Yehova Ngu ‘Garuitya Wase Sha Ashighe A Mzeyol’

Myom u mbaperapera yô, due hen TER je, ka Un a lu garutya ve sha iyange i mzeyol ye.”—PASALMI 37:39.

1, 2. (a) Yesu yange er msen sha ci u mbahenen nav ér nyi? (b) Ka awashima u nyi Aôndo a we sha ci u ior nava?

 YEHOVA hemba agee sha won cii. Ngu a tahav mbu kuran mbacivir un mba jighjigh sha gbenda u á soo cii. Ngu a tahav mbu una fatyô u paven ior nav aa tar ne veren ve hen ijiir i kundu kundu, ape bem a lu yô. Nahan cii kpa Yesu sôn Ter na u sha la sha ci u mbahenen nav wener: “M ngu eren msen Mer: Kura ve shin tar ne kera ga, kpa M ngu sônon Mer kura ve sha [or u] ifer.”—Yohane 17:15.

² Yehova wa ishima u ‘kuran se shin tar ne’ kera ga. Kpa á soo wener se lu vea ikpelaior i tar ne imôngo, se pasen ior loho na u ishimaverenkeghen man u msurshima la. (Mbaromanu 10:13–15) Kpa, er Yesu a er ken msen na la nahan, er se lu shin tar ne yô, se tagher vanger a or u “ifer.” Uumace mba hembanato man ujijingi mba aferev mbá vihin ior iyol shi mba eren ior atsan, kua Mbakristu kpa ker cii.—1 Peteru 5:9.

3. Kanyi nahan mbacivir Yehova mbajighjigh je kpa vea tagher a mini, kpa ka ishimasurun i nyi se zough a mi ken Mkaanem ma Aôndo?

³ Zum u se tagher a atsan ne yô, iyol ia fatyô u kpen se ker hen shighe la. (Anzaakaa 24:10) Bibilo ôr kwagh u mbajighjigh kpishi mba yange ve tagher a atsan yô. Orpasalmi kaa wener: “Atsan a orperapera ngee, kpa TER ka A dugh nan ken a cii.” (Pasalmi 34:19) “Orperapera” je kpa akaabo nga eren nan. Ashighe agen je yô, kwagh a er se se ‘ure, a kunda se iyol tsung’ er orpasalmi Davidi nahan. (Pasalmi 38:8) Nahan kpa, aluer se fa ser, “TER ngu ikua a mba asema a vihin ve la, yem mba ve lu a ishima i zamber” la yô kwagh ne una sur se asema kpen kpen.—Pasalmi 34:18; 94:19.

4, 5. (a) Kanyi kwagh takerada u Anzaakaa 18:10 u er ér gba kpee u se er ve Aôndo una kura se? (b) Ka igbenda i nyi jighilii i gbe u se kar sha mi ve Aôndo una wase se?

⁴ Yehova ngu kuran se er Yesu ôr ken msen u a er la nahan. Ngu “garutya [wase] sha iyange i mzeyol.” (Pasalmi 37:39) Takerada u Anzaakaa kpa ôr kwagh nahan ér: “Iti i TER ka gôgôyou u taven u taver, orperapera ka nan yevese nan ta kimi, nan war.” (Anzaakaa 18:10) Ivur ne pase mimi u vesen sha kwagh u ikyo i wan i Yehova a we akaa a á gbe a la. Aôndo kor ior hemban cii je yô mbaperapera mba ve keren un, inja er  mba yevese za yeren ken gôgôyou u taven u taver nahan.

⁵ Shighe u kwagh a tser se yô, se ker iwasen hen Yehova nena? De se time nen sha igbenda ityar i se kar sha mi ve Yehova una wase se yô. Gbenda u hiihii yô, gba u se er msen hen Ter wase u sha la. Gbenda u sha uhar yô, se er akaa a icighan jijingi na a lu tesen se la. Gbenda u sha utar yô, se dondo gbenda u Yehova a ver la sha u teman imôngo a anmgbianev asev Mbakristu mba vea wase u panden mbamzeyol asev la.

