“Wanakiriki U Jighjigh” Tile Sha Mimi Sha Shighe U I Va Sôr Un la!

“Shighe kuma u ijir ia ngurum sha ya u Aôndo je ve.”—1 Peteru 4:17.

1. Ka nyi Yesu yange tagher a mi shighe u va sôr “wanakiriki” na laa?

 YESU yange ver “wanakiriki” sha iyange i Pentekosti u 33 S.W. la ér a naan ior mba ken “ya” na kwaghyan sha ashighe ashighe. Ken inyom i 1914 la i kôr Yesu tor, nahan lu u ica a gba ga je tsô maa una va sôr “wanakiriki” la. Nahan shighe u á va sôr “wanakiriki” la yô, á kohol ior kpishi ken nongo u wanakiriki la mba ve tile sha ‘jighjigh shi ve lu a kwaghfan’ kpaa yô. Tsô, á wa “akaa a na cii” sha ikyev na. (Mateu 24:45-47) Kpa, wanakiriki u bo ugen gema lu, un tile sha jighjigh ga shi lan kwagh kpaa.

“Wanakiriki u Bo La”

2, 3. “Wanakiriki u bo” la due hana, man yange hii nena?

² Yesu ôr kwagh u “wanakiriki u jighjigh man u fan kwagh” la been a bee nahan maa á ôr kwagh u wanakiriki u bo la. Á kaa ér: “Aluer wanakiriki u bo la nana kaa ken ishima i nan er: Terem timbir u van yum man nana gba gbidyen akar a na a tom, man nana gba yan akaa, man akaa a mbahundenmsôrom imôngo yô, ter u wanakiriki la una va sha iyange i wanakiriki la nan ver ishima ga la, hen shighe u nan fe ga la kpaa; una gber nan atôôn atôôn, una na nan kwar a mbaimangerev imôngo; mliam maa lu keregh kua anyi a yan.” (Mateu 24:48-51) Ishember i ‘wanakiriki u bo la’ hide umbur se mkaanem ma Yesu vande ôron sha kwagh u wanakiriki u jighjigh man u fan kwagh la. Sha kpôô yô, ka mba ve vande lun ken nongo u wanakiriki u jighjigh la yange ve due ve hingir “wanakiriki u bo” la ye. * Kwagh ne er nena?

³ Cii man inyom i 1914 la yô, ior mba ken nongo u wanakiriki la kpishi lu a ishimaverenkeghen kpoghuloo i yemen sha za kohol Orkwasehe ken inyom shon la, kpa ishimaverenkeghen ve ne kure sha mi nahan ga. Kwagh ne man akaa agenegh kpaa na ior kpishi ahenge a van, shi mbagenev kpuaa ken ve je yô asema vihi ve ker tsung. Mbagenev ken ve gba “gbidyen” ior mba kera yô, ve lu anmgbianev vev la, ve er kwagh ne nahan sha u ôron akaa geseghee sha ve, shi ve lu zuan imôngo a “mbahundenmsôrom” mba ve lu iniongo i ukwaghaôndo mba Mbakristu Mbaaiev la.—Yesaia 28:1-3; 32:6.

4. Yesu er a “wanakiriki u bo” la man ior mba ve dondo imba ieren na la cii nena?

⁴ I hingir u va kaven ve mba ve vande lun Mbakristu mban ér ka “wanakiriki u bo,” tsô Yesu tsaha ve, gber ve “atôôn atôôn.” Á er kwagh ne nena? Á venda ve, nahan ishimaverenkeghen ve i yemen sha la maa saa ve ashe. Nahan kpa, i tim ve kera ave ave la je ga. Hiihii yô, gba u vea lu ken mliam kua anyi a yan “ken ime i ken won” u tiônnongo u Kristu. (Mateu 8:12) Hii sha ayange la je, Mbakristu mbagenev mba i shigh ve mkurem kpuaa kpa tese imba bo inja ne, nahan ve tese ér mba nongo a “wanakiriki u bo” la. Mbagenev ken “iyôngo igen” la kpa dondo ieren ve i sha jighjigh ga ne. (Yohane 10:16) Mbaihyomov  mba Kristu mban kpaa kure ken “ime i ken won” shon ne i môm, i i lu ime i ken jijingi la.

