Ibaver I Mbayôôn Tartor

Ishimataver man Ishimawan Ume Atam a Dedoo

YESU KRISTU yange tsengaôron ér ken ayange a masejime yô “dooshima u mbagenev kpishi una ndôhôr.” Kwagh ne na yô, ior kpishi sha avegher a tar kposo kposo soo u ungwan kwagh u loho u dedoo u Tartor ga. Mbagen je yô, kwaghaôndo jimin cii gba ve kwagh ga.—Mateu 24:12, 14.

Er i lu nahan je kpaa, mbapasenkwagh u Tartor mba nôngon a mtaver ne kure kure, er vande-eren u ken tar u Czech Republic u i nger shin heen ne a tese nahan.

Kasev Mbashiada uhar tile sha hunda lu lamen a kwase ugen, kpa kwase ti bugh hunda ga. Ica i gbe ga yô, a bugh hunda la teghelee, za uwegh tsuwe magazin u Iyoukura man Awake! u Mbashiada mban lu nan un la. Á kaa a ve wener, “m sugh ne,” maa a wuhe hunda je. Lan Mbashiada mban ishima cii, tsô ve pine ér, “ngun nahan se hide se va un inya keng-ne?” Môm ken Mbashiada mban, u lu pania shin lu kwase u shiren tom hanma shighe la, hide za un inya, kpa er kwase ne er a ve sha kwa u hiihii la nahan, kape á za hemen u eren a na je la, er kwagh ne kuma inyom jimin.

Er kwase pania ne soo wener una gema gbenda u kwaghpasen na hen kwase ne yô, á er msen hen Yehova ér á wase un. Nahan hidi ze hen kwase ne kwagen u̱ za nan un magazin yô, á pine un mbampin mba kundu kundu, ér: “Ú ngu nena? Ú ôr umagazin mbara nahan ve doo ú kpa?” Sha hiihii la, kwase ti bugh zwa na ga, kpa er kwase pania ne de ga shi hide va un inya acin imôngo yô, kwase ne maa hii u saan ishigh sha a na. Sha shighe ugen la je yô, á bugh hunda gbangelaa ve tema ve lam sha anshighe kpuaa.

Er kwase pania ne yange una za kwase ne inya kpa á soo u lamen ga yum yô, á nger un washika á pase un ityôkyaa i i ne ve ka un shi van un inya didi yô, shi á lôhô un Bibilo i henen kpaa. Ken masejime yô, er pania ne nôngo kwagh je kuma inyom môm man tiôn nahan yô, á va mase hiin Bibilo i henen a kwaseya ne. Kpiligh pania ne iyol kpishi, kpa ishima seer taver un zum u kwase ne kaa a na wener: “Hii sha iyange i ú hii van mo a umagazin mban ne je m na Aôndo jighjigh.”

Sha kpôô yô, ishimataver man ishimawan ia fatyô u umen atam a dedoo ken tom u pasen kwagh u Tartor shi geman ior hingir mbahenen ne.—Mateu 28:19, 20.