Suur Sha Yehova A Ishima I Môm Ken Ashighe A Ican

“Aôndo ka ijiir yase i waren ker man agee ase kpaa, ka iwasen i i lu ikua ikua ken ican je.”—PASALMI 46:1.

1, 2. (a) Ka ikyav i nyi i̱ tese ér gba u se er kwagh a hemba di u gban kaan sha zwa ser se suur sha Aôndo? (b) Er nan ve i gbe u se er kwagh a hemba u kaan sha zwa ser se suur sha Yehova?

 KA I lu se ican ga cii u kaan ser se suur sha Aôndo, kpa gema ka kwagh u taver kpishi u tesen sha aeren a ase ser se suur sha na. Ikyav i tesen yô, i nger ishember i i kaa ér “Se Suur Sha Aôndo” la sha inyaregh ki tar u United States la ica gba hegen. * Ken inyom i 1956 la, Ayough a Idyuugh ahar a shin tine aa tar u United States la due a tindi u tesen ér ishember ne i hingir ishember i tar u United States ua ôron, shi a fa ú a mi yô. Kpa kwagh u a gem a lan ishima yô, ior kpishi sha tar cii, ka tar u United States tseegh ga, suur sha inyar kua uyôughyôughmbaakaav hemba er ve suur sha Aôndo la.—Luka 12:16-21.

² Se mba se lu Mbakristu mba mimi ne, gba u se er kwagh a hemba di u gban kaan sha zwa ser se suur sha Yehova la. Aluer se kaa ser se suur sha Aôndo yô, a gba u se tese kwagh ne sha aeren a ase, ga yô a lu vough er “jighjigh u nan u lun a aeren ga di kpaa, a lu kpenegh nahan.” (Yakobu 2:26) Se hen ken kwaghngeren u ken ijime la ser, ka se tese ser se suur sha Yehova sha u eren msen hen a na shi den ser Mkaanem nam ma hemen se man sha u veren ashe a nongo na ser ú hemen se. De ase se nenge nen er se er kwagh sha igbenda itiar ne ken ashighe a ican yô.

Shighe u Or Kera Lu a Tom Ga Shin Í Kimbin Nan Inyaregh Kpuaa Yô

3. Ka mbamtaver mba inyar mba nyi mbacivir Yehova ve tagher ishigh a mi ken “ashighe a ican” nee, man er nan ve se fe ser Aôndo una lumun u wasen se?

³ Ken “ashighe a ican” ne inyaregh ki ican kpishi, man kwagh ne bende a se mba se lu Mbakristu ne kua mbagenev kpaa. (2 Timoteu 3:1) Nahan alaghga kwagh ne una na yô, a gba den  se tom kpoo tsô. Shin alaghga se lu a gbenda inyar ugen ga, nahan á gande se tsô se hingir u eren tom ahwa imôngo, geman ngohol aninyar kpuaa sha uwer. Ken imba mlu ngun nahan, á taver se u ‘nengen sha ior asev’ kpen kpen. (1 Timoteu 5:8) Sha ashighe angan nahan, Aôndo Uhembansha una lumun u wasen se je kpa? Una er nahan kpee je! Nahan kpa, ú ngu wer Yehova kur se sha ikyev i hanma mzeyol u a lu ken tar ungun cii ga. Kpa aluer se suur sha a na yô, mkaanem ma ken Pasalmi 46:1 la maa iv sha a vese, ma kaa ér: “Aôndo ka ijiir yase i waren ker man agee ase kpaa, ka iwasen i i lu ikua ikua ken ican je.” Kpa sha shighe u se lu yan ican i inyar yô, se tese ser se suur sha Yehova a ishima i môm nena?

4. Shighe u se tagher a mbamzeyol mba inyar yô, se er msen ser Yehova a na se nyi, man ka sea er mbamsen nahan yô, á er nena?

