“De Cie Nen Ga, Asema A̱ De Yen Ne Kpaa Ga”

“De cie nen ga, asema a̱ de yen ne kpaa ga; . . . gadia TER ngu a ven.” —2 Kroniku 20:17.

1. Tswam u eren bende a ior sha nyi gbenda, man er nan ve mciem ma ve lu a mi la ma lu sha injaa?

 TSWAM! Ka a tér a tér ishemberti ne tseegh kpa ior ve nyôr mciem, ve yem henen er mkor man iwasen i lu mape ga yô. Ngi i̱ na ior ve cia kwagh tsung shin ve zungwe, gayô ishima i vihi ve. Shi ishemberti ne tese kwagh u ior kpishi ve lu a mciem ér una tser uumace ken anyom kpishi a a lu van ken hemen la yô. Mnènge u ityar igen i ndera nôngon kwagh a tswam u eren sha igbenda wue wue anyom kpishi hegen, kpa i fetyô u been a mi kera ga ne tese ér mciem ma ior ve lu a mi nahan ne ma sha inja je.

2. Mbashiada mba Yehova er nena sha kwagh u mzeyol u tswam u eren nee, man kwagh ne va a mbampin mba nyi?

² Nahan cii kpa, ityôkyaa jighilii ngi i lun a ishimaverenkeghen. Mbashiada mba Yehova mba ve pasen kwagh kpoghuloo ken ityar man uharegh 234 sha tar cii ne, mba a ishimaveren i vesen. Er ma ve lu a mciem ér mayange je a fatyô u been a tswam u eren ga yô, ve gema mba a vangertiôr ér a bee a mi—man kwagh ne una  ngôôr eren ga. Ka shami u lun a ishimaveren i ve lu a mi laa? Ka an je nana kôr cio u been a kwagh u a tser tar ne sha wono, man kwagh ne una er nena? Er alaghga se cii ma ipila i̱ bende a vese yô, a lu shami u timen fan kwagh u a ne imba ishimaveren la yô.

3. Ka akaa a nyi á lu a nan ior mcieme, man kanyi i tsengeôron sha kwagh u shighe wase nee?

³ Nyian ne, ior mba a mciem shi asema nga yinan ve sha atôakaa kposo kposo. Hen ase sha kwagh u ior kpishi mba ve kera fetyô u nengen sha ayol a ve ga sha ci u iyolbeen man ior mba ve lu kpen a kpe kuaa sha ci u uicôronmbauangev mba ve lu a mi la, man icombor i u̱ yan a ya kwaghyan kpa i lu nôngon u hemban í la. Sha kpôô yô, nenge er uma jighilii je kpa a lu kpegher kpe kpegher sha wono! Alaghga ku u or gban kpen kpoo sha aikyôr shin aahe la ua yav iwan-ambe ua lu keghen a kegh u paven se a hanma kwagh u a doo se ishima cii. Mciem ma lun a mi imba ne man ishimanyian kua akaa agen kpishi a nan se mzeyol ken ishima shi nan se lanshima kpaa la na yô, ashighe a ase ne nga vough er apostoli Paulu a pase nahan, ér: “Fa kwagh ne. Ken ayange a masejime yô, ashighe a ican aa va. Gadia ior vea hingir mbawan ayol a ve iko tseegh . . . man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga” la.—2 Timoteu 3:1-3.

4. Kanyi kwagh i dedoo i lu ken akaa a vihin a 2 Timoteu 3:1-3 a er kwagh sha mi laa?

⁴ Shin er avur ne a er i lu akaa a vihin nahan kpa, á tese ér ishimaverenkeghen ngi. Nenge ase er i lu ken “ayange a masejime” a tar u ifer u Satan ungun ne ashighe a ican aa lu yô. Kwagh ne inja na yô, myôhôryol ngu ikyua ikyua man ica a gba ga tsô a kar a tar u ifer ungun ne kera a ver hemen u vough u Tartor u Aôndo, u Yesu yange tese mbadondon nav ér ve sônon ken msen ér u̱ va la. (Mateu 6:9, 10) Er profeti Daniel a er nahan, Tartor ne ka gomoti u Aôndo u sha, u ua “gba mayange ga yô,” “kpa ua hembe ityartor [i uumace] igen ne cii avur avur, ua tim i, kpa u yô, ua lu gbem sha won.”—Daniel 2:44.