Msen Ngu a Tahav

6. Mbakristu mba mimi mba nengen msen nena?

⁶ Mbafankwagh u tweregh tsor tsor kaa a ior ér msen ka icigh ki been a ishimayinan man mtumeyol. Shin er msen u eren zulee una fatyô u panden mtumeyol mimi nahan kpa, ka msen tseegh ga amo agen a sha gbaaôndo shin iyol tiligh kpaa ia fatyô u pever mtumeyol. Mbakristu mba mimi mba tee msen ér ka kwagh u una na a lu ve ken ishima guda tsô ga. Se Mbakristu se tôô msen ser ka gbenda u civirigh u lamen a Orgbanakaa. Msen ka gbenda u civir Aôndo shi tesen ser se suur hen a na vangertiôr. Sha mimi yô, msen ka vegher u mcivir wase.

7. Inja i u eren msen vangertiôr ér nyi, man msen u eren nahan ne ka a wase se u wan ishima a mtumeyol nena?

⁷ Aluer se mba eren msen yô, gba u se lu a vangertiôr shin se suur hen Yehova ser una ungwa msen la. Apostoli Yohane nger kwagh wener: “Ka vangertiôr wase u se lu a mi sha ishigh Nagh ne: ka sea sôn nyityô kwagh u a lu sha ishima Na vough yô, A ungwa se.” (1 Yohane 5:14) Sha mimi yô, Yehova, Uhembansha, un u a lu Aôndo uhembanagee la keghen ato sha mbamsen mba mbacivir un ve eren hen a na a ishima i môm la. Aluer se fa ser Aôndo u dooshima ongo mbamsen asev zum u se er un akaa a nyian se ishima man mbamzeyol asev yô, kwagh ne una taver se ishima kpen kpen.—Mbafilipi 4:6.

8. Er nan ve i doo u mayange je kunya ua kôr Mbakristu mba jighjigh shin vea nenge ér ve kuma u eren msen hen Yehova ga ze ga?

⁸ Mayange je kunya u de ker Mbakristu mba jighjigh u eren msen hen Yehova ga, shi ve de nengen ér ve kuma u eren msen hen a na ga ze, shin ve de te akperan shighe u ve lu eren msen hen a na kpaa ga. Sha mimi yô, shighe u se kera fe kwagh u se lu sha mi jighilii ga, shin se nenge ser mbamzeyol ta sha vese yum yô, alaghga se kera taver ishima u eren msen hen Yehova hanma shighe ga. Sha ashighe la nahan doo u se umbur ser Yehova ka á “zungwe mba Nav mba ve ye ican la mhôônom,” shi “A sur se ishima” kpaa. (Yesaia 49:13; 2 Mbakorinte 7:6) Ka shighe u se lu ken mzeyol shi ican i tser se la je i hembe lun shighe u injaa u i gbe u se suur sha Ter wase u sha la a vangertiôr ye.

9. Jighjigh u nan ka a wase se sha gbenda u se eren msen hen Aôndo la nena?

 ⁹ Gba u se lu a jighjigh u nan u mimi keng ve se zua a injar mgbeghaa sha msen u eren ye. Bibilo kaa ér, “or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.” (Mbaheberu 11:6) Jighjigh u nan saa sha u se fan di tsô ser Aôndo “ngu” tseegh ga. Jighjigh u nan u mimi yô ka u se fan dedoo ser Aôndo ngu a tahav shi sar un u nan se injar sha m-ongo u se ongo imo na la. “Ashe a Ter yô, nga sha mbaperapera shi veren ato sha zamber ve kpaa.” (1 Peteru 3:12) U fan dedoo ser Yehova we se ikyo la una na se hemba eren msen sha gbenda u injaa cii.

10. Aluer se soo ser Yehova a na se agee ken jijingi yô, gba u se eren mbamsen asev nena?

¹⁰ Yehova ongo mbamsen mba se eren hen a na a ishima i môm la. Orpasalmi nger wener: “M yila a ishima yam cii, ungwam TERE! Me kuran akaawan a Ou la.” (Pasalmi 119:145) Se mba eren mbamsen sha imanger shin a asema ahar er mbamsen mba ukwaghaôndo kpishi ve eren sha ashighe a uiniongo mbaaduav vev nahan la ga. Aluer se mba eren msen hen Yehova a ‘ishima yase i môm’ yô, se ôr un akaa a injaa shi se ôr akaa a kwagh a gbe se sha mi la kpaa. Shighe u se er msen a ishima i môm se “haa akaa a zan [se] iyol cii sha TER” yô, se hii u zuan a mpeveryol. Gadia er Bibilo i tende zwa a vese nahan, “una taver” se.—Pasalmi 55:22; 1 Peteru 5:6, 7.

