Kohol Iyol Keghen A Kegh Iyange I Yehova
Kohol Iyol K eghen A K egh Iyange I Yehova
“Kohol nen iyol gadia ka hen shighe u ne ver ishima ga la je, Wan u or Una va ye.”—MATEU 24:44.
1. Er nan ve i gbe u se ver ishima sha kwagh u iyange i Yehova laa?
IYANGE la ia lu iyange i uitya man i iyughugh man i ishimanyian, kua i ican man i ime i wan man i myôhôr. “Iyange i TER i vesen i cieryol” la ia va sha botar ne kpee a bunde ga, vough er Mngerem ma Deemee tim botar u sha ayange a Noa la nahan. Ia va keng a bunde ga. Nahan kpa, “hanma or u nan yer sha iti i TER yô, nana war.” (Yoel 2:30-32; Amoshi 5:18-20) Aôndo una tim mbaihyomov nav, una gema a yima ior nav. Profeti Sefania ôr kwagh ne a ishima i torough torough wener: “Iyange i vesen i TER mgbôghom, ngi van fefa je.” (Sefania 1:14) Nahan tsô, ka hanma shighe jim Aôndo una ôr ijir nee?
2, 3. Er nan ve i gbe hange hange u se wa iyol se keghen a kegh iyange i Yehova la?
2 Yesu kaa wener: “Kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.” (Mateu 24:36) Er se fe iyange la jighilii ga yô, ka a inja kpishi u se eren sha mkaanem ma ivur i sha inyom i̱ 2004 ma kaa ne ér: “Kuran nen, . . . kohol nen iyol.”—Mateu 24:42, 44.
3 Yesu ôr er a va gagher a va yima ior mba ve we iyol ve kegh a kegh la, kpa mbagenev yô a yima ve ga yô, á kaa wener: “Hen shighe la ior ihiar vea lu ken ityev, á tôô u môm á undu u môm; kasev uhar vea lu wuan uwua sha nase; á tôô u môm á undu u môm.” (Mateu 24:40, 41) Mlu wase una lu nena sha iyange ikyaa laa? Iyange la ia va kohol se se kohol iyol se lu keghen i̱ a kegh shin ia va kohol se abuu? Ka akaa a se tsough u eren hegen ne aa tese kwagh u una er se sha iyange la ye. Se wa iyol se kegh a kegh iyange i Yehova la sha u palegh aeren agen a a dumbur hegen yum ne, shi se palegh u nôngon gbev ken jijingi, shi se nyagh aeren agen a ior ve lu eren la.
Palegh Ieren i Wan Kwagh Ikyo Ga La
4. Ka ieren i nyi ior mba sha ayange a Noa la lu erene?
4 Hen ase sha kwagh u ayange a Noa la. Bibilo kaa ér: “Ka sha jighjigh u nan man Noa kpaa, zum u Aôndo wa un kwagh sha akaa a i lu a nenge a mi ga la yô, a wa iko a gba tso sha u yiman ya na” ye. (Mbaheberu 11:7) Tso la a lu zege tso je a kpiligh iyol. Heela tseegh ga, Noa lu or u “yôôn kwagh u perapera.” (2 Peteru 2:5) Noa lu gban tso shi lu pasen ior kwagh je kpa ishima tsô i ta ve kwe u den uma u ve lu eren la ga. Sha ci u nyi? Sha ci u “ve lu yan akaa, man akaa, eren kasev, nan kasev ken unoo.” Ior mba Noa pasen ve kwagh la uve ityough u eren akaa ve, shi ember uma, akaa ne na yô “ve fa ga zan zan mngerem ma deemee va, va kuwa a ve cii” kera.—Mateu 24:38, 39.
5. Ior mba ken gar u Sodom u sha ayange a Loti la lu anza nena?
5 Kape sha ayange a Loti kpa lu je la. Ruamabera kaa ér: “Ve lu yan akaa, man akaa, yamen ukasua, lôôn akaa, maan uya, kpa sha iyange i Loti due ken Sodom yô, usu man sulfur due sha, haa shin inya, i tim ve cii.” (Luka 17:28, 29) Zum u mbatyomov ta Loti cin sha mtim u lu van la yô, Loti gema ôr ônov nav mba kemev kwagh sha mi. Kpa “lu ve er ka asenge a eren yô.”—Genese 19:14.