Mtil Paleghaa u Orkristu man Tswam u Eren

5. Ityar wue wue sember eren nyi sha m-anger u tswam u eren u lu anger ior nee?

⁵ Tswam u eren wua ior udubu udubu anyom imôngo hegen. Tar cii hemba nengen a kwaghbo u tswam u eren u lu van a mi hii sha shighe u yange i ta num sha New York City man Washington, D.C. sha uwer u Setemba 11, 2001 kar kera la je. Er tswam u eren u lu hemban ngeen a ngee shi u lu benden a tar cii yô, ityar kposo kposo kohol imôngo fese je u nôngon a kwagh ne. Ikyav i tesen yô, abaver tese ér sha uwer u Disemba 4, 2001 la, “mbatomov mba nengen sha akaa a a zough ityar ve a ityar igen mba ken ityar 55 i ken Yuropa man Imbusutariyan i Amerika man Icombotar i Ashia zua due a mhen” u ve we ishima ér vea nôngo kwagh imôngo yô. Ortom u vesen ugen u tar u U.S. wuese kwagh ne er a “seer nan ve tahav mbu hev” mbu nôngon kwagh a tswam u eren yô. Fese je maa ior umiliôn deri imôngo nyôr iyol cou cou ken kwagh u The New York Times Magazine a yer ér ka “mhii u ityav mbi vesen” la. Se mba a fa er uiniôngon vev mban ne vea za a za kighir ga. Nahan kpa, ior kpishi mba a mciem man ishimanyian sha ci u akaa a mnènge shon u i lu nôngon sha u a bee  a tswam kera ne una va a mi la, kpa mba ve suur sha Yehova yô, mba a mciem ga.

6. (a) Er nan ve alaghga ashighe agen a taver mbagenev u lumun mtil paleghaa u Mbakristu u Mbashiada mba Yehova ve til laa? (b) Ka ikyav i nyi Yesu yange ver mbadondon nav sha kwagh u akaa a patii?

⁶ I fa Mbashiada mba Yehova tseer tseer sha mtil u ve til paleghaa sha akaa a patii la. Er alaghga ior kpishi vea lumun a mtil ve ne sha ashighe a bem a lu nahan kpa, shighe u akaa a kpilighyol kpishi a er yô, ka ve lumun mtil ne gbar gbar ga. Ashighe kpishi, mciem man mbamzeyol mba ityav mbi ve a mi la ka ve na kwagh u mbavia a mbavia a taver ken ior kpishi. Kwagh ne una na a taver ior mbagen kpishi je u kaven er i hii ve ma or nana soo u suen uiniôngon mba tar u nan u lu nôngon sha kwagh man ior cii ve lumun a mi la ga yô. Nahan cii kpa, Mbakristu mba mimi fa ér gba u vea ungwa tindi u Yesu a we ve ér ve de ‘lu ior i tar ne ga’ la. (Yohane 15:19; 17:14-16; 18:36; Yakobu 4:4) Kwagh ne tese ér gba u vea tile paleghaa sha akaa a patii shin sha akaa a ityôô. Yesu iyol na ver ikyav i dedoo sha kwagh ne. Er lu a mfe u vough kua aeren a doon kpishi yô, yange ma kôr cio u nan kwaghwan u una wase uumace sha ayange a na la yô. Nahan kpa, venda u nyôron iyol ken akaa a patii. Sha mhii u tom na la, á venda a Satan tsembelee je zum u á kaa a na ér una na un hemen u ityartor i sha tar cii la. Ken masejime yô, á palegh iniôngon i ior lu nôngon ér vea na un hemen la fese je.—Mateu 4:8-10; Yohane 6:14, 15.

7, 8. (a) Ka nyi kwagh mtil u Mbashiada mba Yehova ve til paleghaa sha akaa a patii la a tese ga, man er nan ve i lu nahana? (b) Mbaromanu 13:1, 2 tese ér gba u se nyôr iyol ken aeren a sha ipila sha u hendan kwagh a gomoti ga nena?

⁷ Ka u or nana hen ér mtil u Mbashiada mba Yehova ve til paleghaa la tese ér mba suen aeren a ipila shin ve nenge á ér nga kwagh ga, ga. Aluer ve er nahan yô, mkaa u ve kaa ér ve mba mbatomov mba “Aôndo u dooshima man u bem” la ka mimi ga. (2 Mbakorinte 13:11) Ve fa er ka i lu Yehova ken ishima sha kwagh u ipila i eren yô. Orpasalmi yange nger wener: “TER ngu karen orperapera kua iferor kpaa; or u ipira i doo nan la yô, A kôr nan ihom.” (Pasalmi 11:5) Shi ve fa kwagh u Yesu yange ôr a apostoli Peteru, wener: “Wa sanker wou ken vaa, gadia mba ve tee sanker cii á wua di ve sha sanker.”—Mateu 26:52.

