Mbacivir Yehova Mba A Ishimaverenkeghen I Mimi
Mbacivir Yehova Mba A Ishimaverenkeghen I Mimi
“Asande a Yakob a a shi her la, aa lu ken atô u akuraior kpishi er avure a a dugh hen TER nahan, . . . a a keghen or ga.”—MIKA 5:7.
1. Iserael u ken jijingi ngu gbenda u nan ior myôhôryol u ken jijingi nena?
YEHOVA ka Or u nôôn wura shi gban avure u hemban. Aluer se ver ishima ser uumace ve gba avure shin ve nôô wura yô, ishimaveren yase la ia lu gbilin tsô. Yange profeti Mika nger wener: “Asande a Yakob a a shi her la, aa lu ken atô u akuraior kpishi er avure a a dugh hen TER nahan, man er aber a ura sha toho nahan, a a keghen or ga, shin á ngôôr her sha ci u ônov mba iorov kpaa ga yô.” (Mika 5:7) Ainge ne ka unô ve lu “asande a Yakob a a shi her la”? Ka Iserael u ken jijingi, u a lu asande a “Iserael u Aôndo” la. (Mbagalatia 6:16) Mba er ka “avure a a dugh hen TER” a kundun iyol nahan hen “akuraior kpishi” a tar ne, shi mba er “aber a ura sha toho nahan.” Sha kpôô yô, Mbakristu mba i shigh ve mkurem mba ve shi her uma shin tar nyian ne mba gbenda u Aôndo a lu nan ior myôhôryol yô. Er ve lu mbayôôn angwe u Tartor yô, Yehova ngu yaren tom a ve sha u pasen ior loho u a lu a mi u nan ior ishimaverenkeghen i mimi ne.
2. Er se lu ken tar u mzeyol ne nahan kpa er nan ve se lu a ishimaverenkeghen i mimi?
2 I de kpiligh se iyol ser tar ne ban a ishimaverenkeghen i mimi ga. Gadia se vande fan je ser tar u Satan Diabolo a tem tor shin ú hoghom hoghom ne ua lu a ambaakaa er mzeyol u patii, mvihi u aeren a dedoo man Ifer, mbamzeyol mba sha kwagh u inyar, tswam u eren wuan ior man ityav mbi nôngon keng. (1 Yohane 5:19) Ior kpishi mba cian kwagh u una va er ken hemen la. Nahan cii kpa, icile tenger se mba se civir Yehova sha mimi ne ga, gadia ishimaverenkeghen i se lu a mi sha kwagh u ken hemen la ka i tenger mayange ga. Ishimaverenkeghen yase ka ishimaverenkeghen i mimi sha ci u se har i sha Mkaanem ma Aôndo. Se lumun a Yehova man Mkaanem nam sha ci u hanma shighe yô kwaghôron na gbe inya ga.
3. (a) Er nan ve yange gba u Yehova una tsaha Iserael man Yudaa? (b) Er nan ve mkaanem ma Mika ma lu a inja nyiana?
3 Kwaghôron u profeti u Aôndo yange na Mika nger la taver se ishima u zenden ken iti i Yehova shi á na se ityôkyaa i lun a ishimaverenkeghen i mimi. Shighe u Mika lu eren tom u profeti ken derianyom u sha anigheni Cii Shighe Wase la nahan, ior mba Aôndo ya ikyuryan a ve la pav ker hingir akuraior ahar—lu Iserael man Yuda—man ve cii ve undu ikyuryan i ve ya vea Aôndo la. Sha nahan yô, ityartor i ihiar ne cii ya ican i mvihi u aeren a dedoo man mvende u mimi kua uyôughyôughmbaakaav mba keren kpishi la. Tsô Yehova kaa a ve wener una tsaha ve. Sha kpôô yô, akaa a Aôndo lu ôron sha u tan ve icin la lu sha ci u ior mba sha ayange a Mika la. Kpa mlu u sha ayange la za kwagh môm a mlu u ainge ne, nahan mkaanem ma Mika mara ma a inja nyian kpaa. E̱r se lu timen sha atôakaa a vesen a ken ityouv mbi itiankarihiar mbi takerada u Mika ne yô, se nenge er mkaanem ma Mika man ma lu kuren sha ayange ne yô.
