Saan Mbatomov Mba Yehova Iyol
Saan Mbatomov Mba Yehova Iyol
“Saan mba ve lu mbaibanave ken jijingi la iyol.”—MATEU 5:3.
1. Kanyi i lu msaanyol u mimi, man msaanyol ne tese se ér nyi?
MSAANYOL u ior mba Yehova ve lu a mi la doo ve ishima kpen kpen. Orpasalmi Davidi, ngise yôô wener: “Saan ior mba TER A lu Aôndo ve la, iyol.” (Pasalmi 144:15) Msaanyol ka mkpeyol u ken ishima. Zum u ka sea fa ser, iveren i Yehova ngi sha a vese yô, ka í hemba saan se iyol cii—ka í saan se iyol je í kôr se ken atô ishima. (Anzaakaa 10:22) Imba msaanyol ne ngu a tese ér se ya ikyar a Ter wase u sha la kôôsôô, shi se mba eren ishima na kpaa. (Pasalmi 112:1; 119:1, 2) Kwagh er doo yô, Yesu ngise tér atôakyaa ataankaranyiin a nan se msaanyol. Se lu timen sha akaa a nan se msaanyol ne ken kwaghhenen ne kua u dondon la kpaa, nahan se kav er se zua a msaanyol kpishi aluer se civir Yehova, “Aôndo u i wuese” shin u saan saan la sha jighjigh yô.—1 Timoteu 1:11.
U Kaven Ibanave Yase i̱ ken Jijingi La
2. Ka hanma shighe Yesu ôr kwagh u msaanyolo, man kanyi kwagh yange hii tesenee?
2 Ken inyom i 31 S.W. la, Yesu ôr kwaghôron u hemban cii, u i gbe tar je or lu a vande ôron ga yô. Í yila kwaghôron ne ér ka Ityesen i sha Uwo, gadia Yesu na kwaghôron ne hen kpe uwoogh, ikyua a Zegemnger u Galilia la. Ivangeli i Mateu pase ér: ‘Tsô [Yesu] nengen a ikpelaior yô, A unde sha uwo; tem sha her yô, mbahenen Nav va her a Na. Tsô A bugh zwa Na, A gba tesen ve, kaan er: Saan mba ve lu mbaibanave ken jijingi la iyol, gadia tartor u Sha ka u ve je.’—Mateu 5:1–3.
3. Iyol i hiden a mi ijime ngi ve a msaanyol nena?
3 Yesu pase ken Ityesen na i sha Uwo la wener aluer or kav ibanave i nan i ken jijingi la yô, a saan nan iyol a hemba cii. Mbakristu mba hiden a iyol ijime, fa doo doo er ve lu mbaasorabo yô, ka nahan ve ka ve zamber a Yehova ér a̱ de ve asorabo ve sha ci u naagh ku ipaan ku Kristu na sha ci ve la ye. (1 Yohane 1:9) Kwagh ne ngu a na ve bemshima man msaanyol u mimi. “Saan or u i de nan kwaghbo u nan la iyol, man i cir isholibo i nan kpaa” la.—Pasalmi 32:1; 119:165.
4. (a) Ka sha nyi igbenda nahan se tese ser se kav ibanave yase i̱ ken jijingi man i̱ mbagenev kpaa? (b) Kanyi ka i na ve i hemba saan se iyol zum u se lu mbaibanave ken jijingi yôô?
