Za Hemen U Lun A Aeren A Wang Sha U Kuran Ishima you
Za Hemen U Lun A Aeren A Wang Sha U Kuran Ishima you
“Hemba kuran ishima you a akaa a u kor a cii, gadia ka ken i uma a dugh ye.”—ANZAAKAA 4:23.
1-3. (a) Ior ka ve tese ér aeren ve a wang gba ve kwagh ga nena? Tese ikyav. (b) Er nan ve i lu hange hange u se time sha mluainja u aeren a wang na?
KEN ityar igen yô, foto u i er un a doo ashe tsung ngu ior zegekwagh kpen kpen. Tôô ase wer or ngu a foto ken iyou i nan kpa nan va nenge ér foto la ya tsegh. Alaghga nan nenge ér a yina sha ulum u iyou i̱ í ver un ker la. Kwagh kera gba nan a foto la ga. Nahan nan tôô foto shon nan tee sha ₦4,000. Anyom nga karen kpuaa yô, nan va kav er foto la a gbe ishe je i kom er miliôn dubu deri nahan. Foto ne hingir zegekwagh. Nenge er ishima ia vihi or u yange nenge ér foto la gba kwagh ga ve tôô tee kera la sha wono!
2 Ashighe kpishi, kape ior ka ve tôô aeren a wang ér a gba kwagh ga je la. Kwagh kera gba ior kpishi nyian ne u lun a aeren a wang ga. Mbagenev nenge ér aeren a wang ka kwagh u ngise ior eren yô, kera ka uma u ior ainge ga. Ka ve gbihi aeren a ve a wang la kera sha u eren akaa a vea zua a mtsera u ikyoogh ga yô. Mbagenev di ka ve nôngor aeren a ve a wang la kera sha u pirin isharen ve i ijimbagh la hen anshighe kpuaa. Mbagenev di ka ve gbihi aeren a ve a wang la kera sha u vea er kwagh u vea ya civir kpishi hen mbakov ve, shin hen ma kwase shin nomsoor yô.—Anzaakaa 13:20.
3 Ior kpishi ka ve va fa ér aeren a wang a yange ve de u eren la lu kwagh u injaa tsung je ve de sar la. Ashighe kpishi, ka ve zua a injar i vihin tsung sha dang ve u eren la. Bibilo ôr kwagh sha injar i dang u eren ér i̱ “yua er kon u yuan nahan.” (Anzaakaa 5:3, 4) Ken tar u aeren a wang a saa ishe ne, ú ver ishima sha aeren a ou a wang shi ú kura a nena? Se time sha igbenda ityar i se kar sha mi ve se er kwagh ne yô.
Kura Ishima You
4. Ishima i̱ sha injakwagh la kanyi, man er nan ve i gbe u se kura ii?
4 Kwagh u vesen u una wase se ve se lu a aeren a wang yô, ka u se kuran ishima yase. Bibilo kaa ér: “Hemba kuran ishima you a akaa a u kor a cii, gadia ka ken i uma a dugh ye.” (Anzaakaa 4:23) Kanyi jighilii i lu “ishima you” i í tér heen ne? Ishima ne ka ishima i kpôô kpôô ga. Ka ishima i sha injakwagh. Ishima i̱ i tér heen ne ka or u se lu kimi la, ka mbamhen asev, mlu wase u ken ishima la, man akaa a ka a mgbegha se u eren kwagh la. Bibilo kaa ér: ‘TER Aôndo A̱ doo u ishima a ishima you cii man a uma wou cii man a agee ou cii.’ (Duteronomi 6:5) Yesu tese ér tindi ne ka tindi u a hembe atindi cii yô. (Marku 12:29, 30) Mimi je, ishima yase i sha injakwagh ne ngi a inja kpishi. I̱ kuma i se kura i̱ yô.