5. Wanakiriki u jighjigh man u fan kwagh la yange er nena, man ieren ne kaha kposo a ieren i “wanakiriki u bo” la nena?

⁵ Nahan cii kpa “wanakiriki u jighjigh man u fan kwagh” la kar ken ikyaren vough er “wanakiriki u bo la” nahan. Kpa er ishima ma i vihi ve ker yô, ve sôr mbamlu vev. (2 Mbakorinte 13:11) Dooshima u ve lu a mi sha Yehova man anmgbianev vev la hemba taver a taver cii. Sha nahan yô, ve hingir “ityôgh man imagh ki mimi a suur sha mi” ken ashighe a ican a “masejime” ne yô.—1 Timoteu 3:15; 2 Timoteu 3:1.

Anuunaukase a Fankwagh man a Lanen Kwagh La

6. (a) Yesu pase kwaghfan u wanakiriki na u jighjigh la nena? (b) Cii man inyom i 1914 la va yô, lu loho u nyi Mbakristu mba i shigh ve mkurem mbara yôô?

⁶ Yesu er kwagh u “wanakiriki u bo la” been yô, maa á ôr anzaakaa ahar sha u tesen er i hii ve Mbakristu mbagenev mba i shigh ve mkurem la vea tile sha jighjigh shi vea fa kwagh, kpa mbagenev ken ve vea lu nahan ga yô. * Á ôr kwagh u kwaghfan wanger wanger, á kaa wener: “Tartor u Sha ua lu inja er anuunaukase pue, a a tôô amenger a ve, ve due sha u za keghen orkwasehe gbenda. Mba utaan ken ve lu mbalanenkwagh, mba utaan yô, lu mbafankwagh. Gadia mbalanenkwagh mbara, er ve tôô amenger a ve yô, ve kera tôô mkurem kpaa ga. Kpa mbafankwagh mbara yô, tôô asegh a mkure a ve a amenger a ve imôngo.” (Mateu 25:1-4) Anuunaukase a pue a i er kwagh ve la umbur se kwagh u Mbakristu mba i shigh ve mkurem mbara sha shighe u inyom i 1914 lu a va ga la. Yange ve fa ér ica a gba ga tsô orkwasehe Yesu Kristu una va. Nahan “ve due” sha u za keghen un gbenda, ve lu pasen kwagh vangertiôr kaan ér “shighe u atôatyev” ngu kuren ken inyom i 1914 la.—Luka 21:24.

7. Ka hanma shighe Mbakristu mba i shigh ve mkurem mbara yange ve ‘meer mnyama’ man lu sha ci u nyi?

⁷ Kwagh u ve lu ôron ne lu shami. Shighe u atôatyev la kure ken inyom i 1914 la, nahan Tartor u Aôndo sha ikyev i Kristu Yesu hii tom. Kpa kwagh ne er sha usha mba se nengen a mi ga la. Shin tar ne yô, ican hii u ‘tseren’ uumace je huan iyol. (Mpase 12:10, 12) Shighe u ikyarenegh hii ve. Kwagh ne wanger Mbakristu mba i shigh ve mkurem la tsembelee ga, nahan ve hen ér “orkwasehe timbir u van.” Ve lu ken mtsum, shi tar kpa lu tôvon ve a ican, akaa ne cii na yô maa ve hide ijime, shi ve nôngo u den kwaghpasen u ken igbar la kpa kuaa. Ve er kwagh er ka anuunaukase a ken injakwagh la nahan, “ve meer mnyam, ve yav” ken jijingi di vough er Mbakristu mba nan jighjigh ga yange ve er shighe u mbaapostoli mba Yesu kpe kera la nahan.—Mateu 25:1-5; Mpase 11:7, 8; 12:17.

8. Ka akaa a nyi yange er cii ve i va ungwa angwe ér: ‘Orkwasehe ngu vana,’ man lu shighe u Mbakristu mba i shigh ve mkurem mbara vea er nyi?

