Se Vôr Kpa Se Yina Ishima Ga
Se Vôr Kpa Se Yina Ishima Ga
“TER ka Aôndo u tsôron je, Orgban u akighir a tar, . . . Ka A na or u nan ver la agee, man A seer or u nan taver ga la agee.”—YESAIA 40:28, 29.
1, 2. (a) Ka mlehe u kundun iyol u nyi i lôhô mba ve soo ér vea lu ken mcivir u wang ciilii? (b) Kanyi nahan ia fatyô u vihin mtil wase u ken jijingi?
ER SE lu mbahenen mba Yesu yô, se lan mlehe u kundun iyol u Yesu a lôhô se ér: “Va nen her a Mo, ne mba i ver ne iyol cii, ikav mbi yoho ne kpaa, Mo Me na ne mmem. . . . Gadia igbur Yam leghem man ikav Yav kpaa peese” la ga. (Mateu 11:28–30) Shi i na Mbakristu “ashighe a myôhôryol a sha ishigh ki Ter” kpaa. (Aerenakaa 3:19) Sha kpôô yô, u we henen sha akaa a mimi a ken Bibilo shi henen kwagh u ishimaverenkeghen i dedoo i ken hemen shi eren sha akaawan a Yehova la na ú myôhôryol.
2 Nahan kpa, ashighe agen mbamzeyol ka ve ta sha mbacivir Yehova mbagen nahan ve vôr ken ishima. Ashighe agen yô, ka ve vôr shighe kpuaa. Kpa ashighe agen di yô ve vôr shighe naleghaa. Mbagenev ka vea vôr shighe naleghaa yô ve tôô ér ityom i Kristu i ve lu eren la ngi yuhwan ve a yuhwa ikyav, ve kera tôô ér ityom la ka i nan ve myôhôryol er Yesu tôndo zwa ér a lu nahan la ga. Mbamhen mba kpeegh mban vea fatyô u vihin ikyar i Orkristu nan ye vea Yehova la.
3. Er nan ve Yesu a we se kwagh u i nger ken Yohane 14:1 laa?
3 Cii man í kôr Yesu í wua un yô, á kaa a mbahenen nav ér: “Asema a̱ de kera te ne kwe ga; na nen Aôndo jighjigh, Mo kpaa nam nen jighjigh.” (Yohane 14:1) Yesu yange ôr mbaapostoli nav kwagh ne er shighe mase shin kpuaa u vea tagher a akaa a vihin tsung yô. Kwagh ugen u lu inya u akaa ne a been tsô una tser ve yô, lu tôvacan. Yesu fa dedoo ér iyol ia kpe mbaapostoli nav nahan vea nôngo gbeev. (Yohane 16:1) Luun er yange a taver mbaapostoli ishima ga yô, ishima ma za ve iyol tsung nahan ma ve vôr ken jijingi ma ve kan shio u suur sha Yehova. Imba kwagh ne ia fatyô u eren Mbakristu nyian kpaa. Aluer iyol ngi kpen se hanma shighe yô, kwagh ne una na asema a za se iyol kpishi nahan se vôr. (Yeremia 8:18) Ishima ia kera taver se ga. Aluer se tagher a mzeyol ne yô, iyol ia kpe se ker shi se vôr ken jijingi kpaa, nahan a kera sar se u civir Yehova ga.
4. Kanyi ia wase se ve se kura ishima yase i sha injakwagh la ser i̱ de vôron ga?
4 Bibilo wa se kwagh u injaa kpishi, ér: “Hemba kuran ishima you a akaa a u kor a cii, gadia ka ken i uma a dugh ye.” (Anzaakaa 4:23) Bibilo wa se akaa a injaa a a wase se ve se kura ishima yase i sha injakwagh la sha akaa a a na se iyol kpen shi aa na ve se vôr ken jijingi la. Nahan kpa, gba u se vande fan kwagh u a ne se ivôron la.
Kwaghaôndo u Kristu Kighir Or Ga
5. Ka anzughul a nyi i lu inja er nga sha kwagh u or lun orhenen u Kristu laa?
5 Aluer or soo ér nana hingir Orkristu yô, gba u nana tema a tema ga, nana er tom taveraa. (Luka 13:24) Yesu iyol na kaa wener: “Hanma or u nana tôô [kon u mtsaha] u nan iyol i nan, nana dondo sha a Mo ga yô, nana fatyô u lun orhenen Wam ga.” (Luka 14:27) Aluer ú ôr mkaanem man sha laa laa yô, a lu ú inja er ma zua sha mkaanem ma Yesu ôr wener ikyáv nav peese shi mbi ne mmem la ga nahan, kpa sha mimi yô, anzughul nga sha kwagh ne ga.
