Mbacivir Aôndo Mba Er Ikyon Nahan—Sha Nyi Gbenda?

ORPASALMI ôr kwagh u or u atindiakaa a Bibilo á gbe nan ishima shi nan eren tom sha á la ér: “Nan ngu er kon u i môôr hen ukungômbamngerev, u u um sha shighe u u yô, ika i u kpaa ngi usu ga; hanma kwagh u nan eren kpaa, nana kure un vough.” (Pasalmi 1:1-3) Er nan ve mkar u orpasalmi a kar or u atindiakaa a Bibilo á gbe nan ishima sha kon la i lu shamini?

Ashighe agen ikyon ka i tsa kpen kpen. Ikyav i tesen yô, i kaa ér ikyon i olev igen ken ningir u Zegemnger u Mediterenia la tsa kuma er anyom dubu nahan, igen je yô, tsa kuma er anyom dubu uhar hegen nahan. Ikyon i lúmbú i ken icombotar i Afrika la kpa ka i tsa kpishi, shi kon ugen u i yer ér bristlecone u ken ipaventar u Kalefonia ken tar u United States la kpa i na jighjigh ér u tsa je kuma er anyom 4,600 nahan. Ashighe kpishi ikyon i vesen i ken ikyô ka i lu a iwasen ape i vese la kpen kpen. Ikyav i tesen yô, ikyon i taven ka i gba mure sha ikyon i kiriki, nahan kwagh ne a lu í a iwasen, shi ikya i ikyon ne ka i ndoor i haa inya nahan i na inya i hen ijiir la i doo kpen kpen je.

Kera cii je, ka ken ikyô, ape ikyon i lun imôngo la, ikyon i hemban taven shin tar cii la i lun ye. Gadia ikyon ka ia lu imôngo yô, i wa amise shin inya i pelegh kpelegh kpelegh, nahan shighe u ahumbe a va te sha í taveraa je kpa ngi i hemba lun a tahav mbu tilen her dông a kon u ú vese ken toho tswen yô. Shi kon ka ua za amise shin inya yô, ú zua a mngerem kua kwaghyan shin inya kpishi. Ashighe agen yô, amise a kon nga a za shin inya ca je i hemba ityaven i kon la, shin nga a samber a yem ica je i hemba ape agbar a kon la a samber i za kighir la.

Alaghga apostoli Paulu lu ôron kwagh teren kon zum u á kaa wener Mbakristu ve ‘zenden ken Kristu nahan vough, er ve we amishe ken a Na shi i maa ve ken a Na kpaa, man i taver jighjigh ve u nan’ kpaa la. (Mbakolose 2:6, 7) Sha kpôô yô, saa Mbakristu vea wa amishe ken Kristu dông ve vea fatyô u taver ken jighjigh ve u nan ye.—1 Peteru 2:21.

Ka igbenda igen i nyi nahan a fatyô u kaan ér mbacivir Aôndo mba er ka ikyono? Er ikyon i ken ikyô ka i zua a iwasen hen ikyon igen i i lu ikyua a í la nahan, kape mba ve lu a tiônnongo u Kristu ikyua la kpa ka ve zua a iwasen hen mba nan jighjigh mbagenev je la. (Mbagalatia 6:2) Mbakristu mba jighjigh, mba ve vie, ve we amise ken jijingi a samber shi a ze shin inya la ka ve wase mbananjighjigh mba hev sha u ve tile dông sha jighjigh ve u nan zum u ve tagher a ahendan kpoghuloo er ka ijeverahumbe nahan yô. (Mbaromanu 1:11, 12) Mbakristu mba hev vea fatyô u vesen ken “mure” u a lu mkor u a dugh hen mbacivir Aôndo mba ve lu a mkav kpishi la. (Mbaromanu 15:1) Mba ve lu ken tiônnongo u Kristu sha tar jimin cii la kpa zua a iwasen sha u yan kwaghyan u ken jijingi u taver ve iyol ker u asande a mba i shigh ve mkurem mba ve lu “ikon i ouki i perapera” ve ne ve la.—Yesaia 61:3.

Saan se iyol kpishi gadia ityendezwa i i lu ken Yesaia 65:22 la ia va kure sha mbacivir Aôndo cii, ityendezwa la kaa ér: “Er ayange a ikon a lu nahan kape ayange a ior Av kpaa aa lu la.”

[Picture Credit Line on page 19]

Godo-Foto