5. Ishima ia fatyô u lun se a inja, shi lun kwagh u bo hen a vese kpaa nena?
5 Nahan kpa, Bibilo shi i kaa ér “ishima i wa atseregh je hemba hanma kwagh cii.” (Yeremia 17:9) Ishima ia er atseregh—ia wa se ken kwaghbo nena? U tesen ikyav yô, mato ngu a iwasen kpishi, shighe u aikyôr a er yô, ka i tôô ior mba kwagh a er ve la shin mato i yem a ve ken iyouci. Kpa, aluer deraba u a lu nahan mato la ver ishima u kôôm un sha gbenda jighilii ga yô, una er aikyôr a wua ior. Kape ishima yase kpaa i̱ lu je la, aluer ú ver ishima u kuran ishima you ga yô, asaren a ou a ken ishima, man mbamhen mba kenden we ken ishima u eren kwagh la vea kôôm we, vea mgbegha ú u za gba ken kwagh u bo. Mkaanem ma Aôndo kaa ér: “Or u nan suur sha ishima i nan iyol i nan yô, ka ibumeor je, kpa or u nan zenden sha kwaghfan yô, á yima nan.” (Anzaakaa 28:26) Aluer ú soo u zan zende man ú fa gbenda ga, kpa ú gema ú ngu a ngeren u tesen gbenda yô ú nenge shimi cii man ú mough zende la ye, Mkaanem ma Aôndo kpa kape i lu je la, aluer ú yar tom a ma yô, ma a kôôm we ú er kwagh sha kwaghfan nahan ú war ishôm.—Pasalmi 119:105.
6, 7. (a) Icighanmlu kanyi, man er nan ve ieren ne i lu hange hange hen mbacivir Yehova? (b) Er nan ve se fe ser uumace mba ve yen kpa vea fatyô u dondon icighanmlu u Yehovaa?
6 Ishima yase ia kar iyol i i̱ tsô ia gba henen u eren aeren a wang ga. Saa se tsaase i̱ ve ia hen u eren nahan ye. Gbenda môm u se kôôm i̱ yô, ka u timen fan mluainja u aeren a wang. Ieren i wang zua kôôsôô a icighanmlu, man ikyav i icighanmlu yô ka mlu u lun a acôghor shio, shi lun wang man a isholibo iyol shio kpaa. Icighanmlu ka ieren injaa i̱ i̱ lu mlu u Yehova Aôndo jim jim yô. Avur a Bibilo deri imôngo tér icighanmlu u Yehova. Yehova kaa ér “lu nen uicighanmbaiorov, gadia Mo M ngu u Icighan je.” (1 Peteru 1:16) Ieren i tseng ne nahan i bende a vese uumace mba se yen ne nena?
7 Yehova pase ken Mkaanem nam ér: “Lu nen uicighanmbaiorov, gadia Mo M ngu u Icighan je.” (1 Peteru 1:16) Sha mimi yô, se fatyô u dondon icighanmlu u Yehova la; se er kwagh ne sha u lun wang sha ishigh nagh, shi kuran aeren ase a wang la. Nahan aluer se mbá palegh aeren a hôngorough yô, se mbá tesen ser se kuma u lun sha iaven i tseng, man i vesen—i̱ lun a ieren i doon tsung i̱ Aôndo Uhembansha la! (Mbaefese 5:1) Doo u se hen ser se yina u lun a ieren i Aôndo ne ga, gadia Yehova fa kwagh, shi ngu Ter u a norom ikyaa sha kwagh ga, shi á sendegh ér se er kwagh u a hembe se agee ken inya kpaa ga yô. (Pasalmi 103:13, 14; Yakobu 3:17) Sha kpôô yô, gba u se nôngo kpoghuloo ve se lu wang ken jijingi man sha aeren ase kpaa ye. Apostoli Paulu kaa ér ‘mlu u mimi man u wang ngu ken Kristu.’ (2 Mbakorinte 11:3) Se mba Kristu man Ter na a injô i se nôngo kpoghuloo se lu a aeren a wang sha ishigh vev ga he? Heela tseegh ga, ve tese se dooshima u se tsa sha won nan nan kpa se er ve kwagh u una kuma sha mi ga yô. (Yohane 3:16, 15:13) Nahan hemba kan a inja u se tese iwuese sha dooshima u ve er a vese la sha u lun a aeren a wang. Aluer se nenge ser u lun a aeren a wang ka gbenda ú se wuese Yehova yô, kwagh ne una na se ver ishima sha aeren ase, shi se kura ishima yase kpaa.
