“Mluashe U Tar Ne Ngu Karen kera”
“Mluashe U Tar Ne Ngu Karen kera”
“M ngu kaan mer, shighe kera vese ga.”—1 MBAKORINTE 7:29.
1, 2. Ka mbamgem mba nyi nahan ú nenge a mi sha ayange a ú lu uma nee?
KA MBAMGEM mba nyi nahan ú nenge a mi sha ayange a ú lu uma nee? Ú fatyô u teren mbamgem mban mbagenev kpa? Ikyav i tesen yô, i zua a mzehemen kpishi sha kwagh u twer sôron. Mzehemen u tom tweregh ne na yô ior kpishi mba tsan hegen ka kuman anyom 70, kera ka er sha mhii u sha derianyom u sha ikyundu la ior tsaan anyom 50 tseegh nahan ga! Shi hen ase sha mtsera u se zough a mi sha igbenda kposo kposo sha u yaren tom a redio man televishen sha inja, man utelefon mbakiriki mba ior ve we shin ikpa ve zenden a mi man akeke a tindin a ilyoho kpaa la. Shi kwagh ugen u mayange se hungur ga yô, ka mzehemen u a lu sha kwagh u takerada u henen man akaahendan man ian i ior ve lu a mi sha akaa wue wue la, kwagh ne cii na yô uma u ior umiliôn kpishi ngu guda hegen.
2 Nahan kpa, ka mbamgem cii ve lu mba dedoo ga. Se mba nengen ashe ase er ifer i lu yemen aôndo aôndo, man aeren a dedoo kpa a lu hemban gban a gba kera, shi ior ve lu hemban man mcimbim ma bov, man ivaa paven kpa i zende tembe shi akaa a lu hemban taver a taver ishe ken kasua shi utswambaiorov ve lu àngèr ior kpishi ayange ne nahan. Er i lu cii kpa, ka keng ú lumun a kwagh u apostoli Paulu nger ngise ngise ne, wener: “Mluashe u tar ne ngu karen kera,” ngu geman je.—1 Mbakorinte 7:31.
3. Lu nyi kwagh Paulu lu ôron shighe u yange nger wener “mluashe u tar ne ngu karen kera” laa?
3 Paulu tôô tar ne lu karen sha tsembe u anumbegh zum u á ôr mkaanem man la. Mbaanumbev mba ve lu sha tsembe shon yô—ka uityaghermbaiorov mba hemen tar man mbahemenev mba ukwaghaôndo man ator—ve mban cii ka ve due sha tsembe ve er anumbe vea been yô, ve hungwa ve na mbagenev ian. Kwagh ne ngu zan hemen nahan uderimbaanyomov imôngo hegen. Sha ayange a ngise la, ashighe agen tsombor-tor yange u hemen upuembaanyomov imôngo—shin anyom uderi imôngo—shi akaa faan geman ga. Kpa kwagh ne kera ka nahan nyian ga, gadia akaa nga a gema fese sha shighe u ma iferor nan woo ityagheror u hemen tar kera la! Sha kpôô yô, ken ashighe a hang a ngee yum ne, se fa kwagh u kper una va a mi ga.
4. (a) Ka mnenge u vough u nyi i gbe hange hange u Mbakristu vea lu a mi sha akaa a a lu zan hemen shin tar nee? (b) Ka akav ahar a kuman ken ishima a nyi se time sha mi hegene?
4 Aluer tar ne ka tsembe u inumbe man mba hemen ú ka mbaanumbev yô, Mbakristu di ka mbanengen anumbe. * Nahan kpa er ve lu “ior i tar ne ga” yô, hange ve tsung u fan vighe vighe er i lu eren inumbe zan a mi la ga, shin mba ve lu eren í la ga. (Yohane 17:16) Kpa, ve gema ve ver ishima tsung mba nengen akaa a a tese ér inumbe la ngi zan ia za kure—sha gbenda u vihin kpishi yô—gadia ve fa doo doo ér msertar ne una kure keng cii man Yehova una va a tar u he u perapera la ye. * Nahan yô, de se time nen sha akav ahar a a tese ér se mba ken shighe u mkur man tar u he mgbôghom la. Akav ne yô ka (1) Tsegh ku ôron ku Bibilo i̱ er sha alô sha alô la, man (2) akaa a vihin tsung a a lu eren shin tar hegen ne.—Mateu 24:21; 2 Peteru 3:13.
