Yehova Ngee A Erdoo Wuee
Yehova Ngee A Erdoo Wuee
“TER mgbough a mrumun u sha mhôôn . . . , erdoo Na ngee wuee.”—PASALMI 145:8.
1. Dooshima u Aôndo za kighir nan je?
“AÔNDO ka dooshima.” (1 Yohane 4:8) Mkaanem ma kundun iyol man tese ér, gbenda u Yehova a hemen la ka u sha dooshima. Sha kpôô yô, uumace mba ve we imo na ikyo ga je kpa ka ve zua a iwasen sha iyange i ngu a na i ta man sha ura u ka á nôô se sha dooshima la! (Mateu 5:44, 45) Er tar u uumace ne u doo Aôndo ishima yô, mbaihyomov nav je kpa vea fatyô u geman ishima hiden hen a na nahan zuan a uma u tsôron. (Yohane 3:16) Nahan kpa, kera shi ca ga tsô Yehova una tim mbaaferev mba ve vende u geman asema la cii, sha er uumace mba á doo ve ishima la vea ember uma u tsôron ken tar u perapera una tema ker la yô.—Pasalmi 37:9-11, 29; 2 Peteru 3:13.
2. Ka nyi inja dooshima Yehova a tese hen mba ve tsegh ayol a ve sha ci na laa?
2 Yehova tesen mba ve civir un sha mimi la dooshima sha gbenda u injaa, u tsan gbem. Í pase inja i imba dooshima la sha ishemberti i ken zwa Heberu i̱ í gem ér “erdoo” shin “ishoon i sha ishima i môm” la. Yange doo Davidi Tor u Iserael u tsuaa la a erdoo u Aôndo la ishima i môm. Akaa a a vande eren Davidi iyol na man mhen u yange henen sha aeren a Aôndo a mbagenev la na yô, Davidi fatyô u kaan vangertiôr nahan ér: “Erdoo [u Yehova] ngee wuee.”—Pasalmi 145:8.
Er A Fa Ior mba Aôndo mba Jighjigh La
3, 4. (a) Pasalmi 145 wase se u fan ior mba jighjigh mba Yehova nena? (b) Ior mba Aôndo mba jighjigh vea “ver [un] doo doo” nena?
3 Hana, ngô u profeti Samuel ôr kwagh u Yehova Aôndo kaa ér: “Una kura angahar a uicighan Nav [shin ior Nav mba jighjigh].” (1 Samuel 2:9) Ka unô ve lu “ior mba jighjigh” mbanaa? Tor Davidi na mlumun sha mpin ne. Er wuese aeren a Yehova a kpilighyol la been kera cii yô, á kaa ér: “Mba i doo U a ve la [shin ior ou mba jighjigh], vea ver Ú doo doo.” (Pasalmi 145:10) Kpa uumace nahan vea ver Aôndo doo doo nena? Mba eren kwagh ne jighilii sha u wuese un shin ôron kwagh na sha gbenda u dedoo kpaa.
4 Ka kwagh u ican u fan ior mba Yehova mba jighjigh ga, gadia ka ve man ve wuese un sha ijô ve ye. Ka nyi ngi i lu ityô liam ve shighe u ve tem imôngo shin ve ze mbamkombo mba Mbakristu yôô? Ka u henen a hen ga, ka ve ôron kwagh u Tartor u Yehova! Ior mba civir Aôndo mbajighjigh lumun a mkaanem ma Davidi ma á kaa ér: “Vea ôr kwagh u iengem i tartor Wou [u Yehova], vea ter agee a Ou kpaa” la.—Pasalmi 145:11.
