Gbenda u Se Fa Inyamkyume la man Ikyav i I̱ Yô

KA Í doo ú ú tôvon fan kwagh u a cimin yôô? Ka wea tôvon sha kwagh yô, ú ker avindir a a wase ú u tôvon sha kwagh la yô. Aôndo tese se avindir ken Mkaanem nam ma a ne i nger la sha kwagh u iyenge i 666 i í lu iti shin ikyav i inyam i í er kwagh u i̱ ken takerada u Mpase ityough 13 la.

Se nenge sha akaa anyiin a a wase se u tôvon sha kwagh ne yô—ka avindir a injaa—a a pase se kwagh u a lu ikyav i inyamkyume la yô. Se nenge sha (1) gbenda u ashighe agen ka i ii or shin akaa agen iti ken Bibilo yô, (2) kwagh u a lu inyamkyume la, (3) inja i iyenge i 666 i í lu “iyenge i or” la, man u (4) ikyav i namba 6, man er i hii ve i nger ataratar kwa tar la, inja na yô i nger 6 kohol 60 kohol 600, shin 666.—Mpase 13:18.

Ati a ken Bibilo Nga a Inja

Ashighe kpishi ati a ken Bibilo nga a lu a inja, hemban je yô ka alu iti i Aôndo iyolna a ii yô. Ikyav i tesen yô, yange gba pe Aberam una hingir ter u akuraior, nahan Aôndo ii tertamen ne iti ér Aberaham, inja na yô ér “Ter u ikpelaior.” (Genese 17:5) Aôndo yange kaa a Yosev man Maria ér ve ii wan u Maria una mar la iti ér Yesu, man inja i iti ne yô ér “Yehova Ka Myom.” (Mateu 1:21; Luka 1:31) Yehova na se myom sha tom u Yesu er la man ku na u á kpe sha u nan naagh sha ci wase la, nahan kwagh ne kure sha inja i iti na la vough.—Yohane 3:16.

Nahan yô, iyenge i 666 i i lu iti i Aôndo a ne inyamkyume la tese ikyav i kwagh u Aôndo a nenge wener ka mbamlu mba tseer tseer mba inyamkyume la yô. Kpa kwagh u hiihii u se er ve se fa mbamlu mban yô, ka u hiin fan inyamkyume la kpôô kpôô man ityom i í kpaa.

I Pase Se Kwagh u Inyamkyume la I Lu Yô

Takerada u Daniel ta iwanger sha ikyav i inyám í sha injakwagh. Ityough ki sha 7 la pase se kwagh u “Inyam i vesen inyiin” wanger wanger—ka begha man dwem man anyam man inyam i cier iyol i lun a uzegembaanyiiv mba iyôôv. (Daniel 7:2-7) Daniel kaa a vese ér inyám ne tile sha ityough ki “utor” shin ityartor i yange i hemen ityartor igen sha adondo adondo la.—Daniel 7:17, 23.

Dikishenali i i yilan ér The Interpreter’s Dictionary of the Bible ôr kwagh u inyamkyume i ken Mpase 13:1, 2, la ér “ngi a mbamlu mba inyám i inyiin i ken mpase u sha mnenge u Daniel la . . . Sha nahan yô, inyamkyume i ken [Mpase] la tile sha ityough ki hemen u ugomoti mba shin tar ne mba ve hendan a Aôndo la cica cii.” Mpase 13:7 tese ér kwagh u dikishenali ne i er ne ka mimi, ijiir la ôr kwagh u inyamkyume la ér: “I na i tahav sha hanma nongo man hanma nongoior man hanma zwa man hanma ikurior kpaa.” *