6. Ka ieren i nyi i gbe u se palegh keng ne?
6 Yesu kaa ér er ayange a Noa man Loti lu nahan “kape m-ande u Wan u or kpaa una lu la.” (Mateu 24:39; Luka 17:30) Nyian kpaa ior kpishi mbá a ieren i wan kwagh ikyo ga la. Mayange je se lumun ser imba mhen la a ya tor ken a vese ga. Kwagh u bo ngu sha u yan kwaghyan u injaa shi man msôrom akuma akuma ga. Ivese kpaa ka Aôndo a ser a ver ye. Nahan kpa, aluer se tôô akaa ne hemba ngan se tamen kwagh, se gema akaa a injaa a ken jijingi se nôngor a kera nahan, se mba wan iyol keghen iyange i vesen i Yehova i cieryol la kpa?
7. Ka mpin u hange hange u nyi i gbe u se pine cii ve se tsua u eren nyityô kwagh i se soo u erene, man ka sha ci u nyi?
7 Apostoli Paulu kaa wener, “shighe kera vese ga. Hii hegen yô, mba ve lu a kasev kpaa, ve̱ lu er mba a kwase ga yô.” (1 Mbakorinte 7:29-31) Se mase shin a shighe kpuaa tseegh u been tom u Aôndo a ne se u pasen kwagh u Tartor ne. (Mateu 24:14) Paulu wa mba ve er ivese kwagh ér ve de haren asema ve cii sha akar ve a ken ivese je u vea gema akaa a Tartor vea ver ken ijime ga. Paulu lu wan se kwagh ér se palegh ieren i wan kwagh ikyo ga la. Yesu kaa ér: “Vande keren nen tartor [u Aôndo] man perapera Na, man akaa ne cii á seer ne a ye.” (Mateu 6:33) Cii man se er mhen sha nyityô kwagh i se soo u eren yô, ka hange hange u se pine mpin ne ser, ‘Kwagh ne una yangem u veren akaa a Tartor hiihii ken uma wamaa?’
8. Aluer akaa a uma a se eren hanma sev la ya tor ken a vese yô, kanyi i gbe u se ere?
8 Aluer se wa ityough u eren akaa a uma a se eren hanma sev la man se va kav ser se gema se hungur a akaa a ken jijingi di ye? Inja yase man i ahuraior a ase a a lu a mfe u vough u Ruamabera ga, shi ve lu mbayôôn angwe u Tartor kpaa ga la war kahan cuku di tsô? Aluer se kav ser kwagh ngu nahan yô, se ôr Aôndo kwagh sha mi. Yehova una wase se se lu a mhen u vough. (Mbaromanu 15:5; Mbafilipi 3:15) Una wase se u veren akaa a Tartor hiihii ken uma wase, shi una wase se u eren kwagh u vough shi eren un tom u i gbe u se er un la.—Mbaromanu 12:2; 2 Mbakorinte 13:7.
De Meer Mnyam ken Jijingi Ga
9. Sha kwagh u Mpase 16:14-16 a er yô, hii nan ve i gbe hange hange u se taver ashe ikyôr se meer mnyam ken jijingi ga?
9 Kwaghôron u profeti shon u i er kwagh u “ityav mbi iyange i vesen i Aôndo, Uhembanagee” mbi sha iyange i̱ Armagedon la tese ér ior mbagenev vea lu yaven. Ter Yesu Kristu kaa ér: “Nenge, M ngu van er ormbaiv nahan. Or u nan lu per shi nan kor riga u nan sha u nana kera zende idyelegh er á nengen kunya u nan ga yô, i saan nan iyol.” (Mpase 16:14-16) Riga u i tér heen ne ka kwagh u ka a tese ér se mba Mbakristu mba ve lu Mbashiada mba Yehova yô. Kwagh ne kua tom wase u yôôn angwe u Tartor u se lu eren ne, man ieren yase i Mbakristu la. Aluer se de tom u eren, er or u nan lu mnya nahan yô, a er se ikyav i Orkristu la iyol kera. Kwagh ne ka kwagh u kunya man u vihin kpishi. Gba kpee u se taver ashe ikyôr se gba mnyam ken jijingi shin se vôr ken jijingi ga. Se taver ashe ikyôr sha er se gba mnyam ken jijingi ga nena?