⁸ Luun yô kape tsegh ku mbayiase ku tese wang ér ashighe kpishi Mbakristu mbaaiev ka ve tôô “sanker” je la, kpa Mbashiada mba Yehova yô, ka nahan ga cii. Mba nyer iyol ken akaaeren a ngan ga cii. Mbashiada mba kuran tindi u i we ken Mbaromanu 13:1, 2 la sha jighjigh je, i kaa her ér: “Hanma or u uma nana̱ ungwan imo i tahav mbu nan lu mbu sha ikev [mbahemenev mba ugomoti] la, gadia ma tahav mbu ga, saa mbu mbu dugh her Aôndo la, mbu mbu lu her ne kpaa, ka Aôndo je A ver ye. Nahan yô, or u nan hendan a tahav mbura yô, ka Aôndo u A ver mbu la je nan lu hendan a Na ye. Mba ve hendan a mbu kpaa vea tôô mtsaha sha ayol a ve.”

9. Ka sha igbenda ihiar i nyi nahan Mbashiada mba Yehova ve lu nôngon kwagh a tswam u erene?

⁹ Kpa, er tswam u eren u lu kwaghbo yum yô, doo u Mbashiada mba Yehova vea lu eren kwagh u wasen u nôngon a kwagh ne ga zee? Een, doo u vea er nahan, man mba eren nahan kpaa. Hiihii yô, ve ayol a ve je mba nyer iyol ken imba kwagheren ngira nahan ga. Sha uhar yô, ka ve tese ior atindiakaa a Mbakristu, nahan shighe u ve yar tom a á yô, nga á wase ve u den ipila i eren sha hanma gbenda cii. * Inyom i i̱ kar ne, Mbashiada yar tom a ahwa 1,202,381,302 u wasen ior sha u henen gbenda u Mbakristu ne. Kwagh ne lu shighe u vihin ga, gadia tom ne wase i er iorov 265,469 batisema ve hingir Mbashiada mba Yehova, nahan ve tese ken igbar ér ve lumun ipila i eren ga jimin cii je.

10. Ka ishimaveren i nyi i lu sha kwagh u been a ipila shin tar u ainge nee?

¹⁰ U seer yô, Mbashiada mba Yehova kav ér mayange je vea fatyô u been a ifer shin tar ne sha tseeneke ve ga. Ka sha ityôkyaa ne ve vé suur sha or u nana fatyô u eren nahan la a ishima ve cii ye—ka Yehova Aôndo je la. (Pasalmi 83:18) Shin er uumace ve lu nôngon sha mimi ve nahan kpa, vea fatyô u been a ipila ga. Orngeren  Bibilo ugen u yange i na un mkaanem nger yô, ta se icin sha kwagh u shighe wase u “ayange a masejime” ne, a kaa ér: “Udangmbaiorov man mbatsughunior vea yem hemen hemen vea hemba vihin a vihi kwagh. Mba tsughun ior man ve di kpaa mba gem mba tsughun ve.” (2 Timoteu 3:1, 13) Aluer se nenge kwagh ne sha gbaa ne yô, gbenda ngu u uumace vea hemba sha iniôngon i ve lu nôngon ér vea bee a ifer la ga. Sha vegher ugen yô, se fatyô u haren sha Yehova ser a bee a ifer vindi vindi gbem sha won kpaa.—Pasalmi 37:1, 2, 9-11; Anzaakaa 24:19, 20; Yesaia 60:18.

Se Cia Num Tan U U Mgbôghom la Ga

11. Kanyi kwagh nahan Yehova a er kera kpaa sha u been a ipila i erene?

¹¹ Er Aôndo u bem a ker ipila i eren ihyom yô, kwagh ne na se kav er i hii ve a tôô aaven a timin un u a hii mzeyol ne jighilii la yô, ka Satan Diabolo je la. Sha kpôô yô, A na Satan ya kunya kera kpaa, sha mhembe u Mikael, ortyom u sha u tamen—ka Yesu Kristu u a lu Tor u he u Aôndo a ver la, a hembe un la. Bibilo pase kwagh ne nahan, ér: “Tsô ityav gba Sha, Mikael kua mbatyomov nav lu nôngon a darakon. Darakon a mbatyomov nav kpaa lu nôngon, kpa a hemba ga, ian kera lu sha ci ve Sha kpaa ga. I gbihi zegedarakon la shin inya, ka tseyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa.”—Mpase 12:7-9.