Kwagh u Takerada u Mika ú Pase Se La
4. Kanyi kwagh se hen ken takerada u Mika ityough 1 zan zan ityough 3?
4 De se sav ase nen akaa a i nger ken takerada u Mika la. Ken ityough ki sha 1 la, Yehova pon tindi u peren u Iserael man u Yuda la ken igbar. Inja i dang ve la na yô, á tim Iserael kera shi mtsaha u Yuda kpaa una ar sha hunda u Yerusalem je. Ityough ki sha 2 la pase ér mbanyarev man mbautaha mbá nzughul a atsanaior man mba ve lu a or ijime ga la. Kpa, Aôndo shi er ityendezwa ér una kohol ior nav ijiir i môm, vea lu ken mzough imôngo. Ityough ki sha 3 la ôr kwagh u ajiraôron a Yehova sha mbahemenev mba tar la man uprofeti mba peren atindi la kpaa. Mbahemenev mba ôron ijir sha mimi ga, shi uprofeti kpaa mba ôron akaa sha aie. Er kwagh lu nahan la je kpa icighan jijingi iv Mika a agee ér a yôô ijirôron i Yehova i vihin tsung i í lu van la.
5. Kanyi i lu ken takerada u Mika ityough ki sha 4 man 5 naa?
5 Ityough ki sha 4 la tsengaôron ér ken ayange a masetyô yô, akuraior cii aa kôndo sha uwo u ya u Yehova u í kende a ú sha la sha u za ngohol ityesen hen a na. Kpa cii man shighe la yô, a yem a Yuda uikyangen ken Babilon, kpa Yehova una yima un. Ityough ki sha 5 la gema pase ér a mar Mesiya ken Betelehem u ken Yuda la. Una hemen ior nav shi una yima ve sha ikyev i ityar i í lu kighir ve la kpaa.
6, 7. Ka atôakaa a nyi i er kwagh sha mi ken ityough ki sha 6 man ki sha 7 ken kwaghôron u profeti u Mikaa?
6 Mika ityough ki sha 6 la ôr kwagh u ayôôso a Yehova a tam a ior nav sha u yilan ve ijir la. Kanyi Yehova a er ior nav je u vea hemba un ato? Ma kwagh je ga. Sha kpôô yô, atindiakaa na la nga a inja kpishi je. A soo ér mbacivir un ve eren kwagh u mimi shi ve eren erdoo, shi ve hiden a iyol ijime er vea zenden vea na yô. U Iserael man Yuda ma ve er nahan la yô, ve gema ve dondo gbenda u ihyembeato, man ka u vea sunda injar i ihyembeato ve la kpaa.
7 Ken ityough ki masetyô ki kwaghôron u profeti u Mika la, á puu ior mba sha ayange na la ken igbar sha aferakaa a ve lu eren la. Nahan cii kpa Mika yina ishima ga, gadia á kange ishima ér una “kegh” Yehova. (Mika 7:7) Takerada ne mase kuren sha mkaanem ma má tese ér Mika ngu a vangertiôr ér Yehova una zungwe ior nav mhôônom la. Tsegh ku mbayiase tese ér ishimaveren i Mika la yange i kure shami vough. Zum u mtsaha u Yehova na ior nav la kure ken inyom i 537 C.S.W. la yô, á zungwe ve mhôônom sha u hiden a mba ve mase shin la hen tar ve.
8. Ú kohol akaa a i nger ken takerada u Mika la cii ú pase wer nan?
8 Nenge imba loho u doon tsung u Yehova pase sha ikyev i Mika ne sha wono! Takerada u i nger ú sha icighan jijingi ne ngu a akav a tan se icin, a a tese er Aôndo ngu a er a mba ve senge ér mba civir un kpa ve ban a jighjigh u nan la yô. Takerada ne tsengapasen akaa a a lu eren ainge ne. Shi ngu a kwaghwan u a dugh hen Aôndo sha u tesen se e̱r se zenden ken shighe u akaa a taver kpishi ne, sha e̱r se kôr ishimaverenkeghen yase her gbang gbang yô.
Yehova, Ter Uhembanagee Ngu Ôron Kwagh
9. Sha kwagh u i er ken Mika 1:2 la yô, yange gba u Yehova una er nyi?
9 De se time ase nen ken takerada u Mika ne vighe vighe hegen. I ôr ken Mika 1:2 ér: “Ungwa nen, ne ior cii; ver ato, we tar man akaa a a lu ken u cii; Ter AÔNDO A̱ lu shiada u hendan a ven, Ter ken icighantempel Na je.” Luun er wea lu sha ayange a Mika la nahan, mkaanem mara ma má ker u ken ishima keng keng. Man ma kôr u ken ishima kpaa sha ci u Yehova ngu ôron kwagh ken icighantempel na shi ngu lamen a ior hanma ijiir cii, kera ka Iserael man Yuda tseegh ga. Sha ayange a Mika la, ior gema ijime a Yehova, Ter Uhembanagee la ica gba. Kpa lu u ica a gba ga tsô, kwagh a kera lu nahan ga. Yehova yange kange ishima u tsahan ve.