4 Aluer se kav er se lu mbaibanave ken jijingi yô, kwagh ne una na yô se ôron Bibilo ayange ayange, sha er kwaghyan u ken jijingi u “wanakiriki u jighjigh man u fan kwagh” a ne se “sha ashighe ashighe” la una lu se a iwasen yô, shi se zaan mbamkombo mba Kristu nduuruu kpaa. (Mateu 24:45; Pasalmi 1:1, 2; 119:111; Mbaheberu 10:25) Aluer mbawanndor a vese doo se ishima yô, kwagh ne una wase se se kav ibanave i ken jijingi i mbagenev, shi una tuur se se ôr ior loho u dedoo u Tartor sha gbashima, shi se tese ve kpaa. (Marku 13:10; Mbaromanu 1:14–16) Ka sea pasen mbagenev mimi u a lu ken Bibilo la yô se zua a msaanyol. (Aerenakaa 20:20, 35) Zum u ka sea gbidye kwar sha kwagh u ishimaverenkeghen i dedoo i Tartor man averen a ua va a mi la kpaa yô, ka i hemba saan se iyol cii. Mbakristu mba i shigh ve mkurem mba ve lu “anikumuile u kpeghee” la vea ngohol uma u tsôron sha, nahan vea lu ken gomoti u Tartor u sha ikyev i Yesu la. (Luka 12:32; 1 Mbakorinte 15:50, 54) Gema “iyôngo igen” la yô, ia zua a uma u tsôron ken paradiso shin tar sha ikyev i gomoti u Tartor la.—Yohane 10:16; Pasalmi 37:11; Mateu 25:34, 46.
Gbenda u mba Ve Zungu Vea Zua a Msaanyol Yô
5. (a) Ikyav i ishemberkwaghôron i “mba ve zungu la” ér nyi? (b) Ka í sur ve mba shon mba ve zungu la asema nena?
5 Mkaanem ma gen ma dondon ma Yesu á pase se er se zua a msaanyol la ma inja er ma nyiman iyol í ma nahan. Á kaa ér: ‘Saan mba ve zungu la iyol, gadia á sur ve asema.’ (Mateu 5:4) Aluer or ngu zungwen nahan, a saan nan iyol inja nena? Doo u se time se fa ijungwen shon i Yesu á er kwagh u í ne, ka nahan man se kav kwaghôron na ne ye. Orhenen Yakobu pase wener mlu wase u isholibo la a̱ lu se ityôkyaa i zungwen. Á nger ér: “Wanger nen ave a en, ne mbaasorabo, man shi kile nen asema a en, ne mba asema a lu ne ahar ne. Lu nen kusususu, zungwe nen, vaa nen. Ahan a en la a̱ gema a̱ hingir ijungwen, iember yen kpaa, i̱ hingir iuren. Hire nen ayol a en ijime sha ishigh ki Ter man Una kende ne sha ye.” (Yakobu 4:8–10) Mba asema a vihi ve ker sha mimi sha ci u asorabo a ve la, ka ve zua a ishimasurun zum u ka vea fa ér aluer ve na naagh ku ipaan ku Kristu la jighjigh, shi ve gema asema sha mimi, mba eren ishima i Yehova yô, a de ve asorabo ve yô. (Yohane 3:16; 2 Mbakorinte 7:9, 10) Ka vea er nahan yô ve ya ikyar i dedoo a Yehova shi ve lu a ishimaveren i lun uma gbem, civir un shi wuese un kpaa. Kwagh ne ngu a na í saan ve iyol tsung.—Mbaromanu 4:7, 8.
