“Atindi A Ter” Gba Ú Ishima Kpa?
“Atindi A Ter” Gba Ú Ishima Kpa?
‘I saan or u . . . atindi a TER a lu kwagh u gban nan ishima la iyol.’—PASALMI 1:1, 2.
1. Er nan ve i saan se iyol u lun mbayev mba Yehova yumu?
YEHOVA ngu a wase se shi á ver se doo doo ér se mba mbayev nav mba mimi. Sha kpôô yô, ka se tagher a mbamzeyol kpishi. Nahan kpa, shi se mba zough a msaanyol jim jim. Kwagh ne kpiligh se iyol ga, gadia se mba civir “Aôndo u saan saan,” jijingi na ivin se a iember ken asema. (1 Timoteu 1:11; Mbagalatia 5:22) Iember ka iaven i ka i saan or iyol sha ci u nan zough a kwagh u dedoo u nan ver ishima nan lu keghen yô. Man Ter wase u sha la ne se hanma naagh ku dedoo cii. (Yakobu 1:17) Kape i lu je ve i saan se iyol yum ne!
2. Ka hanma pasalmi se lu lamen shamini?
2 I pase kwagh u msaanyol ken takerada u Pasalmi la tseer tseer. U tesen ikyav yô, í pase kwagh u msaanyol ken Pasalmi 1 man 2. Mbadondon mba Yesu Kristu mba tsuaa mbara kaa ér ka Tor Davidi á nger pasalmi u sha uhar la ye. (Aerenakaa 4:25, 26) Or u yange nan nger pasalmi u hiihii, u i ter iti i nan ga la yange nan hii sha u ngeren icam ne, nan kaa ér: “I saan or u nan zenden sha mhen u mbaaferev ga la iyol.” (Pasalmi 1:1) De se nenge nen ken ngeren ne kua u a dondo la cii tsô se nenge er Pasalmi 1 man 2 a ne se ityôkyaa i ember yô.
Kwaghmyer u A Ne Msaanyol Yô
3. Ka atôakyaa a nyi Pasalmi 1:1 a tese ér nga a va or u civir Aôndo a msaanyolo?
3 Pasalmi 1 tese er i hii ve ka i saan or u civir Aôndo iyol yô. Orpasalmi wa icam sha u pasen atôakyaa a nga a na imba msaanyol la kaa ér: “I saan or u nan zenden sha mhen u mbaaferev ga la iyol, gbenda u mbaasorabo nan til sha u ga, mbanahantar kpaa nan tem imôngo a ve ga.”—Pasalmi 1:1.
4. Sekaria man Elisabetu yange ve ker ikyav i dedoo i nyi?
4 Aluer ka u se lu ken msaanyol jim jim yô, saa se dondo atindiakaa a Yehova a vough la keng. Sekaria man Elisabetu, ve mba ve zua a ian i civirigh i hingir mbamaren mba Yohane u eren Batisema la yange ve “lu mbaperapera sha ishigh ki Aôndo, ve kuran atindi a Ter kua akaawan a Na cii ve lu a acôghor a wan iyol ga.” (Luka 1:5, 6) Se kpa a saan se iyol aluer se dondo ikyav ve la, shi se venda a ishima i môm ser se ‘zende sha mhen u mbaaferev’ ga, shi mhen u mbaaferev kpa se de ser a̱ hemen se ga yô.
5. Ka nyi ia wase se u palegh “gbenda u mbaasorabo”?
5 Aluer se venda mhen u mbaaferev yô, se lu ‘tilen sha gbenda u mbaasorabo ga.’ Jim je yô, se zaan sha ajiir a ve lun her hanma shighe la ga—ka ajiir a ugurgur mba ijimbav ve dumbur la je la. Kpa aluer er se ken ishima inja er se nyôr nongo a mbaaferev ken aeren a ve a ruamabera a vende la di ye? Aluer kwagh ngu nahan yô se sôn nen Aôndo a wase se se er kwagh vough er apostoli Paulu ngise kaa nahan la, ér: “I̱ de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? Shin ka nyi mzough i lu hen iwanger a ime?” (2 Mbakorinte 6:14) Aluer se suur sha Aôndo shi ka se ken “asema wang” yô, se venda mhen man aeren a mbaaferev nahan se lu a asaren man mbaawashima mba dedoo, shi se lu a “jighjigh u lun a imanger ga” la kpaa. —Mateu 5:8; 1 Timoteu 1:5.