⁸ Nahan ka va ker ken inyom i 1919 la yô, kwagh gema er u ma or hen ér una er ga yô. I nger ér: “Kpa ka kom atôutu yô, i ungwa angwe u orkwasehe er: Orkwasehe ngu van, due nen za kegh nen un gbenda! Nahan anuunaukase la cii nder, gba sôron amenger a ve.” (Mateu 25:6, 7) Lu shighe u akaa vihi gba kera lu inja er ma ishimaveren tsô ngi ga la je maa i yôô ér hanma or nana hide a lu tsevaa sha tom ye! Ken inyom i 1918 la, Yesu, “Ortyom u ikuryan” va ken tempel u Yehova sha u va sôron shi wanger tiônnongo u Aôndo. (Malaki 3:1) Nahan lu shighe u Mbakristu mba i shigh ve mkurem la vea due a za kegh un gbenda ken ityembe i tempel shon i shin tar la. Shighe kuma u vea “ta iwanger” ve.—Yesaia 60:1; Mbafilipi 2:14, 15.

9, 10. Er nan ve ken inyom i 1919 la, Mbakristu mbagenev ‘fa kwagh,’ kpa mbagenev ‘lan kwagha’?

 ⁹ Kpa tile yôô! Kwagh za anuunaukase agen a ken injakwagh la iyol. Yesu za hemen wener: “Mbalanenkwagh mbara kaa a mbafankwagh la er: Pande nen se mkurem enem man, gadia amenger ase nga pirin.” (Mateu 25:8) A mkurem shio yô, amenger a yegh ga. Nahan yô, mkurem ma ken imenger umbur se kwagh u Mkaanem ma Aôndo ma mimi man icighan jijingi na u ka a na mbacivir sha mimi tahav mbu lun mba tan iwanger la. (Pasalmi 119:130; Daniel 5:14) Cii man inyom i 1919 la yô, Mbakristu mba i shigh ve mkurem mba fankwagh mbara nôngo kpoghuloo ér vea fa ishima i Aôndo sha ci ve, shin er ve vôr sha anshighe kpuaa, ve kera taver ga nahan kpaa. Nahan mba va yer ve ér ve ta iwanger ve yô, maa ve kar a kar je.—2 Timoteu 4:2; Mbaheberu 10:24, 25.

¹⁰ Nahan kpa, mba i shigh ve mkurem mbagenev wa iyol u nan ayol a ve, shin nôngon kwagh kpoghuloo ga—shin er sar ve tsung u lun a Orkwasehe la nahan kpaa. Shighe va kom u a er tom u kwaghpasen kpoghuloo yô, ve wa iyol ga kuaa. (Mateu 24:14) Ve gema ve lu nôngon a nôngo ér vea tule ishimatseen i akar a ve la vea hide a mi ijime, sha ierkwagh ve ne yô, ve lu kaan a ve ér ve pande ve mkurem vem ma ve lu a mi la. Anuunaukase a fan kwagh a ken injakwagh i Yesu la er nena? Ve kaa ér: “Alaghga maa kuma se a ven imôngo ga. Guda yô, za nen hen mbateen, za yam nen ma enem.” (Mateu 25:9) Kape Mbakristu mba i shigh ve mkurem kpa yange ve er ken inyom i 1919 la vough je la, ve venda u eren nyityô kwagh u una pande ve tahav mbu tan iwanger cii. Ve tile sha mimi shighe u i va sôr ve la.

11. Kanyi yange i er anuunaukase a lanen kwagh laa?

¹¹ Yesu mase kuren kwaghôron na wener: “Tsô mba ngur yemen sha u za yamen yô, orkwasehe za va; mba ve wa ago iyol la ve nyôr a na imôngo ken iyou i iniongo i kwasehe maa i wuhe hunda. Ken masejime la yô, anuunaukase agen la kpaa shi va, va kaa er: Tere Tere, shi bugh se ga! Kpa a gema a kaa er: Mimi je, m kaan ne ne, m fa ne ga.” (Mateu 25:10-12) Een, mbagenev wa iyol sha mve u Orkwasehe la ga. Ve gba shighe u i va sôr ve la, nahan ian i zan iniongo i kwasehe sha la kar ve. Sha mimi yô, kwagh u a er ve ne vihi tsô!

