Erdoo Ngu a Inja Nan Je?

BIBILO kaa ér: “Erdoo u or yô, ka un a doo ior ye.” (Anzaakaa 19:22) Sha kpôô yô, or ka nana er erdoo a orgen sha ci u dooshima u nan lu a mi sha nan nahan, i doo kpen kpen. Kpa ikyav i ishemberti i “erdoo” la ken Bibilo yô, ka m-er u eren kwagh a orgen doo doo sha ci u alaghga kwagh vande zuan ne kangenaa, nahan ú ngu eren erdoo a nan sha u kimbin injô i kwagh u nan vande eren a we la. Sha nahan yô, erdoo himbir m-er u eren kwagh a orgen sha mimi la kpaa.

Yoashi tor u Yuda yange fatyô u lun a ieren i injaa ne ga. Lu ingyôr i ter na igen kua anmgbian u ter na Yehoyada a injô i̱ iwuese kpishi je. Shighe u Yoashi lu a iv inyom i môm kpaa ga la, ngô na u tamen u lu ifer kwase la ver iyol na torkwase, nahan a wua anmgbianev mba nomso mba Yoashi mba yange ma ve tema tor la cica cii. Kpa fatyô u wuan wanakiriki Yoashi ga, sha ci u ingyôr i ter na man anmgbian u ter na la tôô un za yer kpile kpile. Shi ve tese un Tindi u Aôndo kpaa. Yoashi lun anyom ataankarahar yô, anmgbian u ter na er kwagh sha tahav nav mbu pristi u tamen la, a wua torkwase u ifer la, a ver Yoashi tor.—2 Kroniku 22:10–23:15.

Gumor Yoashi tema tor sha inja zan zan anmgbian u ter na ne kar kpen, kpen yô maa or ti de akaa cii gba civir akombo. Aôndo tindi Sekaria wan u Yehoyada ér a̱ venda a Yoashi a̱ de akombo a civir. Yoashi na zwa i ta Sekaria awen, i wua. Kwagh ne lu ieren i m-ban u mimi i̱ vihin kpen kpen je yange er a tsombor u ú er a na doo doo kpishi yum ne ye!—2 Kroniku 24:17-21.

Bibilo kaa ér: “Kape tor Yoashi kera umbur kwagh u dedoo u Yehoyada ter u Sekaria er un, ga la, a gema a wua wan na je.” Sekaria ngur nôngon ku yô, a kaa ér: “TER A̱ nenge, A̱ or iyev!” Mkaanem ma Sekaria man kure shami vough, gadia Yoashi gba angev mbu nyoon tsung shi mbatomov nav wua un.—2 Kroniku 24:17-25.

Doo u se hingir er Tor Yoashi nahan ga, kpa hanma or u nana dondo kwaghwan u a lu shin heen ne di tsô yô nana ember mlu u ken hemen u dedoo kpen kpen. Kwaghwan ne kaa ér: “Erdoo man mimi ve̱ de undun we ga, . . . nahan . . . zua a mrumun . . . sha ishigh ki Aôndo kua ki iorov kpaa.”—Anzaakaa 3:3, 4.