12, 13. (a) Inyom i 1914 la ngi a inja sha nyi? (b) Kwaghôron u profeti u Esekiel tsengaôron ér nyi sha kwagh u mba ve lu suen Tartor u Aôndo laa?

¹² Ashighe a ôron sha alô sha alô a Bibilo i er man akaa a a lu eren shin tar ne cii kohol nga tesen ér inyom i 1914 la ka shighe shon u yange i nôngo ityav sha je la. Hii sha shighe la je zan zan, tar ngu hemban vihin a vihi cii. Mpase 12:12 pase er i hii ve kwagh a lu nahan yô, ér: “Nahan yô, ember nen ne Usha, man shi ne mba ne tem ker kpaa. Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.”

¹³ Ka nahan ve, ishima i hembe vihin Diabolo a mba Aôndo a shigh ve mkurem mbara man “iyôngo igen” i i̱ lu akar a ve la yum ye. (Yohane 10:16; Mpase 12:17) Ahendan a Diabolo ne nga sôôn kuusu zum u una usa a ta num taveraa sha mba ve lu suen Tartor u Aôndo shi ve suur sha ú la cii. Num u una sa kwan a ta sha ve ne, i pase ú ken Esekiel ityough 38 ér ka num u “Gogi, u ken tar u Magogi.”

14. Ka mbamkor mba nyi Mbashiada mba Yehova ve vande zuan a mi ken ashighe a karen laa, man kwagh a za hemen u lun nahan shinii?

¹⁴ Hii sha shighe u yange i daa Satan shaala la je, ashighe agen ior mba Aôndo ka ve zua a mkor sha num tan u Satan la sha uiniôngon mba iniongo i patii igenegh, i̱ i pase kwagh u í ken Mpase 12:15,16 sha mkaanem ma sha injakwagh la. Kpa Bibilo tese ér sha shighe u num tan u masetyô u Satan la yô, ma nongo u uumace môm môm je kpaa ua na mba ve suur sha Yehova la mkor ga. Doo u kwagh ne una na Mbakristu vea hingir u cian kwagh shin yinan asemaa? Mayange ga cii!

15, 16. (a) Mkaanem ma Yehova ma taver ior nav asema ma yange ôr sha ayange a Yehoshafati la ma na Mbakristu vangertiôr nyian ne ér kwagh a zayol ga nena? (b) Ka ikyav i nyi Yehoshafati man ior nav yange ve ver sha ci u mbatomov mba Aôndo nyiana?

¹⁵ Aôndo una sue ior nav kpee, vough er yange  sue ikyurior na sha ayange a Tor Yehoshafati la nahan. I nger ér: “Ver nen ato, ne Mbayuda cii, man ne mba ne tem ken Yerusalem, man we tor Yehoshafati kpaa; TER ngu kaan a ven nahan er: De cie nen ga, asema kpaa a̱ de yen ne sha ci u ikpelaior i vesen ne ga; gadia ityav ka mbi yenev ga, ka mbi Aôndo je. . . . Ka ne né nôngo ityav mbin ga; wa nen ago iyol, tile nen ving, tsô né nenge myem u TER Una yima ne, we Yuda man Yerusalem; de cie nen ga, asema a̱ de yen ne kpaa ga; kper, due nen, nôngo nen ityav a ve, gadia TER ngu a ven.”—2 Kroniku 20:15-17.

¹⁶ Yange i taver ior i Yuda asema ér ka ve vea nôngo ityav ga. Nahan kape shighe u Gogi u Magogi una ta num sha ior mba Aôndo la kpaa, vea tôô ikyav mbi utyaav ér vea nôngo a kura ayol a ve ga je la. Kpa vea gema a ‘tile ving, vea nenge myem u TER’ una yima ve la. Nahan kpa, er ior mba Aôndo mba sha ayange a Yehoshafati la kpa yange ve gba tilen di gbilin a kwagh eren shio ga nahan, u tilen ving la tese ér vea lu a kwagh eren ga kuaa je ga. I nger nahan, ér: “Tsô Yehoshafati gure kuma icul inya; Yuda cii kua mba ve tem ken Yerusalem kpaa ve haa inya sha ishigh ki TER, ve civir TER. . . . Tsô [Yehoshafati] hen kwagh a ior, nahan a ver mbagenev er ve̱ wa atsam ve̱ wuese TER, ve̱ wuese a uicighanmbaakondov iyol, ve̱ zaan ikumutya ken hemen, ve̱ kaan er: Wuese nen TER, gadia erdoo Na ngu gbem sha won.” (2 Kroniku 20:18-21) Een, sha shighe u mbaihyomov vev va u va tan num sha ve la je kpa, ior za hemen u wuese Yehova kpoghuloo je. Kwagh ne ka ikyav i Mbashiada mba Yehova vea dondon zum u Gogi una hii u tan num sha ve yô.