5. Ka sha nyi se fe ser Yehova ongo shighe u ior nav mba jighjigh ka vea ôron kwagh na sha gbenda u dedoo laa?
5 Yehova ongo shighe u ior nav mba jighjigh ve lu wuese un la je kpa? Een, ongo kwagh u ve lu ôron la. Malaki nger kwaghôron u profeti sha kwagh u mcivir u mimi u sha shighe wase ne, kaa ér: “Tsô mbacian TER kpaa gema ôr kwagh ayol a ve; TER kpaa ver ato, ungwa, i nger ruamabera u umbur akaa sha ishigh Nagh, sha ci u mba ve cie TER, man mba ve civir iti Na yô.” (Malaki 3:16) Ka i doo Yehova shighe u ior nav mba jighjigh ka vea ôron kwagh na sha gbenda u dedoo la kpen kpen, man ngu a umbur ve kpaa.
6. Ka akaa a eren a nyi a ne se fe ior mba Aôndo mba jighjighi?
6 Shi a fa ior mba Yehova mba jighjigh mbara sha ishimataver i ve lu a mi la, man ka i lu ve je ve hii iliam a ior mba ve civir Aôndo u mimi ga la ye. Sha kpôô yô, ior mba Aôndo mba jighjigh ka ve “pase ônov mba iorov aeren a Na a ageegh, kua iengem i icivir i tartor Na la kpaa.” (Pasalmi 145:12) Ú keren shi ú yaren tom a aan a a dugh la tsema tsema sha u pasen ior kwagh u tartor u Yehova kpa? Er ica a gba ga tsô ugomoti mba uumace vea kaa kera nahan kpa, tartor na yô ngu lun gbem sha won. (1 Timoteu 1:17) Nahan hingir torough torough u ior vea hen vea fa kwagh u tartor u tsôron u Yehova la shi vea dondo ú kpaa. Davidi wa icam nahan ér: “Tartor Wou ka icôrontartor je, Ú tema tor Wou sha ikov ikov cii.”—Pasalmi 145:13.
7, 8. Kanyi yange i er ken inyom i 1914 laa, man ka ikyav i nyi i lu i tesen ér hegen Aôndo tema tor sha ikyev i Tartor u Wan naa?
7 Hii ken inyom i 1914 la je, se seer zuan a ityôkyaa igen i ôron kwagh u tartor u Yehova. Aôndo yange ver Yesu Kristu, Wan u Davidi Tor u Tartor u Mesiya la sha ken inyom shon. Yehova maa iv ityendezwa i lu er wener ikyônough ki torough ki Davidi kia lu gbem sha won la.—2 Samuel 7:12, 13; Luka 1:32, 33.
8 Se mba nengen a ikyav i i̱ tese ér hegen Yehova tema tor sha ikyev i Tartor u Wan na, Yesu Kristu la sha m-iv u akav a m-ande u Yesu a lu ivin vough vough ne. Ikyav i i̱ hembe duen tseer tseer ken akav ne je yô ka tom u Yesu ôr ér ior mba Aôndo mba jighjigh cica cii vea lu eren la, á kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:3-14) Er ior mba Aôndo mba jighjigh ve lu eren sha kwaghôron u profeti ne vough a ishima i tseen yô, hegen nomso man kasev man mbayev cii mba hemban je er miliôn ataratar nahan mba eren tom u vesen u a tsa a kera kimbir eren ú ga ne. Kera shi ca ga tsô a tim mba ve hendan a Tartor u Yehova la kera cii.—Mpase 11:15, 18.
U Zuan a Mtsera sha Mtemtor u Yehova La
9, 10. Ka mkposo u nyi a lu hen atô u Yehova man mbahemenev mba uumacee?