10. Er nan ve mkaanem ma Mika 1:2 la ma lu a inja hen a vese?
10 Kape sha shighe wase ne kpa i lu vough je la. Mpase 14:18-20 la tese ér Yehova shi ngu ôron kwagh ken icighantempel na. Ica a kera gba ga tsô, Yehova una mough sha, nahan una er uzegembaakaav mba vea tenger orumace yô. Kwa ne yô, Yehova una haa bo ‘wain u shin tar cii’ la shin zegeihungwa u shoghor wain u iyugh i Yehova la, una er kwagh ne sha u timin tar u Satan ne kera vindi vindi.
11. Ikyav i mkaanem ma ma lu ken Mika 1:3, 4 la ér nyi?
11 Kegh ato ungwa kwagh u Yehova á lu eren la. Mika 1:3, 4 kaa ér: “Nenge, TER ngu duen hen ijiir Na, Una hungwa, Una ndyar sha ajiir a taven sha a tar la. Iwo ia sough shin angahar a Na, apev kpaa aa pav ikwe, er ikpayough ka i sough sha usu nahan, man er mngerem ma i ur shin ijiir i tingir nahan.” Yehova una undu ijiir i teman na i sha la una sen a va ndyar sha iwo man apev a ken Tar u Ityendezwa la kpôô kpôô? Ei. Gba u una er nahan ga. A gba u una gema a gema ishigh nagh shin tar tseegh man mbaawashima nav vea gba kuren kuren sha er a soo la. Heela tseegh ga, ka taregh inyaa kpôô kpôô ga, kpa ka mba ve tem ken ú la vea ya ican sha akaa a i pase la ye. Zum u Yehova á kighir á mough sha yô, kwagh a tser mba ve ban a jighjigh u nan la—a lu vough er iwo sough er ka ikpayough yô, shi a lu er tar tenger apev pav ikwe nahan.
12, 13. Sha kwagh u 2 Peteru 3:10-12 a ôr la yô, kanyi i ne ve ishimaverenkeghen yase i lu kwagh u tenger ga?
12 Alaghga kwaghôron u profeti u ken Mika 1:3, 4 la una umbur we kwaghôron u profeti ugen u yange í tsengaôron kwagh u ubombaakaav mba vea er shin tar yô. Apostoli Peteru nger ken 2 Peteru 3:10 ér: “Iyange i Ter ia va er ormbaiv nahan. Usha vea kar kera sha ihuran ioo, asemaakaa aa hia kera man tar kua ityom i sha u cii kpaa ia hia kera.” Mkaanem ma Peteru ma za inja kwagh môm vea kwaghôron u profeti u Mika la, ma tese ér ka usha man tar kpôô kpôô ga. Ma ter kwagh u zegecan i i lu van shin tar u mba ve vende Aôndo la.
13 Shin er aahe la a lu van nahan kpaa, Mbakristu vea fatyô u lun a vangertiôr sha mlu u ken hemen di vough er Mika kpa yange lu a mi nahan. Inja nena? Ka sha u dondon kwaghwan u a lu ken avur a á lu ken washika u Peteru la. Apostoli Peteru vaa iyol kaa wener: “Doo u né lu ken icighanmlu man né lu civir Aôndo nena? Er ne keghen mve u iyange i Aôndo, man ne eren sha u i̱ va fefa yô”! (2 Peteru 3:11, 12) Aluer se mba a ishima i ungwan kwagh man se ver ishima ser ieren yase ngi wang man uma wase kpa iv a aeren a civir Aôndo yô, nahan ishimaveren yase i ken hemen la ia gba ken inya ga. U kôron ishimaverenkeghen yase dông yô, gba u se umbur ser iyange i Yehova la ia va keng a bunde ga.
14. Er nan ve Iserael man Yuda ve kom mtsaha?
14 Yehova pase ityôkyaa i i ne ve ior nav mba ngise mbara ve kom mtsaha yô. Mika 1:5 kaa ér: “Ka sha ci u atindi a peren a Yakob man akaa ne cii a lu nahan ye, man sha ci u asorabo a ya u Iserael kpaa. Ka nyi i lu atindi a peren a Yakobo? Kera ka Samaria gaa? Man ajiir a taven sha a Yuda yee? Kera ka Yerusalem gaa?” Lu Yehova mar ikyurior i Iserael man Yuda ye. Kpa ve hemba un ato, man ihyembeato ve ne za zan zan za ar ken agar a ve a tamen la je kpaa, ka Samaria man Yerusalem je la.
