Ior Pine Mbampin Kpishi—Kpa Mbamlumun Mba Kuman Ve Mba Kpuaa Tsô

IYANGE i Mbajighjigh Cii i sha uwer u Novemba 1, 1755 la, tar tenger pepe ken gar u Lisbon sha shighe u ior nyôr adua yô, kwagh ne er cier iyol kpishi. Ayou udubu udubu yôhôr haa inya shi wua ior udubu pue pue.

Aahe ne been a bee nahan maa orgen u ngeren ityakerada ken zwa French u i yer un ér Voltaire la nger kwagh tiônôô sha aahe u er ken gar u Lisbon la, mba yer ankwagh u yange nger la ér Poem on the Lisbon Disaster, ken kwagh ngeren na ne á venda kwagh u ior lu kaan ér aahe la ka tsaha Aôndo a tsaha ior mba ken gar ne sha ci u asorabo ve la la. Voltaire kaa ér imba uaahe mba vihin mban nahan ka mba ior vea fatyô u kaven shin pasen er i hii ve ve eren ga. Á nger ér:

Sha won er kwagh a ma or ga, se kpen pinen kpa a lu gbilin tsô;

Se mba tômon ka Aôndo u una ôron kwagh a uumace yô.

Kpa ú ngu wer, i gbe je ka Voltaire yange hii pinen mbampin sha kwagh u Aôndo ga. Uaikyôr man uaahe mba ve eren sha ikyov ikyov ne na yô ior zer pinen mbampin ken asema ve er i hii man ve akaa ne a eren nahan yô. Tertamen Yobu ngise pine mpin anyom kar udubu imôngo hegen, á pine mpin ne zum u mbayev nav cii sember saan ku shi un iyolna kpa lu ken mnyoon kpishi yô, á pine ér: “Ka nyi [Aôndo] A ne or u nan lu ken ican la iwanger, man mba asema a vihi ve tsung la uma kpaa?” (Yobu 3:20) Nyian kpa ka i taver ior kpishi u kaven e̱r Aôndo u dedoo man u dooshima nahan kwagh a gbe un sha ican i yan man ifer i i nger yum ne ga yô.

Ior kpishi venda kwagh u i kaa ér Orgbanakaa ngu u a nengen sha uumace doo doo la, ve hen ér una lu yô ijen man iangev man ku ma ú kumbur a ve yum nahan ga. Ornyimanaôndo ugen ua fe kwagh tsula yô kaa ér: “Kwagh môm tsô ngu u una fatyô u nan Aôndo ishô sha u den ér wanye u cuku nana ya ican ga, . . . saa aluer ngu ga tseegh.” Akaa a vihin tsung er Mtim u Ikpelaior u yange er shighe u Ityav mbi Tar cii Mbi sha Uhar la na yô ior kpishi kure ken asema ve ér Aôndo ngu ga. Nenge ase kwagh u Oryuda ugen u ngeren akaa yange nger ken antakerada u tôôn abaver ne, á akaa ér: “Gbenda u ú hembe doon u or a pase atsan a yange ior ya ken gar u Auschwitz la yô, ka u kaan ér Aôndo ngu ua wasen uumace sha akaa a á tser ve la ga.” Kwaghtôvon ugen u yange i tôv ken inyom i 1997 ken tar u France u ú hembe ngeen a Mbakatoliko la tese ér, iorov er 40 ken deri nahan ken iyenge ior i tar la na jighjigh ér Aôndo ngu ga, sha ci u tìm-ikyurior u a lu zan hemen sha tar imba er u yange er ken tar u Rwanda ken inyom i 1994 la nahan.

 Kwagh Ngu u A Yangen Ior u Nan Jighjigh Yôô?

Er nan ve Aôndo a er kwagh u yangen akaa a bo ér a de eren ga, ga? Orkatoliko ugen u ngeren akaa a mbayiase kaa ér mpin ne ka “kwagh u vesen u a yangen ior kpishi u nan Aôndo jighjigh yô.” Á pine wener: “Sha kpôô yô, or a fatyô u nan Aôndo ua gbe teman tsô a lu kenger er i lu wuan ior mba ishôô umiliôn umiliôn man tìm-ikyurior ua lu zan hemen ken tar kpa a er kwagh u yangen kwagh ne ga la jighjigh je kpa?”

Ngeren u Orgberen pipaabaver i Mbakatoliko i í yer ér La Croix la kpa kaa ér: “Ka alu uaahe mba ve vande eren kera shin alu akaa a vihin a iwavaren í er shin alu uaahe mba sha gbaaôndo shin alu afer a ma nongo u er gayô ku u or u doon se ishima je kpa, akaa ne nga a cier ior iyol kpishi nahan ve kenger ashe sha. Ve pine ér: Aôndo u ngu hana? Ka ve soo u fan er i hii ve Aôndo a de ér kwagh a er ve nahan yô. Un ka Uhemban u kwagh a gbe un avese ga, Ua we se ikyo ga la ga zee?”

Ken inyom i 1984 la, Pope John-Paul u sha Uhar ôr kwagh sha kwagh ne ken washika na u nger hen ior u i yer ér Salvifici Doloris la. Á nger ér: “Shin er tar ne u bugh uumace ashe ve fe ér Aôndo ngu, shi ve nengen a kwaghfan man tahav man mhembe na nahan kpa, ka inja er ifer man ican i yan na uumace kera nenge a kwagh ne nahan ga, ashighe agen yô, ican i yan ngi i vihi mnenge u uumace ve nengen Aôndo sha gbenda u vesen nahan ne, hemban cii je yô er hanma sev ior ka ve ya ican sha akaa a ve fe kwagh sha mi ga man aferakaa a mbagen ve er sha iyol ve kpa ve yem iyol ishô la.”

Imba ican i uumace ve lu yan nyian yum ne nahan shi kwagh ne zua sha kwagh u Bibilo i kaa ér Aôndo u dooshima man u á hembe agee ngu la kpa? Eren kwagh u yiman ma or shin ior sha ikyev i uaahe kpa? Aôndo eren ma kwagh sha ci wase nyian kpa? Voltaire a̱ kera kaa ga yô, mase “Aôndo u a lamen a uumace” ngu u una na ikyar sha mbampin mban kpa? Ôr ngeren u ken hemen ne tsô u zua a mbamlumun sha mbampin mban ne.

[Pictures on page 3]

Aahe u yange er ken gar u Lisbon ken inyom i 1755 la na yô, Voltaire kaa ér imba uaahe mba vihin mban nahan ka mba ior vea fatyô u kaven ga

[Credit Lines]

Voltaire:I tôô ken takerada u i yer ér Great Men and Famous Women la; Lisbon: J.P. Le Bas, Praça da Patriarcal depois do terramoto de 1755. Foto: Museu da Cidade/Lisboa

[Picture on page 4]

Tìm-ikyurior u a lu zan hemen sha tar imba er u yange er ken tar u Rwanda la na yô, ior kpishi nyiman ér Aôndo ngu ga

[Credit Line]

AFP PHOTO