10. Er nan ve u ôron Bibilo hanma sev la una wase se u lun per ken jijingii?
10 Bibilo ôr nduur nduur er i gbe u se lu per shi se lu geng ge geng yô. U tesen ikyav yô, ityakerada i Bibilo i Ivangeli umbur ser ér: “Kuran nen” (Mateu 24:42; 25:13; Marku 13:35, 37); “kohol nen iyol” (Mateu 24:44); “ver nen ishima, kuran nen” (Marku 13:33); “kohol nen iyol” (Luka 12:40). Zum u apostoli Paulu kaa ér iyange i Yehova ia va sha tar ne abu bee kera yô, á taver mba ve na jighjigh a na imôngo mbara asema ér: “Se kera hungur nen mnyam er mbagenev nahan ga, se lu nen per geng ge geng.” (1 Mbatesalonika 5:6) Yesu Kristu u i kende a na sha la ôr mve na u una va abu la ken takerada u masejime u Bibilo, á kaa ér: “M ngu van fefa.” (Mpase 3:11; 22:7, 12, 20) Uprofeti mba ve lu Mbaheberu kpishi ôr kwagh u iyange ivesen i̱ Yehova i̱ jirigh la shi ve ta ior icin sha kwagh u iyange la kpaa. (Yesaia 2:12, 17; Yeremia 30:7; Yoel 2:11; Sefania 3:8) U ôron Bibilo, i i lu Mkaanem ma Aôndo la hanma sev shi hiden henen sha kwagh u se er la ka kwagh u injaa kpishi u una wase se u lun per ken jijingi yô.
11. Er nan ve u henen Bibilo sha tseeneke la i lu kwagh u hange hange u una wase se u lun per ken jijingi?
11 Sha kpôô yô, u yaren tom a ityakerada i “wanakiriki u jighjigh man u fan kwagh,” timen ken Ruamabera sha tseeneke wase kpoghuloo la una wa se inya itine u lun per ken jijingi! (Mateu 24:45-47) Nahan kpa, cii man kwaghhenen u sha tseeneke la a ume atam a dedoo yô, gba kpee u se henen un sha gbenda u una na se za ikyura yô, shi se henen un nduuruu. (Mbaheberu 5:14–6:3) Shi se yaan kwaghyan u taver u ken jijingi hanma shighe. Taver u sôron ian veren i henen kwagh sha tseeneke sha ayange ne kpen kpen. (Mbaefese 5:15, 16) Heela tseegh ga, u ôron Bibilo man ityakerada i i har sha Ruamabera la sha shighe u se nenge i doo se la tseegh wase kpa bee ga. Aluer ka u a ‘kpe jighjigh u nan wase iyol’ shi se lu per yô, gba hange hange u se henen kwagh sha tseeneke wase hanma shighe cii.—Titu 1:13.
12. Mbamkombo mba Mbakristu man mbamkohol mba kiriki man mba vesen ka ve wase se u taver ashe ikyôr sha er se meer mnyam ken jijingi ga nena?
12 Mbamkombo mba Mbakristu man mbamkohol mba kiriki man mba vesen kpaa ka ve wase se u taver ashe ikyôr sha er se meer mnyam ken jijingi ga yô. Ka ve wase se nena? Ka ve wase se sha akaawan a ka se ungwa la. Ka i zer umbur se ken mbamkombo mban er iyange i Yehova la i mgbôghom ga he? Mbamkombo mba Mbakristu mba se eren hanma sati la kpaa ka ve bugh se aan a ‘taver ayol a ase asema u lun a aeren a dedoo.’ Mtaver u taver ayol ase asema la ka a wase se u lun per ken jijingi. Nahan ka u se hen a hen er i hii ve i we se tindi ér se zaan mbamkombo hanma shighe er se “nenge iyange la i lu mgbôghom” la ga.—Mbaheberu 10:24, 25.
13. U eren tom u Mbakristu la ka kwagh u una wase se u lun per ken jijingi nena?
13 U eren tom u Mbakristu u pasen kwagh sha gbashima la kpaa ka kwagh ugen u wasen se u lun per ken jijingi. Dugh gbenda u lamen a ior ôron ve akav a ashighe ne man er i hii ve a lu eren la kera yô, ka gbenda u dedoo ugen u nyi ua wase se u umbur akav a ashighe ne man er i hii ve a lu erene? Ka sea nenge a mzehemen u ior mba se henen Bibilo a ve man er ka vea hii u eren sha kwagh u ve lu henen la yô, kwagh ne ka a núm ishima yase i eren kwagh torough torough ne. Apostoli Peteru kaa wener se ‘nyôôso mfe wase, shi se lu geng ge geng.’ (1 Peteru 1:13) U ‘eren tom u Ter ngegh je sha hanma shighe cii’ la ka gbenda u injaa kpishi ú ua wase se u mayange je gban mnyam ken jijingi ga yô.—1 Mbakorinte 15:58.