I Va Mase Kaven Kwaghmyer Ugen!
5. Kanyi i lu “shighe u atôatyev,” man er nan ve kwagh a gbe se sha shighe nee?
5 Tsegh ku ôron ka kwaghhenen u ka a wase or u fan akaa a yange er ngise ngise man ashighe a akaa shon er la. Yesu lu ôr kwagh u shighe u mbahemen tar cii vea lu hemen kpa Tartor u Aôndo ua yángé ve ga yô. Yesu yila shighe la ér “shighe u atôatyev.” (Luka 21:24) “Shighe u atôatyev” la una kuren yô, Tartor u Aôndo u ú lu sha la ua kar a tema, man a lu Yesu una lu Orhemen ú u vough ye. Yesu una hii hemen ne “hen atô u mbaihomov [nav].” (Pasalmi 110:2) Nahan Daniel 2:44 kaa ér Tartor la ua “hembe [ugomoti mba uumace cii] avur avur, ua tim [ve],” kpa ú yô ua lu gbem sha won.
6. “Shighe u atôatyev” la hii hanma shighe, man shighe shon lihe kighir nena, man á kure hanma shighee?
6 Ka hanma shighe nahan “shighe u atôatyev” la una kure, man Tartor u Aôndo di ua hii hemen hanma shighee? Mlumun u i ne sha mpin ne, u yange i ‘cir un, i ver zan zan shighe u mkur’ la zua sha kwagh u tsegh ku ôron ku Bibilo i̱ ôr sha alô sha alô la. (Daniel 12:9) Er “shighe” la lu zulum u kuren yô, Yehova maa pase annongo u mbahenen Bibilo mba hiden a iyol ijime la mlumun u sha mpin ne. Sha iwasen i jijingi u Aôndo yô, ve kav er “shighe u atôatyev” la yange hii ken inyom i 607 C.S.W. la, inyom shon i i̱ tim Yerusalem la, shi ve kav er “shighe” la a lihi i kom anyom 2,520 yô. Nahan kwagh ne wase ve ve mase kaven er inyom i 1914 la i lu inyom i “shighe u atôatyev” kure yô. Shi ve kav kpaa ér mkur u tar ungun hii ken inyom i 1914 la. Er ú lu orhenen Bibilo nahan, ú fatyô u tesen ken Ruamabera e̱r i zough a inyom i 1914 la kpa? *
7. Ka avur a ruamabera a nyi a wase se u kaven shighe u ashighe ataankarahar aa i ter ken takerada u Daniel la yange hii, shi a tese mlihi u ashighe shon man mkur u á?
7 Takerada u Daniel ngu a kwagh môm u una ta se iwanger sha kwagh ne yô. Yehova yange yar tom a Tor Nebukadinesar sha u timin Yerusalem sha mhii u “shighe u atôatyev” ken inyom i 607 C.S.W. la, nahan yô Aôndo pase sha ikyev i tor la ér Una de atôatyev aa za hemen u hemen zan zan a kuma ashighe ataankarahar a sha ikyav. (Esekiel 21:26, 27; Daniel 4:16, 23-25) Ashighe ataankarahar la lihe kuma shighe nena? Mpase 11:2, 3 man 12:6, 14 tese ér, ashighe atar man tiôn ka ayange 1,260. Nahan yô, ashighe ataankarahar di aa hemba ashighe atar man tiôn la kwa har, shin aa lu ayange 2,520. Ka iniembe i ashighe ataankarahar shon cii laa? Ei, Yehova yange ôr profeti Esekiel u̱ lu hen shighe u Daniel kpa lu uma la mkaanem ma gen ma ma wase u pasen ashighe ataankarahar a sha ikyav ne yô, á kaa wener: “M ver u ayange akunduahar, iyange i môm sha ci u inyom i môm.” (Esekiel 4:6) Nahan, ashighe ataankarahar la ka anyom 2,520 jim jim. Nahan aluer se hii ken inyom i 607 C.S.W. la, se ôr anyom 2,520 yô, se mase kaven ser gba u ashighe a atôatyev la aa kure ken inyom i 1914 la.
