Jighjigh u Nan Mbagenev Ka Kwagh u Hange Hange U A Ne Msaanyol ken Uma Yô

OR KA nana ya kwaghyan u a doo ga yô iyav mbu nyoon nan kpen kpen. Aluer kwagh er or nahan kuma kwa imôngo yô, doo u nana ver ishima tsung sha akaa a nan ye yô. Kpa aluer nan de kwaghyan u yan kuaa sha ci u nan kera soo u shi yan kwagh u una nyoon nan iyav ga yô, a lu shami ga. U eren kwagh nahan la una gema a va a va a mbamzeyol kpishi a hemba ave a tse. A kwaghyan shio yô ma or nana fatyô u lun uma ga.

Sha gbenda shon ne môm, or u se ne nan jighjigh ka nana er kwagh a vese sha mimi ga nahan ka i nyoon se je i saa her. Aluer ior mba se ne ve jighjigh nzughul a vese acin imôngo yô alaghga a doo u se hide se nenge sha gbenda u se ye ikyar a ior la vighe vighe. Kpa, u paven ijende a hanma or sha ci u se soo ser or a va nzughul a vese ga la ka gbenda u sôron zayol shon ne ga. Sha ci u nyi? Sha ci u aluer se na ior mbagenev jighjigh ga yô se lu a msaanyol ga. Sha er se zua a mkom ken uma yô, doo u se na ior mbagenev jighjigh, ve kpa vea na se jighjigh.

Takerada u i yer ér Jugend 2002 la kaa ér, “u nan orgen jighjigh ka kwagh u vesen u ka a na i doo ior mbagenev u lun ikyua a mbagenev hanma iyange yô.” Ipipaabaver i í yer ér Neue Zürcher Zeitung la kaa ér, “hanma or yô ka i sar nan u ior mbagenev ve na nan jighjigh. U nan orgen jighjigh la ne uma u or hembe doon,” je yô kwagh ne ngu “hange hange sha u waren uma.” Pipa i tôôn abaver la shi kaa ér a jighjigh u nan mbagenev shio yô, “or nana fatyô u wan ishima a mbamzeyol mba uma ga.”

Er i lu hange hange u nan orgen jighjigh yô, ka an se fatyô u nan nan jighjigh kpa nana nzughul a vese ga?

Suur sha TER a Ishima You Cii

Bibilo kaa a vese ér se “suur sha TER a ishima [yase] cii.” (Anzaakaa 3:5) Sha kpôô yô, Mkaanem ma Aôndo taver se ishima kwa imôngo ér se suur sha Orgban wase, Yehova Aôndo.

Er nan ve se fatyô u suur sha Aôndo? Ityôkyaa i hiihii yô, ka sha ci u Yehova Aôndo ka icighan Aôndo je. Profeti Yesaia nger wener: “Icighan, icighan, icighan, kape TER . . . A lu la.” (Yesaia 6:3) Ú soo u kporom ikyua a na ga sha ci u ngu icighan yumu? I de lu nahan ga, kpa i gema i doo ú a doo u kporom ikyua a na sha ci u mlu u Yehova u icighanegh la tese ér ngu wang, eren ma kwaghbo ga, shi á kuma u se har sha na a ishima i môm. Mayange je una fatyô u eren kwagh a vese sha ifer shin nzughul a  vese ga, shi mayange je una vihi jighjighi u se ne un la ga.

Heela tseegh ga, se fatyô u suur sha Aôndo sha ci u ngu a tahav mbu wasen mba ve civir un cii, shi gba un ishima u eren nahan kpaa. Ikyav i tesen yô, tahav nav mbu hemban la mbu ne eren kwagh. Ijirôron na i sha mimi man kwaghfan na u vough la ngu a tese un gbenda u una er kwagh yô. Man ka dooshima na u ieren igen i môm i kom sha mi ga la a mgbeghan un u eren kwagh ye. Apostoli Yohane nger wener, “Aôndo ka dooshima.” (1 Yohane 4:8) Hanma kwagh u Aôndo a eren cii ka dooshima na ka a mgbegha un u eren kwagh shon ye. Mlu u Yehova u icighanegh la man shi aeren na a tseer tseer la na yô ngu Ter u dedoo, u a kom u se nan un jighjigh a ishima yase cii yô. Kwagh môm tsô shin orgen môm tsô ngu u nan kom u se suur sha nan a hemba Yehova ga.