8. (a) Se koso ishima yase i sha injakwagh la nena? (b) Alam a se lamen la aa pase or u se lu nena?
8 Gbenda ugen u se kura ishima yase yô, ka sha gbenda u se koson i̱ la. Gba u se koson mbamhen asev man asema ase sha kwaghyan u dedoo u ken jijingi hanma shighe cii, shi se har asema ase sha loho u dedoo u Tartor u Aôndo la. (Mbakolose 3:2) Shi se lamen sha akaa a a tese ér se har asema ase sha Tartor la yô. Aluer ior fa se ér se mba lamen sha asaren a yolough man sha akaa a jimbagh tseegh yô, kwagh ne ngu tesen er ishima yase i lu ker yô. (Luka 6:45) Hemba doon u ior vea fa se ér se mba ior mba lamen sha akaa a ken jijingi man akaa a maan mbagenev kpaa. (Mbaefese 5:3) Akaa a bo a vesen agen nga a i gbe kpee u se palegh sha er se kura ishima yase yô. De se time nen sha akaa ne ahar.
Yevese Nen Idya
9-11. (a) Er nan ve ashighe kpishi ior mba kwagh a gbe ve sha kwaghwan u i we ken 1 Mbakorinte 6:18 ga la ka ve hemba nyôron iyol ken ijimba i eren tsung-nu? Tese ikyav. (b) Aluer se mba yevese idya yô, kanyi i gbe u se paleghaa? (c) Ka ikyav i dedoo i nyi orjighjigh Yobu a ver sha ci wase?
9 Yehova yange na apostoli Paulu nger akaawan a a wase ior kpishi ve kor asema a ve shi ve lu a aeren a wang kpaa yô. Paulu kaa ér: “Yevese nen idya.” (1 Mbakorinte 6:18) Fa wer Paulu kaa heen ér se “palegh idya” tseegh ga. Gba u Mbakristu vea palegh idya tseegh ga. Gba u vea yevese aeren a hôngorough cii, di er vea yevese kwaghbo u a lu nôngon u wuan ve nahan. Aluer se kenger kwaghwan ne ashe ashe yô, a lu se ican ga u nyôron iyol ken ijimba i eren i vihin tsung, nahan Aôndo una venda se.
10 U tesen ikyav yô: Tôô ase wer, ngô ôô wan na u kiriki iyol tsembelee hua un ikyondo sha u vea za ma icighan iniongo yô. Wanakiriki la gema pine ngô na ér a na un ian una za numbe ken won cii vea yem iniongo la ye, ngô na lumun kpa ta un icin. A kaa a na ér: “De ze ikyua hen ape mngerem ma jire la cuku tsô kpaa ga. Aluer ú ishi angbiôr iyol yô, me gbidye ú kpee a bunde ga.” Nahan kpa, ica i gbe ga yô, ngô la nenge wan la ngu ningir sha kur u mngerem mara. Ngu a ishi angbiôr iyol ve ga. Nahan kpa, er á lu ningir ikyua a mngerem mara yô, kwagh ne tese ér á wa kwaghwan u ngô na la ikyo ga, nahan shin mngerem mara kpa una gba kpee je a bunde ga. (Anzaakaa 22:15) Igyumior man mbaganden mba ma ve kôron iyol tsaha je kpa ka ve fatyô ga. Er nan ve kwagh a lu nahana?