Í Pase “Shighe u Mkur”
8. Kanyi nahan ú fatyô u hônon uwegh sha mi wer hii ken inyom i 1914 la je akaa nga hemban vihin tumen a tume inya?
8 Hii ken inyom i 1914 la je akaa a a lu eren shin tar la tese ér kwagh u tsegh ku Bibilo i̱ ôr sha alô sha alô u se ôr sha heen ne ka mimi. Yesu iyolna yange ôr wener ityav mbi nôngon man ijen man ubombauangev vea dumbur sha shighe u ‘mkur u tar’ ne. (Mateu 24:3-8; Mpase 6:2-8) Sha kpôô yô, akaa nga eren nahan vough hii ken inyom i 1914 la je. Apostoli Paulu seer ôron akaa a tan iwanger sha kwagh ne, á kaa ér aeren a ior ve eren a mbagenev la aa gema kpishi. Mbamgem mba shon mba yange pase vighe vighe la mba eren sha mi vough er se kpa se lu nengen nahan.—2 Timoteu 3:1-5.
9. Kanyi kwagh ior ve ôr sha kwagh u mlu u tar ne hii ken inyom i 1914 la?
9 Sha mimi yô, se fatyô u kaan ser “mluashe u tar” ne gema kpishi hii ken inyom i 1914 laa? Profesôr Robert Wohl nger ken takerada na u i yer ér The Generation of 1914 la wener: “Ior mba yange ve nenge ityav mbin sha ashe ve la na jighjigh ér tar u dedoo yange ú kure, ugen gema hii ken uwer u Agusutu inyom i 1914 la, man mayange je vea dugh jighjigh ne ken ve sha won ga.” Ikpurorfantakerada Jorge A Costa e Silva u a lu orvesen u sôron iangev mbi ken ityou u a eren tom vea Mzough u Mkpeyol u Tar Cii la lumun a kwaghôron ne, á kaa ér: “Se mba uma sha shighe u akaa a gem fese yô, mbamgem mban mba ne ior ishimanyian man haghelaa sha gbenda u vesen, man mayange je kwagh ngu a vande tseren uumace imba ne ga.” We kpa uma wou iv a mbamzeyol mban nahana?
10. Bibilo pase se kwagh u a ne ve hii ken inyom i 1914 la je tar u lu vihin seer a seer nena?
10 Ka hanma iferor nan lu eren tar ne u lu hemban vihin a vihi ciilii? Mpase 12:7-9 pase se iferor shon, ijiir la kaa ér: “Tsô ityav gba Sha, Mikael [Yesu Kristu] kua mbatyomov nav lu nôngon a darakon [Satan Diabolo]. Darakon a mbatyomov nav kpaa lu nôngon, kpa a hemba ga, ian kera lu sha ci ve Sha kpaa ga. I gbihi zegedarakon la shin inya, . . . u a lu tsughun tar cii la.” Nahan ka Satan Diabolo a lu oryongo u a lu van a mbamzeyol mban cii ye, man mzende u i zende un sha ken inyom i 1914 la tese ér kwagh “tser tar man zegemnger gadia diabolo sen shin [ú], ishima vihi un tsung gadia a fa er shighe na a kera vese ga yô.”—Mpase 12:10, 12.
Kwagh u Una Mase Eren ken Mkur u Inumbe Ne La
11. (a) Satan ngu yaren tom a igbenda i nyi nahan sha u tsughun ‘tar ciili’? (b) Ka iniôngon i vesen i Satan i nyi nahan apostoli Paulu a ter kwagh sha mini?