Icighan Jijingi u Aôndo Wasen Se

11. Ka sea gba uwer ga, sea za hemen u ‘sônon’ Yehova ser a wase se yô, ka sha nyi gbenda nahan ka a wase se?

¹¹ Yehova ongo mbamsen asev tseegh ga kpa eren kwagh sha mi kpaa. (Pasalmi 65:2) Davidi nger wener: “Sha iyange i ican i tserem yô, me yila U, gadia Ú ungwam.” (Pasalmi 86:7) Yesu kpaa taver mbadondon nav ishima wener ve de gbe uwer u ‘sônon’ Yehova iwasen ga, gadia ‘Ter u A lu Sha’ la una “na mba ve sen Un la Icighan Jijingi” na. (Luka 11:9–13) Sha mimi yô, tahav mbu tomov mbu Aôndo ka mbu wase ior mba Aôndo shi mbu sur ve asema kpaa.—Yohane 14:16.

12. Aluer ka inja er mbamzeyol ta sha vese gande yô, icighan jijingi u Aôndo una wase se nena?

¹² Shighe u se tagher ishigh a mbamzeyol je kpaa, jijingi u Aôndo una na se “agee a hemban.” (2 Mbakorinte 4:7) Apostoli Paulu yange wa ishima a mbamzeyol mba taver tsung, nahan á ôr a vangertiôr wener: “M ngu a agee a eren akaa cii je ken Un u A taver mo ne.” (Mbafilipi 4:13) Nyian kpaa Aôndo ungwa mbamsen mba Mbakristu kpishi ve sen agee hen a na la nahan a na ve agee ve hide ve taver ken jijingi shi ve zua a ishimataver kpaa. Ashighe kpishi icighan jijingi u Aôndo ka una na se agee yô, mbamzeyol mba taver mba ve cinge sha vese la ve pande. Sha ci u agee a Aôndo a ne se ne yô, se kpaa se ôr ier i apostoli Paulu nahan ser: “Mba eren se ican sha hanma ian kpa i her se a her ga. Lan se ishima cii kpa se hunde ishima kera ga. Mba tôvon se a ican nahan kpaa i ta se kera ga. Mba kôron se tan inya, kpa i wua se ga.”—2 Mbakorinte 4:8, 9.

13, 14. (a) Yehova tese ér un ngu garutya wase sha Mkaanem nam ma a ne i nger la nena? (b) U eren sha atindiakaa a Bibilo la wase ú nena?

¹³ Icighan jijingi u Aôndo shi wase ior ve nger Mkaanem ma Aôndo shi a wase mkaanem man ma her sha ci u iwasen yase. Yehova tese sha Mkaanem ma á ne i nger la wener un ngu garutya wase ken ashighe a ican nena? Gbenda môm yô, á na se kwaghfan u mimi man mkav u ken ishima. (Anzaakaa 3:21–24) Bibilo ka i tsaase mbamhen asev man mkav wase u ken ishima la. (Mbaromanu 12:1) Aluer se mba ôron Mkaanem ma Aôndo hanma shighe shi se mba timen sha ma shi eren sha kwagh u se lu henen la yô, ma a tsaase ‘mkav wase u ken ishima’ nahan a ‘hoghor se u paven kwagh u dedoo a kwagh u bo.’ (Mbaheberu 5:14) Alaghga we iyol you ú nenge er shighe u ú lu ken ican yô atindiakaa a Bibilo wase ú u eren mhen sha inja tsuan kwagh u ú soo u eren yô. Bibilo na se mfe u una wase se u keren gbenda u se sôr mbamzeyol mba vihin tsung mba se tagher a mi la yô.—Anzaakaa 1:4.