Palegh Uma u Eren U Una Vihi Mlu Wou u ken Jijingi La
14. Er i pase ken Luka 21:34-36 nahan ka uma u eren u nyi Yesu a te icin sha mini?
14 Yesu shi ta icin igen sha kwagh u ikyav i̱ mve na la ken kwaghôron u vesen u profeti u ôr la. Á kaa wener: “Ver nen ishima sha ayol a en, asema a en a̱ de yoho sha hua u sha kwaghyan man sha ihundugh man sha akaa a nyian ishima a uma ne ga, iyange la i̱ de va bulun ne er kwaghhônon nahan ga; gadia kape ia va bul a bul mba ve tem sha won cii la. Nahan kuran nen shi eren nen msen hanma shighe cii, sha er né kuma u waren akaa a á va er la cii, man né tile sha ishigh ki Wan u or yô.” (Luka 21:34-36) Yesu pase uma u ior wuee ve lu eren la vough vough, á kaa wener: Ior uve ityough ken taryan man ihundugh ki msôrough man uma u eren u nan ior ishimanyian.
15. Er nan ve i gbe u se palegh hua u eren sha kwaghyan man msôromo?
15 Atindiakaa a Bibilo yàngè hua u eren sha kwaghyan man sha msôr, nahan gba u se palegh aeren ne. Bibilo kaa ér: “De luun a mbamanmsôrom imôngo ga, shin a mbaeren hua sha inyam kpaa ga.” (Anzaakaa 23:20) Saa or nana er hua sha kwaghyan shi nana ma kwagh kpishi ve una wa nan agbe ken jijingi ga. Dugh u man msôrom kpishi shi eren hua sha kwaghyan la kera je kpa, kwaghyan una na mnyam ma a kar or shi nana vôr. Injakwagh igen ken Bibilo kaa ér “uma u oruhwe, kwagh ka a sar un, kpa a zua a kwagh ga.” (Anzaakaa 13:4) A sar imbaor la u ma nan er ishima i Aôndo kpa nana kanshio, sha ci u hwev ua yàngè nan u eren ishima na.
16. Se palegh ishimanyian i koson tsombor wase la sha u i̱ de ne se ishima i vôron ga nena?
16 Ka akaa a nyian ishima a uma a nyi Yesu yange wa se kwagh sha mi? Akaa shon yô, ka mbamgbe asev, man mkoso u koson tsombor wase, man akaa agen amba ne nahan. Ka a inja u se lumun ser akaa ne a na se ishima i vôron ga! Yesu pine wener: “Ka an wen je sha ishima i nyian i nan la, nana fatyô u seer ishiva i môm sha ityaven i nan ase?” Á wa se kwagh ér: “Asema a̱ de nyian ne, kaan nen ner: Sé ya nyi? Shin: Sé ma nyi? Shin: Sé zer nyi? ga. Gadia akaa ne cii atôatyev nga keren a, kpa Ter wen u Sha fa er kwagh a gbe ne sha akaa ne cii yô.” Aluer se ver akaa a Tartor hiihii ken uma wase shi se na jighjigh ser Yehova una kure mbamgbe asev yô, kwagh ne una wase se se pande ishimanyian shi una wase se u lun per.—Mateu 6:25-34.
17. Uyôughyôughmbaakaav mba zendan vea fatyô u nan or ishimanyian nena?
17 U zendan uyôughyôughmbaakaav ityô la kpaa una na se ishimanyian. U tesen ikyav yô, ior mbagenev ka ve va a ican sha ayol a ve sha u hanma shighe yô keren ér vea yam akaa a ikpa ve i yen tahav u yamen yô. Mbagenev yô, isharen i lun yôughyôugh la i mee ve ve nyôr iyol ken igbenda i zuan a inyaregh ave ave la, man igbenda i bo igen i keren inyaregh. Ior mbagenev di ka ve wa ityough u henen makeranta sha u vea va lu a kwagh ave, kpa kwaghhenen la a gema a na ve gba ken imeen. Sha mimi yô, aluer or hen makeranta akuma akuma tseegh kpa ua wase nan u zuan a tom. Jighilii yô, mbagenev vihi shighe kpishi nôngo ér vea hen makeranta vea za ar sha azenger, nahan kwagh ne vihi mlu ve u ken jijingi la. Vihi u imba kwagh u bo ne a er or er iyange i Yehova i sôôn van ne kpen kpen! Bibilo wa se kwagh ér: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe.”—1 Timoteu 6:9.