Suur sha Yehova, Nahan Zua a Msaanyol

Ityôkyaa injaa igen i se lu a mi i suur sha Yehova yô ka mfe u a fe se i hembe hanma orgen cii la. A fa er i lu hange hange u hanma or cii nana ya ikyar a Orgbanakaa sha gbenda u ikyaryan la ia tenger mayange ga, ia za hemen gbem shi ia tese ér nan suur sha a na yô. Mba ve ye ikyar a na nahan ne hemba mban ken mkpeyol. Tor Davidi yange kure ikyaa ne nahan ér: “Saan or u nan suur sha Aôndo la iyol.” (Pasalmi 40:4) Ior umiliôn imôngo nyian ne lumun a mkaanem ma Davidi ôr ne a ishima ve i môm.

Nenge ase akav a tesen ne. Doris yange lu ken tar u Dominican Republic, va mough heela yem za lu ken tar u Jamani shi va mough za lu ken tar u Grika kua ken tar u United States kpaa. A kaa wener: “Saan mo iyol kpishi er m suur sha Yehova nahan. A fa u nengen sha mo shi a fa u nengen sha mlu wam u ken jijingi man u ken ishima la kpaa. Ka un a lu ijende i hemban cii i or a fatyô u lun a mi ye.” Or atindigh ugen, mba yer un ér Wolfgang, a pase wener: “Ka kwagh u doon kpishi u haren sha or u kwagh wou a gbe nan ishima yô, or u nana fatyô u eren kwagh u a hembe doon sha ci wou, man sha mimi je nana er nahan yô!” Yange i mar Ham ken Ashia, kpa hegen ngu ken Yuropa, á kaa ér: “M ngu a vangertiôr mer kwagh môm hemba Yehova ga, shi tsum ga, nahan doom kpishi u haren sha a na.”

Nahan kpa, ka Orgban wase tseegh i gbe u se na un jighjigh ga, ior mbagen kpa se na ve jighjigh. Nahan yô, Yehova, un u a lu ijende yase i fan kwagh shi kaven kwagh kpaa la na se kwaghwan u a tese se ior mba se na ve jighjigh yô. Aluer se mba ôron Bibilo vighe vighe yô, se fatyô u kaven kwaghwan na u a ne se sha kwagh ne yô.

Ior mba Se Fatyô u Nan Ve Jighjigh Yô

Orpasalmi nger wener: “De suur nen sha mbatarev, sha wan u or u iwasen i lu her a na ga la ze.” (Pasalmi 146:3) Mkaanem ma Aôndo a ne i nger ne ma wase se u kaven ér uumace kpishi kuma mba se na ve jighjigh ga. Aluer ka “mbatarev” mba tar ne, mba i ne ve civir kpishi, anza er ior mba ve lu a kwaghfan tsor tsor sha akaa shin sha ityom kpishi nahan kpa, ve kuma u se gba nan nan ve jighjigh tsô ga. Ashighe kpishi gbendatesen ve ngu ze kpe, shi jighjigh u or ne “mbatarev” cii una ngôôr van nan ahenge ga.

