Mbampin mba Mbaôron Takerada Ne Ve Pin La

Er nan ve Elisha yange sôn Eliya wener a na un “ikwar ihiar” i jijingi naa?

Er shighe mase shin di kpuaa u Eliya una kure tom na u profeti ken Iserael yô, profeti u kiriki Elisha zamber a na wener: “Shi rumun ikwar ihiar i jijingi wou i̱ gba sha a mo.” (2 Utor 2:9) U ôron kwagh ne sha mlu u ken jijingi yô, ikyav tese ér Elisha yange lu zamber wener a kar kwar a na un ikwar ihiar er yange a̱ kar kwar ve i na waniunda nahan. (Duteronomi 21:17) Aluer se hide se time sha ngeren ne yô kwagh ne una wanger se shi se zua a ityesen sha kwagh u yange er la kpaa.

Profeti Eliya tsua Elisha ver un sha tom sha u a tile sha ityough nagh shighe u una kera lu ga yô, á er kwagh ne vough er Yehova kaa un nahan. (1 Utor 19:19-21) Elisha lu wanakiriki u Eliya, er un tom sha mimi kuma anyom ataratar shi wa ishima u eren tom ne zan zan kpaa. Nahan sha yange i masetyô i Eliya mase eren tom profeti ken Iserael la je kpa, Elisha lu a orvesen na u lu tesen un tom ne her tsô. Shin er Eliya lu kaa a Elisha ér a de kera dondon un ijime ga nahan kpa, profeti u kiriki ne venda acin atar wener una dondo un ijime her, á kaa a na ér: “Me undu u ga.” (2 Utor 2:2, 4, 6; 3:11) Sha kpôô yô, Elisha yange tôô wener profeti u vesen ne ka ter na ua tese un akaa a ken jijingi yô.—2 Utor 2:12.

Kpa, lu Elisha tseegh lu wan u Eliya u yange na un ityesen i ken jijingi ga. Eliya man Elisha lu a nongoior ugen imôngo, ve mban ve lu “ônov mba uprofeti.” (2 Utor 2:3, NW ) Ngeren u ken Utor u sha Uhar la tese ér “ônov” mban lu ikyooso kyooso a Eliya ter ve u yange na ve ityesen i ken jijingi la. (2 Utor 2:3, 5, 7, 15-17) Kpa, er lu Elisha i tsua un ér á tile sha ityough ki Eliya yô, lu un lu waniunda ken ônov mba Eliya, mba Eliya na ve ityesen i ken jijingi la ye. Yange a kar kwar ken Iserael sha ayange a tsuaa la yô, i na waniunda kwar u dyako u ter na la kwa har, kpa ônov mbagen cii yô i na ve kwar la kwa môm. Ka nahan ve, Elisha yange sôn Eliya wener a na un kwar u dyako na u ken jijingi la kwa har ye.

Er nan ve Elisha sôn un kwagh ne sha shighe nee? Sha ci u shighe mase shin cuku u una hii zege tom u i na un la—tom u lun profeti ken Iserael sha ityough ki Eliya. Elisha fa je wener, a gba u una zua a tahav mbu ken jijingi, mbu i lu Yehova tseegh una fatyô u nan un, mbu mbu hembe mbu nagh zende zende la, sha er una er zege tom u taver tsung u i ne un la una kure vough kpaa yô. Gba kpee u una eren kwagh a mciem shio er Eliya kpa eren nahan. (2 Utor 1:3, 4, 15, 16) Sha nahan yô, á sôn Eliya wener a̱ na un ikwar ihiar i jijingi na u ishimataver man u “ishima [tseen] tsung sha kwagh u TER” la—aeren ne ka aeren a doon kpishi a jijingi u Aôndo ka a wase or u lun a mi yô. (1 Utor 19:10, 14) Eliya er nena sha kwagh nee?

Eliya fa wener kwagh u Elisha a sen un ne un ngu a tahav mbu nan un ga saa Aôndo tseegh. Nahan Eliya hide a iyol ijime, gema kaa a na ér: “U sôn kwagh u ican tsô; nahan kpaa, aluer wea nengen a mo zum u á tsuwem her a we kera la yô, á lu nahan.” (2 Utor 2:10) Man sha kpôô yô, Yehova de ér Elisha a nenge er Eliya una kôndo sha hiar a yem sha yô. (2 Utor 2:11, 12) I na Elisha kwagh u yange sôn la. Yehova na un jijingi u una wase un u eren tom na u he shi una lu a ishima i tagher a atsan kpaa yô.

Nyian ne, Mbakristu mba i shigh ve mkurem (ve mba ashighe agen ka i yila ve ér nongo u Elisha la) man mbacivir Aôndo mbagenev vea fatyô u zuan a ishimataver kpishi sha kwagh u i nger ken Bibilo ne. Ashighe agen yô, alaghga ishima ia nyian se kpishi sha tom u i ne se yô, se nenge ser se yina sha tom shon, shin alaghga ishimataver i se lu a mi sha tom wase u pasen kwagh u Tartor la ia lu panden sha ci u ior mba keghen ato a vese ga shin se mba tagher a ahendan ken haregh wase yum. Kpa aluer se zamber Yehova ser á wase se yô, una na se icighan jijingi na, nahan una wase se u wan ishima a mbamtaver man mbamlu kposo kposo mba se tagher a mi sha ashighe ashighe la. (Luka 11:13; 2 Mbakorinte 4:7; Mbafilipi 4:13) Er Yehova yange nyôôso Elisha sha u á er ityom i hemban taver nahan, se kpa una wase se, sea lu agumaior shin sea lu mbaganden kpaa, nahan se er tom wase u kwaghpasen, se kure ú doo doo.—2 Timoteu 4:5.