Er nan ve Bibilo i er kwagh u inyám ér í tile  sha ityough ki mtemtor u orumace? A bunde kpa atôakaa nga a har a i hii ve kwagh a lu nahan yô. Hiihii yô, ka sha ci u ugomoti ndera wuan ior haan awambe inya er inyamkyume nahan uderimbaanyomov imôngo hegen. Or u timen sha akaa a mbayiase Will Durant man Ariel Durant nger nahan ér: “Ityav mbi nôngon ka kwagh u i gbe je tsô i fe orumace a mi yô, man hegen kpa mbi pande ga shin er ibughashe i seer hegen shi gomoti u mbakpishiv a lu hegen nahan kpaa.” Sha mimi yô, “or ka nana lu a tahav sha orgen yô, nan eren nan ican”! (Orpasenkwagh 8:9) Ityôkyaa i sha uhar yô, “darakon [Satan] gema na [inyamkyume la] agee a na man shi ikônough nagh ki torough man shi tahav mbu vesen kpaa.” (Mpase 12:9; 13:2) Nahan er i lu Diabolo a ver mtemtor u orumace yô, mtemtor ne ngu eren kwagh sha inja i inyamkyume shin darakon, vough er Diabolo kpa a eren nahan.—Yohane 8:44; Mbaefese 6:12.

Nahan kpa, kwagh ne tese ér hanma orhemen tar cii yô ka Satan a ver nan ga. Sha kpôô yô, u ôron sha gbenda ugen yô, ugomoti mba uumace mba eren tom u “ortom u Aôndo,” ve wase ityô i uumace ngi vough, a ve shio yô anzughul ma a ngee tsung je. Mbahemenev mbagenev kura ian i ior ve lu a mi i eren akaa la, kua ian i civir Aôndo sha mimi la kpaa—man Satan soo ér kwagh a lu nahan ga cii. (Mbaromanu 13:3, 4; Esera 7:11-27; Aerenakaa 13:7) Kpa, er Diabolo a we ave sha hemen u orumace yô, or môm tsô, shin ma mzough u orumace môm tsô ngu a fatyô u van a bem man mkpeyol u lun gbem ga. *—Yohane 12:31.

“Namba u Or”

Kwagh u sha utar u una wase se u fan inja i iyenge i 666 la yô, ka mlu u iyenge ne i lu “iyenge i or” la, shin er mgem u Bibilo i i yer ér The Amplified Bible la a kaa nahan, ka “namba u or.” Ishember ne ngi ôron kwagh u gbenger or môm ga, gadia ka Satan a lu a tahav sha inyam ne ye, ka orumace ga. (Luka 4:5, 6; 1 Yohane 5:19; Mpase 13:2, 18) Kpaa, mlu u inyamkyume ne i lu a “namba u or” shin ikyav la, tese ér inyam ne ka kwagh u orumace, ka jijingi shin ijôv ga, sha nahan yô ngi a mbamlu mba orumace. Ka nyi i lu mbamlu mba shono? Bibilo na mlumun ér: “Ior ca ca ve er isholibo nahan kera mba a iengem i Aôndo ga.” (Mbaromanu 3:23) Nahan er inyam la i lu a “namba u or” yô, kwagh ne tese ér ugomoti mba a mlu u orumace u myen, ua tese ér mba ken isholibo shi mba vough ga la.

Akaa a a vande eren karen yô tese ér kwagh ne ka nahan. Henry Kissinger, un u ngise lu Akawe u tar u Amerika cii la kaa wener: “Hanma zegetartor u yange lu cii yô, u va yôhôr kera.” Shi a  kaa ér: “Tsegh ku mbayiase tese akaa a ior nôngo ér vea er kpa ve kan shio yô, man mbaawashima vev mba yange ve kure ve ga la . . . Nahan or u nan tím sha akaa a mbayiase tsô yô, nana lumun ér aahe ka kwagh u una tser ior kpee a bunde ga yô.” Kwaghôron u Kissinger u mimi ne lumun a mimi u vesen u ken Bibilo ne: “Gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga.”—Yeremia 10:23.

Er hegen se fe inyamkyume la shi se fe mnenge u Aôndo sha i yô, se mba sha ian i se fatyô u masen timen sha vegher u masetyô u kwaghcimin ne—se time sha iyenge i ataratar la, man er i hii ve i nger ataratar kwa tar—inja na yô, ka 6 kohol sha 60 kohol sha 600.

Er Nan Ve i Nger Ataratar Kwa Tara?

