa wener: “Hegen ne yô, m fa kwagh u m lu uma sha mi jighilii yô. Kwagen kpa m̱ va nenge a wee?” Hanma sati yô, yange i hen Bibilo a na kwa har.
Sur Mbagenev Asema a Ishimasurun i Aôndo a Ne La
5. Kanyi ia fatyô u nan or ishimasurun i mimi shighe u se lu zungwen a nan imôngo laa?
5 Zum u se soo ser se sur mbagenev asema yô, ka i doo kpishi u ôron kwagh a ve sha mhôôn. Ka se nôngo ser se ôr kwagh a or u nan lu ken mzungu la sha mkaanem man ikyenge yase i ken ityo i i̱ tese ér kwagh u a er nan la nyoon se yô. Ka sha u gban di ôron kwagh a nan sha zwa nyohon man ve se kôr cio u eren kwagh ne ga. Bibilo kaa a vese ér, “se̱ lu a ishimaverenkeghen sha ishimawan man ishimasurun i ken icighanruamabera la.” (Ka se se nger i yier ye; Mbaromanu 15:4) Er i lu nahan yô, se fatyô u pasen nan kwagh u a lu Tartor u Aôndo sha shighe u i gbe i doo yô, shi se fatyô u tesen ken Bibilo er ua sôr mbamzeyol mba se lu a mi ainge ne kpaa yô. Se been heela yô, se fatyô u henen a nan imôngo er i hii ve ishimaverenkeghen ne i kom u se har sha mi yô. Ka sha u eren nahan ve se na or ishimasurun ye.
6. Kanyi i doo u se wase ior u kaven sha er vea fatyô u zuan a iwasen kpishi sha ishimasurun i Ruamabera i ne laa?
6 Gba u or u i lu nan na̱n ishimasurun la nana fa Aôndo u mimi, nana fa imba Aôndo u a lu yô, shi nana fa er uityendezwa nav ve kom u haren sha mi yô, ka nahan ve nana zua a mtsera sha kwagh ne doo doo ye. Zum u se soo ser se wase or u nan lu a hingir orcivir Yehova ga yô, ka a inja u se pase nan atôakaa a a dondo heen ne. (1) Ishimasurun i Bibilo i lu a mi la ka hen Yehova u a lu Aôndo u mimi la i̱ dugh ye. (2) Yehova ka Aôndo Uhembansha cii, shi ka Orgban u sha man tar kpaa. Ka Aôndo u dooshima shi ngu a erdoo man mimi wuee kpaa. (3) Aluer se kporom ikyua hen Aôndo sha u zuan a mfe u vough u ken Mkaanem nam la yô, se zua a ishimataver i ia wase se u wan ishima a mbamzeyol yô. (4) Bibilo ngi a avur a ruamabera a a er kwagh sha akaa jighilii a ior kposo kposo ve tagher a mi yô.
7. (a) Kanyi se kôr cio u eren sha u ôron var var ser ishimasurun i Aôndo a ne la “i ngee sha Yesu Kristu”? (b) Ú fatyô u surun or u nan kav ér yange nan vande lun a anza a bo la ishima nena?
7 Mbagenev ôr ior mba ve lu a mfe u Bibilo mba ve lu zungwen la mkaanem ma surun ishima ma ken ruamabera ma má lu ken 2 Mbakorinte 1:3-7 la. Zum u ve lu eren kwagh nahan yô, ka ve pase mkaanem ma má kaa ér “ishimasurun yase kpaa i ngee sha Yesu Kristu” la var var je. (Ka se se nger i yier ye.) Ivur ruamabera ne alaghga ia wase or u fan ér Bibilo ka imbor i nan ishimasurun, man gba u nana seer veren ishima sha i̱. Shi ia fatyô u wan imaagh ki alaghga or nana seer lamen sha akaa agenegh kpaa sha ian igen yô. Aluer or hen ér akaa nga zan nan iyol ka sha ci u akaabo a yange nan vande eren yô, se ôr a ôr nan ijir ga, kpa se ôr nan ser nana zua a ishimasurun sha u ôron kwagh u i nger ken 1 Yohane 2:1, 2 man Pasalmi 103:11-14 la. Sha u eren sha igbenda ne nahan yô, ka se na ior mbagenev ishimasurun i Aôndo a ne la.
Sur Mba Ve Ye Ican Kpishi sha ci u Ipila Shin M-ban u Inyar la Asema
8, 9. A fatyô u nan ior mba ve ye ican sha ci u ipila la ishimasurun sha inja nena?