Kpa, kwagh ne a de yangen se u kera nan ma or môm môm jighjigh ga ze. Nahan cii kpa, ka a inja kpishi je u se tsua ior mba se na ve jighjigh la sha  kwaghfan. Kanyi nahan se yar tom a mi u tsuan ior mba se na ve jighjighi? Ikyav igen ken tar u Iserael sha ayange a ngise la ia wase se sha kwagh ne. Er yange hingir hange hange u a tsua ior a ver ve sha ior i Iserael vea eren ityom i vesen yô, i wa Mose kwagh ér á “sange ior mba fan kwagh ken ior cii, mba ve cie Aôndo, mba mimi, mba ve vende inyaregh ki yamen ishô” yô. (Ekesodu 18:21) Kwagh ne tese se nyi?

Ior mban lu ior mba ve lu a aeren a Aôndo yô, lu nahan ve i sange ve i wa ve ityom sha ikyev ye. Yange ve vande tesen kera ér ve mba mbacian Aôndo; ve lu a icivir sha Orgbanakaa kpishi, shi ve cian u eren kwagh u vihin un ishima kpaa. Ikyav lu wang hanma or fa ér ior mban ka ior mba ve nénge sha afatyô ve cii u eren sha atindi a Aôndo yô. Ve vendan inyaregh ki yamen ishô, nahan kwagh ne tese ér mba a anza a dedoo aa a yàngè ve u eren tahav dang dang yô. Vea er ityom i i we ve sha ikyev la dang dang sha u keren mtsera ve shin mtsera u anngôôv vev shin azende a ve ga.

Se nyian kpa a lu ieren i sha kwaghfan u nengen ior mba ve lu a anza imba la nan ve jighjigh ga zee? Se fa ior mba aeren a ve a tese ér mba ior mbacian Aôndo kpa? Ve mban ne ve kange ishima u lun a anza a a tese ér mba eren tom sha atindi na kpa? Mba a ishima i nyaghen akaaeren aa a lu a vough ga la kpa? Mba a mimi iyol u una na vea er kwagh sha atseregh sha ci u mtsera ve shin vea nôngo tsung vea zua a kwagh u ve soo la ga kpa? Sha mimi yô, nomso man kasev mba ve lu anza nahan ne ve kuma mba se na ve jighjigh yô.

Ishima i De Yen Ú sha Ahenge a Van a u Zough A Mi sha Ashighe Ashighe la Ga

Er jighjigh u nan ior mbagen i lu kwagh u a hiin shighe môm gaegh ga yô, gba kpee u se er kwagh sha ishimawan zum u se lu sangen ior mba se na ve jighjigh la. Kwagh u a doo u se er yô ka u nan or jighjigh kure kure. Se er kwagh ne nena? Se fatyô u kpen iyol nengen inja i or shighe naleghaa, shi nengen er ka nan er kwagh ken mbamlu kposo kposo yô. Ú fatyô u nan or shon jighjigh sha akaa a kiriki kpa? U tesen ikyav yô, ka nana ngohol or kwagh nahan nan hidi a mi er nan tende zwa nahan kpa, shi ka nana na or shighe sha kwagh nahan nan eren er nan ôr la kpa? Aluer nan eren akaa ne nahan yô, se fatyô u hiin u nan nan jighjigh sha akaa a vesen kpaa. Kwagh ne zua sha kwaghôron u mimi ne: “U nan lu jighjigh sha ankwagh u kiriki yô, nana lu jighjigh sha kwagh u vesen kpaa.” (Luka 16:10) U sangen a sange ior mba se na ve jighjigh shi lun a ishimawan kpaa la ka kwagh u una wase se nahan mayange je se zua a ishimavihin kpoghuloo sha ci u or nzughul avese yum ga.