6. Hii nan ve i gbe u se kura iyol yase sha kwagh u mbanahantara?
6 Aluer se soo u eren kwagh sha ishima i Yehova yô, mayange je se ‘tema imôngo a mbanahantar’ ga. Mbagen ka ve puu kwagh u kuran atindi a Aôndo la, kpa ken “ayange a masejime” ne, mba ngise ve lu Mbakristu kpa hegen ve hingir u vendan mimi la ka ve hemba tesen sha tarnahan ve la cii ér mimi gba ma kwagh môm ga. Apostoli Peteru lu ta mba nan jighjigh a na imôngo icin wener: “Ne mbadoon mo ishima, . . . hiihii yô, fa nen er ken ayange a masejime mbanahantar vea due a tarnahan, vea zende sha asaren a ve ayol a ve. Vea kaa er ityendezwa i m-ande Na ngi hana? Gadia hii sha shighe u uter kpe kera la akaa cii nga her di er a lu sha mhii u igbetar la nahan.” (2 Peteru 3:1–4) Aluer se ‘tema imôngo a mbanahantar’ ga yô, kwaghtseren u a lu van sha a ve u una bunde mayange ga la una tser se ga.—Anzaakaa 1:22–27.
7. Hii nan ve i doo u se kôr mkaanem ma ken Pasalmi 1:1 mara ken ishima?
7 Aluer se kôr mkaanem ma i hii Pasalmi 1 a mi la ken ishima ga yô, mlu u ken jijingi u se zough a mi sha u henen Ruamabera la una saa se ishe. Jim je yô, se hemba gban a gba kera cii. Aluer se dondo mhen u mbaaferev yô, gbong gbong wase u ken jijingi la una hii u panden kera tegh tegh. Alaghga maa se hingir u lun vea mbaaferev hanma shighe cii. Tegh tegh tsô maa se va hingir u vendan mimi, hingir mbanahantar kpaa. U kôron ijende vea mbaaferev la una fatyô u seer ivin jijingi u vendan Aôndo la ken a vese, shi una vihi mlu wase a Yehova Aôndo je ka ashe tugh ga. (1 Mbakorinte 15:33; Yakobu 4:4) Mayange se de nen ser imba kwagh la i tser se ga!
8. Kanyi ia wase se se har asema ase sha akaa a ken jijingi?
8 Msen u eren una wase se u veren ishima yase sha akaa a ken jijingi geman palegh ijende i mbaaferev la. Paulu lu nger wener: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu.” Apostoli ne taver se ishima ér se ver ishima sha hanma kwagh u mimi, man u̱ a kom icivir, man u̱ perapera man u̱ a lu u wang, man kwagh u doon ishima, man kwagh u a doo u ungwan yô. (Mbafilipi 4:6–8) De se dondo nen kwaghwan u Paulu ne, nahan se kera hingir mbateman igbur i môm a mbaaferev imôngo ga.
9. Er se vende anza a ifer shalegh shalegh nahan kpa, ka se nôngo ser se wase hanma injaor cii nena?
9 Er se vende anza a ifer shalegh shalegh nahan kpa, ka se pase ior kwagh sha kwaghfan, di vough er apostoli Paulu kpa ngise pase Feliku, Gomna u Roma la kwagh sha kwagh u “perapera, man u kôron iyol tsaha man shi kwagh u ijir i i lu van la” nahan. (Aerenakaa 24:24, 25; Mbakolose 4:6) Se mba pasen hanma injaor cii loho u dedoo u Tartor shi se mba eren a ve doo doo kpaa. Se mba a vangertiôr ser “mba i ver ve sha u ve̱ zua a uma u tsôron yô” vea va hingir mba nan jighjigh shi vea wa atindi a Aôndo ikyo kpaa.—Aerenakaa 13:48.
Atindi a Yehova Ka Kwagh u Gban Nan Ishima
10. Kanyi kwagh ia wase se u kôron kwagh u se hen sha tseeneke wase la saan a mi ken ishima yase?
10 Orngeren Pasalmi shi ôr kwagh u or u i saan nan iyol la kaa ér: “Atindi a TER ka kwagh u gban nan ishima, shi ka atindi a Na nan zeren henen a ken ishima tugh kua tetan kpaa ye.” (Pasalmi 1:2) Er se lu mbayev mba Aôndo yô, se kpa ‘atindi a Yehova ka kwagh u gban se ishima.’ Ka sea henen kwagh sha tseeneke wase shi sea gbidyen kwar sha kwagh u se lu henen la yô, alaghga se gba “zeren henen a ken ishima,” ôron duen sha genger genger je. Aluer se mba eren nahan hanma kwa u se lu ôron ma ivur Ruamabera yô, kwagh ne una wase se se hemba kôron kwagh u se hen la saan a mi ken ishima cii.