6. Ka sha nyi gbenda nahan mbagenev ve lu zungwenee, man mba surun ve asema nena?
6 Mkaanem ma Yesu man ma wa mba ve zungu sha ci u akaa a hôngorough a a dumbur shin tar la ker. Yesu tôô kwaghôron u profeti u ken Yesaia 61:1, 2 la kar sha iyol na; kwaghôron ne kaa ér: “Jijingi u Ter AÔNDO ngu sha a Mo, sha ci u TER shighem mkurem; A verem er M̱ sur mba asema a vihi ve la asema, . . . mba ve zungu cii, M̱ sur ve asema.” Iniezwa ne ngi sha ci u Mbakristu mba i shigh ve mkurem, mba ve lu shin tar ne her la kpaa, ve mba ve lu eren sha iniezwa ne sha iwasen i “iyôngo igen” i í lu akar a ve la. Ve cica cii mba eren tom u sha injakwagh, ú veren ikyav sha atsul a “ior mba ve lu a asema a shirin man ve vaa sha ci u akaa a ndôhôrshima a i eren ken [Yerusalem u á vende mimi, u Mbakristu mbaaiev ve til sha ityough nagh la] cii.” (Esekiel 9:4) Mba surun ve mba ve lu zungwen mban cii asema sha “Loho u Dedoo u tartor” u í lu ôron ve la. (Mateu 24:14) Saan ve iyol kpishi u fan ér ica a gba ga tsô a kar a tar u ifer u Satan ne kera, a gema a ver tar u he u Yehova u perapera la.
Saan mba Ve Lu a Ishima i Legh Legh la Iyol
7. Ishember i “ishima i legh legh” la i̱ tese ér nyi ga?
7 Yesu za hemen a Ityesen na i sha Uwo la, á kaa wener: ‘Saan mba ve lu a ishima i legh legh la iyol, gadia tar ua lu dyako ve je.’ (Mateu 5:5) Ashighe agen ior ka ve hen ér aluer or ngu ishima legh legh yô, nan tsoghul ishima ga. Kpa ka nahan ga. Er or u timen ken Bibilo ugen lu pasen inja i ishemberti i í gem ér “ishima i legh legh” ne yô, á kaa wener: “Or u lun [ishima legh legh] ka or u kôron iyol tsaha kpoghuloo, ka ieren i nan i vesen je la. Aluer or ngu ishima legh legh yô, kwagh ne tese ér nan ndôhôr dem dem, nan ngu or u taver ishima sha kwagh ga ze, shin nan ngu or u gban lun shong tsô ga. Ishima i legh legh ka tahav mbu or a fatyô u kôôm mbu yô.” Yesu ôr kwagh u mlu na, wener: “M ngu ishima legh legh, man M kehen ityough kpaa ga.” (Mateu 11:29) Er Yesu lu ishima legh legh nahan kpa, ôron kwagh u atindiakaa a perapera sha ishimataver.—Mateu 21:12, 13; 23:13–33.
8. Ishima i legh legh zua kôôsôô a nyi kwagha, man er nan ve i gbe u se lu a ieren ne ken ikyaryan yase a mbageneve?
8 Nahan yô, ishima i legh legh zua kôôsôô a iyolkôrontsaha. Ka nahan ve zum u apostoli Paulu ôr kwagh u “ityamegh ki Jijingi” yô, á ter ishima i legh legh man u kôron iyol tsaha ijiir i môm ye. (Mbagalatia 5:22, 23) Ka sha iwasen i icighan jijingi se fatyô u maan ieren i ishima i legh legh la ken a vese ye. Ieren ne ka i Orkristu i̱ ka i̱ na se lu ken bem a mba ken tiônnongo kua mba ve ne jighjigh a vese imôngo ga la kpaa cii. Paulu nger wener: “Haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan . . . Waan nen ishima a ayol a en, deen nen ayol a en kwaghbo.”—Mbakolose 3:12, 13.
9. (a) Er nan ve u lun ishima legh legh la i saa sha ieren yase a ior mbagenev tseegh ga? (b) Mbaasemaleghlegh “vea ya dyako u tar” nena?