Unamba mbagenev ken Ruamabera tile sha ikyav kwagh. U tesen ikyav yô, ashighe kpishi utaankaruhar ka a tile sha ityough ki kwagh u a lu jimin shin a lu vough sha ishigh ki Aôndo yô. Ikyav i tesen yô, Aôndo yange gba hanma kwagh shin tar ne bee jimin cii er yange washima nahan, á gba akaa ken lahadi môm, ka ‘ayange’ ataankarahar shin shighe u a lu jimin yô. (Genese 1:3–2:3) “Akaaôron” a Aôndo nga er azurfa “u i ser un kwa taankaruhar,” nahan a hingir vough yô. (Pasalmi 12:6; Anzaakaa 30:5, 6) Yange i kaa a orimande Naaman ér a̱ ôô iyol shin Ifi u Yordan kwa taankaruhar, ee yô, maa imande na la bee un iyol jimin cii.—2 Utor 5:10, 14.

Ataratar yina môm u lun utaankaruhar. Nahan a lu shami u kaan ér ataratar tile sha ityough ki kwagh u a lu vough ga shin a yen sha ishigh ki Aôndo ga zee? Sha kpôô yô, kape i lu je la! (1 Kroniku 20:6, 7) U seer yô, mnger u i nger ataratar kwa tar la, ka 666 je la, tese er mlu u vough ga la a ngee kpishi yô. Kwagh ne ka shami, gadia er se vande timen nahan, 666 la ka “namba u or.” Nahan yô, akaa a inyam la i vande eren la, man “namba u or” i inyam shon i lu a mi la, man er iyenge ne i lu 666 la kpaa, tese wanger wanger ér—inyamkyume ne ngi a isholibo shi i yina sha ishigh ki Yehova kpishi je.

Myen u inyamkyume ne umbur se kwagh u yange i ôr a Tor Beleshasar yô. Yehova ôr kwagh a tor la sha ikyev i Daniel kaa ér: “I kar u sha iyôgh ki karen kwagh; yô, u yina.” Hen tugh mbura je i wua Beleshasar, nahan Zegetartor u ageegh u Babilon la gba. ( Daniel 5:27, 30) Nahan ijirôron i Aôndo a lu va ôron ugomoti mba ve lu inyamkyume la man ior mba ve lu a ikyav i i la tese mkur u inyamkyume ne man mba ve lu a i ityô cii. Kpa kwa ne yô, Aôndo una tim gomoti môm tseegh ga, kpa una tim mtemtor u uumace cii kera. (Daniel 2:44; Mpase 19:19, 20) Nahan yô, nenge i doo u se palegh ikyav i kuugh i inyamkyume ne sha wono!

I Fa Ikyav La

Takerada u Mpase ngu er kwagh u iyenge i 666 ngu been a bee nahan man ú ôr kwagh u iorov 144,000 mba ve lu mbadondon  Waniyôngo, Yesu Kristu, mba i nger iti na man iti i Ter na Yehova sha atsul a ve la. Ve mba i nger ve ati ne la mba sha ci u Yehova man Wan na u ve lu eren shiada sha ci na sha gbashima la. Kape mba ve lu a ikyav i inyamkyume la kpa ve lu eren i tom ken igbar je la. Nahan u ôron sha injakwagh yô, aluer or ngu a ikyav ne, alu ken uwegh ku yanegh shin sha icul kpaa, ikyav ne tese ér nan ngu or u nan civir ugomoti mba tar ne mba sha inja inyam la. Mba ve lu a ikyav la mba ne “Shisar” akaa a a lu sha ci u Aôndo yô. (Luka 20:25; Mpase 13:4, 8; 14:1) Ka ve er kwagh ne nena? Ka ve er nahan sha u civir ugomoti mbapativ, mba ve suur sha ve shi ve veren ashe a ve ér ve na ve myom la, shi ka ve civir ityuta ve kua akumautya ve kpaa. Nahan icivir i ve ne Aôndo cii kpa ka sha ikpazwa tsô.

Kpa Bibilo gema wa se kwagh ér: “De suur nen sha mbatarev, sha wan u or u iwasen i lu her a na ga la ze; zum u iôôn i nan ka ia due yô, nan shi nan hide hen inya i nan, sha iyange la je mbamhen mba nan saa ishe.” (Pasalmi 146:3, 4) Mba ve yar tom sha kwaghwan u injaa ne yô, mba zough a lanshima zum u ugomoti ve kan shio u eren sha uityendezwa vev shin zum u mbahemenev mba zan iti ve hungwa sha utaha kera ga.—Anzaakaa 1:33.