6, 7. Er nan ve se fatyô u kaan ser gbenda u se civir Aôndo la ngu ne se mba vôron ga?
6 Shighe u or er tom u taver kpoghuloo nan vôr je kpa nana zua a mkom shi a kundu nan iyol kpaa aluer nan er ú a ishima i môm yô. (Orpasenkwagh 3:13, 22) Man kanyi tom je i hembe tom u pasen mbawanndor a vese akaa a mimi a ken Bibilo laa? Shi aluer se tôô iniôngon i se nenge u eren sha atindi a Aôndo a we sha kwagh u aeren a wang la se kar sha mbamtsera mba se zua a mi la yô, se nenge ser iniôngon yase la i gba kwagh ga. (Anzaakaa 2:10–20) Shi ka a tôvon se a ican je kpaa se tôô ser se mba yan ican sha ci u Tartor u Aôndo.—1 Peteru 4:14.
7 Ikyáv mbi Yesu mbi ne mmem, hemban cii yô, aluer se tôô mbi se kar sha ime i ken jijingi i mba ve lu sha ikyev i igbur i kwaghaôndo u aie la yô. Aôndo eren a vese sha dooshima, kighir se ér se er kwagh u a gande se vanger ga. “Atindi a [Yehova] yô, a yuhwa ga.” (1 Yohane 5:3) Ruamabera pase ér Kwaghaôndo u Kristu u mimi kighir or ga. Nahan gbenda u se civir Aôndo la ngu ne se iyol kpen ga, shin ngu ne se mba vôron ga.
‘Shir Hanma Ikyáv Cii’
8. Ashighe kpishi kanyi ka i na ve se vôr ken jijingii?
8 Sea vôr ken jijingi nan nan kpa ka mbamzeyol mba tar u ú vihi cica cii ne ve ne ve sé vôron ye. “Tar cii ngu sha ikev i Orbo,” mbahendan kwagh a vese kase se wa atô nahan vea fatyô u wan se agbe shi vihin mtil u se til dông ken jijingi la. (1 Yohane 5:19) Aluer se wa ityough u keren akaa a a lu hange hange ga la yô, aa na uma a taver se kpishi shi aa yange se u eren ityom yase i Kristu la. Akaa ne aa na iyol ia kpe se shi aa na se vôr gbeda gbeda kpaa. Nahan Bibilo wa se kwagh u injaa kpishi ér se ‘shir hanma ikyáv’ mbi se tee mbi yoho se la cii.—Mbaheberu 12:1–3.
9. Uyôughyôughmbaakaav mba zendan ityô vea yuhwa se ikyáv nena?
9 U tesen ikyav yô, kwagh gba ior i tar ne kpishi u nôngon ér vea za iti shi vea lu mbanyarev shi vea er ugurgurmbaakaav shi vea zende vea nenge tar shi vea zenda uyôughyôughmbaakaav mbagen ityô, akaa ne cii aa fatyô u vihin mbamhen asev. (1 Yohane 2:15–17) Mbakristu mbagen sha derianyom u hiihii la yange ve zenda uyôughyôughmbaakaav ityô nahan ve na uma tsoghul ve tsung. Apostoli Paulu kaa wener: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe. Gadia mishe u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.”—1 Timoteu 6:9, 10.
10. Injakwagh i Yesu ôr sha kwagh u or u tan ivor la tese se nyi sha kwagh u zendan uyôughyôughmbaakaav ityôô?
10 Aluer se nenge ser se mba vôron shi iyol ngi kpen se u eren Aôndo tom yô, alaghga tsô, se wa ityough u keren uyôughyôughmbaakaav ve ve lu tagher se u taver ken jijingi ye shinii? Injakwagh i Yesu ôr sha kwagh u or u tan ivor la tese ér kwagh a fatyô u eren nahan kpôô. Yesu tôô “anzughul a tar ne a nyian ishima kua icugh i inyar man asaren a sha akaa agen” kar sha usaa mba ka ve ‘imbishi’ vor u mkaanem ma Aôndo ma i lee ken asema ase la. (Marku 4:18, 19) Nahan Bibilo wa se kwagh ér: “Inyaregh ki saren ki̱ de luun ken uma wen ga. Kwagh u ne lu a mi yô, a̱ kuma ne, gadia A kaa er: Mayange Me undu u ga, Me kende u kpaa ga.”—Mbaheberu 13:5.