⁴ Gbenda môm u se tese ser se suur sha Yehova yô ka u eren msen hen a na. Kpa se er msen ser a na se nyi? Shighe u se tagher a mbamzeyol mba inyar yô, a gba u se er kwagh sha kwaghfan a hemba er se vanden eren nahan. Nahan se nôngo kpoghuloo se er msen ser á na se kwaghfan! Mkaanem ma Yehova taver se ishima ér: “Aluer kwaghfan una yina mô [wase] yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je.” (Yakobu 1:5) Een, se sôn Yehova a na se kwaghfan—u a lu tahav mbu yaren tom a mfe man mkav kua iwanger i se lu a mi sha kwagh sha gbenda u dedoo la—sha er se tsua akaa a se soo u eren la sha inja shi se er kwagh vough kpaa yô. Ter wase u dooshima u a lu sha la taver se ishima wener, aluer se er mbamsen hen a na yô una ungwa mbamsen mba shon. Hanma shighe yô, ngu a wa iyol a kegh a kegh u kôôm igbenda i mba ve suur sha a na a ishima ve cii la.—Pasalmi 65:2; Anzaakaa 3:5, 6.

5, 6. (a) Er nan ve i doo u se har ishima sha Mkaanem ma Aôndo ser ma wase se u wan ishima a icana? (b) Kanyi alaghga se er sha u panden ishimanyian shighe u se kera lu a tom ga laa?

⁵ U haren ishima sha Mkaanem ma Aôndo ser ma hemen se la kpaa ka gbenda ugen u se tese ser se suur sha Yehova je la. Mbampase nav mba sha kwaghfan mba ve lu ken Bibilo la ka mba “mimi je.” (Pasalmi 93:5) Shin er yange i nger icighan takerada ne anyom a kar hegen i hembe anyom 1,900 nahan kpa, ngu a kwaghwan u a kom u se har sha mi yô, shi ngu a kwaghfan u una wase se se hemba fan er se washima a ican yô. Nenge akav agen a kwaghfan u ken Bibilo ne.

⁶ Tor u fan kwagh Solomon yange kaa ngise ngise la ér: “Mnyam ma ortom ka ma dedoo, shin nana ya kwagh ciôôn, shin kpishi kpaa, kpa m-ide u ornyar yô, una rumun nan nana̱ yav ga.” (Orpasenkwagh 5:12) Ka sea lu a ikyav kpishi yô, i gba u se tôô shighe man inyaregh kpishi sha er se sôr mbi, se er a mbi mbia lu wang shi se ver ishima ser mbi sha inja shi se kura mbi kpaa. Nahan aluer se kera mba a tom ga yô, alaghga se tôô shighe la se hide se time sha gbenda u se eren uma la, nahan se fa akaa a kwagh a gbe se a mi kpôô kpôô man akaa a i gbe hangen se u lun a mi tsô la. Alaghga a hemba doon u se gema uma wase sha er se pande ishimanyian yô. Ikyav i tesen yô, se fatyô u heghem uma wase sha u duen za kôron haya hen iyou i kiriki, shin palegh u gban yamen akaa tsô lun a mini?—Mateu 6:22.

7, 8. (a) Yesu yange tese wener un fa er asema nga a za uumace mba vough ga ne iyol kpishi sha kwagh u akaa a iyolough nena? (Nenge ngeren u shin kpe la.) (b) Ka kwaghwan u injaa u nyi Yesu yange wa u̱ tesen se ér se palegh ishimanyian i gban lun a mi dang dang laa?

⁷ Yesu yange na kwaghwan ken Ityesen i sha Uwo la kaa ér: “Asema a̱ de nyian ne sha ci u uma wen, sha kwagh u né ya man sha kwagh u né ma, shin sha ci u iyol yen, sha kwagh u né zer la, ga.” * (Mateu 6:25) Yesu fa wener, sha gbaaôndo je, ka i gba uumace mba ve lu vough ga ne ishima u zuan a akaa a kwagh a gbe ve a mi la kpen kpen. Nahan kpa, “asema [aa] de nyian” se sha amba akaa ne nena? Yesu kaa ér: “Vande keren nen tartor.” Aluer ka nyityô zayol je se tagher a mi kpa, gba u se za hemen u veren mcivir u Yehova  hiihii ken uuma asev. Aluer se er nahan yô, Ter wase u sha una “seer” se akaa a kwagh a gbe se a mi hanma sev la cii. Una wase se sha igbenda wue wue, se zua a akaa a kwagh a gbe se a mi la.—Mateu 6:33.

