Se Fatyô u Nan Ma Orgen Jighjigh Je Kpa?

SHA shighe u Girgar u Berlin yôhôr haa inya ken inyom i 1989 la, akaamyer kpishi due ken igbar a ior vande fan ga yô. U tesen ikyav yô, kwase ugen, mba yer un ér Lydia, * yange kav ér shighe u gomoti u Tyemimôngo lu hemen ken tar u East Germany la, adugwer a i yer á ér Stasi shin State Security Service la nger akaa shin takerada kpishi a yange un eren ken iuv yô. Kwagh ne kpiligh Lydia iyol, kunda un kpishi u fan ér ka nom na jighilii je yange ôr adugwer a Stasi ne akaa ne ve nger shin takerada ye. Nenge ase yô, lu or u Vera ma na un jighjigh vangertiôr la je er kwagh a na sha mimi ga nahan ye.

Robert lu igyandenor u lu ishima kundu kundu yô; ipipaabaver i í yer ér The Times of London la ôr ér Robert yange “lu a icivir kpishi sha ortwer na shi soo kwagh na tsung shi na un jighjigh kpaa.” Ortwer na ne “fa kwagh kpishi shi zungwen ior kpaa.” Tsô maa iyange igen yô Robert tôndo ku kpe. Kpe lu angev mbu ishimaa shin lu angev mbu kpen aleghe? Ei, lu ma angev ga. Mbautahav kaa ér ortwer ne yange za a icigh ki wuan or hen ya u Robert za kuma un, Robert fa ga, tsombor na kpa fa nahan ga. Ikyav tese ér lu or u Robert na un jighjigh je tôô ave sha ne wua un ye.

Ior mba Lydia man Robert na ve jighjigh la er kwagh a ve sha mimi ga je cier iyol, man akaa gema due ker a vihin kpen kpen. Ashighe agen yô ka i lu akaa a vihin nahan ga. Nahan cii kpa, shighe u or u se ne nan jighjigh nan er kwagh a vese sha mimi ga yô ka i nyoon se kpen kpen. Ijiir i vesen igen ken tar u Jamani i keren mnenge u ior sha akaa due a takerada ve u sha inyom u í yer ér Allensbach Yearbook of Opinion Polls 1998-2002 la, takerada shon tese ér iorov 86 ken atô u iorov deri mba i tôv ve yô kaa ér or u ve ne nan jighjigh nan er kwagh a ve sha mimi ga. Alaghga we kpa imba kwagh ne vande eren we. Nahan yô, kwagh u ipipaabaver i ken tar u Switzerland i í yer ér Neue Zürcher Zeitung la yange i ôr ken inyom i 2002 la a de kpiligh se iyol ga, yange i kaa ér, “mne u ior nan ayol a ve jighjigh la ngu panden ken ityar i Abuter i í lu yôughyôugh la je kuma hegen upuembaanyomov imôngo.”

Jighjigh u Nan Or Ka Kwagh u Ngu a Hii Kure Kure yô, kpa Gem Vihin Fese

Mne u nan mbagenev jighjigh la ka nyi? Dikishenali igen pase kwagh u a lu u nan mbagenev jighjigh la ér ka “u lun a vangertiôr sha ior wer ka ior mba mimi, mba ve eren kwagh sha atseregh ga, mba mayange je vea bula ú ga yô.” U nan ior mbagenev jighjigh ka kwagh u ngu a hii kure kure yô, kpa gem vihin fese. Er ior kpishi ior mbagenev mba ve ve ne ve jighjigh la ve er kwagh a ve sha mimi ga nahan, shi ka kwagh u kpiligh se iyol er ka i war taver ve u nan mbagenev jighjighi? Kwaghtôvon ugen u yange i tôv ior ken tar u Jamani ken inyom i 2002 la kaa ér, “ken hanma agumaior atar a i dugh yô, ka gumor môm nahan tseegh ka nan nôngo u nan ior mbagenev jighjigh doo doo ye.”

Alaghga a doo u se pine ayol a ase mbampin mban, ser: ‘Se fatyô u nan ma orgen jighjigh sha mimi je kpa? Ka a inja u nan orgen jighjigh aluer ka inja er nana va er kwagh a vese sha mimi ga kpaa?’

[Footnote]

[Blurb on page 3]

Kwaghtôvon ugen tese ér iorov 86 ken atô u iorov deri mba i tôv ve yô kaa ér or u ve ne nan jighjigh nan er kwagh a ve sha mimi ga.