11. Se er nan ve se de u eren akaa a a na se vôr laa?
11 Ashighe agen yô, kwagh u ka a na ve uma a taver se yô, ka i lu sha ci u se mba ombon uyôughyôughmbaakaav seer yum keng ga, kpa ka i lu kwagh u se lu eren a akaa a se vande lun a mi la. Alaghga mbagenev vea ure tsung sha ci u ma icôron uange ngi zan ve iyol, shin sha ci u ior vev mba doon ve ishima sar ku, shin mbamzeyol mbagen mba vihin tsung ta sha ve. Nahan yô, ve nenge ér doo u vea zer nyôôso akaa a ve eren la. Nom ugen vea kwase na ve nenge ér doo u vea de u eren akaa agen a ve eren sha ian ve i memen la, shi vea de u eren akaa agen a ve nenge ér nga hange hange ga yô. Tsô ve tôv sha akaa a ve lu a mi la vighe vighe nahan ve kura ikyav mbi ve eren akaa a a lu ve hange hange ga la cii ve koso. Se kpaa doo u hanma shighe yô, se gbidyen kwar sha aeren ase man akaa a se lu a mi la, nahan se de u eren akaa a se nenge ser nga hange hange ga la sha er aa na se vôr shin se yina ishima kpaa ga yô.
Doo u Se Eren Kwagh sha Kwaghfan man Akuma Akuma Kpaa
12. Kanyi i gbe u se fa sha kwagh u aferakaa ase?
12 Aluer se mba eren aferakaa a lu sha akaa a kiriki je kpaa yô, kwagh ne una na uma a tsoghul se. Mkaanem ma Davidi ôr ne ma mimi, á kaa wener: “Gadia aferakaa am cirim, yisa, a yuhwam a hembam, er ikav mbi yuhwan yum yô.” (Pasalmi 38:4) Aluer se mba sôron aeren a ase sha ashighe ashighe yô, se fatyô u heghem ikyáv mbi se tee mbi yoho se la.
13. U eren kwagh sha kwaghfan una wase se u lun a mnenge u vough sha tom wase u pasen kwagh la nena?
13 Bibilo wa se kwagh ér se lu a “kwaghfan u mimi” man “m-er u sha inja.” (Anzaakaa 3:21, 22) Bibilo kaa ér “kwaghfan u a dugh Sha yô, hiihii ka u . . . sar sar.” (Yakobu 3:17) Mbagenev na ayol a ve ican tsung sha u nôngon ér vea er tom u Mbakristu sha indi tom i mbagenev. Nahan kpa, Bibilo wa se kwagh ér: “Hanma or nana̱ kar tom u nan iyol i nan, ka nahan man nana lu a ityôikaa i tan ihagh ken iyol i nan tseegh, á kera lu sha kwagh u orgen ga ye. Gadia hanma or nana va tôô ikav mbi nan iyol i nan je.” (Mbagalatia 6:4, 5) Shin er ikyav i dedoo i anmgbianev asev mba ken Kristu ia taver se ishima se hemba civir Yehova a ishima i môm nahan kpa, aluer se mba eren kwagh sha mkav man sha kwaghfan yô, kwagh ne una wase se se na ishima sha akaa a se fatyô u eren, a á lu sha tahav asev vough man mbamlu asev kpaa yô.
14, 15. Se kure mbamgbe asev mba sha iyol man mba ken ishima la sha kwaghfan nena?
14 Aluer se mba eren kwagh sha kwaghfan sha akaa a i lu inja er nga hange hange ga la kpaa, kwagh ne una wase se se kera vôr ga. U tesen ikyav yô, se mba eren akaa a injaa a a na ve iyol ia seer taver se a taver kpa? Nenge ase kwagh u nom ugen vea kwase na ne, mba eren tom ken afishi agen a nengen sha gbaatom a Mbashiada mba Yehova. Ve kav er u eren kwagh sha kwaghfan la a wase ve u eren tom vôron yum ga yô. Kwase na kaa wener: “Ka sea lu a ityom i eren ave kpishi kpa, se nôngo se yav sha shighe u se ver ser se yaven la keng. Shi se mba eren anumbe hanma shighe. Kwagh ne wase se kpen kpen. Se fa akaa a se fetyô u eren man a se fetyô u eren ga la, nahan se mba eren kwagh ken ijoughave. Se mba tee ayol a ase se mba kar sha ior mba i lu inja er mba eren tom mba ver ga la ga.” Se mba ye kwaghyan u injaa hanma shighe shi se mba memen tsembelee kpa? Shi se mba yaven sha shighe vough kpa? Aluer se mba veren ishima sha iyol yase sha inja yô, kwagh ne una pande iyolkpen man mvôr u ken jijingi kpaa.