⁸ Yesu shi wa kwagh nahan ér: “Asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô.” (Mateu 6:34) U gban di zan ishima yase iyol sha kwagh u alaghga sev mbu kper mbu a va a mi la ka shami ga. Orfantakerada ugen kaa ér: “Mciem ma se lun a mi sha kwagh u kper la má fe lun er se hen ser a lu nahan la keng ga.” Aluer se hide a iyol ijime se er kwagh sha kwaghwan u Bibilo i we se ér se hemba veren ishima sha akaa a kwagh a gbe se sha mi la tseegh shi se ver ishima sha kwagh u sev mbu nyian, i de lu sev mbu kper la ga yô, kwagh ne una wase se, se kera lu a ishima i nyian dang dang ga.—1 Peteru 5:6, 7.

9. Shighe u se lu ken ican yô, ka iwasen i nyi nahan se zua a mi ken ityakerada i “wanakiriki u jighjigh man u fan kwagh” laa?

⁹ Shi se tese ser se suur sha Yehova shighe u ican i inyar i bende a vese la, sha u ôron ityakerada i “wanakiriki u jighjigh man u fan kwagh” á nger la sha er se zua a iwasen yô. (Mateu 24:45) Magazin u Awake! la ngu a zer duen a ungeren mba wasen sha ashighe ashighe kua mbamhen mba tesen er se nôngo a ican yô. Ngeren u ken Awake! u Agusutu 8, 1991 u a kaa ér “Ka Akaa a Nyi Nahan Or Nana Er Shighe u Nan Kera Lu a Tom Ga?” la due a igbendaakaa anigheni i i wase ior kpishi u vihin inyaregh sha inja shi gban ishima ikyôr shighe u ve lu a tom ave ga yô. * Nahan cii kpa, ka igbendaakaa ne tseegh se nenge sha i̱ ga, doo u se fa mtsera u inyaregh ki lu a mi hen a vese jighilii la kpaa. I ôr kwagh sha kwagh ne ken Awake! shon môm, ken kwaghngeren u á kaa ér “Kwagh u A Hembe Doon a Inyaregh Yô” la.—Orpasenkwagh 7:12.

Shighe u Angev Mbu Ze Se Iyol Yô

10. Ikyav i Tor Davidi la i̱ tese se ér or nana fatyô u suur sha Yehova shighe u nan lu uange kpoghuloo la nena?

¹⁰ Ka kwagh u shami u suur sha Yehova shighe u ma angev mbu ze se iyol kpoghuloo yôô? Kape i lu vough je la! Mhôônom ma ker Yehova a ior nav mba ve lu uange la. Heela tseegh ga, ngu a kegh iyol u wasen ve kpaa. U tesen ikyav yô, nenge ase kwagh u yange er Tor Davidi ne. Alaghga yange lu ken uange kpoghuloo je sha shighe u á nger mkaanem ma ma tese er Aôndo ka a er a orperapera u nan lu uange yô. Á kaa ér: “TER Una suwe nan sha gambe u nan u uange; Ú gema myavinya u nan la sha iyange i angev mbu nan.” (Pasalmi 41:1, 3, 7, 8) Davidi suur sha Aôndo her  taveraa, nahan ken masejime yô, tor Davidi war angev mbun. Nahan se tese ser se suur sha Aôndo shighe u angev mbu ze se iyol nena?

11. Shighe u angev mbu te sha vese yô, kanyi akaa nahan se sôn Ter wase u sha ser a na se?

¹¹ Gbenda môm u se tese ser se suur sha Yehova sha shighe u angev mbu te sha vese yô, ka u zamber a na ken msen ser a na se ishimawan. Se sôn un ser a wase se se er kwagh sha “kwaghfan” sha u eren twer u ú gande se ken inya ga yô. (Anzaakaa 3:21) Shi se sôn un ser a wase se se lu a ishimawan man ishimataver sha er se nôngo a angev mbu se lu a mi la yô. Hemban cii yô, se sôn Yehova ser a taver se, a na se agee a se za hemen u nan un jighjigh, se tile her dông se gba ga, aluer ka nyi nyi kwagh je ia er kpaa. (Mbafilipi 4:13) U civir Aôndo sha mimi la hemba kan a inja a u nôngon ser se war uma wase hegen ne. Aluer se za hemen u civir un sha mimi yô, Un u a ne ior Injar ne una na se uma u vough, se lu gbem sha won shi se lu gbong gbong kpaa.—Mbaheberu 11:6.