11 Satan fa ér mkur na mgbôghom, nahan hii ken inyom i 1914 la je á seer iniôngon na i a lu nôngon kpoghuloo wener una tsugh “tar cii” la. Satan ka orcugh u numben a mi ga, á tile ken ijime i tsembe u inumbe ngu duen a utor mba tar ne man mbahemen gbenda sha akaa sha tsembe ne sha u ve er anumbe yô. (2 Timoteu 3:13; 1 Yohane 5:19) Awashima môm u a lu a mi yô ka sha u una tsugh uumace ve hen ér hemen na ua fatyô u van a bem u mimi shin tar. Kohol cii yô, ior kpishi lumun konjo na ne, gadia ior hen ér kper kwagh a lu guda shin er akav a lu kpishi a tesen ér tar ngu hemban vihin a vihi nahan kpaa. Apostoli Paulu tsengakaan wener zum u shighe una mase shin cuku u a tim tar ungun kera la yô, konjo u gbidyen u Satan la una dumbur. Á nger wener: “Zum u vea kaan er: Bem, man mkpeyol yô, ka zum la je mtim una ande sha a ve ibuv er martoghor ka a kôr kwase uya nahan.”—1 Mbatesalonika 5:3; Mpase 16:13.
12. Ka iniôngon i nôngon ér a va a bem i nyi i lu zan hemen sha shighe wase nee?
12 Mbapativ zer ôron kwagh u “bem, man mkpeyol” ken anyom a karen ne sha u pasen akaa kpete kpete a ve weshima u eren yô. Je yô ve yila inyom i 1986 la ér Inyom i Bem sha Tar Cii, kpa inyom ne yange i̱ va a bem sha tar ga. Iniôngon i mbahemen tar ve lu nôngon nahan ne tese ér mkaanem ma 1 Mbatesalonika 5:3 la ma kure sha mi cica ciili, shin Paulu lu ôron kwagh ugen u una va er ken hemen sha gbenda u vesen u ior sha tar cii vea lan ga yôô?
13. Zum u Paulu tsengaôron kwagh u myer u “bem, man mkpeyol” la, kanyi yange kar mtim u una dondo la sha mini, man kwagh ne tese se nyi?
13 Ashighe kpishi ka zum u akaaôron a profeti a Bibilo a kur kera cii la shin shighe u akaaôron shon a lu kuren zaan ave la ka se mase zuan a mkav u akaaôron a profeti shon vighe vighe ye, nahan yô a gba u se ver ashe se nenge er kwagh ne una za la. Nahan kpa, kwagh u a gem a doo u se fa yô Paulu yange tôô mtim u una ande ibuv shighe u a lu kaan ér “bem, man mkpeyol” la kar sha martoghor u ka u kôr kwase uya la. Kwase u nan we iyav nan lu keghen mar la ka nan nengen a akav ken iwer itiankarinyiin i wan a lu ken uya la á tesen ér wan la ngu vesen. Alaghga nana ungwa er ishima i wan u nan la i lu kumen yô, shin una nôngo nan ken uya kpaa. Alaghga je yô wan la una tume nan angahar. Akav ne nga a seer ayange ayange, zan zan iyange igen yô martoghor maa u hii, nahan kwagh ne a tese ér iyange i mar i nan lu keghen la nyôr ve. Nahan yô, aluer myer u “bem, man mkpeyol” la una kure sha nyityô gbenda je kpa, kwagh u una gema a due ker yô ka mtim u vihin tsung u una ande ibuv, kpa una gema a lu kwagh u dedoo hen mbagenev la—inja na yô a tim mbaaferev kera, msertar u he una gema a hii tom.