 ¹⁴ Mkaanem ma Aôndo shi ma a kwagh ugen u una na se agee yô—ka ishimaverenkeghen i myom je la. (Mbaromanu 15:4) Bibilo kaa ér akaabo aa za hemen u eren gbem ga. Nyityô ican i se lu yan hegen cii a va kar a i kera. (2 Mbakorinte 4:16–18) Se mba a “ishimaveren keghen [i] uma u tsôron, u Aôndo u A eren aie ga la, A tôndo zwa je er shighe lu a lu ga la.” (Titu 1:2) Aluer se mba ember sha ishimaverenkeghen la, shi se zer umbur mlu u dedoo u ken hemen u Yehova a tende zwa la yô, se fatyô u wan ishima ken ican.—Mbaromanu 12:12; 1 Mbatesalonika 1:3.

Tiônnongo Ka Ikyav i Dooshima u Aôndo hen A Vese

15. Mbakristu vea wase ayol a ve nena?

¹⁵ Kwagh ugen u Yehova a er sha u wasen se ken ashighe a ican yô, ka mzough u anmgbianev u ka se ember ken tiônnongo u Kristu la. Bibilo kaa ér: “Huror yô, lu a dooshima gbem, man shi i mar anmgbian sha ci u ayange a ican.” (Anzaakaa 17:17) Mkaanem ma Aôndo taver mba ken tiônnongo cii asema ér ve nan mbagenev icivir shi ve lu a dooshima ayol a ve. (Mbaromanu 12:10) Apostoli Paulu nger wener: “Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.” (1 Mbakorinte 10:24) Aluer se fa kwagh ne nahan yô, una wase se se ver ishima sha atsan a ase tseegh ga kpa se ver ishima sha mbamgbe mba mbagenev kpaa. Aluer se mba wasen mbagenev yô, ka ve tseegh vea zua a mtsera ga, se kpa se zua a msaanyol man mkom u una na se hemba wan ishima a mbamzeyol asev yô.—Aerenakaa 20:35.

16. Mbakristu vea taver asema ayol a ve nena?

¹⁶ Anmgbianev mba nomso man mba kasev mba ve vie ken jijingi kpaa vea fatyô u taver mbagenev asema. Gba u vea lu ior mba í taver mbagenev u van hen ve ga, man mba ve we iyol ve keghen a kegh u wasen mbagenev ve vea taver mbagenev asema ye. (2 Mbakorinte 6:11–13) Mba ken tiônnongo ka vea wuese igyumior shi vea taver ior mba hev asema shi vea taver anmgbianev mba ve ver la asema yô, kwagh ne ka a wase tiônnongo cii. (Mbaromanu 15:7) Mdoo u anmgbianev doon se ishima la kpaa una yange se u keren ibo hen mbagenev. Se kôr iyol yase tsaha u kaan a mbagenev ser mtaver u ve tagher a mi la ka ikyav i tesen ér ve vôr ken jijingi la. Paulu wa Mbakristu kwagh sha inja nahan ér, “taver nen mba ve yen ishima la asema.” (1 Mbatesalonika 5:14) Bibilo kaa ér Mbakristu mba jighjigh je kpaa ican tseren ve.—Aerenakaa 14:15.

17. Ka aan a nyi se lu a mi a se taver anmgbianev Mbakristu asema?

¹⁷ Mbamkombo Mbakristu bugh se aan a injaa a surun mbagenev asema shi taver ve asema kpaa. (Mbaheberu 10:24, 25) Nahan kpa, ka ken mbamkombo mba tiônnongo tseegh se  kumba a anmgbianev shi se lam a ve sar sar ga. Ior mba Aôndo mba ser aan agen kpaa mba veren a vea kumba aniniongo u daalaa vea ember imôngo yô. Nahan zum u se tagher ishigh a mbamzeyol mba vihin tsung yô, se fatyô u wasen ayol a ase sha ci u se vande mban ken mzough kangenaa. Apostoli Paulu nger ér: “Mpav a̱ de lu sha iyol ga . . . , kpa alegh a̱ waan ayol a a iko vough vough cii. Aluer ican ngi eren ilyeghegh i môm yô, alegh cii aa lu ken ican la imôngo. Aluer a civir ilyeghegh i môm yô, a cii, aa ember imôngo.”—1 Mbakorinte 12:25, 26.