9 Aluer se mba Mbakristu mba ve ne ayol a ve yô, se zua a mbamtsera er se ye ikyar a Yehova, Ter Uhembanagee ne. (Pasalmi 71:5; 116:12) U tesen ikyav yô, er se cie Aôndo shi se eren kwagh u perapera yô, á lumun a vese shi se mba ikyua a na ken jijingi. (Aerenakaa 10:34, 35; Yakobu 4:8) Mbahemenev mba uumace yô kwagh ve ngu kposo, sha ci u ka ashagbaaior amba er mbahemenev mba shojaa man mbakpengav mba ve lu a inyaregh kpishi yô, shin ior mba eren anumbe mba zan ati tseegh ka ve lu akar a ve ye. Ityagheror ugen u eren tom u gomoti ôr kwagh u ibanave i ken tar na ken pipa abaver igen i ken Afrika i í yer ér Sowetan yô kaa ér: “Se mbagenev kpishi ka a̱ doo se u zan sha ajiir a mbaibanave ve lu la ga je kpa ka m lan ga. Ka i lu sha ci u se soo u umbur ser amba ajiirigh la nahan nga ga. Ka sea gema sea nenge er se lu hendan umato mba taver ishe nahan i za se iyol shi kunya u kôr se kpaa.”
10 Kpa, mimi je kwagh gba mbahemenev mba uumace mbagenev sha mkpeyol u ior vev. Nahan kpa, mbahemenev mba ve doo inja la je kpa mba fe ior vev tsembelee ga. Sha kpôô yô, se fatyô u pinen ser: Ma orhemen ngu u nan we ikyo a hanma or u nan lu sha ikyev i nan tsung, u ka nan na hanma or iwasen fese je shighe u kwagh a tser nan yôô? Een, imba orhemen la ngu. Ngise Davidi nger wener: “TER ka A kôr mba ve gbe la cii, kenden a mba ve lu ngugh ngugh la sha.”—Pasalmi 145:14.
11. Ka atsan a nyi a tseren ior mba Aôndo mba jighjighi, man ve zua a iwasen nena?
11 Ameen man mbamzeyol kpishi ka ve tser ior mba jighjigh mba Yehova Aôndo sha er ve lu ior mba lun vough ga, shi ve lu ken tar u ú lu sha ikyev i Satan, “Orbo” ne yô. (1 Yohane 5:19; Pasalmi 34:19) Mbakristu mba tagher a tôvacan. Mbagenev di ka ve ya ican i côron uange shin msaa u or ve nan saa ku la. Ashighe agen yô, mbamtsum mba ior mba Yehova mba jighjigh ayol a ve kpa ka ve na ve̱ iyolkpen nahan ve hingir “ngugh ngugh.” Nyityô ican i i̱ tser ve cii kpa, Yehova kegh a kegh iyol u nan hanmô ve ishimasurun man tahav mbu ken jijingi. Kape Tor Yesu Kristu kpaa kwagh u ior mba á lu hemen ve la a gbe un ishima tsung je la.—Pasalmi 72:12-14.
Kwaghyan u Kuman u Aôndo a Ne Se sha Ashighe Ashighe La
12, 13. Yehova ne “hanma kwagh u uma” cii asaren a na nena?
12 Er Yehova a lu a erdoo kpishi yô, kur mbamgbe mba ior mba ve civir un cii. Kwagh ne kua u nan ve kwaghyan u injaa, u vea ya a kuman ve gbing yô. Tor Davidi lu nger ér: “Ashe a uuma cii nga sha a We [Yehova], U ne ve kwaghyan sha ashighe ashighe. U bugh uwegh Ough, U ne hanma kwagh u uma sha isharen na, ka kom un.” (Pasalmi 145:15, 16) Ken ashighe a ican je kpa Yehova una fatyô u kôôm mlu u akaa sha er ior nav mba jighjigh vea zua a ‘kwaghyan u a lu sha ci u ayange ayange’ yô.—Luka 11:3; 12:29, 30.
13 Davidi kaa ér “hanma kwagh u uma” cii zough a mkom. Kwagh ne kua zendenya kpa ker. Luun er ka toho u ú dumbur sha tar ne, shin ikyon i sha tar man imendenev mbi shin mnger kpaa cii ga yô, akaauma a shin mnger man inyon kua inyam i sha tar kpaa ma ve zuan a ahumbe a ôôn ga, kwaghyan kpaa ga. (Pasalmi 104:14) Kpa Yehova ngu a ver ishima ér ve zua akaa a kwagh a gbe ve sha mi cii.