Kpa kwagh ne tese ér Mbakristu mba mimi gba teman tsô wa ave mba eren kwagh u wasen sha mbamzeyol mba uumace ve lu ker ne ga ze. Kpa, mba yôôn kwagh u gomoti u una bee mbamzeyol mba uumace la kpoghuloo je—ka Tartor u Aôndo u ve lu eren ú tom la.—Mateu 24:14.

Ka Tartor u Aôndo Tseegh Ú Lu Ishimaverenkeghen i Orumace Ye

Zum u Yesu lu shin tar ne la lu Tartor u Aôndo la lu itinekwagh i kwagh pasen na ye. (Luka 4:43) Yesu tese mbadondon nav ken msen na u a lu ikyav, u̱ ashighe agen ka i yila ér Msen u Ter Wase la wener ve eren msen ér Tartor la u̱ va shi i er ishima i Aôndo shin tar kpaa. (Mateu 6:9, 10) Tartor la ka gomoti u una hemen tar cii yô, man gartamen u gomoti ne ngu sha, ka shin tar ne ga. Ka nahan ve, Yesu yila Tartor la ér “tartor u Sha” ye.—Mateu 11:12.

Ka an je nan kom u lun Tor u Tartor la i hembe Yesu Kristu, un u yange kpe sha ci u mba vea va lu sha ikyev na laa? (Yesaia 9:6, 7; Yohane 3:16) Ica a gba ga tsô Tor u vough ne, u a lu or u ken jijingi u lun a tahav hegen ne, una gbihi inyamkyume la man ator a i kua a akumautya a i ken “berusu u a lu yeghen sha sulfur”, u a lu ikyav i mtim u timin kwagh vindi vindi la. Kpa ka cii la ga. Yesu una er kwagh u orumace môm nana fatyô u eren ga yô, una kar a Satan kera.—Mpase 11:15; 19:16, 19-21; 20:2, 10.

Tartor u Aôndo ua va a bem hen mba vea lu sha ikyev i u cii. (Pasalmi 37:11, 29; 46:8, 9) Ijungwen man mnyoon man ku ua kera lu ga. Nenge imba er kwagh ne i lu ishimaverenkeghen icivirigh sha ci u mba ve lu a ikyav i inyamkyume la ga sha wono!—Mpase 21:3, 4.

[Footnotes]

[Box on page 4]

Avindir a Wasen Se u Fan Iyenge i 666 La

1. Ashighe kpishi ati a ken Bibilo nga a pase se mbamlu mba or u nan ye iti shon la, shin er yange nan er uma u nan yô; kwagh ne ka nahan sha Aberaham man Yesu kua mbagenev kpishi kpaa. Nahan inyam la kpa iyenge i i la pase se aeren a i.

2. Inyam kposo kposo i ken takerada u Bibilo u Daniel la tile sha ityough ki ityartor i uumace shin uzege mba tartor mba yange ve hemen sha adondo adondo yô. Inyam i ken Mpase 13:1, 2 la jimin cii tile sha ityough ki ugomoti mba shin tar cii mba Satan a ne ve tahav shi a lu hemen ve la.

3. Er inyam la i lu “iyenge i or” shin “namba u or” yô, kwagh ne tese ér inyam la ka kwagh u orumace, ka ijôv ga. Nahan yô, ngi a mbamyen mba orumace a lu a mi sha ci u isholibo man mlu na u vough ga la.

4. Sha ishigh ki Aôndo yô, namba u ataratar u a yen môm u lun utaankaruhar la tese kwagh u a lu vough ga yô, man ken Bibilo yô, utaankaruhar ka kwagh u jimin shin u vough. Iyenge i 666 la tese myen u kwagh u a yina yô, kwa tar je.

[Pictures on page 5]

Mtemtor u orumace yina kpishi, man iyenge i 666 la tese kwagh ne wanger wanger.

[Credit Line]

Wan u kpen ijen: UNITED NATIONS/Foto sha ikyev i F. GRIFFING

[Pictures on page 6]

Yesu Kristu una va a mtemtor u vough sha tar