14. Akaa aa va er ken hemen sha adondon adondon nena, man kanyi ia gema a due kere?
14 Mtim u a lu van ne una ta Mbakristu mba jighjigh mba vea tile vea lu nengen hanma kwagh la hindi iyol kpishi. Hiihii yô, utor mba tar ne (ugomoti mba ve lu vegher u nongo u Satan la) vea mough vea ta num sha mbasuen Zegebabilon (ukwaghaôndo mba ve lu vegher u nongo na la) vea tim ve. (Mpase 17:1, 15-18) Nahan gbande a gema imo hen shighe la je a kpilighyol, tartor u Satan ua pav ker, vegher ugen una mough a ta num sha ugen, man Satan una lu a tahav cuku tsô mbu yangen kwagh ne ga. (Mateu 12:25, 26) Yehova una mgbegha asema a utor mba tar ne ‘sha u ve̱ er sha awashima Na,’ inja na yô, ve kar a mbaihyomov nav mba kwaghaôndo mbara shin tar ne kera. A timin ukwaghaôndo mbaaiev kera yô, Yesu Kristu una hemen akumautya a sha una tim nongo u Satan u ú mase shin her u̱ mbakpengav man mbapativ la cii avur avur. U masen kuren yô, a kôr Satan a wuhe. A kôron un kera yô, inumbe i i er i̱ shighe gôgônan ne maa ia kure.—Mpase 16:14-16; 19:11-21; 20:1-3.
15, 16. Er se fe ser “shighe kera vese ga” yô, doo u mfe ne una bende a uuma asev nena?
15 Ka hanma shighe man akaa ne cii aa eree? Se fatyô u fan iyange shin ihwa ga. (Mateu 24:36) Kpa se fa tsô ser “shighe kera vese ga.” (1 Mbakorinte 7:29) Sha nahan yô, doo u se yar tom a shighe u a mase shin ne sha kwaghfan. Se er nena? Er apostoli Paulu á pase nahan, ka hange hange u se ‘waan ian yase ikyo’ sha u eren akaa a a hembe lun a inja la geman akaa a a lu a inja ga la gbihin ken ijime sha er hanma iyange yase cii a saa ishe ga yô. Er nan ve i doo u se er nahana? Sha ci u “ayange ne ka a bo.” Man aluer se ‘kav kwagh u a lu ishima i Ter’ sha ci wase yô, mayange je se vihi shighe u injaa u se mase shin a mi cuku ne ga.—Mbaefese 5:15-17; 1 Peteru 4:1-4.
16 Se fa ser tar ungun jimin cii ua kar kera, nahan doo u mfe ne una bende a vese asange asange nena? Apostoli Peteru yange nger kwagh ne sha ci u mtsera wase, á kaa wener: “Er akaa cii á va sough kera nahan yô, doo u né lu ken icighanmlu man né lu civir Aôndo nana?” (2 Peteru 3:11) Sha kpôô yô, doo u se lu ken icighanmlu shi se lu civir Aôndo kpaa! Er kwaghwan u injaa u Peteru ne a tese nahan, doo u se (1) ver ishima tsung sha ieren yase sha er ia lu wang yô, shi se (2) nôngo hanma shighe yô gbashima wase u se lu a mi ken mcivir u Yehova la a tese ér á doo se ishima tsung.
17. Ka akaa a hônon a Satan a nyi i gbe hange hange u Mbakristu mba jighjigh vea kura ayol a ve sha mini?
17 Mdoo u Aôndo a doo se ishima la una yàngè se u varen a tar ne sha ci u iengem i ú la. Kwaghtseren u a lu van sha ityough ki tar u ungun ken hemen la na yô u lun a dooshima sha iengem i tar ne kua uma u ior ve eren u keren iemberyolough tseegh la ka kwaghbo je zua ga. Shin er se lu ken tar ne shi se eren akaa ken ú nahan kpa, doo u se er tom sha kwaghwan u injaa u a kaa ér se lu er kwagh zua se a ú ga nahan la. (1 Mbakorinte 7:31) Sha kpôô yô, gba u se nôngo sha afatyô wase cii se kura ayol a ase sha er tar ua tsugh se sha aie u ú la ga yô. Tar ne ua fatyô u sôron mbamzeyol mba ve tser ú ne ga. Ua za hemen u lun her gbem sha won ga. Er nan ve se ne jighjigh taveraa ser kwagh a lu nahana? Ka sha ci u Mkaanem ma Aôndo a ne i nger la ma ôr a vese nahan, ma kaa ér: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:17.