15 Se mbagenev mbamzeyol asev kaha kposo a ior mbagenev. U tesen ikyav yô, anmgbian u kwase ugen ken Kristu er tom u pasen kwagh hanma shighe la ken ican tsung. Ubombauangev ta sha a na kposo kposo, kua ikyansa kpa sha mi. Kanyi i wase un u wan ishima a mbamzeyol mba vihin tsung mbana? Á kaa wener: “Ka m soo mer me lu tswen me tema ving sha er a pever mo iyol yô. Zum u ka a tumem iyol shi a vôrom iyol kpishi yô, i sarem tsung u keren ijiir i kundunyol teman her ving sha er me ôr takerada shi me mem yô.” Aluer se mba eren kwagh sha kwaghfan man mkav yô, kwagh ne una wase se se fa mbamgbe asev man gbenda u se kar sha mi ve se kure ve, sha er se vôr ken jijingi ga yô.
Yehova Ne Se Agee
16, 17. (a) Er nan ve i gbe hange hange u se wan ikyo sha mkpeyol wase u ken jijingii? (b) Kanyi igen kpaa i gbe u se eren ayange ayange?
16 Hemba kan hange hange u se ver ishima sha mkpeyol wase u ken jijingi la cii. Aluer se ya ikyar a Yehova Aôndo yô, sea vôr kpa mayange je se vôr u civir un ga. Yehova “ka A na or u nan ver la agee, man A seer or u nan taver ga la agee.” (Yesaia 40:28, 29) Apostoli Paulu iyol na nenge er Aôndo na un agee yô, nahan á kaa wener: “Asema kera nga yinan se ga; shin er or wase u ken won ne lu vihin kera kpaa, or wase u kimi ne mba gem un hegh ayange ayange.”—2 Mbakorinte 4:16.
17 Ver ase ishima sha ishember i “ayange ayange” ne. Kwagh ne tese ér gba u se ngohol kwaghwan u Yehova a we se la ayange ayange. Kwase mishen ugen er tom u mishen anyom 43; ashighe agen yange iyol i kpe un shi a ure kpaa. Kpa mayange je yina ishima ga. Á kaa wener: “Yange m nôngo hingir ikye yam i nderen sha use eren msen hen Yehova shi ôron Mkaanem nam cii kôron ma nyityô tom ave ye. Er m eren nahan hanma shighe yô, kwagh ne wasem u wan ishima zan zan hegen.” Se kpaa aluer se mba eren msen hen Yehova hanma shighe shi gbidyen kwar sha aeren a na a vesen man uityendezwa nav yô, se fatyô u suur sha tahav nav ser a̱ wase se.
18. Ka ishimataver i nyi Bibilo i taver mba ve lu civir Aôndo sha jighjigh mba ve beeyol shi ve lu uange laa?
18 U eren msen hanma shighe la una wase mbabeenyol man mba angev mbu ne i tum ve iyol kpishi la. Alaghga ve mban vea vôr ken ishima sha ci u mba karen mlu ve u hegen sha mlu ve u ngise la, ka sha ci u mba tôôn iyol ve karen sha mbagenev keng ga. U se fan ser Yehova we mbaganden ikyo la ka kwagh u taver se ishima kpen kpen! Bibilo kaa ér: “Ivu ka tsar u sha ityou u icivirigh, mba zuan a i sha gbenda u perapera.” (Anzaakaa 16:31) Yehova fa mbamyen asev, nahan kpa doo un kpishi er se lu civir un a ishima i môm shin er se yen nahan. Shi Aôndo koso ityom i dedoo i se lu eren la ken ishima na gbekeke. Ruamabera taver se ishima ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa.” (Mbaheberu 6:10) Doo se tsung er mbagenev ken a vese ve civir Yehova sha jighjigh upuembaanyomov imôngo hegen nahan!