11 Ken ayange ne ior kpishi nyôr iyol u eren “asaren a dang,” ikyômpeni i eren shi teen akaa a ijimbagh kpaa dumbur. (Mbaromanu 1:26, 27) Ufoto mba ijimbagh de ishar ken umagazin man ken ityakerada man ken uvidio man sha Intanet. Ior mba ve tsough u ivin asema a ve aa ufoto mba ijimbagh cii mba yevese idya i eren ga. Kwagh tsô gba ve sha kwaghwan u Bibilo i we sha kwagh ne la ga, nahan ka ve eren akaa a a mgbegha ve u eren idya yô. Mba kuran asema a ve ga, kpa ve gema mba hôngor asema a ve aa ufoto mba ijimbagh mba anyom a kar imôngo cii ve vea bee ve ken ishima la. (Anzaakaa 6:27) Se hen nen kwaghfan hen orjighjigh Yobu, yange ya ikyur a ashe a na wener mayange je una kenger kwagh u una mee un u eren kwaghbo ga. (Yobu 31:1) Sha kpôô yô, ikyav i Yobu la i kuma i se dondo kpee je!
12. Zum u nomso man kasev mba ken Kristu ve lu sôôr ayol a ve la, vea “yevese idya” nena?
12 Shi gba hange hange u se “yevese idya,” hemban cii yô, sha shighe u ishiôr kwase. Gba u shighe la a lu shighe u ember, veren ashe gbenda tsung keghen iyange ikyaa la, nahan kpa igyumior man igyumukase i i soo u vôson ayol a ve la ka ve vihi shighe ne sha u yaven ayol a ve. Ka vea vande yaven ayol a ve kera yô, kwagh ne a yange ve u wan imaagh ki ma ve we ve ivese ve ma i hembe doon cii la—ka ivese i i har sha dooshima u tangen iyol ga, man iyol kôron tsaha, man u ungwan imo i Yehova Aôndo je la. Orkristu ugen vea kwase na yange ve er idya shighe u ve lu sôôr ayol a ve la. Mbá eren ivese kera yô, kwase la kaa ér, yange imoshima na za un iyol kpen kpen, kwagh ne na yô, saan un iyol sha iyange i ivesegh la ga cii. Á kaa wener: “Yange m shi zamber a Yehova mer, a̱ dem a kwaghbo wam, hii shighe la zan zan hegen, anyom kar ataankarahar je kpa imoshima yam de u zan mo iyol ga.” Gba keng keng u mba ve er imba isholibo la yô, ve ker iwasen hen mbatamen mba ken Kristu. (Yakobu 5:14, 15) Nahan kpa, nomso man kasev mba ken Kristu kpishi mba ve soo u vôson ayol a ve ka ve er kwagh sha kwaghfan nahan ve palegh akaabo ne shighe u ve lu sôôr ayol a ve la. (Anzaakaa 22:3) Ka ve pande akaa a eren a tesen ishoon sha ayol a ve la. Shi ka a gba u vea lu mape ve uhar tseegh yô, ve ker orgen nan lu vea ve.
13. Er nan ve i doo u Mbakristu vea sôôr or u nan civir Yehova tseeghele?
13 Mbakristu mba ve lu sôôr or u nan civir Yehova ga la vea zua a mbamzeyol mba vihin kpee je a bunde ga. U tesen ikyav yô, aluer ú vôso or u kwagh u Yehova a vihi nan ishima nahan a doo je kpa? Gba kpee u Mbakristu vea vôso or u Yehova a doo nan ishima, shi nan we atindiakaa a Yehova a we sha kwagh u aeren a wang la ikyo yô. Mkaanem ma Aôndo wa se kwagh nahan ér: “I̱ de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? Shin ka nyi mzough i lu hen iwanger a ime?”—2 Mbakorinte 6:14.
14, 15. (a) Ka mnenge u kpeegh u nyi nahan ior mbagenev ve lu a mi sha kwagh u a lu “idya” jighilii? (b) “Idya” kua aeren a nyi nahan keregh, man Mbakristu vea “yevese idya” nena?