18. Ka mhen u nyi i gbe u se lu a mi ve una wase se u wan ityough ken uma u keren uyôughyôughmbaakaav ga?
18 Kwagh u injaa u una wase or ve nana lu a isharen i nyôron iyol ken uma u zendan uyôughyôughmbaakaav ityô ga yô, ka u lun a mhen u paven kwagh u dedoo a kwagh u bo shighe u or nan lu tsuan akaa a nan soo u eren la. Se lu a ieren ne sha u zeren yan ‘kwaghyan u taver u ken jijingi ua lu sha ci u mbaganden’ la, man sha u ‘henen u eren tom a mkav wase u ken ishima’ la. (Mbaheberu 5:13, 14) U ‘fan akaa a a hembe lun a inja’ shighe u se lu henen sha akaa a a hembe lun a injaa a se er la kpaa una wase se u palegh mbamhen mba kpeegh.—Mbafilipi 1:10.
19. Aluer se kav ser se mba a shighe kpuaa u eren akaa a ken jijingi yô, kanyi i gbe u se ere?
19 U lun a uma u zendan uyôughyôughmbaakaav ityô la una wa se agbe, se lu a ian cuku i eren akaa a ken jijingi ga. Se kar ayol a ase se nenge, nahan se palegh to u nyôron ken imba uma ne nena? Gba u se er msen, se gbidye kwar se nenge er se sôr uma wase ve se lu a uma u akuma akuma yô. Tor Solomon u ken Iserael u ngise la kaa wener: “Mnyam ma ortom ka ma dedoo, shin nana ya kwagh ciôôn, shin kpishi kpaa, kpa m-ide u ornyar yô, una rumun nan nana̱ yav ga.” (Orpasenkwagh 5:12) Se mba akaa a a lu se hange hange yum ga a ka se vihi shighe man agee ase kpishi u nengen sha a yôô? Aluer se mba a akaa kpishi yô, a gba u se sôron a, shi se er ishwalansi sha akaa ne shi se kuran a kpaa. Nahan aluer se mba ombon uyôughyôughmbaakaav ga, se mba a uma u akuma a kuma nahan a pever se iyol ga he?
Nôngo sha Afatyô Wou Cii Kohol Iyol Keghen a Kegh
20, 21. (a) Ka ishimataver i nyi Peteru a taver se sha kwagh u iyange i Yehova la? (b) Er se lu keghen iyange i Yehova la yô, ka aeren a nyi i gbe hange hange u se lu a mini?
20 Er shighe u tar u Noa la yange va bee nahan kape shighe u tar ungun ne kpa una va bee vough je la. Apostoli Peteru taver se ishima ér: “Iyange i Ter ia va er ormbaiv nahan. Usha vea kar kera sha ihuran ioo, asemaakaa aa hia kera man tar kua ityom i sha u cii kpaa ia hia kera.” Usha mba ve til sha ityough ki—ugomoti mbaaferev—man tar u ú til sha ityough ki—uumace mba ve lu paleghaa a Aôndo la—vea war ishimavihin i cieryol i Aôndo la ga. Peteru pase se er se wa iyol se keghen a kegh iyange la yô, á kaa wener: “Er akaa cii á va sough kera nahan yô, doo u né lu ken icighanmlu man né lu civir Aôndo nana? Er ne keghen mve u iyange i Aôndo, man ne eren sha u i̱ va fefa yô.”— 2 Peteru 3:10-12.
21 U lun ken icighanmlu ne yô, se zaan mbamkombo Mbakristu nduuruu shi pasen loho u dedoo kpaa. Er se we ishima se lu keghen iyange i vesen i Yehova la nahan, se er nen ityom ne sha gbashima. Se nôngo nen ‘tsung sha u á kohol se ken bem sha ishigh Nagh se lu wang a acôghor iyol ga yô.’—2 Peteru 3:14.
Baver We Kpa?
• Er nan ve i gbe u se kohol iyol se keghen a kegh iyange i Yehova laa?
• Aluer mzende u zendan akaa taregh ityô la ya tor ken a vese yô, kanyi nahan i gbe u se ere?
• Kanyi ia wase se ve se palegh u meer mnyam ken jijingi?
• Ka uma u bo u eren u nyi nahan i gbe u se paleghaa, man se palegh un nena?
[Study Questions]
[Pictures on pages 12, 13]
Kwagh yange gba ior mba ve lu sha ayange a Noa la sha ijirôron i i lu van la ga—we ye?
[Picture on page 15]
Ú fatyô u panden akaa a ú we ave a eren kpishi la sha er ú hemba lun a shighe u eren akaa a ken jijingi kpa?