De Gbe Uwer Ga
19. Aluer se mba eren akaa a dedoo a ior yô, se zua a iwasen nena?
19 Mbagenev nenge ér tom u eren kpoghuloo hanma shighe ngu panden iyolkpen. Ityom i ken jijingi kpaa, aluer se mba eren i hanma shighe yô, ia pande mvôr u ken ishima man u ken jijingi kpaa. Bibilo kaa ér: “Sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô. Nahan er se lu a ian yô, se eren nen akaa a doon a ior cii, kpa jim je yô, ka mbananjighjigh.” (Mbagalatia 6:9, 10) Ver ishima sha ishember i i̱ kaa ér “u eren akaa a dedoo” man “akaa a doon” la. Kwagh ne tese ér gba u se tema a tema ga. Aluer se mba eren akaa a dedoo a ior yô, kwagh ne una wase se se gba uwer u civir Yehova ga.
20. Aluer se soo ser se yina ishima ga yô, ka unô ior nahan se de u zenden a ve?
20 Nahan kpa aluer se mba biishi a ior mba ve we atindi a Aôndo ikyo ga shi se mba eren ityom a ve yô, ityom la ia lu se ikyav mbi yuhwan. Bibilo wa se kwagh ér: “Iwen ka kwagh u yuhwan je, waarawa kpaa yuhwa, kpa ishimavihin i ibumeor hemba akaa ahar ne cii.” (Anzaakaa 27:3) Aluer se soo ser se yina ishima ga shi se vôr kpaa ga yô, se de nen u zenden a ior mba ve lu a mhen u kpeegh, mba ka ve zer keren ibo hen mbagenev shi puun mbagenev la.
21. Se taver anmgbianev asema ken tiônnongo u Kristu nena?
21 Yehova ver tiônnongo u Kristu sha u se zuan a agee ken jijingi. Mbamkombo mban ka ve bugh se aan a injaa kpishi a se taver ayol a ase asema sha akaaôron a kundunyol shi se ember a anmgbianev imôngo kpaa. (Mbaheberu 10:25) Anmgbianev mba ken tiônnongo cii ve nôngo ve ôron akaa a maan mbagenev shighe u ve lu nan mlumun shin ve lu nan kwaghôron yô. Anmgbianev mba ve lu mbatesen ken tiônnongo hemba mban sha ian i taver mbagenev asema cii. (Yesaia 32:1, 2) Aluer gba u vea taver or ishima shin vea kôôm or yô doo u vea kôôm nan sha imo i legh legh. (Mbagalatia 6:1, 2) Mdoo u mbagenev ve doo se ishima la una wase se nahan se gba uwer u civir Yehova ga.—Pasalmi 133:1, Yohane 13:35.
22. Er i mar se se yen nahan kpa, se fatyô u lun a vangertiôr ser nyi?
22 U civir Yehova ken ayange a masejime ne ka tom. Man Mbakristu kpa mba ver shi iyol ngi kpe ve shi mba tagher ishigh a mbamzeyol mba nanden ityough kpaa. Iyol yase i uumace i i yen ne taver ga er gbande u inyaagh nahan. Nahan kpa Bibilo kaa ér: “Kpa se mba a kwagh u injaa ne ken ikav mbi inyaav; nahan agee a hemban la ka a Aôndo, ka ken vese a dugh ga.” (2 Mbakorinte 4:7) Se vôr, kpa mayange je se gba nen uwer shin se yina nen ishima ga. De se ‘kaa nen a vangertiôr ser: Ter ka Orwasen se.’—Mbaheberu 13:6.
U Hiden Saven a Sav
• Ka ikyáv mbi yuhwan mbi nyi se fatyô u shirin veren inyaa?
• Se er “kwagh u doon” a anmgbianev asev Mbakristu mba se civir a ve imôngo la nena?
• Yehova ne se agee shighe u se vôr shin iyol i kpe se la nena?
[Study Questions]
[Picture on page 15]
Yesu fa wener aluer mbaapostoli nav vôr shighe naleghaa yô, ishima ia za ve iyol
[Picture on page 16]
Mbagenev de u eren akaa agen a ve eren sha shighe ve u memen a a lu hange hange ga la
[Picture on page 18]
Er se yen nahan kpa Yehova nengen mcivir u se civir un a ishima i môm la ér ka zege kwagh