Injakwagh sha Kwagh u Utalenti

12. (a) Kanyi kwagh Yesu yar tom a mi u ôron injakwagh i i pase kwagh u jighjigh laa? (b) Ka an nan lu or u yange nan “yem zende” laa?

¹² Yesu ôr injakwagh i i tese kwagh u kwaghfan la been yô, á ôr injakwagh i i tese kwagh u jighjigh yô. Á kaa ér: “Ka er or u a lu yemen tar ugen u icaa; tsô a yila mbatomov nav a wa ve inyaregh nagh sha ikev. A na ugen talenti utaan, ugen la uhar, man ugen la môm; hanmô ve sha agee a nan; tsô maa a yem zende na.” (Mateu 25:14, 15) Or u i er kwagh na ken injakwagh ne la ka Yesu iyol na, yange “yem zende” shighe u á kôndo á yem sha ken inyom i 33 S.W. la. Kpa cii man Yesu kôndo yem sha yô á wa “akaa a na cii” sha ikyev i mbahenen nav mba jighjigh mbara. Á er kwagh ne nena?

13. Yesu ver zege ijiir tom shi kaa a “wanakiriki” na ér a̱ er kasua nena?

¹³ Shighe u Yesu lu eren tom shin tar ne la, á pase kwagh u Tartor ken tar u Iserael cica cii, nahan á ver zege ijiir tom. (Mateu 9:35-38) Cii man a̱ “yem zende” yô, á gema ijiir tom la á wa sha ikyev i mbahenen nav mba jighjigh mbara, á kaa a ve wener: “Nahan yô, za nen, za gema nen  akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii; nenge, Me luun a ven ayange ayange zan zan mkurtar je.” (Mateu 28:18-20) Mkaanem ma Yesu kaa a “wanakiriki” ne, inja na yô, lu kaan a na ér a̱ er kasua zan zan una kar hiden, “hanmô ve sha agee a nan.”

14. Er nan ve lu kwagh u hanma or nana fatyô u eren tom kwagh môm ga?

¹⁴ Mkaanem ma “hanmô ve sha agee a nan” ne tese ér hanmô Orkristu u ken derianyom u hiihii la lu a ian shin tahav mbu eren tom kwagh môm ga. Mbagenev, er Paulu man Timoteu nahan, lu a ian gbanger gbanger i eren tom u pasen kwagh shin u tesen ior la. Kpa mbagenev yô, alaghga mbamlu vev yàngè ve tsung u eren tom sha asema a ve. U tesen ikyav yô, Mbakristu mbagenev lu ikpan, mbagenev lu uange, mbagen bee iyol shin lu a icombor ave. Nahan kpa, ityom igenegh ken tiônnongo lu sha ci u mbahenen cica cii ga. Kasev man nomso mbagenev mba yange i shighe ve mkurem la lu a ian i tesen ken tiônnongo ga. (1 Mbakorinte 14:34; 1 Timoteu 3:1; Yakobu 3:1) Nahan cii kpa, i wa hanma orhenen u Kristu—nomso man kasev—mba i shighe ve mkurem la cii kasua ér ve er shin er ve lu ken mbamlu kposo kposo nahan kpaa, tsô ve yar tom a aan a ve man mbamlu vev ve er tom u Mbakristu u pasen kwagh la. Nyian ne kpa, ka tom u mbahenen mba Kristu ve lu eren vough je la.

Shighe u Sôron Ve la Hii Ve!

15, 16. (a) Lu hanma shighe nahan yange gba u hanma or nana va a kwagh u nan zough a mini? (b) Ka aan a eren “kasua” a nyi i na mba ve tile sha jighjigh laa?