12. Ka akaawan a ken Ruamabera a nyi aa wase se u tsuan twer u injaa u se eree?

¹² Msuur u se suur sha Yehova la shi ngu a mgbegha se nahan se ker kwaghwan u injaa u a lu ken Bibilo i i̱ lu Mkaanem nam la. Atindiakaa a a lu ken Ruamabera la aa wase se u tsuan akaa a tweregh sha kwaghfan shighe u se lu eren twer yô. Ikyav i tesen yô, er se fe ser Bibilo venda “ahir a eren” yô, doo u se palegh nyityô twersôron u ú tsar kwagh u azôv sha mi cii. (Mbagalatia 5:19-21; Duteronomi 18:10-12) Shi ikyav igen kpa ngi heen i kwaghfan u ken Bibilo u a kom u se har sha mi yô, ikyav shon yô ka i ne: “Orlanenkwagh ka nan gba nan jighjigh sha hanma kwaghôron tsô, kpa orfankwagh yô, ka nan ver ishima sha zende u nan.” (Anzaakaa 14:15) Nahan zum u se soo ser se er ma twer yô, doo u se tôv se fa akaa a a lu mimi sha kwagh u twer shon la, se gba nan “jighjigh sha hanma kwaghôron tsô” ga. Aluer se mba eren kwagh “tsev tsev” imba ne yô, kwagh ne una wase se se gbidye kwar sha kwagh u se soo ser se er la vighe vighe, nahan se mase tsuan kwagh u se fe a hembe doon la.—Titu 2:12.

13, 14. (a) Se tese ser se suur sha Yehova sha nyi gbenda, man magazin u Iyoukura man Awake! la mba se a iwasen nena? (b) Ka kwaghwan u tesen se er se nôngo a côron mbauangev mba nyi yange i nger ken Awake! u Janawari 22, 2001 laa?

¹³ Shi se tese ser se suur sha Yehova sha u timen sha akaa a a lu ken ityakerada i wanakiriki u jighjigh la. Magazin u Iyoukura man Awake! ngu a due a akaangeren a injaa sha ashighe ashighe a a er kwagh u mbamnyoon man iangev atô kposo kposo yô. * Ashighe agen yô, umagazin mban ka ve ôr akaa a ior kposo kposo mba ve we ishima a mbamnyoon mba zan iyol wue wue man iangev kua awan atô kposo kposo yô. Heela tseegh ga, akaangeren ne agen due a mbamhen ken Ruamabera kua akaawan a injaa a tesen se er se wa ishima a côron mbauangev yô.

¹⁴ Ikyav i tesen yô, Awake! u Janawari 22, 2001 la ôr akaa imôngo sha itinekwagh i i kaa ér “Msurshima sha ci u Mbauangev” la. Akaangeren ne due a akaawan a ken Bibilo a wasen se shi a due a akaa a i tôv ior mbakaven kwagh kposo  kposo mba ve ker cio u wan ishima a iangev mbi vihin tsung anyom kpishi yô. Kwaghngeren u a kaa ér “U Wan Ishima a Angev Mbu Se Lu a Mi La—Se Er Kwagh Ne Nena?” la due a kwaghwan nahan ér: Nôngo kpoghuloo fa kwagh u angev mbu u̱ lu a mi la er ú fetyô la cii. (Anzaakaa 24:5) Lu a mbaawashima mba dedoo mba ú soo wer ú kure ve yô, shi lu a awashima wer ú wase mbagenev kpaa, kpa fa wer alaghga u fatyô u eren sha mbaawashima mban vough er ior mbagen nahan ga. (Aerenakaa 20:35; Mbagalatia 6:4) Mayange je de palegh ior, lun kwagh wou tswen ga. (Anzaakaa 18:1) Shighe u ior ve ve ú inya yô, nôngo i saan ve iyol. (Anzaakaa 17:22) Kohol cii yô, za hemen u lun ikyooso ikyooso a Yehova man tiônnongo kpaa. (Nahum 1:7; Mbaromanu 1:11, 12) Doo se er Yehova a ne se akaawan sha ikyev i nongo na a a kom u se har sha mi nahan ga he?