17, 18. (a) Ka ieren i dedoo i nyi Mbashiada mba Yehova nyian ne ve lu a mi sha kwagh u num tan u Gogi laa? (b) Ka m-umbur u nyi i sember umbur ikyaior i ken Kristu?

¹⁷ Mbashiada mba Yehova vea za hemen u suen Tartor u Aôndo zan zan vea kar aren sha shighe u num tan u Gogi la—man sha shighe u ua hii kera la je kpaa vea de ga. Vea za hemen u zuan a tahav man mkor sha u kohol aa atôônanongo a á hembe iyenge 94,600 sha tar jimin cii la. (Yesaia 26:20) Nenge imba er shighe ne i lu shighe u dedoo u wuese Yehova sha ishimataver sha wono! Sha mimi yô, ishimaveren i ve lu a mi ér num tan u Gogi la nangem la na ve u cian hiden ijime ga. Er ma ve er nahan yô, kwagh ne mgbegha ve u seer nan naagh vev ku iwuese er ve fetyô u eren sha tahav vev la cii.—Pasalmi 146:2.

¹⁸ Ikyaior udubu imôngo sha tar cii mba ve tee tom u pasen kwagh sha hanma shighe la tese ieren i dedoo ne sha gbenda u vough. U tesen er  i hembe doon u tsuan imba gbenda ne yô, yange i due a ankwatakerada u Ikyaior—Ne Er Nyi a Uma Wene? la ken mkohol u vesen u ken 2002 la. Mbakristu cii, ikyaior man mbaganden kpaa, mba a iwuese sha mbamumbur mba sha shighe vough mban.—Pasalmi 119:14, 24, 99, 119, 129, 146.

19, 20. (a) Er nan ve Mbakristu ve lu a ma ityôkyaa i cian shin yinan asema ga? (b) Kwaghngeren u a dondo ne una er nyi kwagha?

¹⁹ Gba kpee u Mbakristu vea cia shin vea yina asema sha ci u akaa a a lu zan hemen shin tar ne ga. Ve fa ér ica a gba ga tsô, Tartor u Yehova ua bee a hanma inja ipila i eren cii gbem sha won. Shi mfe u ve fe ér a va nder ior kpishi mba yange ve saa ku sha ipila shin mbakpenev la kpaa ka kwagh u nan ve ishimasurun. Er mnder u shin mbakpenev ne una na mbagenev ian i hiihii i henen kwagh u Yehova nahan kpa, una na di mbagenev ian i zan hemen a tom u ve tsegh ayol a ve vé lu shiren un la.—Aerenakaa 24:15.

²⁰ Er se lu Mbakristu mba mimi yô, se kav er i gbe hange hange u se za hemen u lun a mtil paleghaa u Mbakristu la yô, man se kange ishima ser se er nahan kpaa. Se soo ser se za hemen u lun a ishimaveren i kpilighyol i ‘tilen ving, nengen myom u TER’ la. Kwaghngeren u a dondo ne una taver jighjigh wase u nan sha u wasen se u kaven akaa a a lu eren ainge ne, a a lu nan mkav kure kure seer sha m-iv u kwaghôron u profeti u Bibilo la.

[Footnote]

Ú Fatyô u Pasen Kpa?

• Er nan ve asema a yen ior kpishi nyian yumu?

• Er nan ve Mbashiada mba Yehova ve lu a vangertiôr ér kwagh a lu guda ken hemenee?

• Kanyi Yehova a vande eren kera sha kwagh u un u a ve a ipila i eren cii laa?

• Er nan ve ma ityôkyaa i lu i se cia num tan u Gogi la ga?

[Study Questions]

[Picture on page 21]

Yesu ver ikyav i dedoo sha kwagh u mtil paleghaa u Mbakristu la

[Pictures on page 24]

Ikyaior i Mbashiada udubu imôngo tôô tom u pasen kwagh hanma shighe la saan saan je

[Picture Credit Line on page 20]

UN PHOTO 186226/M. Grafman