8 Ior mba se fe iyenge ve jighilii ga yô mba yan ican sha ci u ipila i aferaior a hen ijiir ve shin ipila i ityav mbi nôngon ka mbi va a mi la je gande. Se fatyô u surun ve asema nena?
9 Mbakristu mba mimi ka ve ver ishima sha er vea sue ma nongo ungun shin ungura ken ityav mbi tar ne sha kwaghôron ve shin sha ieren ve tsô kpaa ga yô. (Yohane 17:16) Kpa ka ve yar tom a Bibilo sha inja sha u tesen ér mbamlu mba ainge mba vihin kpishi mban vea za hemen gbem sha won ga. Ashighe agen yô, vea ôr Pasalmi 11:5 sha u tesen er Yehova á nengen mba ipila i doo ve ishima la yô, shin vea ôr Pasalmi 37:1-4 sha u tesen kwaghwan u Aôndo a ne ér se de nôngon ser se or iyev ga, kpa se suur sha Aôndo la. Mkaanem ma ken Pasalmi 72:12-14 la tese er i lu Yesu Kristu u a lu Solomon u Hemban la, un u a tem Tor sha hegen ne ken ishima a ior mba ve lu iyol ishô mba i eren a ve sha ipila la yô.
10. Aluer ú nenge a ityav mbi nôngon ciligh ciligh anyom imôngo yô, avur a ruamabera a i ter á ne aa fatyô u wasen we nena?
10 Ior mbagenev yô, er yange i mar ve la je ve kôr wan ishima a ityav mbi iniongo kposo kposo í ker nôngon ayol a ve sha u keren hemen la. Ve mban ne yô, ve hingir u nengen ityav mbi nôngon man akaa a ka mbi va a mi la cii ér kape uma a lu je la. Ishimaverenkeghen i ve lu a mi tseegh yô, ka u henen ér alaghga akaa a hemba doon aluer ve yevese ve yem twev ken tar ugen yô. Kpa mayange je ve kpishi ve kôr cio u eren kwagh ne nahan ga, shi mbagen ken ve hingir u saan ku zum u ve nôngo ér vea er nahan yô. Mba ve fetyô u yemen ken ityar igen je kpa, ashighe kpishi ka ve mase kaven ér ve tôô mzeyol ugen ve musan di sha ugen tsô. Se fatyô u yaren tom a Pasalmi 146:3-6 sha u wasen ambaaior ne sha u a̱ lu a ishimaverenkeghen sha kwagh u a hembe lun u vea har ishima sha mi i hembe u yemen twev ken tar ugen yô. Kwaghôron u profeti u ken Mateu 24:3, 7, 14 shin u a lu ken 2 Timoteu 3:1-5 la una fatyô u wasen ve u hemban kaven kwagh ne vighe vighe, shi vea kav er i hii man akaa a ve lu wan ishima a mi la a lu nahan yô, inja na yô, vea kav er se lu ken ayange a mkur u tar u tse ungun ne yô. Avur a ruamabera amba er Pasalmi 46:1-3, 8, 9 man Yesaia 2:2-4 la alaghga aa wase ve u kaven ér mimi je se mba a ishimaverenkeghen i mlu u ken hemen u bem.
11. Ka avur a ruamabera a nyi yange na kwase ugen ken Ityôtar i Afrika ishimasurunu, man ka sha ci u nyi?
11 Zum u i lu nôngon ityav zan a mi ave ken tar ugen ken Ityôtar i Afrika yô, kwase ugen yevese undu ya na er agbo a gbuuka lu purugh karen hanma ijiir la. Uma na iv a mciem man ijungwen man lanshima u na un ishimavihin tsung yô. Ken masejime, shighe u tsombor na cii za lu ken tar ugen la, nom na tôô takerada ve u ivesegh la nande kera, nahan á zenda kwase ne shin er lu iyav nahan kpaa, kua wan ve u nomso u lun anyom pue la kpaa, tsô a gba eren tom pristi. Zum u i va ôr kwase ne kwagh u a lu ken Mbafilipi 4:6, 7 man Pasalmi 55:22 shi i ôr un ungeren mba ken Iyoukura man Awake! mba ve har sha Ruamabera la yô, á mase zuan a ishimasurun shi uma na hemba lun a inja kpaa.
12. (a) Ka ishimasurun i nyi Ruamabera a ne mba ve lu ken ican kpoghuloo sha ci u m-ban u inyar laa? (b) Kwaseshiada ugen ken tar ugenegh ken Ashia yange fatyô u wasen orkasua ugen nena?