14, 15. Mba ne se kwaghyan u ken jijingi nyian nena?
14 Uumace mba er ka inyamtoho nahan ga, gadia mba a isharen i ken jijingi. (Mateu 5:3) Yehova kur asaren a ken jijingi a ior nav mba jighjigh mbara sha gbenda u kpilighyol kpen kpen! Cii man ku u Yesu yô, á er ityendezwa wener “wanakiriki u jighjigh man u fan kwagh” una naan mbadondon mba Yesu “kwaghyan [u ken jijingi] sha ashighe ashighe?” (Mateu 24:45) Ka asande a mba i shigh ve mkurem mba 144,000 mbara je ve lu wanakiriki la nyian ye. Sha kpôô yô, ka sha ikyev ve je Yehova a lu nan se kwaghyan u ken jijingi mgbeghaa ye.
15 U tesen ikyav yô, ior mba Yehova kpishi mba zuan a mtsera ken mgem u vough u he u Bibilo ken ijô ve jighilii. Bibilo i ken zwa Buter i í yer ér New World Translation of the Holy Scriptures la ka iveren injaa je zua ga! U seer yô, shi mba zan hemen u gberen ityakerada umiliôn umiliôn i wasen or u henen Bibilo ken ijô igen je hemba ijô 300. Ior mbacivir sha mimi tar sha won cii mba zuan a iveren sha kwaghyan u ken jijingi ne. Ka an i gbe u se na nan iwuese sha akaa ne ciilii? Ka Yehova Aôndo. Er á ngee a erdoo yum yô, á na sha er wanakiriki la una na se “kwaghyan sha ashighe ashighe” yô. Sha mbamne mbara nahan yô, ne “hanma kwagh u uma sha isharen na” ken paradiso u ken jijingi u se lu ker nyian ne ka kom un. Mbacivir Yehova ember sha ishimaverenkeghen i va nengen er a gema tar ua hingir paradiso kpôô kpôô la kpen kpen!—Luka 23:42, 43.
16, 17. (a) Ka akav a tesen a nyi a lu a tesen ér kwaghyan u ken jijingi ve sha ashighe voughloo? (b) Pasalmi 145 pase mnenge u ior mba Aôndo mba jighjigh sha ikyaa i Satan yange va a mi la nena?
16 Hen ase sha kwaghyan u ken jijingi u i ne se sha shighe vough ne. Ityav mbi Tar cii Mbi sha Uhar mbira yange mbi hii ken Yuropa ken inyom i 1939 la. Ken inyom shon la i môm, Iyoukura (zwa Buter) i Novemba 1 nger kwagh u itine na i kaa ér “Neutrality” (mtil paleghaa) la. Er i pase kwagh ne wanger wang yô, Mbashiada mba Yehova tar sha won cii nenge a ityôkyaa i tilen paleghaa hen atô u ityar i í lu nôngon ityav la. Kwagh ne va ve a iyugh i ugomoti mba ken ityar ne cii ken atô u anyom ataratar aa ityav mbira la cii. Shin er i wa ior mba Aôndo mba jighjigh ataban shi i tôv ve a ican nahan kpa, ve za hemen u pasen loho u dedoo u Tartor ne her. Hii ken inyom i 1939 zan zan 1946 la, ve zua a mseer u kpilighyol je kuma iorov 157 nahan sha ityough ki deri. U seer yô, mtil u yange ve tile sha mimi her dông sha shighe u i lu nôngon ityav la ngu zan hemen her u wasen ior u fan kwaghaôndo u mimi.—Yesaia 2:2-4.