9 Kpa, ishima i legh legh saa sha ieren yase a uumace mbagenev tseegh ga. Ka sea kar a ishima yase sea wa ayol a ase sha ikyev i hementor u Yehova yô, se lu tesen ser se mba ishima legh legh. Ka Yesu Kristu a ver ikyav i vesen sha gbaa ne ye, gadia er lu shin tar ne yô, lu ishima legh legh shi lu eren ishima i Ter na a ishima na cii. (Yohane 5:19, 30) Er i lu Yesu í ver un Tor u tar ne yô, ka un a lu or u hiihii u yan dyako u ú ye. (Pasalmi 2:6–8; Daniel 7:13, 14) Á kar iorov 144,000 mba ve lu ‘mbayandyako a na imôngo,’ mba i tsough ve “ken ior” ér ve “tema tor sha tar” la, dyako ne. (Mbaromanu 8:17; Mpase 5:9, 10; 14:1, 3, 4; Daniel 7:27) Kristu man mbateman tor a na imôngo mbara vea hemen nomso man kasev umiliôn imôngo mba lun er iyôngo nahan la; ve mban cii kwaghôron u profeti u ken pasalmi u a kaa ér: “Mbaasemaleghlegh yô, vea ya dyako u tar, á saan ve iyol sha mngee u bem” la, una kure sha ve sha gbenda u doon kpishi.—Pasalmi. 37:11; Mateu 25:33, 34, 46.
Saan mba Ijen i Ker Ve sha Kwagh u Perapera la Iyol
10. Ka sha gbenda môm u nyi nahan, “mba ijen i ker ve, man imura kpaa, sha kwagh u perapera” la vea idee?
10 Kwagh ugen u nan se msaanyol u Yesu ôr kwagh sha mi hen kpe uwoogh u Galilia yô, ka un ne: ‘Saan mba ijen i ker ve, man imura kpaa, sha kwagh u perapera la iyol, gadia vea ide.’ (Mateu 5:6) Yehova tese Mbakristu gbenda u eren perapera, ú vea dondo yô. Nahan yô, mba ijen i ker ve, man imura kpaa, sha kwagh u perapera la cii, ka sha kwagh u gbendatesen u Aôndo la je ijen i ker ve shi imura kpaa i ker ve ye. Ve mban ve fa asorabo ve doo doo, shi ve fa er ve yen kpaa yô, nahan sar ve tsung u Yehova a lumun ve. Ka vea hen Mkaanem ma Aôndo vea fa ér aluer ve gema asema, ve na naagh ku ipaan ku Kristu la jighjigh, ve zamber ér i̱ de ve asorabo ve yô, vea lu mbaperapera sha ishigh ki Aôndo, nahan í saan ve iyol je í zua ga!—Aerenakaa 2:38; 10:43; 13:38, 39; Mbaromanu 5:19.
11, 12. (a) Mbakristu mba i shigh ve mkurem la ka ve hingir mbaperapera nena? (b) Akar a mba i shigh ve mkurem, aa imura i ker ve sha kwagh u perapera la zua a mkom nena?
11 Yesu kaa ér a saan amba ne iyol, gadia “vea ide.” (Mateu 5:6) Mbakristu mba i shigh ve mkurem ér ve ‘ya tor’ a Kristu sha la, í za a ve ken “ishô i nan [shin perapera] man uma.” (Mbaromanu 5:1, 9, 16–18) Yehova ngu ter ve, á mar ve mba ônov nav mba ken jijingi. Ve hingir mbayandyako a Kristu imôngo, gadia í tsua ve mba ator man upristi ken gomoti na u sha, u Tartor la.—Yohane 3:3; 1 Peteru 2:9.
12 Kpa gema akar a mba i shigh ve mkurem la yô, mba a za a ve ken perapera man uma ga. Nahan kpa, er ve lu a jighjigh u nan sha awambe a Kristu a hee inya la yô, Yehova tôô ér mba a perapera iyol kpuaa. (Yakobu 2:22–25; Mpase 7:9, 10) Í nenge ve ér mba ahuraior a Yehova a a eren perapera yô, nahan á va yima ve shighe u “zegecan” la. (Mpase 7:14) Vea seer zuan a mkom sha imura i i ker ve sha kwagh u perapera la zum u vea lu sha ikyev i “Usha mba hev,” vea hingir vegher u tar u he u “perapera una tema ker” la.—2 Peteru 3:13; Pasalmi 37:29.