18. Ka ieren i nyi i gbe u se yànge shighe u iyol i kpe se yô?

¹⁸ Ashighe agen yô, iyol ia kpe se tsung je a gande se u kumban a anmgbianev asev Mbakristu ember a ve imôngo. Se nôngo tsung se yange imba ieren la, aluer se er nahan ga yô anmgbianev mba ve ne jighjigh a vese imôngo la vea fatyô u surun se asema shi wasen se ga. Bibilo wa se kwagh ér: “Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii.” (Anzaakaa 18:1) Anmgbianev asev mba nomso man mba kasev mba gbenda u Aôndo a tese ér un we se ikyo yô. Aluer se kav gbenda u Aôndo a er kwagh a vese sha dooshima ne yô, se zua a mpeveryol ken ashighe a ican.

Tôô Wer Hanma Kwagh Una Za a Doo

19, 20. Ruamabera wase se u palegh mbamhen mba kpeegh nena?

¹⁹ Shighe u iyol i kpe se shi se lu gbuur yô, se fatyô u lun a mbamhen mba kpeegh ken ishima. U tesen ikyav yô, shighe u ican i tser mbagenev yô, vea hii u tan akperan sha mtil ve u ken jijingi la, alaghga je yô, vea kaa ér ican i ve lu yan la ka ikyav i tesen ér Aôndo ta ve kera. Kpa umbur wer Yehova meen or môm sha “kwagh u ifer” ga. (Yakobu 1:13) Bibilo kaa ér: “Ka ishima [i Aôndo] u eren ônov mba iorov ican man u vihin ve ishima kpaa ga.” (Ukwelegh 3:33) Ishima ka i vihi Yehova tsung zum u mbacivir un ve lu yan ican yô.—Yesaia 63:8, 9; Sekaria 2:8.

²⁰ Yehova “ka Ter u A lu a mhôônom ma zungwen man ka Aôndo u A lu a ishimasurun cii.” (2 Mbakorinte 1:3) We se ikyo, shi shighe á va kuma vough yô una kende a vese sha. (1 Peteru 5:6, 7) Aluer se fa dedoo ser se doo Aôndo ishima yô kwagh ne una wase se se tôô ken ishima ser hanma kwagh wase cii una za a doo, shi se ember kpaa. Yakobu nger wener: “Anmgbianev av, i̱ lu ne kwagh u iember tseegh shighe u ameen atô kposo kposo aa va tser ne yô.” (Yakobu 1:2) Er nan ve i gbe u se embere? Á na mlumun wener: “Gadia zum u nana kar ikaren i i lu karen nan la yô, nana ngohol tsar u uma u A tende zwa sha mi a mba A doo ve ishima” la.—Yakobu 1:12.

21. Nyityô ican i se lu yan cii, ka ibumun i nyi Yehova a ne mba ve civir un sha jighjigh dông laa?

²¹ Yesu vande wan se kwagh ér ican ia er se shin tar. (Yohane 16:33) Kpa Bibilo tôndo zwa ér nyityô “ican shin ishima i nyian shin mtev u sha ican” cii ia pav se a dooshima u Yehova man u Wan na ga. (Mbaromanu 8:35, 39) Mfe u se fe ser nyityô ican i se tagher a mi cii ka hira la ka kwagh u taver se ishima kpen kpen! Er hegen se lu veren ashe gbenda a shighe u a va kar a atsan a uumace ve lu yan ne kera cii nahan, Yehova Ter wase u dooshima ngu kuran se. Aluer se gema hen Yehova ser a kura se yô, una ‘hingir ijiir yase i yeren sha ci u se mba i kighir se a ican yô, ijiir i yeren sha ayange a ican i tsung la.’—Pasalmi 9:9.

Se Hen Nyi Kwagh?

• Er Mbakristu ve lu ken bo tar ne di tsô yô kanyi nahan ve ver ishima ér vea tagher a mini?

• U se eren mbamsen kpoghuloo la una wase se shighe u se tagher a atsan nena?

• Jijingi u Aôndo ka a wase se sha nyi gbenda?

• Kanyi se er ve se wase mbageneve?

[Study Questions]

[Picture on page 10]

Gba kpee u se ker Yehova inja er se mba yevese za tan ken gôgôyou u taven u taver nahan

[Pictures on page 12]

Anmgbianev mba ve vie ken jijingi mba wuese mbagenev shi mba taver ve asema sha hanma ian cii