Imo Ishima I Dedoo

CHARLES eren tom ken yunivasiti igen ken tar u Kenya; ngur kurun tom sha iyange igen yô, telefon na u kiriki u yange a zenden a mi la gba sha gbenda saa. Utelefon mbakiriki taver ishe ken tar u Kenya je ka kwagh u inumbe ga.

Charles kaa wener, “m hen mer telefon ne saa a saa je.” Kpa ayange nga kar kpuaa yô, afishi a Mbashiada mba Yehova ken tar u Kenya gbidye un waya, nahan kpiligh un iyol kpishi. Mba kaan a na ér a va ngohol telefon na yô cier un iyol je bee un er ka asenge nahan! Charles ze yô, i pase un er Orshiada u Yehova ugen u a eren tom u pasen kwagh hanma shighe yange nyôr mato u un vande nyôron la, nahan á tôô telefon na u gba shin mato shon ne. Ortom u pasen kwagh hanma shighe ne nôngo ér una zua a or u telefon ne a lu u nan la keng, nahan á za a mi hen mbatomov mba ve ne ayol a ve ve̱ eren tom hen afishi a nengen sha tom kwaghpasen ken tar shon la, mba za bughun un yô ve nenge a namba u telefon u Charles sha mi maa ve yila un.

Charles nger washika hen afishi a nengen sha tom kwaghpasen la kaa ker wener, “m wuese ne kpishi sha er ne nôngo tsung ne zough a mo shin er i lu zange ga nahan kpaa. M sugh ior mba ken nongo wen mba ve zough a telefon ne, ve nenge gbem ve fe ér ka u wam shi ve hidi a mi ve nem ne. Ka ican tsung u zuan a or u mimi ayange ne, kpa ka kwagh u taver or ishima kpishi u fan ér ior mba ve lu Mbashiada mba Yehova mba mimi yô mba inja kposo.”

I fa Mbashiada mba Yehova hanma ijiir cii ér mba ior mba mimi. Inja ve i mimi ne ka apostoli Paulu ve lu kaven ye, gadia yange nger kaa ér: “Se fa dedoo ser, se mba a imo i dedoo ken ishima, sar se u zenden tsembelee sha akaa cii.” (Mbaheberu 13:18; 1 Mbakorinte 11:1) Vé fa doo doo er imba ieren ne i̱ lu ieren i van Yehova a icivir er Yesu lu kaa nahan, ér: ‘Iwanger yen i̱ wanger sha ishigh ki iorough sha u ve̱ nenge aeren a en a dedoo man ve̱ civir Ter wen u A lu Sha yô.’—Mateu 5:16.