Saan mba Ve Zungu Mhôônom la Iyol
13, 14. Ka sha nyi igbenda jighilii nahan se tese ser se mba a mhôônom ma zungwene, man ka mbamtsera mba nyi nahan se zua a mini?
13 Yesu za hemen a Ityesen na i sha Uwo la, wener: ‘Saan mba ve zungu mhôônom la iyol, gadia á zungwe ve mhôônom.’ (Mateu 5:7) Sha gbaa u atindigh yô, í nenge ér mhôônom ma zungwen yô ka kunya u orjir nan lu a mi sha or u nan er kwaghbo vé nan pande mtsaha u nan la. Kpa, ken Bibilo yô, asember a í gem á ér ‘mhôônom ma zungwen’ la hemba pasen kwagh u ikyo i wan shin kunya u lun a mi sha mba i hembe ve iyol la. Nahan yô, kunya ngu ker mba ve lu a mhôônom ma zungwen la a mbagenev kpen kpen. Injakwagh i Yesu ôr kwagh u Orsamaria u nenge sha orwanndor a na la tese se ikyav i dedoo i or u yange ‘zungwe’ orgen u kwagh tser un “mhôônom” yô.—Luka 10:29–37.
14 Aluer ka se pe zuan a msaanyol u mhôônom ma zungwen ma ve a mi la yô, gba u se er akaa a dedoo a mba kwagh a tser ve la. (Mbagalatia 6:10) Kunya yange u kôr Yesu a ior mbagen mba nenge a ve yô. “Mhôônom kôr Un a ve sha ci u ve lu er iyôngo i i lu a orkuran i ga yô. Tsô A hii u tesen ve akaa kpishi.” (Marku 6:34) Yesu kav er ibanave i ken jijingi i uumace la i̱ hembe lun hange hange a nyityô kwagh igen cii yô. Se kpa se fatyô u tesen ser kunya kôr se a ior shi se mba a mhôônom ma zungwen sha u nan ve kwagh u kwagh a hembe gban ve a mi cii la—ka “Loho u Dedoo u tartor” je la. (Mateu 24:14) Shi se fatyô u wasen Mbakristu mba beenyol man kasev mba côgholov man ancôgholov, shi se “taver . . . mba ve yen ishima la asema.” (1 Mbatesalonika 5:14; Anzaakaa 12:25; Yakobu 1:27) Aluer se mba eren nahan yô, ka msaanyol tseegh se zua a mi ga, Yehova una zungwe se mhôônom a kighir sha mi.—Aerenakaa 20:35; Yakobu 2:13.
Mba Ve Lu Asema Wang shi Ve Ker Num La
15. Se er nan ve se lu a ishima i wang shi se lu mba kôron num kpaa?
15 Yesu ôr se kwagh u sha ataratar man u sha utaankaruhar u a ne or msaanyol yô, wener: ‘Saan mba ve lu asema wang la iyol, gadia vea nenge a Aôndo. Saan mba ve ker num la iyol, gadia á yila ve er, ônov mba Aôndo.’ (Mateu 5:8, 9) Ishima i wang yô ka i̱ i̱ lu wang sha aeren man sha akaa a ken jijingi kpaa la, shi or u nan lu a imba ishima ne nan civir Yehova a ishima i môm. (1 Kroniku 28:9; Pasalmi 86:11) Ken zwa Grika yô, ishember i í gem i̱ ér “mba ve ker num” la, ikyav i i̱ kpôghôô yô, ka “mba van a bem.” Mba ve ker num mbá lu ken bem a anmgbianev vev mba ken Kristu, shi ka ve nôngo sha afatyô ve cii ér vea lu ken bem a mbawanndor a ve kpaa. (Mbaromanu 12:17–21) Mba ‘keren bem mba zende un ityô’ kpaa.—1 Peteru 3:11.