17 Yehova ne se kwaghyan sha shighe vough tseegh ga, kpa ka se ya kwaghyan ne a kuma se gbing gbing kpaa. Shin er ityar cii uve ityough ken Ityav mbi Tar cii Mbi sha Uhar la nahan kpa, ior mba Yehova yô i wase ve u haren ishima ve sha kwagh u a hembe lun kwagh jim jim yô, ve kera ker ér vea zua a myom ve ayol a ve ga. Yehova wase ve u fan er ityôkyaa i vesen i i kough hanma or cii ker la i zough sha kwagh u ian i Yehova a lu a mi i hemen sha won cii la yô. Sha kpôô yô, doo se u fan ser, hanma Orshiada u Yehova u nan til sha mimi yô, nan ngu a ci kpuaa sha u kenden a hementor u Yehova sha shi tesen ér Diabolo ka oraie! (Anzaakaa 27:11) Ior mba jighjigh mba Yehova yô mba er Satan u yange lam sha Yehova kua ian na i hemen dang la nahan ga, ve yô mba yôôn ken igbar ér: “TER eren perapera sha igbenda Na cii.”—Pasalmi 145:17.
18. Kanyi ikyav i sember lun i tesen ér se mba zough a kwaghyan u ken jijingi u sha ashighe ashighe u kuman se gbing?
18 Ikyav igen i kwaghyan u ken jijingi u kuman, u sha ashighe ashighe yô ka takerada u i yer ér, Draw Close to Jehovah la, yange i due a takerada ne sha Mkohol u Vesen u “Mbayôôn Angwe u Tartor sha Gbashima” u i zua sha ajiir uderi uderi, hii ken inyom i 2002 zan zan per ken inyom i 2003 la. Takerada ú “wanakiriki u jighjigh man u fan kwagh” a nger ú, Mbashiada mba Yehova ve gem ve gber ú ne, ú hemba ôron kwagh sha mbamlu mba Yehova Aôndo mba ve til tseegh tseegh la, kua ieren i i er kwagh u i̱ ken Pasalmi 145 la kpa ker. Takerada u injaa ne ua wase ior mba Aôndo mba jighjigh sha er vea seer a seer kporom ikyua hen a na cii yô.
Ka Shighe u Se Kporom Ikyua a Yehova Je Ne
19. Ka shighe u vesen u nyi a lu mgbôghomôô, man se er hen shighe la nena?
19 Shighe ngu kuman u a bee a ahon a gban sha hementor u Yehova kera vindi vindi yô. Er i tsengeôron ken takerada u Esekiel ityough 38 nahan, kera shi ca ga tsô Satan una kure tom na u “Gogi, u ken tar u Magogi” la. Kwagh ne kua mte u una ta num sha ior mba Yehova tar sha won cii la. Kwagh ne una lu iniôngon i Satan una nôngo sha tahav nav cii ér una wundugh mtil sha mimi u ior mba Aôndo mba jighjigh la je la. Sha shighe la a gba u mbacivir Yehova vea hemba yilan un a ishima i môm cii, je yô vaan yilan un ér a̱ wase ve. Mase zan mcie u cian Aôndo sha icivir man mdoo u á doo se ishima la una due gbilin shinii? Mayange ga cii, gadia Pasalmi 145 kaa ér: “TER ngu ikua ikua a mba ve yer Un cii, mba ve yer Un sha mimi la cii. Una na mba ve cie Un la kwagh u a sar ve yô, man shi Una ungwa mliam vem, Una yima ve kpaa. TER kor mba A doo ve ishima la cii, kpa mbaaferev yô, Una tim ve kera.”—Pasalmi 145:18-20.
20. Mkaanem ma ma lu ken Pasalmi 145:18-20 la ma a iv ken hemen nena?
20 Nenge er a lu kwagh u iemberegh u nengen er Yehova una lu a vese kôôsôô, shi una yima se sha shighe u una tim mbaaferev kera la sha wono! Sha shighe u vesen u a mgbôghom hegen yum ne, Yehova una kegh ato a “mba ve yer Un sha mimi” mbara tseegh. Mayange je una kegh ato a mbaimangerev ga. Mkaanem ma Aôndo tese wang ér, m yer u mbaaferev va masen yilan sha iti na shighe u tso a kor a kaa ihyongo la lu a iwasen ga.—Anzaakaa 1:28, 29; Mika 3:4; Luka 13:24, 25.