11. Hii nan ve i doo u se ôron Bibilo ‘tugh kua tetanaa’?
11 “Wanakiriki u jighjigh man u fan kwagh” ngu a shi wan se kwagh ér se ôron Bibilo hanma iyange. (Mateu 24:45) Alaghga isharen i se lu a mi tsung i ma se seer fan loho u Yehova a lu a mi sha ci u orumace la ia mgbegha se u ôron Bibilo “tugh kua tetan”—je yô kua shighe u ma kwagh a ze se iyol se kanshio u yaven tugh kpaa. Peteru wa se kwagh kaa ér: “Atumba a man a mimi a sha kwaghôron u Aôndo la a̱ sar ne tsung er anikundanev mba forototo nahan, sha er né vese sha mi u zan ken myom yô.” (1 Peteru 2:1, 2) Ka gbe ú ishima u ôron Bibilo hanma iyange shi henen sha Mkaanem ma Aôndo man mbaawashima nav shighe u ú yav tugh la kpa? Kape orpasalmi yange eren je la.—Pasalmi 63:6.
12. Aluer atindi a Yehova doo se ishima yô se er nena?
12 Saa a gba se ishima u timen ken atindi a Aôndo ve se zua a msaanyol u tsôron gbem sha won la ye. Nga vough shi nga jighjigh kpaa, man or u nan kor á yô nana zua a zegeinjar je. (Pasalmi 19:7–11) Orhenen Yakobu nger wener: “Or u nan kenger sha tindi u vough u a pasen se a toho la shi nan veren ishima yô, á saan nan iyol ken aeren a nan cii, gadia u ungwan kwagh yô, nan ngu or u kwagh hungur nan fefa ga, kpa nan ngu or u eren tom je.” (Yakobu 1:25) Aluer mimi je atindi a Yehova doo se ishima yô, iyange i môm kpa se gba inya u timen sha akaa a ken jijingi ga. Sha kpôô yô, ishima a taver se ker u tôvon sha “akaacimin a Aôndo je kpaa,” shi se ver Tartor na ua lu kwagh u hiihii ken uma wase. —1 Mbakorinte 2:10–13; Mateu 6:33.
Nan Ngu Er Kon Nahan
13–15. Se lu er kon u i môôr ú hen ukungômbamngerev nahan sha nyi gbenda?
13 Or ngeren pasalmi shi za hemen pase kwagh u orperapera nahan wener: “Nan ngu er kon u i môôr hen ukungômbamngerev, u u um sha shighe u u yô, ika i u kpaa ngi usu ga; hanma kwagh u nan eren kpaa, nana kure un vough.” (Pasalmi 1:3) Se mba se civir Yehova ne kpa se mba tagher a mbamtaver di vough er hanma orumace ugen kpa nan tagher a mi nahan. (Yobu 14:1) Alaghga a tôv se a ican shin se tagher a akaren agen a a gbe a zough sha kwagh u jighjigh u nan wase yô. (Mateu 5:10–12) Kpa sha iwasen i Aôndo yô, se fatyô u wan ishima a akaren ne, gban uwer ga, di vough er kon u kwagh a ze ú iyol ga kpa ua fatyô u tilen her dông shighe u ijeverahumbe i va te sha ú nahan.
14 Kon u i môôr ú hen ape mngerem ma om ga yô, ngu usu ikya i ú inyom shin sha shighe u icegh ki ze kpaa je ga. Aluer se mba ior mba cian Aôndo yô, ka hen Yehova Aôndo u a lu Imbor i utaha la je se zough a tahav ye. Paulu yange ker iwasen hen Aôndo nahan fatyô u kaan ér: “M ngu a agee a eren akaa cii je ken Un [Yehova] u A taver mo ne.” (Mbafilipi 4:13) Shighe u jijingi u Yehova ka una hemen se shi una taver se ken jijingi yô, se mba kera usu kera shin se mba hingir kpenegh ken jijingi shin hingir u hôron tom ga. Kpa ka se ume atam ken tom u se lu shiren Aôndo ne shi se ume atam a jijingi kpaa.—Yeremia 17:7, 8; Mbagalatia 5:22, 23.