Kwagh u Dedoo Ngu Van ken Hemen!
18, 19. Ka mbamgem mba nyi ú lu veren ashe wer vea er ken tar u he, man er nan ve shighe u ú tôô u keghen akaa ne la cii una saa gbilin ga?
18 Ica a gba ga tsô Yehova una tim Satan kua ior nav cii kera. Aôndo una timin ve a been yô, una haa iveren sha ior nav mba vea war mkur u tar ungun ne la, nahan vea gba a mi eren tom sha u sôron “mluashe” u tar ne sha er una lu gbem sha won yô. Ityav mbi nôngon mbia kera vihi mluashe u tar ga; Aôndo una er “ityav mbia bee zan zan a ar hen ikighir i tar je.” (Pasalmi 46:9) Ijen ia kera lu ga, ‘iyiav mbia ngee shin tar, asagher a mbi a̱ hingir war war.’ (Pasalmi 72:16) Upurusu man utashan mba dasenda vea kera lu ga, kua iangev mbi tsaren sha myav u yaven a kwase shin nomsoor kua anomaior a teen mcimbim ma bov man mbaatejir mba paven ivaa man ikyômpeni i yan ior inyaregh geman za keren mkor ken atejir man tswam u eren kpaa ua kera lu ga.—Pasalmi 37:29; Yesaia 33:24; Mpase 21:3-5.
19 Iwar ia lu gbilin, a nder ior ubiliôn imôngo shin ku—nahan tar ne ua hemba ngeen a ior. Iember ia lu zum u ior mba ikyov kposo kposo vea hide a zua imôngo man shighe u ior mba ku u pav ve a mba doon ve ishima la kpa vea hide a zua a kuve ayol a ve saan saan aa mliam ashe la je a gande ôron! Tegh tegh tsô hanma or u nan lu uma cii nana civir Yehova. (Mpase 5:13) Mbamgem mban cii vea been kera yô, maa inumbe i he ia hii, tar cii ua lu paradiso. A lu ú ken ishima nena shighe u ú lu zenden nengen mluashe u tar laa? Alaghga ú kaa genger genger wer, ‘m kegh tar u he ne shighe lihe kpen kpen, kpa shighe ne cii saa gbilin ga!’
[Footnotes]
^ Paulu lu ôr kwagh u Mbakristu mba i shigh ve mkurem sha shighe ugen kposo wener mba “kwagh u tar man mbatyomov mba Shaav kua ior kpaa ve kenger un yô.”—1 Mbakorinte 4:9.
^ U tesen ikyav yô, aluer ú soo u fan kwagh u “tor u ken imbusutarimese” u i ter ken Daniel 11:40, 44, 45 la yô, nenge ken takerada u Pay Attention to Daniel’s Prophecy la, peeji 280 zan zan 281.
^ Bibilo pase ér yange i tim Yerusalem anyom 70 ken ijime cii man Mbayuda mba ve yem shir la ve va mase hiden ken inyom i 537 C.S.W. la ye. (Yeremia 25:11, 12; Daniel 9:1-3) Aluer ú soo u ôron kwagh u “shighe u atôatyev” la vighe vighe yô, nenge peeji 95 zan zan 97 ken takerada u Reasoning From the Scripture la, ka Mbashiada mba Yehova ve gber ye.
Ú Na Mlumun Wer Nyi?
• Mkaanem ma Apostoli Paulu á ôr wener “mluashe u tar ne ngu karen kera” la ma kure shami sha shighe wase ne nena?
• Tsegh ku ôron ku Bibilo i̱ ôr sha alô sha alô la tese shighe u mkur u “shighe u atôatyev” la nena?
• Mgem u akaa a lu geman ken tar yum ne tese ér inyom i 1914 la ka mhii u “shighe u mkur” nena?
• Doo u m fe u se fe ser “shighe kera vese ga” ne una bende a vese nena?
[Study Questions]
[Picture on page 26]
I va mase kaven kwaghmyer!