¹⁵ Injakwagh la za hemen kaa ér: “Tsô ka tse gbang yô, ter u mbatomov mbara za hide, ôr iyenge i inyar a ve.” (Mateu 25:19) M-ande u Kristu Yesu u sha inja i tor hii ken inyom i 1914 la—man sha kpôô yô, inyom ne gba ica a inyom i 33 S.W. la. Anyom nga va karen atar man tiôn, ken inyom i 1918 la yô, á va ken tempel u Aôndo u ken jijingi la, nahan á kure mkaanem ma Peteru ma ma kaa ér: “Shighe kuma u ijir ia ngurum sha ya u Aôndo” la. (1 Peteru 4:17; Malaki 3:1) Lu shighe u hanma or nana va a kwagh u nan zough a mi yô.

¹⁶ Anmgbianev mba Yesu mba ve lu wanakiriki  la er nyi kwagh a “utalenti” mba Tor na ve laa? Hii ken inyom i 33 S.W. la zan zan va ar ken anyom a yange mase karen cii man inyom i 1914 la, shi zan zan hegen kpaa ve mban kpishi mba eren “kasua” u Yesu a we ve la kpoghuloo. (Mateu 25:16) Shighe u i lu nôngon ityav mbi tar cii mbi hiihii la je kpa ve lu eren Ter tom sha gbashima je. Nahan lu shighe u dedoo u a na mba yange ve tile sha jighjigh la aan a he sha u ve ‘er kasua’ yô. Shighe u mkur u tar ungun ne kuma ve. Gba u a pase loho u dedoo a tser tar. Lu shighe u a sunda ‘iyiav mbi shin tar cii yô.’ (Mpase 14:6, 7, 14-16) Gba u a mase zuan a ior mba ken nongo u uwua la, shi a kohol mba ve lu “zegeikpelaior” i iyôngo igen la kpaa.—Mpase 7:9; Mateu 13:24-30.

17. Mbakristu mba i shigh ve mkurem mba jighjigh mbara yange ve ‘nyôr ken iember i ter’ nena?

¹⁷ Shighe u sunda ka shighe u msaanyol. (Pasalmi 126:6) Ka nahan ve, shighe u Yesu seer nan anmgbianev nav mba jighjigh mba i shigh ve mkurem la tom ken inyom i 1919 la yô, á kaa a ve wener: ‘U er jighjigh sha akaa kpeghee; nahan me ver u sha akaa kpishi. Nyôr ken iember i teru.’ (Mateu 25:21, 23) U seer yô, iember i Ter u i sember veren un Tor u Tartor u Aôndo la yange i ngee je gande u se hen sha mi. (Pasalmi 45:1, 2, 6, 7) Ior mba ken nongo u Wanakiriki u jighjigh la mba ember a Tor imôngo, ve tile sha ityough nagh mba eren un tom shi mba seer akaa a na a shin tar la kpaa. (2 Mbakorinte 5:20) Kwaghôron u profeti u ken Yesaia 61:10 la pase er iember ve ne i lu yô, i kaa her ér: “M ember tsung ken TER, uma wam kpaa ember ken Aôndo wam; gadia A haam akondo a myom iyol.”

18. Er nan ve mbagenev tile sha mimi shighe u i va sôr ve la ga, man lu nyi i gema i eree?

¹⁸ Kwagh er vihi yô, mbagenev tile sha mimi shighe u i va sôr ve la ga. I nger ér: “U a ngohol talenti môm la, kpaa za va, va kaa er: Tere, m fa u, u ngu or u taver inja; ka u sunda henpe u lee ga yô; ka u kohol henpe u vande saren ga yô. Yô, mo m cia a yagh, m za yer talenti wou ne shin inya; ngohol a yough kwagh wou.” (Mateu 25:24, 25) Mbakristu mbagenev mba i shigh ve mkurem kpa kape yange ve er vough je ne, ve er “kasua” ga. Cii man inyom i 1914 va yô, ve fatyô u pasen mbagenev kwagh u ishimaverenkeghen ve sha gbashima ga, shi ken inyom i 1919 la kpa ve soo u hiin tom ne ga. Yesu er a ve nena sha ilyahan ve nee? Á ngohol aan a tom aa ve lu a mi la cii. I ‘kende ve ken ime i ken won la, ape mliam ma lu kua anyi a yan’ kpaa la.—Mateu 25:28, 30.