14 Gba hange hange u shi se fa kwagh u a lu idya jighilii yô. Aluer se fa kwagh u a lu idya jighilii ga yô, a taver se u yevese i̱ elegh elegh. Nyian ne ior mbagenev mba a mnenge u kpeegh sha kwagh u a lu “idya” jim jim yô. Ka ve hen ér vea er ivese ga kpa vea fatyô u pirin isharen ve i yavaor la sha u eren aeren a ijimbagh agen aa lu u yaven a or jighilii ga yô. Ajiir a vesen a nengen sha kwagh u mkpeyol u ior, aa a lu nôngon u panden iyav mbu igyumukase i we sha ár la je kpaa taver igyumior man igyumukase asema ér ve er aeren a ijimbagh avea wa iyav ga yô. Imba kwaghwan la nahan ka u shami ga cii. U palegh iyav mbu wan a ivese i eren shio la zua kwagh môm a aeren a wang cuku kpaa ga, shi ikyav i ishemberti i “idya” la i̱ saa sha u yaven a or tseegh ga, i samber sha aeren a ijimbagh agen kpaa.
15 Inja i ishemberti i ken zwa Grika i por·neiʹa, i̱ í gem i̱ ér “idya” la nôngo u samber sha aeren a ijimbagh wuee. Ishember la i kua myav u ior mba ve lu a er ivese ga yaven ayol a ve la shi numben a alegh a yavaor la ker. Shi por·neiʹa kua u ndiar alegh a yavaor la ker, man u yaven a orgen shin tswar kua u ngirigh ilyeegh ki yavaor ki orgen la cii ka aeren a idya a i hembe eren sha ajiir a mbaashawo ve lu la. Ior mba ve hen ér aeren angan nahan cii ka “idya” ga la mba tsughun a tsugh ayol a ve, shi ve gba ken to u Satan kpaa. (2 Timoteu 2:26) Heela tseegh ga, ka mvende u vendan ser se nyôr iyol ken aeren a idyaa ga la tseegh i lu u lun a aeren a wang ga. Kpa gba hange hange u se palegh nyityô ieren i ijimbagh man aeren a dang a a mgbegha se u eren isholibo i vihin tsung i por·neiʹa la, ka sha u eren nahan man se “yevese idya” ye. (Mbaefese 4:19) Aluer se mba eren nahan yô, se mba lun a aeren a wang.
Palegh Mbamzeyol mba Gban Di Hian a Mbagenev La
16. Ka hanma shighe nahan i lu kwaghbo u nomsoor numben a kwase ga, man ka ikyav i nyi i tese ken Ruamabera sha kwagh nee?
16 Aluer se soo ser se lu a aeren a wang yô, gba u se palegh u hian a mbagenev. Ior mbagenev vea kaa ér kwaghbo ngu sha u hian a orgen ga, ka di u eren sarka a nomsoor shin kwase tsô. Jighilii yô, shighe ngu u nomsoor nana fatyô u numben a kwase yô. Ior yange ve nenge Isaka man Rebeka ve lu “numben,” tsô ve kav er ve lu anmgbianev shin ve lu di boki tsô ga yô. (Genese 26:7-9) Ve vôso ayol a ve. Iniumbe ve la lu kwaghbo ga. U hian a mbagenev wuee wuee la kaha kposo a iniumbe i hen atô u nom man kwase la.
17. Inja i u hian a orgen ér nyi, man se hendan a mzeyol ne nena?
17 Inja i u hian a orgen yô: Ka u nomsoor shin kwase tesen isharen ijimbagh sha orgen a awashima u vôson nan shio. Uumace bugh ashe kpen kpen, nahan igbenda ngi kpishi i vea fatyô u hian a orgen yô, igbenda ne igen ka i ken myer. (Anzaakaa 30:18, 19) Atindi nga jighilii sha kwagh ne ga. Nahan kpa, kwagh ugen u vesen ngu u a hembe atindi a wan sha kwagh ne yô—ka u timen sha aeren ase sha mimi shi eren sha atindiakaa a ken Bibilo la vough vough.