Aeren a Ifer Dumbur
15, 16. Ka aferakaa a nyi ior mba sha ayange a Mika mbara ve ye ibo sha mi?
15 Mika 2:1, 2 tese se ikyav i i pase ifer i ior mba sha ayange a Mika la vighe vighe yô, ijiir la kaa ér: “Kwagh á tser mba ve henen iferkwagh man ve we agoyol u eren kwagh u bo sha ugambe vev la! Er sev a av yô, ve kure kwagh la kpaa, sha ci u a lu ken tahav mbu ave ve yô. Ve tôm ishule man ve ngohol i sha apera, kua ayou kpaa, ve ngohol a kpaa; ka ve nzughul a or kua ya u nan, man a or kua dyako u nan kpaa.”
16 Mbahuav mba yaven tugh ga, ka ve tsa henen kwagh u vea e̱r ve vea ngohol ishule man ayough a mba wan ndor a ve yô. Sev ka mbua aven a av nahan, ve er fefa sha u vea er sha mbamhen vev mbara yô. Luun er vea umbur ikyuryan i Yehova la yô, mayange je ma ve fetyô u eren aeren a bo angara nahan ga. Tindi u sha ikyev i Mose la ngu a akaawan aa kuran mbaatsanev. Sha tindi la yô, lu u dyako i ma tsombor môm tsô kpa ia saa ga. Nahan kpa, kwagh gba ior mba eren hua mban sha kwagh ne ga. Ve venda mkaanem ma ma lu ken Levitiku 19:18 la, ma kaa ér: “Or u nan we ndor a we nana̱ doo u ishima er we iyol you nahan.”
17. Kanyi kwagh ia er ior mba ve senge ér ve mba civir Aôndo kpa kwagh a hembe gban ve a uyôughyôughmbaakaav laa?
17 Kwagh ne tese kwagh u una fatyô u eren ior mba ve senge ér ve mba civir Aôndo, kpa kwagh a kera gbe ve sha akaa a ken jijingi ga, kwagh á hembe gban ve a uyôughyôughmbaakaav la. Paulu lu ta Mbakristu mba sha ayange a na la icin wener: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe.” (1 Timoteu 6:9) Zum u or nan gem inyaregh ki keren ki hingir tamen kwagh ken uma u nan yô, nan ngu civir aôndo u aiegh u i yer ér Inyaregh la. Aôndo u aiegh shon ne né ma ishimaveren i bunden ga, i mlu u ken hemen la ga.— Mateu 6:24.
18. Kanyi kwagh yange gba u ia er ior mba sha ayange a Mika mba uyôughyôughmbaakaav hemba doon ve ishima laa?
18 Ior mba sha ayange a Mika la kpishi va fa sha gbenda u vihin tsung ér, u suur sha uyôughyôughmbaakaav la ka di gbilinkwagh tsô. Yehova kaa ken Mika 2:4 nahan ér: “Sha iyange la vea dugh ishor sha a ven, vea gber kwelegh, vea kaa er: Se saa ishe puru; A gema dyako u ior av A na ior mbagenev; nenge, er A pav un a mo yô! A kar mbaahendanev ishule yase.” Een, dyako i sha tsombor i̱ mba yange ve iin uya man ishule la ia saa. A yem a ve ken tar u ve fe u ga yô man akaa a ve la aa hingir ishar i ior “mbaahendanev” mba ken akuraior. Nyityô ishimaveren i ve lu a mi ér vea lu a akaa la cii ia saa ve ishe.
19, 20. Lu nyi i er Mbayuda mba ve suur sha Yehova la?
19 Nahan kpa, mba ve suur sha Yehova yô vea va ahenge sha ishimaverenkeghen ve la ga. Yehova kura ikyuryan na aa Aberaham man Davidi, shi a zungwe mbagenev mba ve lu er Mika nahan mhôônom, ka ior mba á doo ve ishima shi i ker ve iyol tsung er ior vev ve undu Aôndo nahan. Sha ci u perapera u ambaaior ne yô, Aôndo una hide a ve ken tar ve sha shighe u á ver la.