Shighe u Myina u Se Lu a Mi la a Zer a Vese Yô

15. Apostoli Paulu lu hemba mbamyina nav mba iyol i vough ga ne nena, man ka vangertiôr u nyi se lu a mini?

¹⁵ Apostoli Paulu lu nger ér: “Ma kwagh u doon tem ken mo ga.” (Mbaromanu 7:18) Mbamyina mba Paulu vande lun a mi la na yô á fa er i lu kwagh u ican kpishi u nôngon a asaren man mbamyina mba iyol yase i vough ga ne yô. Nahan kpa, Paulu lu a vangertiôr wener una hemba. (1 Mbakorinte 9:26, 27) Una hemba nena? Una hemba sha u suur sha Yehova a ishima na i môm cii. Kape i lu ve Paulu kaa nahan ne, ér: “Kpe ahii, mo or u gban kera nee! Ka an nana shi yimam sha ikev i iyol i kuugh nee? I̱ wuese Aôndo sha Yesu Kristu Ter wase!” (Mbaromanu 7:24, 25) Se di ye? Se kpa se mba nôngon ityav a mbamyina asev. Er se lu nôngon a mbamyina mban nahan, ishima ia fatyô u yinan se ker fese je, se hen ser kwagh hemba se. Kpa Yehova una wase se aluer se har sha tahav asev ga, kpa se har sha Na er Paulu kpa yange er nahan yô.

16. Aluer ma myina u se lu a mi la zer a vese yô, kanyi i gbe u se er msen se sôn ser i̱ na se, man kanyi i doo u se er aluer se hide se mba eren kwagh shon her yôô?

¹⁶ Aluer ma myina u se lu a mi la zer a vese yô, se tese ser se suur sha Yehova sha u zamber a na ken msen. Gba u se sôn, shin se zamber a Yehova ser a̱ na se icighan jijingi na. (Luka 11:9-13) Se sôn un jighilii ser, a̱ na se iyol kôron tsaha i í lu vegher u ityamegh ki jijingi u Aôndo la. (Mbagalatia 5:22, 23) Kanyi i doo u se er aluer se hide se mba eren ma ieren i doon ga i yange se de u eren la yôô? Mayange je, se gba uwer ga. De se vôr nen ga, se eren nen msen a iyol hiden a mi ijime hen Aôndo wase u zungwen mhôônom la ser a̱ de se asorabo ase shi a̱ wase se. Yehova una venda ishima “i zamber, i uren tsung” i or u imoshima i nan i lu zan nan iyol la ga. (Pasalmi 51:17) Aluer se er msen hen Yehova a ishima i mimi shi se zungwe sha kwaghbo wase yô, una wase se, se nôngo kwagh a ameen.—Mbafilipi 4:6, 7.

17. (a) Er nan i doo u se fa er i lu Yehova ken ishima sha kwagh u ma myina u se lu nôngon a mi laa? (b) Aluer se mba nôngon ser, se de ishimanyoon dang dang, shin ser, se kôr nombor wase tsaha shin se mba nôngon ser asema ase a de yier yemen sha iemberyolough i vough ga yô, ka avur a ruamabera a nyi se fatyô u kôron á saan a mi ken ishima?

¹⁷ Shi se tese kpaa ser se suur sha Yehova sha u timen ken Mkaanem nam sha er se zua a iwasen yô. Aluer se gbidye kwar se fa er i lu Yehova ken ishima sha kwagh ne yô, kwagh ne una taver isharen yase i eren kwagh sha ishima na la. Nahan ishima ia lu se ker er un kpa i̱ lu un ker nahan, se kôr akaa a un kpa a ker á ihyom la ihyom. (Pasalmi 97:10) Mbagenev yô, zua a iwasen kpishi sha u kôron avur a Bibilo a á er kwagh u myina u ve lu nôngon a mi la saan a mi. Se mba nôngon ser se de ishimanyoon dang dang-na?  Aluer ka nahan yô, se kôr avur ne ken ityou se saa a mi, ka Anzaakaa 14:17 man Mbaefese 4:31. Ka taver se u kôron nombor wase tsahaa? Doo u se lu a avur a á lu heen ne ken ishima: Anzaakaa 12:18 man Mbaefese 4:29. Asema a ase hemba yier yemen sha iemberyolough i vough ga shinii? Se nôngo u umbur avur er Mbaefese 5:3 man Mbakolose 3:5 nahan.

