Mkaanem Ma Aôndo Ma Taver We Ishima Kpa?

SHIGHE u ka wea tagher a mbamzeyol nahan, ka ú er nena? Zum u Satan lu zan Yesu iyol yô, á umbur ivur ruamabera i una na un ikyaa yô, nahan kwagh la wase un. (Mateu 4:1-11) Kape Tor Davidi kpa Mkaanem ma Aôndo taver un ishima shighe u a tagher a mbamtaver je la. Á kaa wener: “Zum u mbamhen ve ngeem ken ishima yô, mbamsurshima Ou nam ishima i saan saan.”—Pasalmi 94:19.

Kape se kpa zum u se tagher a mbamzeyol man se umbur ma ivur ruamabera i i̱ doo se ishima tsung ve ia sur se ishima, ga yô ia taver se ishima, se hendan a mbamzeyol mba shon je la. U tesen ikyav yô, orgen u i yer un ér Rex, á lu anyom 89 hegen yô, tsa ken tom u pasen kwagh hanma shighe la, hii ken inyom i 1931 la je. Nahan kpa, á kaa ér: “Hanma kwa u ka a̱ seer mo tom u vesen ken tom kwaghpasen yô, ka i lum e̱r m kuma u eren ú ga nahan.” Yange er nena? Á kaa ér: “Yange m umbur ivur ruamabera i i̱ doom ishima yum la, i̱ yô ka Anzaakaa 3:5, ivur ne i̱ kaa ér: ‘Suur sha TER a ishima you cii, de yier sha mkav wou ga.’ Er m umbur shi m eren sha ivur ruamabera ne vough yô, kwagh ne wasem u eren ityom yam kuren í doo doo.”

Mbakiriki je kpa ka i doo ve u kôron ivur ruamabera i i̱ doo ve ishima la saan a mi. Jack, u á lu anyom ataratar la kaa ér ivur ruamabera i i̱ hembe doon un ishima yô ka Mateu 24:14. Ivur ruamabera ne i taver un ishima u duen kwaghpasen vea mbamaren nav. Á kaa ér: “Sha hanma iyange i Sati yô, ka i doom u duen kwaghpasen vea ngôm man terem man anngôôv av mba kasev.”

Ka ú tagher a akaa a karen jighjigh wou jighilii sha ashighe agen er Yesu kpa yange tagher a mi laa? Aluer kwagh ngu nahan yô, alaghga Mbafilipi 4:13 una hingir ivur ruamabera i hemban doon we ishima cii. “Mbamhen” ngee ú ken ishima er Tor Davidi nahana? Aluer ka nahan yô, alaghga u we umbur Mbafilipi 4:6, 7 la una wase ú. Ka i lu ú sha ashighe agen inja er ú gbe shiren Aôndo tom gbilin gbilin tsô shinii? Aluer ka u nahan yô, ú zua a ishimataver sha u umbur kwagh u i er ken 1 Mbakorinte 15:58 la.

Ka sea kôr avur a ruamabera a injaa la ken ityo yô, se na Mkaanem ma Aôndo ian ser ma er tom ken a vese. (Mbaheberu 4:12) Amba avur a ruamabera a doon a ngera nahan aa na se ishimataver tseegh ga, aa sur se asema kpaa.—Mbaromanu 15:4.