16, 17. (a) Er nan ve i yer mba i shigh ve mkurem la ér “ônov mba Aôndo,” man ve “nenge a Aôndo” nena? (b) “Iyôngo igen” ngi ‘nengen a Aôndo’ nena? (c) “Iyôngo igen” ia hingir “ônov mba Aôndo” kpôô kpôô nena, man ka hanma shighee?
16 Í tôndo zwa a mba ve ker num, mba asema ve a lu wang la ér “á yila ve er, ônov mba Aôndo,” shi “vea nenge a Aôndo” kpaa. I mar Mbakristu mba i shigh ve mkurem la ken jijingi, nahan er ve lu shin tar her la je Yehova ngohol ve ve hingir ‘ônov’ nav. (Mbaromanu 8:14–17) Ka a̱ nder ve shin ku vea za lu a Kristu sha yô, ve er tom sha ishigh ki Yehova, nahan ve nenge a Na kpôô kpôô.—1 Yohane 3:1, 2; Mpase 4:9–11.
17 “Iyôngo igen” i í lu bem bem a ior mbagenev la ngi civir Yehova sha hemen u Kristu Yesu, Orkuranilev u Dedoo, u a hingir ‘Ter ve u tsôron’ la. (Yohane 10:14, 16; Yesaia 9:6) Mba vea va ya ikyaren i masetyô shighe u Hemen u Kristu u Anyom Dubu ua kure la, vea hingir ônov mba Yehova mba shin tar, nahan vea lu ken “mlu u engem u lun a ikangenev ga u ônov mba Aôndo la.” (Mbaromanu 8:21; Mpase 20:7, 9) Nahan er ve lu keghen shighe shon ne yô, mba yer Yehova ér Ter ve, gadia ve tsegha ayol a ve sha ci na, shi ve kav kpaa ér ka un a ne ve uma ye. (Yesaia 64:8) Mba ‘nengen a Aôndo’ sha ashe a jighjigh ve u nan er Yobu man Mose kpa ngise ve nenge a na sha ashe a jighjigh ve u nan nahan. (Yobu 42:5; Mbaheberu 11:27) Ve kav aeren a Yehova a kpilighyol sha “ashe a asema” a ve man sha mfe u vough u Aôndo u ve lu a mi la, nahan ve nôngo kpoghuloo mba dondon Yehova sha u eren ishima na.—Mbaefese 1:18; Mbaromanu 1:19, 20; 3 Yohane 11.
18. Akaa a ataankarahar a nan or msaanyol a Yesu a hii teren ne tese ér ka unô ve lu a msaanyol u mimi nyiana?
18 Sé nenge e̱r mba ve lu mbaibanave ken jijingi, man mba ve zungu man mba ve lu a ishima i legh legh man mba ijen i ker ve, man imura kpaa, sha kwagh u perapera la, kua mba ve zungu mhôônom man mba ve lu asema wang kua mba ve ker num kpaa la cii, ve zough a msaanyol u mimi sha u civir Yehova yô. Nahan kpa, ve mban ka ve shi tagher a ahendan kua tôvacan je kpaa. Ka vea tagher a mi nahan, i kera saan ve iyol ga shinii? Se nenge nen sha mpin ne ken kwaghhenen u una dondo ne.
U Hiden Saven a Sav
• Mba ve lu mbaibanave ken jijingi la mba zough a msaanyol nena?
• Ka sha nyi igbenda nahan í sur mba ve zungu la asema?
• Se tese ishima i legh legh nena?
• Er nan ve i doo u se lu mba zungwen mhôônom, shi se lu mba lun asema wang shi kôron num kpaa?
[Study Questions]
[Picture on page 22]
“Saan mba ve lu mbaibanave ken jijingi la iyol”
[Pictures on page 22]
“Saan mba ve zungu mhôônom la iyol”
[Picture on page 22]
“Saan mba ijen i ker ve, man imura kpaa, sha kwagh u perapera la iyol”