15 Orpasalmi yar tom a ishember i ken zwa Heberu i i gem ér “er” la sha u karen akaa ahar. Lu karen akaa ahar a a lu kposo kpa á gem a zough kwagh môm sha gbenda ugen yô. Uumace mba kwagh môm a ikyon ga, kpa, a̱ shi nan kpa yange mdoo u kon u i môôr ú hen ukungômbamngerev ú doo la umbur orpasalmi mlu u ken jijingi u kundu kundu u mba ‘atindi a Yehova a doo ve ishima’ yô. Aluer atindi a Aôndo doo se ishima yô, se tsa sha won ayange aa vese vough er kon kpa ngu u tsa ayange a vese nahan. Jim je yô, se lu gbem sha won.—Yohane 17:3.
16. Hii nan ve ‘hanma kwagh u se eren kpaa ngu a kure voughloo,’ man ka sha nyi gbenda?
16 Er se lu keren gbenda u perapera ityô nahan, Yehova kpa ngu wasen se sha er se wa ishima a akaren man mbamtaver yô. Doo se kpishi shi se mba umen atam ken tom u se lu eren Aôndo ne. (Mateu 13:23; Luka 8:15) ‘Hanma kwagh u se eren kpaa, ka se kure un vough’ sha ci u awashima wase yô ka u eren ishima i Yehova. Er mbaawashima nav ka ve kure vough hanma shighe cii, shi atindi na a doo se yô, se mba ze ikyura ken jijingi. (Genese 39:23; Yosua 1:7, 8; Yesaia 55:11) Shighe u ka sea tagher a mbaihyomov je kpa kape kwagh ne ngu a kure vough je ne.—Pasalmi 112:1–3; 3 Yohane 2.
Ka Inja er Iyol Doo Mbaaferev Yô
17, 18. (a) Orngeren Pasalmi kar mbaaferev sha nyi? (b) Aluer iyol doo mbaaferev mba a inyaregh je kpa, hii nan ve vea tsa gbem ga?
17 Mlu u mbaaferev kaha kposo a u mbaperapera je ka ashe tugh ga! Alaghga a lu inja er iyol doo mbaaferev sha inyaregh ki ve zough a mi la yô, kpa iyol gema doo di ve sha akaa a ken jijingi ga. Orpasalmi tese kwagh ne ken kwagh u shi á seer ôron ne, á kaa ér: “Mbaaferev yô, mba nahan ga; ve yô, mba er imough i ahumbe a purugh a i yô, ka nahan man mbaaferev vea tile sha, sha iyange i ijir ga, man mbaasorabo kpaa ken mkohol u mbaperapera ga ye.” (Pasalmi 1:4, 5) Fa wer or ngeren pasalmi kaa ér “mbaaferev yô, mba nahan ga.” Yange lu ôron ér ve yô mba kposo a or u civir Aôndo u i sember tôôn nan karen sha kon u ú um atam a ú, ú tse gbem la.
18 Aluer iyol doo mbaaferev mba a inyaregh je kpa vea tsa gbem ga. (Pasalmi 37:16; 73:3, 12) Mba vough er ibumeor u ken injakwagh i yange Yesu ôr zum u orgen pine un ér a̱ kar ve kwar u dyakoo la nahan. Yesu kaa a mba ve lu her la ér: “Ver nen ishima, kura nen ayol a en sha hanma hua; gadia ka sha u ngeen a akaa kpishi la man or nana lu a uma ga.” Yesu pase kwagh ne sha u ôron ve injakwagh sha kwagh u ornyar ugen u sule na doo iyiagh kpishi, nahan ornyar la wa ishima u hemben iuna na maan iuna i vesen í una koso iyiagh nav keregh cii yô. Ornyar la shi wa ken ishima ér una ya kwagh shi una ma kwagh una ember. Kpa Aôndo kaa a na er: “We ibumeor ne! Ka nyian tugh je i lu keren uma wou hen we ye; nahan akaa a u kohol ne yô, aa hingir a ana?” Yesu er kwagh ne ker ior mbara ken ishima doo doo cii yô, á za hemen á kaa ér: “Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne.”—Luka 12:13–21.