12 Ican i inyar na uma u ior umiliôn imôngo hingir caveraa kpen kpen. Ashighe agenegh yô, kwagh ne ngu a lu nahan sha ci u ityav mbi nôngon man akaa a ityav mbi ve a mi la. Sha ashighe agen di, ka i lu akaaeren a gomoti a sha kwaghfan ga, man hua kua anyighe u ior mba ve lu sha utaha la, akaa ne cii nga á na inyaregh ki kera lu ga, tsô ior ve hingir u tôôn akaa a ve teen. Mbagenev yô, er i gbe je mba a lu a akaa a ior ve lu a mi ken tar ne ga. Ambaaior ne cii vea fatyô u zuan a ishimasurun sha u fan ér Aôndo er iceghzwa ér mba ve suur sha a na cii una na ve myôhôryol, shi á na ibumun wener una va a tar u perapera u ior vea ember tom u ave ve yô. (Pasalmi 146:6, 7; Yesaia 65:17, 21-23; 2 Peteru 3:13) Zum u Kwaseshiada ugen ken tar ugenegh ken Ashia ungwa orkasua ugen pase ishimanyian na sha kwagh u mlu u inyar yô, á pase un wener kwagh u a lu zan hemen ken tar shon ne ka vegher u akaa a a lu eren sha tar jimin cii yô. Ve lam imôngo sha kwagh u a lu ken Mateu 24:3-14 man Pasalmi 37:9-11 la, tsô ve hingir u henen Bibilo imôngo sha hanma shighe.
13. (a) Se fatyô u yaren tom a Bibilo u wasen ior zum u ve zough a lanshima sha ci u uityendezwa mba gbilinigh mba i er a ve la nena? (b) Aluer ior hen ér akaa a vihin a á lu eren ve la ka ikyav i tesen ér Aôndo ngu ga yô, ú nôngo sha u pasen ve mimi u kwagh ne nena?
13 Zum u ior ve ye ican anyom imôngo shin ve zough a lanshima sha ci u uityendezwa mba aiev kpishi mba í er a ve yô, alaghga vea er kwagh er ka Mbaiserael mba yange ve lu ken Igipiti mba yange ve venda u keghen ato sha kwagh u i ôr a ve “sha ci u asema lu vihin ve” yum la nahan. (Ekesodu 6:9) Zum u kwagh a lu nahan yô, alaghga a lu sha inja u se ôron ve igbenda i Bibilo ia fatyô u wasen ve u wan ishima vough vough a mbamzeyol mba ainge mban ne yô, man er vea palegh anzughulakaa a ka a vihi uuma mba ior kpishi sha ibume la. (1 Timoteu 4:8b) Alaghga mbagen vea nenge mbamlu mbavihin mba ve lu a ve ne ér ka ikyav i tesen ér Aôndo ngu ga shin á wa ikyo sha kwagh wase ga. Ú fatyô u timen a ve imôngo sha avur a ruamabera a a zough sha kwagh ne sha er ú wase ve vea kav er Aôndo a ne iwasen kpa ior kpishi ve ngohol í ga yô.—Yesaia 48:17, 18.
Sur Mba Ve Tagher a Uraahumbe man Tar-tenger la Asema
14, 15. Zum u aahe ugen kende ior kpishi ken mcie yô, Mbashiada mba Yehova wase ve nena?
14 Alaghga ma aahe una er shighe u uraahumbe u kar baveraa shin tar u tenger shin usu u hie akaa shin ma kwagh a bughur yô. Alaghga kwagh ne una na ior a ger mliam kpishi. Kanyi kwagh se fatyô u eren sha u nan ior mba ve war la ishimasurunu?
15 Doo u ior a fa ér or wa ikyo sha kwagh u a er ve la. Shighe u ior mba wan tswam ta num ken tar ugen bee kera yô, ior kpishi kwagh ne kunda ve iyol je gande. Ior kpishi ku wua ior mba hen tsombor ve shin mba ve vé a kwaghyan hen tsombor ve shin ujende vev shin kera mba a tom shin ma kwagh u ve hen ér ka kwagh u nan ve mkpeyol la ga. Mbashiada mba Yehova yange ve wase ior mba hen ningir ve, ve lu zungwen a ve imôngo sha akaa a a saa ve kpishi la, shi ve lu ôron ve mkaanem ma surun ve ishima ken Bibilo. Kwagh ne doo ior kpishi er ve tese ve ikyo i wan nahan.