18. Ka nyi ka i mgbegha mbagenev ve ve hia a mbageneve, man er nan ve u hian a mbagenev sha idya la i lu kwagh u bo?
18 U ôron sha mimi yô, se mbagenev kpishi se lumun ser, zum u nomsoor shin kwase ka nana er ma kwagh a vese u a tese ér nan ngu a isharen sha vese yô ka i doo se. Kwagh ne ka marami je. Kpa, ka u se gba hian a or tsô ser se seer ulum wase sha ishigh ki nan shin se nôngo yô nana nenge ér se doo nan ishimaa? Aluer se mbá eren nahan yô, se fa ishimavihin i alaghga se na or u se lu hian a nan la kpa? U tesen ikyav yô, Anzaakaa 13:12 kaa ér: “Ishimaverenkeghen i i zough a mi ga yô, ka i na ishima i uren.” Aluer se kar a ishima tsô se mba hian a orgen yô, se fa er ieren yase la ia bende a nan ga. Alaghga or u se hie a nan la nana ver ishima ér se soo u sôôr nan vôson. Kpa aluer nan va kav ér kwagh ngu nahan ga yô, se na nan ishima vihin tsung. (Anzaakaa 18:14) U eren mbagenev a ishima ker la ka kwagh u bo kpen kpen.
19. U hian a orgen ngu a vihi ivese i nomso man kasev mba ken Kristu nena?
19 Gba hange hange u shi se palegh u hian a mba ve er ivese la kpaa. U hian a orgen u nan er ivese, shin or u nan er ivese hian a orgen u nan lu ikyar i nan i ken ivese ga la ka kwagh u bo. Mbakristu mbagen mba a mnenge u kpeegh sha kwagh u hian a mbagenev la, ve nenge ér u ve undun or u ve vôso geman hian a orgen u ve vôso nan ga la ka kwagh u bo ga cii. Mbagenev ka ve pase or u ve senge ér nan ngu “boki” ve la akaa ve a ken myer a mayange je vea pase ma ikyar ve u ken ivese ga yô. Kwagh ne ka a na yô dooshima u ve lu a mi sha nan la a taver ken ve je i hingir kwagh u vea har ishima ve cii sha nan, nahan kwagh ne ka a nôngo u van a mgbejime shi vihin ivese ve kuaa. Gba u Mbakristu mba ve er ivese vea umbur kwaghwan u Yesu a we ér idya i hiin ken ishima la. (Mateu 5:28) Nahan se kura nen asema ase, shi se palegh nen akaa a a na ve se gba ken akaabo ne la.
20. Doo u se kange ishima se nenge aeren ase a wang la nena?
20 Sha mimi yô, taver kpishi u lun a aeren a wang ken tar u ú mgbough a aeren a dang ne. Aluer ú ta aeren ou a wang kera yô u hiden henen á la ka ican kpishi, nahan hemba doon u ú lu a á heregh. Yehova “deen kwaghbo wuee,” shi ngu a tahav mbu wanger mba ve gem asema sha kwaghbo u ve er la. (Yesaia 55:7) Nahan kpa, Yehova kor ior mba ve er ijimba sha akaabo a ve zough a mi sha ijimba i ve er la ga. Injar i bo i or zough a mi sha dang u eren la ia fatyô u lun a nan anyom a kar imôngo, alaghga je yô, zan zan ku u nan. (2 Samuel 12:9-12) Nôngo sha afatyô wou cii, lu a aeren a ou a wang la her sha u kuran ishima you. Nenge aeren a ou a wang, a ú eren sha ishigh ki Yehova Aôndo la wer ka kwagh u injaa tsung ú lu a mi ye—nahan mayange je de undun a ga!
Ú Na Mlumun Wer Nyi?
• Aeren a wang jim kanyi, man er nan ve i gbe hange hange u se lu a á?
• Se kura ishima yase nena?
• U se yevese idya la wa nyi man nyi keregh?
• Er nan ve i gbe u se palegh u hian a mbageneve?
[Study Questions]
[Picture on page 9]
Mato una fatyô u lun kwagh u bo aluer ordelaba naha un sha inja ga yô
[Pictures on page 10]
Aluer i wa se kwagh kpa se wa kwaghwan la ikyo ga yô, kanyi ia er se?
[Picture on page 11]
U nomsoor man kwase sôôr ayol a ve sha inja la ka a va a iember, shi a va Aôndo a icivir