Iwasen i Mimi I Í Lu sha ci u Mbaatsanev Yô

SHIGHE u Yesu Kristu, Wan u Aôndo lu shin tar la, á tese sha mimi wener kwagh u mbaatsanev gba un ishima, nahan wasen ve. Orgen u yange nenge tom u Yesu yô, kaa ér: “Mbaapirashe mba nengen kera, man mbasombon mba zenden, wanger mbaamandev iyol, mbakondonato mba ungwan; mba nderen mbakpenev, man mba ôron mbaatsanev Loho u Dedoo.” (Mateu 11:5) Nahan kpa, mbaatsanev umiliôn imôngo mba ve lu uma sha ayange ne di ye? Ma loho u dedoo ngu sha ci ve je kpa? Een, loho u nan ishimaverenkeghen ngu sha ci ve!

Er ashighe kpishi ior sha tar jimin cii, kwagh ngu a gba ve a atsanaior ga shi ka ve hungur a kwagh ve nahan kpa, Bibilo i i lu Mkaanem ma Aôndo la i er ityendezwa ér: “Á hungul mbaibanave gbem ga, ishimaverenkeghen i mbaatsanev kpaa ia saa gbem ga.” (Pasalmi 9:18) Mkaanem ma surun se ishima ne ma a kure shami zum u Tartor u Aôndo, u ú lu gomoti u kpôô kpôô u a lu sha la ua kar a tile sha ityough ki hemen u orumace la. (Daniel 2:44) “Mhôônom maa kôr” Yesu u a lu Tor u gomoti shon u sha ne “a mbaatsanev man mbaibanave, una yima uuma mba mbaibanave kpaa. Una paa uma ve sha mkighir man ipira; awambe a ve aa lu kwagh u injaa sha ishigh nagh.”—Pasalmi 72:13, 14.

Shighe u Kristu una tema tor sha tar la, uma una lu nena? Mba vea lu uma shin tar sha ikyev i hemen u Kristu la vea ya tom u ave ve. Bibilo kaa ken Mika 4:3, 4 ér: “Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga; gadia ka zwa u TER u akum a Sha je, u kaa nahan ye.” Angev man ku je kpaa Tartor u Aôndo ua bee a mi kera. (Yesaia 25:8) Nenge imba er sha shighe la tar ua kera lu er ú lu nahan ne ga sha wono! Se fatyô u nan uityendezwa mba ken Bibilo mban jighjigh sha ci u ka Aôndo iyol na a ne i nger ve ye.

U seer sha mne u Bibilo i ne se loho u ishimaverenkeghen ne yô, ngi i̱ wase se u nôngon a mbamzeyol mba sha hanma sev, inja er u hemban mnenge u nengen ayol a ase ser se gba kwagh ga sha ci u se mba atsanaior yum la. Orkristu u nan lu icanor yô, nan fa ken Bibilo i nan i henen la e̱r nan gbe kwagh sha ishigh ki Aôndo vough er Orkristu u nan lu ornyar kpa nan gbe kwagh sha ishigh nagh nahan. Takerada u Bibilo u Yobu la kaa ér Aôndo “hemba wan mbanyarev iko a mbaatsanev kpaa ga, gadia ve cii ka tom u ave Na je.” (Yobu 34:19) Ve cii ve doo Aôndo ishima kwagh môm.—Aerenakaa 10:34, 35.