21. Ior mba Yehova mba jighjigh tese ér doo ve u yilan sha iti i Aôndo la nena?
21 Hemba kan torough torough hegen u mba ve cie Yehova yô vea ‘yila sha iti na sha mimi’ cii. Ka i doo ior nav mba jighjigh u yilan sha iti na ken mbamsen vev man shighe u ve lu wan zwa ken mbamkombo vev la kpaa. Ka ve yila sha iti i Aôndo ken iliam i ve lamen ayol a ve la kpaa. Shi ka ve pase iti i Yehova ken tom ve u pasen kwagh la kpaa a ishima i taver je.—Mbaromanu 10:10, 13-15.
22. Er nan ve i lu hange hange u se za hemen u hendan a anza man asaren a taregh?
22 Aluer ka u se za hemen u zuan a mtsera sha ikyar i se ye vea Yehova Aôndo kôôsôô ne yô, ka a inja u se za hemen u hendan a akaa a vihin mlu wase u ken jijingi, amba er uyôughyôughmbaakaav man ugurgur mba bov man mde u den orgen kwaghbo ga shin u wan mbaibanave ikyo ga la nahan. (1 Yohane 2:15-17; 3:15-17) Aluer se za hemen nahan yô, imba inja ne man mzende u zendan ambaakaa la una za zan zan una za due ken isholibo i vesen, kwagh u una na Yehova una kera lumun a vese ga la. (1 Yohane 2:1, 2; 3:6) Ka ieren i kwaghfan u se fan ken ishima yase ser, aluer se mba jighjigh hen Yehova her yô una za hemen u tesen erdoo na shin ishoon i sha ishima i môm i á lu a mi hen a vese la.—2 Samuel 22:26.
23. Ka mlu u ken hemen u vesen u nyi a lu keghen ior mba Aôndo mba jighjigh cica ciilii?
23 Sha nahan yô, mbamhen asev cii ve lu sha kwagh u vesen u a lu keghen ior mba jighjigh mba Yehova cica cii la. Aluer se er nahan yô, se lu a ishimaveren i se kpa va lun imôngo ken mba vea civir Yehova shi vea ver un doo doo shi vea wuese un “hanma iyange” zan zan “gbem sha won” la. (Pasalmi 145:1, 2) Nahan de se ‘kura ayol a ase, se luun ken dooshima u Aôndo a ishima i veren keghen uma u tsôron la.’ (Yuda 20, 21) Er se za hemen u zuan a mtsera sha aeren a injaa a Ter wase u sha, kua erdoo u vesen u á er a vese la nahan, hanma shighe yô se ôron nen ier i Davidi yange ôr ken mkaanem nam ma kuren Pasalmi 145 la, á kaa ér: “Zwa wam ua ôron kwagh u iwuese i TER; uuma cii ve̱ wuese icighanti Na gbem sha won.”
Ú Na Mlumun Wer Nyi?
• Pasalmi 145 wase se u fan ior mba Aôndo mba jighjigh nena?
• Yehova “ne hanma kwagh u uma sha isharen na, ka kom un” nena?
• Er nan ve i gbe u se kporom ikyua hen Yehova?
[Study Questions]
[Picture on page 9]
Ka i doo ior mba Aôndo mba jighjigh u ôron kwagh u ityom na i ageegh
[Picture on page 10]
Mbacivir Yehova ka ve taver ishima ve wase ior ér ve hen ve fa kwagh u mdoom ma hemen na
[Pictures on page 11]
Yehova ne “hanma kwagh u uma” kwaghyan
[Credit Line]
Foto u Annyamev: Parque de la Naturaleza de Cabárceno
[Picture on page 12]
Yehova ne ior nav mba jighjigh mba ve pin iwasen na ken msen la tahav shi kor ve kpaa