Mba Sôron Ve Heregh

19. Ka sha nyi gbenda nahan i lu sôron ior mba ken wanakiriki la heregh, man kanyi kwagh Mbakristu mba i shigh ve mkurem mbara cica cii ve kange ishima ér vea eree?

¹⁹ Sha kpôô yô, ior kpishi mba yange gba u vea va lu ken wanakiriki u Kristu u i shigh un mkurem ken shighe u mkur ne lu a gba civir Yehova shighe u Yesu hii sôron wanakiriki na ken inyom i 1918 la ga. Nahan kwagh ne tese ér mser u i va sôr wanakiriki na la kar ve shinii? Mayange ga cii. Ken inyom i 1918 man 1919, anyom a nongo u wanakiriki u jighjigh man u fan kwagh la jimin cii tile sha mimi ken ikyaren la, lu shighe u mser u i va sôr ve la hii a hii je la. Mba sôron Mbakristu mba i shigh ve mkurem la asange asange heregh zan zan shighe u ikyav i i ver ve sha atsul a ve la ia kar hingir gbekeke la. (Mpase 7:1-3) Er anmgbianev mba Kristu mba i shigh ve mkurem mbara ve fe ér kwagh ngu nahan yô, ve kange ishima dông ér vea za hemen u ‘eren kasua’ u i we ve la sha jighjigh. Shi ve kange ishima ér vea er kwagh sha kwaghfan, vea lu a mkurem her poo sha er iwanger ve ia ta a wanger wang yô. Ve fa ér hanmô ve u nan til sha jighjigh zan zan nan kar kpen yô,  Yesu una ngohol nan una yem a nan sha ijiir i teman i sha la.—Mateu 24:13; Yohane 14:2-4; 1 Mbakorinte 15:50, 51.

20. (a) Kanyi kwagh iyôngo igen la i kange ishima nyian ér ia eree? (b) Mbakristu mba i shigh ve mkurem la fa nyi kwagha?

²⁰ Zegeikpelaior i iyôngo igen la dondo ikyav i anmgbianev vev mba i shigh ve mkurem la. Ve fa er mfe ve u ve lu a mi sha kwagh u mbaawashima mba Aôndo la a ne ve zege tom u eren yô. (Esekiel 3:17-21) Nahan sha iwasen i Mkaanem ma Yehova man icighan jijingi na yô, ve kpa mba a mkurem her poo, man mba zuan a ma sha u henen kwagh shi zan mbamkombo kpaa. Nahan ve de iwanger ve ngi tan, sha u lun a ci ken tom u pasen kwagh shi tesen ior, nahan mba ‘eren kasua’ a anmgbianev vev mba i shigh ve mkurem la imôngo. Kpa, Mbakristu mba i shigh ve mkurem la fa er i lu ve i ne ve utalenti mbara nahan. Á pine ve kwagh u ve er a akaa a Ter a shin tar ne kpee je a bunde ga. Shin er ve lu kpuaa, ve ngee ga nahan kpa, mayange je vea fatyô u geman ityom ve undun zegeikpelaior la a mi ga. Er i lu nahan yô, wanakiriki u jighjigh man u fan kwagh la, ngu nengen sha kasua u Tor, shi doo un kpishi er ior mba tseen asema mba ken zegeikpelaior la ve lu suen ve nahan. Zegeikpelaior ne kav hemen u anmgbianev vev mba i shigh ve mkurem ne shi doo ve kpishi u eren tom sha ikyev ve kpaa.