16. Zum u aahe er ken ningir ugen ken tar u El Salvador yô, kanyi yange i na ve kwaghpasen u Mbashiada mba hen ningir la zakera kpishi yumu?
16 Zum u tar tenger tsung ken tar u El Salvador ken inyom i 2001 la bee kera yô, angbiôr maa kua wua ior kpishi je. Gumor u lun anyom 25 u̱ lu wan u Kwaseshiada ugen kua shi anmgbianev mbakasev mba ishiôr i gumor ne uhar yange ve saa ku. Ngô u gumor ne vea ishiôr i wan na ne ve ngôôr ga je maa ve mough ve due kwaghpasen. Ior kpishi lu kaan a ve ér ka Aôndo ka a tôô ior mba ve kpe la a yem a ve ye, shin ka ishima i Aôndo u kwagh a lu nahan. Mbashiada mban ve ôr ior Anzaakaa 10:22 sha u tesen ve ér Aôndo soo wener se lu ken mnyoon ga. Ve ôr Mbaromanu 5:12 u tesen ér ka isholibo i orumace i ve a ku ye, u ngu wer ka ishima i Aôndo u kwagh a lu nahan ga. Shi ve tese ior loho u ishimasurun u ú lu ken Pasalmi 34:18 man Pasalmi 37:29 man Yesaia 25:8 kua Mpase 21:3, 4 la. Ior yange ve kegh ato a ve fese je, hemban je yô er kasev mbauhar mban ayol a ve kpa ior vev saa ku ken aahe u yange er ne yô, nahan ve hii u henen Bibilo a ior kpishi je.
17. Sha ashighe a aahe a er yô, kanyi iwasen nahan se fatyô u nan ioro?
17 Shighe u aahe a er yô, alaghga ú tagher a or u i lu hange hange u a wase nan fese yô. Alaghga a gba u se yila ortwer shin se wase nan nana za iyouci shin a gba u se er ma kwagh ugen er se fetyô cii sha u nan na̱n kwaghyan kua ijiir i nana lu her yô. Zum u aahe er ken tar u Italia ken inyom i 1998 yô, ortôônabaver ugen kaa wener, Mbashiada mba Yehova “wase ior sha gbenda u kpôô kpôô, sha u nan ior mba ve vihi iyol la iwasen, kwagh gba ve sha kwaghaôndo u ior mba shon ve eren la keng keng ga.” Sha ajiir agenegh yô, akaa a i tsengeôron ér aa er ken ayange a masejime ne nga van ior a ican kpen kpen. Mbashiada mba Yehova ka ve ôr ior akaaôron a profeti a ken Bibilo la sha ajiir shon ne, shi ka ve sur ve asema sha u ôron ve ibumun i Bibilo i ne ér Tartor u Aôndo ua va a mkpeyol u mimi hen uumace la.—Anzaakaa 1:33; Mika 4:4.
U Surun Ior Asema Shighe u Or Nan Saa Ku hen Tsombor Yô
18-20. Shighe u or saa ku hen tsombor yô, kanyi ú ôr shin ú er sha u nan ishimasurunu?
18 Hanma iyange yô, ior umiliôn imôngo ka ve lu a mliam ashe sha ku u or u doon ve ishima. Alaghga ú kohol mba ve lu mliam ashe shighe u ú dugh tom kwaghpasen u Mbakristu la, shin shighe u ú lu eren ityom you i sha ayange ayange la yô. Kanyi kwagh ú ôr shin ú er u una na or la ishimasurunu?
19 Or shon nan ngu mlia kpishii? Anngôôv mba zungwen ku tema mba hen ya kpishi shinii? Alaghga akaa aa lu kpishi aa ú ôr yô, kpa ka hange hange u ú er kwagh sha kwaghfan. (Orpasenkwagh 3:1, 7) Alaghga kwagh u injaa u ú er yô, á lu u tesen wer kwagh u á er la nyoon we, shi na nan takerada u ú har sha Bibilo u ú er kwagh sha kwagh u a ze hemen la yô (antakerada shin magazin shin ankwatakerada), nahan ayange a karen kpuaa yô, hide va va nenge aluer ka u ú seer nan iwasen yô. Shighe u ian i dugh i doo yô, ôr nan wer ú soo u ôron nan akaa a ken Bibilo a nan ishimataver. Kwagh ne una na ishima ia tema or shimi shi á kpe nan iyol kpaa. (Anzaakaa 16:24; 25:11) Ú fatyô u nderen mbakpenev er Yesu yange er nahan ga. Kpa ú fatyô u pasen ior kwagh u Bibilo i er sha kwagh u mlu u mbakpenev la, nahan kpa shighe ne alaghga a lu shighe u ú nôngo wer u pon mbamnenge mba shami ga ken igbar ne ga. (Pasalmi 146:4; Orpasenkwagh 9:5, 10; Esekiel 18:4) Ne fatyô u ôron uityendezwa mba sha kwagh u mnder u shin ku la ken Bibilo imôngo. (Yohane 5:28, 29; Aerenakaa 24:15) Ú fatyô u pasen nan inja i kwagh ne, alaghga ú ôr kwagh u ma mnder u shin ku u Bibilo i er kwagh sha mi yô. (Luka 8:49-56; Yohane 11:39-44) Shi ôr kwagh u aeren a Aôndo u dooshima u a ne se imba ishimaverenkeghen ne la. (Yobu 14:14, 15; Yohane 3:16) Pase er atesen angan ne á wase ú, man er i hii ve ú ne á jighjigh yô.