20 Kwagh la yange er ken inyom i 537 C.S.W la, sha shighe u Babilon yôhôr kera ve, asande a Mbayuda a á shi her la hide yem ken tar ve la. Sha shighe la mkaanem ma Mika 2:12 la maa hii u kuren shami nahan vough. Gadia Yehova kaa ér: “Me kohol ne cii kpee je, we ya u Yakob, Me kohol asande a Iserael a a shi her la je, Me zua ve imôngo er iyôngo ken ityôr nahan man er ikumuile ken atô u ijiir ve i yan toho yô; á hura iuu sha mngee u ior.” Nenge ase er Yehova a lu Aôndo u dooshima sha wono! Tsahan ior nav kera cii yô, a de asande a yange shi her la ér a hide a za civir un ken tar u yange na uter vev la.
Akaa a Yange Er La Zua sha Akaa a a Lu Eren Ainge Ne Je Gande
21. Mbamlu mba tar u hegen ne mba kwagh môm a mba sha ayange a Mika la nena?
21 Er se nenge ken ityouv mbi hiihii mbi ihiar mbi takerada u Mika ne nahan, kpiligh we iyol er ainge kpa akaa a lu er sha ayange la kpa lu nahan ga he? Er lu sha shighe u Mika la nahan, kape ainge kpa ior kpishi ve senge ér ve mba civir Aôndo je la. Nahan kpa, vough er Yuda man Iserael kpa lu nahan, ve pav ker shi mba nôngon ityav ayol a ve kpaa. Mbanyarev mba ken Mbakristu Mbaaiev mba eren atsanaior atsan. Mbahemenev mba ukwaghaôndo mba hemban lumun a lumun a aeren a Bibilo i vende á jighilii la cii. Ka nahan ve i kera shi ica ga u Mbakristu Mbaaiev vea tim imôngo a “Zegebabilon” jimin cii ye! (Mpase 18:1-5) Nahan kpa, Yehova ngu a mbatomov mba jighjigh mba ve shi shin tar di er sha shighe u Mika la nahan.
22. Ka iniongo ihiar i nyi i har ishimaverenkeghen ve sha Tartor u Aôndo?
22 Ken inyom i 1919 la, Mbakristu mba i shigh ve mkurem mba jighjigh mbara mase undun Mbakristu Mbaaiev gbindigh gbindigh, shi ve hii u yôôn loho u dedoo u Tartor la hen akuraior cii kpaa. (Mateu 24:14) Ve hii sha u keren asande a Iserael u Aôndo a á shi her la. Maa i gba kohol zegeikpelaior i “iyôngo igen” la, nahan iniongo i ihiar ne cii hingir “ikum i môm man orkuran môm.” (Yohane 10:16) Shin er ve lu civir Aôndo ken ityar 234 nahan kpa, mimi je í zua ve mbacivir Yehova mbajighjigh mban cii “imôngo.” Man hegen ne, ityôr iyôngo ne ngi ‘huran iuu sha mngee u ior’ a kasev man mbayev kpaa. Ishimaverenkeghen ve i har sha tar u ainge ne ga, kpa ka sha Tartor u Aôndo, ú ica a kera gba ga tsô ua hide a Paradiso shin tar la.
23. Er nan ve u gbe fan tsô wer ishimaverenkeghen you ka kwagh u bunden mayange ga?
23 Ivur i masetyô i Mika ityôugh 2 la ôr kwagh u ior mba civir Yehova kaa ér: “Tor ve kar hemen ve, man TER gema ngu ve sha hemen.” Ú nenge a iyolyou, er ú lu dondon sha Tor wou Yesu Kristu ne lu ember mhembe, man er Yehova iyol na a hemen ne gbenda ne lu yemen la kpa? Aluer ka nahan yô, fa wer, ne hemba keng man ishimaverenkeghen you la kpaa ia bunde mayange ga. Se seer zuan a iwanger sha kwagh ne, er sé lu nengen sha atôakaa agen kpaa ken kwaghôron u profeti u Mika ne nahan.
Ú Na Mlumun Wer Nyi?
• Er nan ve Yehova yange tsaha Yuda man Iserael sha ayange a Mika laa?
• Kanyi ia er ior mba ve senge ér ve mba civir Aôndo kpa uyôughyôughmbaakaav ve hembe doon ve laa?
• Er u tim sha Mika ityough 1 man 2 u bee nahan, er nan u fe wer mayange je ishimaverenkeghen you ia bunde ga?
[Study Questions]
[Picture on page 3]
Kwaghôron u profeti u Mika la una fatyô u taver mlu wase u ken jijingi
[Pictures on page 4]
Iserael u ken jijingi man akar a ve mba kenden a mcivir u mimi sha, di vough er Mbayuda mba yange ve shi her ken inyom i 537 C.S.W. la nahan