18. Er nan i doo u kunya ua kôr se u kaan a mbatamen ser ve wase se se hemba myina wase ga?

¹⁸ Gbenda ugen u shi se seer tesen ser se suur sha Yehova yô, ka u keren iwasen hen mbatamen mba icighan jijingi a ver ve ken tiônnongo la. (Aerenakaa 20:28) Kera ga je kpa, ior mba ve lu “uiwua” ne ka Yehova a ver ve sha ikyev i Kristu sha u ve kura iyôngo na shi ve nenge sha i̱ kpaa ye. (Mbaefese 4:7, 8, 11-14) Sha kpôô yô, alaghga a lu se ican kpishi u kaan ser i̱ na se iwasen i se nôngo a myina u se lu a mi la. Alaghga kunya ua kôr se, se lu cian ser mbatamen vea kenger se ashe ashe. Kpa sha mimi yô, ior mba ken jijingi mba ve vie mban vea na se icivir sha ishimataver yase i se lu a mi sha u pinen ve iwasen la. Heela tseegh ga, mbatamen ka ve nôngo ve tese aeren a Yehova sha kwagheren ve a iyôngo. Alaghga kwaghwan ve u kundun ken ishima u a lu a iwasen la man akaa a ve tese se ken Mkaanem ma Aôndo la aa lu kwagh u una na se kange ishima dông se hemba myina wase cii je la.—Yakobu 5:14-16.

19. (a) Ka sha nyi gbenda Satan a lu nôngon ér una yar tom a mlu u uma a lu ken dang shin tar ungun nee? (b) U suur sha Aôndo vangertiôr la kua nyi kere, man kanyi í doo u se kange ishima se eree?

¹⁹ I̱ de hungur se ga, Satan fa er shighe na a kera vese ga yô. (Mpase 12:12) Ngu nôngon ér mlu u hanma kwagh a lu ken dang shin tar ne ne, a tule se ishima sha er se kera nôngo kwagh ga yô. De se na nen mkaanem ma i er ken Mbaromanu 8:35-39 la jighjigh se tôô ave sha, ma kaa ér: “Ka an nana pav se a dooshima u Kristu? Ican shin ishima i nyian shin mtev u sha ican shin ijen shin idyelegh shin kwaghbo u cier iyol shin sankere? . . . Kpa ken akaa ne cii se hemba tser tser sha ci u Un u se doo Un ishima la. Gadia m fa dedoo mer, ku shin uma, shin mbatyomov mba Shaav, shin tahav, shin akaa a hegen ne, shin akaa a lu van ken hemen, shin mbaageev, shin mtav, shin mze, shin ma kwagh ugen u i gbe un a gba kpaa, una fatyô u paven se a dooshima u Aôndo u a lu ken Kristu Yesu Ter wase la je ga.” Nenge er mkaanem man ma tese msuur u suur sha Yehova sha wono! Nahan kpa, u suur sha na imba ne ne, hemba di mhen u lun a mi ken ishima tseegh tsô la. Kpa ka vangertiôr u lun a mi u a kou akaa a se tsough sha kwaghfan u eren ken uuma asev sha hanma sev yô. Nahan yô, de se kange nen ishima sha u suur sha Yehova a ishima i môm ken ashighe a ican.

[Footnotes]

Baver We Kpa?

• Ka sha igbenda i nyi nahan se tese ser se suur sha Yehova sha shighe u ican i ker se yôô?

• Shighe u angev mbu lu zan se iyol yô, se tese ser se suur sha Aôndo nena?

• Se tese er se suur sha Yehova sha mimi sha shighe u myina u yolough a zer a vese nena?

[Study Questions]

[Picture on page 27]

Aluer se kera mba a tom ga yô, alaghga a hemba doon u se hide se time sha gbenda u se eren uma la

[Picture on page 28]

Kwaghôron u i nger sha kwagh u uma u Loida la tese er u suur sha Yehova ngu a wase or nan wa ishima yô [Nenge “Awake!” (zwa Buter) Mei 8, 2000]

[Picture on page 30]

Doo u kunya ua kôr se u kaan ser i̱ na se iwasen sha er se hemba myina wase ga