20 Aluer ú lôhô or u nan lu zungwen la wer nana va mkombo ken Iyou i Tartor yô, alaghga kwagh ne una wase nan u fan ior mba mbawanndor a ve vé doo ve ishima sha mimi shi ve fe u wasen ayol a ve kpaa yô. Kwase ugen ken tar u Sweden yange kav wener ken ayange a un lu uma ne cii ka kwagh u un lu keren je ne.—Yohane 13:35; 1 Mbatesalonika 5:11.
21, 22. (a) Kanyi i gbe u se er aluer ka u se na ior ishimasurun yôô? (b) Ú fatyô u nan or u nan vande fan Ruamabera doo doo la ishimasurun nena?
21 Zum u ú fe wer ma or u ken tiônnongo u Kristu, shin aluer ka or u ken tar kpaa nan ngu ken mzungu nahan, ashighe agen yô ka ú fatyô u fan kwagh u ú ôr shin ú er á nan jighilii gaa? Ishemberti i ken zwa Grika i ashighe kpishi i gem i̱ ken Bibilo ér “ishimasurun” la, ikyav na kpôghôô yô ka “u za lun a or imôngo.” U lun orsurunshima u mimi la tese ér ka u se lu ikyua a mba ve lu zungwen la.—Anzaakaa 17:17.
22 Kpa aluer or u ú soo u surun nan ishima la nan vande fan kwagh u Bibilo i er sha kwagh u kuu man ipaa kua mnder u shin ku di ye? Mlu u ijende i nan i i̱ ne akaa a or shon kpa nan ne á jighjigh la lun her a nan la tseegh kpa ka kwagh u una fatyô u nan nan ishimasurun yô. Aluer nan soo u ôron kwagh yô, kegh ato a nan doo doo. De henen wer gba u ú na nan kwaghôron ga. Aluer i ôr avur a ruamabera yô, tôô wer avur ne ka akaaôron a Aôndo aa a taver ne cii asema yô. Pase jighjigh u nan u ne cii ne lu a mi la tsung sha mimi u kwagh u avur ne a tende zwa a mi la. Sha u tesen mhôônom ma kôron ma sha inja i Aôndo la shi samber a mimi u injaa u ken Mkaanem ma Aôndo la yô, ú fatyô u wasen mba ve lu zungwen la sha er vea zua a msurshima man ishimataver hen Yehova, “Aôndo u A lu a ishimasurun cii” la.—2 Mbakorinte 1:3.
[Footnote]
^ Nenge ken takerada u Mfe u Una Va a Uma u Tsôron La, ityough 8; man Reasoning From the Scriptures, peeji 393-400, man peeji 427-431; man Is There a Creator Who Cares About You?, ityough 10; man antakerada u Aôndo We Ikyo sha Kwagh Wase Mimi Kpa? la.
Ú Kaa Wer Nyi?
• Ior kpishi ka ve na an ibo sha akaa a a tser ve laa, man se fatyô u wasen ve nena?
• Kanyi se fatyô u eren sha u wasen mbagenev u zuan a iwasen kpishi sha ishimasurun i Bibilo i ne laa?
• Ka akaa a nyi a lu nan ior kpishi mba hen ningir wou ijungwene, man ú fatyô u surun ve ishima nena?
[Study Questions]
[Pictures on page 29]
U samber a loho u ishimasurun i mimi sha ashighe a ican
[Credit Line]
Afo a mba yevese ityav: UN PHOTO 186811/J. Isaac
[Picture on page 30]
Mlu u ijende i or lun her a nan la tseegh kpa ka kwagh u nan nan ishimasurun