19, 20. (a) Pase er yange i gbyiren shi i taan iyiagh sha ayange a tsuaa la. (b) Hii nan ve i tee mbaaferev i kar sha imougho?
19 Mbaaferev mba ‘mbanyarev sha kwagh u Aôndo’ ga. Sha nahan yô, mkor ve la ngu di tsô er imough nahan, ka kwav u ka u cir sam uyia je la. Yange a sundan iyiagh ken atev cii yô, i kura i yem a mi sha vande u gbyiren iyiagh la, vande ne ú lu sha igyungu i lun vaanaa. Zendenya yange a kpela agbur a i we awen shin myôm shami yô a unde a mi sha iyiav mbira a kume samuyia la, nahan sam u due kposo imough di shi i due kposo. A been heela yô, i tôô tser i gba peer samuyia la. (Yesaia 30:24) Sam la u hiden u haan sha vande, kpa imough yô ahumbe a purugh a mi i za haan ica je. (Rutu 3:2) Yange a tsaan sam ne sha lalia sha u a kase inya a haa kera kua ambaakaa la nahan yô, sam ne u kuma u koson shin wuan je kpaa. (Luka 22:31) Kpa akoo kua imough yô i purugh i yem kera.
20 Mbaperapera vea lu her kpa mbaaferev yô a tim ve kera di vough er yange a peer samuyia ve sam u hiden u haan sha vande kpa imough yô i purugh kera nahan. Sha kpôô yô, saan se iyol er ica a kera gba ga tsô mbaaferev cii vea kera lu ga nahan. Man er vea kera lu ga yô, ior mba i gbe ve ishima u wan atindi a Yehova ikyo cii vea zua a iveren kpishi je. Aôndo una na uumace mba ungwan tindi uma u tsôron keng a bunde ga.—Mateu 25:34–46; Mbaromanu 6:23.
Iveren Ngi sha “Gbenda u Mbaperapera”
21. Yehova ‘fe gbenda u mbaperapera’ inja nena?
21 I mase kuren pasalmi u hiihii la nahan ér: “TER fa gbenda u mbaperapera, kpa gbenda u mbaaferev yô, ua saa ishe.” (Pasalmi 1:6) Aôndo ‘fa gbenda u mbaperapera’ nena? Aluer se mba keren perapera ityô yô, se fa je ser Ter wase u sha la fa er se kor atindi a na yô, shi á lumun a vese er se lu mba civir un nahan. Nahan se di se gema ishima i nyian yase la cii se haa sha a na vangertiôr je, gadia ka un a lu koson se ye. —Esekiel 34:11; 1 Peteru 5:6, 7.
22, 23. Kanyi ia er mbaafereve, man mbaperapera di a lu nyi ia er ve?
22 “Gbenda u mbaperapera” ua lu gbem sha won, kpa mbaaferev mba ve vende u geman ishima la yô Yehova una ôr ve ijir, una tim ve kera. Nahan “gbenda” u uma ve la ua tim kera gbem sha won. Nahan se fatyô u lun a vangertiôr ken mkaanem ma Davidi man, á kaa ér: “Shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem. Mbaperapera vea ya dyako u tar, vea lu ken u gbem.”—Pasalmi 37:10, 11, 29.
23 Aluer se mba a ian i lun ken paradiso shin tar shighe u mbaaferev vea kera lu sha tar ga la nahan, a saan se iyol je a zua ga! Hen shighe la mbaasemaleghlegh kua mbaperapera cii vea ember bem u a lu bem jim jim la, gadia hanma shighe cii yô “atindi a TER” aa gbaan ve ishima. Kpa cii man shighe la a va yô, saa se er sha “awashima u TER” keng. (Pasalmi 2:7) Kwaghhenen u a dondo ne una wase se se kav kwagh u a lu awashima shon la, shi se kav inja i awashima shon hen a vese kua tsombor u uumace jimin cii.
Ú Na Mlumun Wer Nyi?
• Hii nan ve i saan or u nan civir Aôndo iyoloo?
• Kanyi i tese ér atindi a Yehova doo se?
• Or a fatyô u lun er kon u i môôr ú hen ukungômbamngerev nena?
• Ka nena gbenda u mbaperapera u lu kposo a gbenda u mbaafereve?
[Study Questions]
[Picture on page 7]
Msen u eren una wase se se palegh u yan ikyar a mbaaferev
[Picture on page 8]
Hii nan ve orperapera nan lu er ka kon nahana?