Kpa, aluer or u se ne nan jighjigh nan nzughul avese yô, se er nena? Mba henen Bibilo vea umbur er mbaapostoli mba Yesu Kristu yange ve er kwagh a na sha mimi ga hen tugh mbu i kôr un la yô. Yuda Isekarioti yange nenge un mker, nahan mbagenev mbara cii cier ve iyol tsô ve yevese ve undu un. Peteru je yô nyiman Yesu acin atar je. Kpa Yesu fa er i lu Yuda tseegh ieren na la i lu sha apera yô. Er mbaapostoli mba 11 mba ve mase shin her mbara yevese undu un sha shighe u sôngo sôngo ne nahan kpa, usati mba karen kpuaa tsô Yesu shi tese ér un na ve jighjigh. (Mateu 26:45-47, 56, 69-75; 28:16-20) Se kpa, aluer ka se inja er or er kwagh avese sha mimi ga yô, a hemba doon u hiden nengen ierkwagh i nan avese la sha er se fa aluer kwagh ne tese ér nan ngu or u mimi ga shin aluer nan er kwagh la ka sha apera ga kpa se fa.

M Kuma u Orgen Nana Nam Jighjigh Kpa?

Or u nan nengen ér hemba doon u nana sange a sange ior mba nana na ve jighjigh yô, nana̱ pine iyol i nan sha mimi ér: ‘Mo m kuma u orgen nana nam jighjigh kpa? Doo u me ver ishima u lun a anza a vough a nyi nahan man me kuma u ior vea nam jighjighi, man gema ior mbagen yô ka anza a nyi nahan vea lu a mi ve me na ve jighjighi?’

Sha mimi yô, or u nan kom u mbagen vea na nan jighjigh yô ka or u nan er kwagh u mimi sha hanma shighe yô. (Mbaefese 4:25) Nan gem kwaghôron u nan sha u i doo mbaungwan a nan, nahan nana zua a kwagh u nan soo ga. Man zum u or u mimi nan tende zwa a or sha kwagh yô ka nan nôngo kpoghuloo nan er sha ityendezwa i nan la. (Mateu 5:37) Aluer or ôr kwagh a nan ken idyu yô, nan tee kwagh la nan samber a mi inya ga. Or u nan kom u a na nan jighjigh la ka or u nan eren kwagh sha mimi a ikyar i nan i ken ivese yô. Nan nengen ufoto mba jimbagh ga, shi nan haren ishima i nan sha asaren a iyolough ga, shi nan hian a ior mbagen ga. (Mateu 5:27, 28) Or u nan kom u se nan nan jighjigh la ka or u nan eren tom kpoghuloo sha er nana zua a kwagh a koso iyol i nan kua  tsombor u nan kpaa yô, mayange je nan keren inyaregh sha wayo sha u bumen ior mbagenev ga. (1 Timoteu 5:8) Aluer se mba a aeren a injaa a a har sha Ruamabera ne ken ishima yô aa wase se se kav ior mba se fatyô u nan ve jighjigh yô. Heela tseegh ga, aluer se iyol yase kpa se mba a aeren ne yô, kwagh ne una na mbagenev vea na se jighjigh shi se kpa se na ior mbagenev jighjigh.

A lu kwagh u doon we kpen kpen u va lun ken tar u ior cii vea lu ior mba mimi, tar u ior mba nzughul a mbagenev vea kera lu ga gbem sha won la! Kwagh ne ka mnyamciem shinii? Ior mba ve ne uityendezwa mba Bibilo i er la jighjigh yô kwagh ne ka ve mnyamciem ga, gadia Mkaanem ma Aôndo ma tsengaôron kwagh u “tar u he” ú doonashe ú mayange je icugh man aie man anyighe vea lu ker ga kua ijungwen man angev man ku je kpaa ua lu ker ga la! (2 Peteru 3:13; Pasalmi 37:11, 29; Mpase 21:3-5) Ka kwagh u injaa kpishi u seer henen kwagh u ishimaveren ne ga he? A saan Mbashiada mba Yehova iyol kpishi u pasen we akaa ne cii kua akaa a hange hange agen kpaa.

[Picture on page 4]

U nan mbagenev jighjigh ga la ka kwagh u ka a na se kera lu a msaanyol ga yô

[Picture on page 5]

Yehova hemba kuman u se suur sha a na cii

[Pictures on page 7]

Se cii ka hange hange u se na mbagenev jighjigh, ve kpa vea na se jighjigh