21. Ka kwaghwan u nyi a tser sha Mbakristu mba ve lu cii man inyom i 1919 la zan zan sha shighe wase nee?

²¹ Shin er anzaakaa a ahar ne a te iwanger sha akaa a yange er sha shighe u 1919 la nahan kpa, kwagh u anzaakaa ne a tese la ngu sha ityou ki Mbakristu mba mimi mba ken ayange a masejime ne cii. Sha gbenda shon ne môm, kwaghwan u Yesu na zum u á ôr injakwagh i sha kwagh u anuunaukase la á bee la kpa kape a hii lun sha ci u Mbakristu mba i shigh ve mkurem mba yange ve lu cii man inyom i 1919 je la, nahan kpa kwaghwan ne tser sha hanma Orkristu cii. Nahan yô, se cii se er ase nen tom sha mkaanem ma Yesu man, ma kaa ér: “Yô, kuran nen gadia ne fa iyange shin ihwa kpaa ga.”—Mateu 25:13.

[Footnotes]

Ú Fatyô u Pasen Kpa?

• Ka hanma shighe Yesu va sôr mbadondon nava, man a tagher a nyi kwagha?

• Er nan ve Mbakristu mbagenev mba i shigh ve mkurem la hingir u lun a imba inja i “wanakiriki u bo” laa?

• Se tese ser se mba a kwaghfan u ken jijingi nena?

• Ka sha nyi gbenda nahan se za hemen u ‘eren kasua’ sha u dondon ikyav i anmgbianev mba Yesu mba i shigh ve mkurem mba jighjigh mbaraa?

[Study Questions]

[Box on page 28]

YESU VA HANMA SHIGHEE?

Mve u i kaa ken Mateu ityough 24 man 25 ér Yesu “va” la ka u sha gbenda môm tseegh ga. Gba u saa una mough henpe a lu la ve una “va” ga. Kpaa, ashighe kpishi mve u ka a “va” la ka i lu sha u geman ishima na veren sha uumace shin sha mbadondon nav sha u ôron ve ijir. Nahan yô, ken inyom i 1914 la á “va,” lu sha m-ande u á ande shighe u i ver un Tor la. (Mateu 16:28; 17:1; Aerenakaa 1:11) Zum u á “va” ken inyom i 1918 la lu ortyom u ikyuryan, nahan á hii u ôron mba ve senge ér ve mba civir Yehova la ijir. (Malaki 3:1-3; 1 Peteru 4:17) Una “va” sha shighe u Armagedon la sha u va timin mbaihyomov mba Aôndo kera.—Mpase 19:11-16.

Mve (shin mhidi) u i er kwa imôngo ken Mateu 24:29-44 man 25:31-46 la ka sha shighe u “zegecan” la. (Mpase 7:14) Kpa gema mhidi u i er kwagh sha mi kwa imôngo ken Mateu 24:45 zan zan Mateu 25:30 la lu mhidi u hide va ôr mba ve senge ér ve mba mbahenen nav ijir hii ken inyom i 1918 zan zan yem ken hemen la. Aluer se kaa ser ka sha shighe u zegecan la Yesu una “va” na wanakiriki u jighjigh la injar na, shi una ôr anuunaukase a lanenkwagh la ijir, á kua wanakiriki u wan hwev u a yer talenti u Ter na la yô, a lu shami ga cii. Aluer se ôr nahan yô, kwagh ne una tese ér mba i shigh ve mkurem la kpishi ka sha shighe la á va mase kaven er ve til sha jighjigh ga ye, nahan a lu sha shighe la a gba u a tsua ior mbagenev sha ityough vev ye. Nahan kpa, Mpase 7:3 tese ér sha shighe la nahan a “ver” mba ve lu wanakiriki u Kristu mba i shigh ve mkurem la ikyav sha atsul a ve gbekeke kera kpaa.

[Picture on page 26]

“Wanakiriki u bo” la zua a iveren ken inyom i 1919 la ga

[Picture on page 27]

Anuunaukase a fan kwagh la wa iyol zum u orkwasehe va la

[Picture on page 29]

Mbatomov mba jighjigh mbara er “kasua”

[Picture on page 29]

Wanakiriki u wan hwev la er kasua ga

[Pictures on page 30]

Mba i shigh ve mkurem man “zegeikpelaior” za hemen u tan iwanger