Ibaver I Mbayôôn Tartor

“Wanger Mo Ve!”

KWASE Shiada u Yehova u pasenkwagh hanma shighe ugen ngu ken tar u Poland, mba yer un ér Dorota. Iyange igen yô, a tôô wan na u nomso u lun anyom 14 a za a na ken iyouci i makeranta ér a̱ za nenge a ortwer. I yilan ortwer la ér Janina, * nahan ortwer ne ngur nengen wan la yô, a pine ngô na Dorota ér a̱ ôr un akaa a wan na ne ka una lu hen ya ve, á eren yô.

Dorota gema kaa ér: “Ka mea kan shio u yôron iyol yam yô, wan wam a yôr iwer, se iorov ataratar mba se lu hen tsombor cii se ya se ide. Shi ka a ese iyou shi a wase u sôron akaa agen hen ya kpaa. Takerada u ôron doo un ishima. Ka wanye u lun a ishimaveren kpen kpen.”

Janina ungwa kwagh la kpiligh un iyol, tsô a kaa ér: “M er tom heen ka anyom 12 je ne, kpa m ngu a̱ vande ungwan imba kwagh ne ga.”

Dorota kaven ér ian due i una er shiada yô, a za hemen a kaa ér: “Mbamaren kpishi nyian mba ne ônov tsaha u vough ga. Ka nahan ve ashighe kpishi ka i war taver ônov vev u lun a iciviryolough ye.”

Janina gema pine ér: “Ú er nan ve ú fe akaa ne ciilii? Gadia mbamaren kpishi an mkav cuku tsô kpa mba a mi sha akaa ne ga.”

Dorota kaa ér: “Ka Bibilo i̱ lu imbor i imba kwaghfan u injaa ne ye. Ikyav i tesen yô, kwagh u i nger ken Duteronomi 6:6-9 la tese ér, gba u se hii tesen ayol a ase cii ve se mase tesen ônov asev ye. Doo u se vande henen aeren shon a se soo ser se tese ônov asev la se kôr ken asema ase gaa?”

Janina maa gbidye iwer, kaa ér: “Kwagh ne kpiligh mo iyolo. Kpiligh iyol je zua ga!” Maa a pine Dorota ér a̱ ôr un er Bibilo i̱ wase un u yesen ônov nav shi tesen ve yô.

Dorota maa pase un ér: “Se mba henen Bibilo hanma sati aa ônov asev. Ka se hen takerada u í yer ér Questions Young People Ask—Answers That Work * la.” Shi a za hemen a pase akaa agen a ken takerada la, shi a ter atineakaa agen ken ú kpaa.

Janina maa gema kaa ér: “Wanger mo ve! Ú shi vam a takerada shon wer m̱ nenge kpa?”

Ihwa i môm karen yô, Dorota maa za hide aa takerada shon.

Janina ngur nengen takerada shon yô, a gema a pine un ér: “Ka hanma adua ú zee?”

“M ngu Orshiada u Yehova.”

“Mbashiada mba Yehova mba nengen mba ve ze mbaadua mbagenev nena?”

Dorota kaa a na ér: “Mba eren a ve vough er mo kpa m lu eren a we nahan—mba ne ve icivir.” Shi a za hemen a kaa ér: “Kpa se tôm ser ma ve fe mimi u a lu ken Bibilo la.”

Janina kaa ér: “Hegen je kpa kam guda.”

Cii man Dorota mase yemen yô, a taver Janina ishima ér a̱ ôr Bibilo. A kaa a na ér: “Ia na uma wou una lu a inja, shi ia wase ú ken tom wou kpaa.”

Janina kaa a na ér: “Mimi je ú taver mo ishima, eren yam nahan kpaa.”

Kape Dorota er kwagh sha mkav shi kange ishima ve, a za lu u za nengen a ortwer, kpa a gema iaven la i̱ hingir i̱ eren shiada u injaa je la.—1 Peteru 3:15.

[Footnotes]