Ior Gema Nengen Kwagh u Nan Iyua sha u Wasen Mbaibanave la Nena?

ER YANGE i ta num sha gar u New York City man gar u Washington, D.C. sha uwer u Setemba 11, 2001 la kar kera yô, ior wue wue wase ior mba aahe ne bende a ve la kpishi je zua ga. I er uiyua sha ikyev i mbamzough mba ngohol uiyua sha ci u mbaibanave sha u wasen icombor i mba aahe ne bende a ve la hemba inyaregh Naira biliôn deri utar. Er aahe ne er vihi yum yô, kpiligh ior iyol kpishi nahan hanmaor soo u wasen.

Kpa, fese nahan ishima hii u vihin ior mbagen ker zum u ve ungwa ér mbamzough mba ngohol uiyua mba i fe ve wuee mba yan inyaregh yô. Yange ishima vihi ior ker je asenge bee shighe u ve ungwa ibaver ér mzough u vesen ugen u ngohol uiyua washima u veren inyaregh ki ki war kuman tiôn u inyaregh ki hemban Naira biliôn 70 ki ve ngohol la sha u vea er akaa agen a mi yô. Shin er ken masejime, mzough ne gema awashima na ne nahan kpa, ortôônabaver ugen kaa wener: “Mbapuunakaa nenge ér, er ve gem awashima ve ne nahan kpa, tso kua kar ihyongo hegen gande u ior shi a na ve jighjigh” er yange ve vande nan ve cii man shighe u i ta num sha ugar mbara nahan. We yô, ú nenge nena? Jighjigh u ú ne mbamzough mba ngohol uiyua sha ci u mbaibanave la pande ayange ne shinii?

Ka Kwagh u Injaa Shin Ka Ibumegh Ki Kwagha?

Ior kpishi nenge ér mne u nan uiyua sha ikyev i mbamzough mba ngohol uiyua mban ka kwagh u dedoo kpen kpen. Nahan kpa, ka hanma or nan nenge kwagh ne nahan ga. Samuel Johnson, Orbuter u ngeren akaa, lu nger kwagh tsa hegen hemba anyom 200, á kaa wener: “Ka wea kimbi ior mba ve er ú tom injar tom ve yô, ka u lu a vangertiôr wer ú er kwagh u dedoo i hemba shighe u ú gbe tôôn inyaregh tsô nan iyua la.” Nyian kpaa ka imba mnenge u ior mbagenev ve lu a mi vough je la, shi abaver a tesen er mbamzough mba ngohol uiyua ve yaren tom a uiyua sha inja ga shin ve vihin uiyua mban dang dang la nga a na ior ve lu a vangertiôr ken ve ga. Nenge ase sha akav ahar aa a sember eren ne.

I de orhemen u mzough u kwaghaôndo ugen u ngohol uiyua sha ci u mbaibanave u a lu ken gar u San Francisco la tom, zum u ibaver i tese ér á kaa a mzough na ér a̱ kimbi inyaregh ki twer u yange un er u naregh kwav iyolough na, kua inyaregh ki kuman naira dubu 64,750 ki kwaghyan u sha hanma sati ú un ye ken hôtel ken anyom ahar yô. Ken tar u Britain di ishima vihi mbavesen mbagen mba yange ve yôô sha ityôgh ki televishen gbungur gbungur ér ior ve er uiyua sha ci u mbaibanave, zum u ve kav ér ken inyaregh ki hemban Naira biliôn 8 ki ve tindi ér i maa ayou a he a ancôgholov ken tar u Romania la, lu ayou a kiriki 12 tseegh i maa ye, man ma or tsô fatyô u pasen kwagh u i er a inyaregh ki kuman udola udubu deri imôngo ki yange ki shi la ga. Abaver a vihin angan nahan na yô, ior mbagen mba nan uiyua hingir u henen a hen kwagh u vea na iyua a mi man mzough u vea er iyua her yô.

U Nan Shin u Nan Ga

Nahan kpa, a lu kwagh u vihin kpishi aluer se de ser ieren i ior mbagen shin mbamzough kpuaa i na se de inja yase i wan mbagen ikyo sha mimi shi lun a mhôônom ma kôron sha ve yô. Bibilo kaa ér: “Mcieaôndo u wang u a lu a acôghor iyol sha ishigh ki Aôndo ga yô, ka un ne: ka u za sôron ancôgholov kua kasev mba côgholov ken ican ve.” (Yakobu 1:27) Een, u wasen mbaibanave man mba i hembe ve iyol la ka vegher u hange hange u Kwaghaôndo u Mbakristu.

Kpa, alaghga a lan ú ishima, nahan u pine wer, ‘M za hemen u nan iyua sha ikyev i mbamzough mban, shin m wase ior sha u nôngon nán ve iyua iyol yama?’ Ka iyua i nyi nahan Aôndo a ver ishima wener se naan mbageneve? Kwaghngeren u a dondon ne una time sha mbampin mban.