Í Tese Se U Pasen Kwagh Kpoghuloo
Í Tese Se U Pasen Kwagh Kpoghuloo
“Né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.”—AERENAKAA 1:8.
1, 2. Ka tom u nyi Peteru lu a mini, man ka an nan na un ú?
“YESU Ornasareti la . . . wa se kwagh er se̱ ôr nongoior la kwaghaôndo, shi se̱ pase kpaa er: Ngun ka u Aôndo ver Un Orjir u mbaumav man mbakpenev je ne.” (Aerenakaa 10:38, 42) Mkaanem man ka ma Peteru ngise ôr a Korneliu kua tsombor na sha u pasen ve tom u í na un ú lun orpasen ivangeli la.
2 Ka hanma shighe Yesu na un tom nee? A̱ shi nan kpa, Peteru lu ôron kwagh u mkaanem ma Yesu ôr shighe u í nder un shin ku, lu nôngon una kôndo á yem sha la. Yesu ôr kwagh a mbahenen nav mba jighjigh sha shighe la wener: “Né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.” (Aerenakaa 1:8) Kpa kera cii je Peteru fa wener, er un lu orhenen u Yesu yô, a gba u una ôr mbagenev kwagh u jighjigh u un ne Yesu la keng.
Í Tese Ve Kuma Er Anyom Atar Nahan
3. Ka ivande i nyi Yesu eree, man yange kaa a Peteru, Anderia kpa lu her ér vea va hingir ior mba eren nyi?
3 Yange í er Yesu batisema ken inyom i 29 S.W. la, iwer ngi kar yô, maa á za pase kwagh hen kpe Zegemnger u Galilia, ape Peteru vea anmgbian na Anderia kôron ishu la. Yange ve tsa keren ishu tugh kaka sev puaa, kpa ve kôr ma kwagh ga. Nahan cii kpa, Yesu gema kaa a Peteru wener: “Kporom hen ijiir i i ze yô, za kende ukper enev sha u kôron ishu.” Eren sha zwa u Yesu yô maa “ve kôr ikpelaishu i vesen je, ukper vev gba anden.” Peteru nengen ivande ne nahan yô, cier un iyol, kpa Yesu gema ôr kwagh a na kundu kundu kaa ér: “De cie ga, hii nyian je zan zan ken hemen kpaa ú mase kôron ior.”—Luka 5:4–10.
4. (a) Yesu yange wa mbahenen nav ago a pasen kwagh nena? (b) Tom u pasen kwagh u yange gba u mbahenen mba Yesu vea er la ua hemba ú Yesu la nena?
4 Fese nahan maa Peteru man Anderia, kua ônov mba Sebedeu, Yakobu man Yohane undu utso vev dondo sha Yesu. Ve gba zenden a Yesu imôngo sha ajiir a á lu pasen kwagh la, nahan á tese ve ivangeli i pasen, ve hingir mbapasen ivangeli. (Mateu 10:7; Marku 1:16, 18, 20, 38; Luka 4:43; 10:9) Shighe u ve lu zenden a na imôngo, lu tesen ve la va kur yô, Yesu ôr kwagh a ve sha iyange i Nisan 14, 33 S.W. la wener: “U nan nem jighjigh yô, ityom i M eren ne, nan kpaa nana er i; i i hembe ingin je kpaa nana er.” (Yohane 14:12) Lu u mbahenen mba Yesu vea pase kwagh kpoghuloo er Yesu nahan, kpa vea hemba pasen kwagh ajiir wue wue cii. Er í va ôr ve nahan, lu u vea pase “akuraior cii” kwaghaôndo zan zan “mkurtar je,” ve, kua mba vea va hingir mbahenen ken masejime la cii.—Mateu 28:19, 20.
5. Se zua a mtsera ken ityesen i Yesu tese mbadondon nav la nena?
5 Se mba ken ayange a ‘mkurtar.’ (Mateu 24:3) Ngise la mbahenen mba Yesu mba hiihii mbara lu a na imôngo, lu nengen er lu pasen ior kwagh yô, kpa se yô ka nahan ga. Kpa, aluer se ôr Bibilo se nenge gbenda u Yesu pasen ior kwagh kua akaa a á wa mbadondon nav mbara kpaa yô, se zua a mtsera sha kwagh la. (Luka 10:1–11) Nahan kpa, kwaghngeren ne una ôr se kwagh ugen u hange hange u Yesu tese mbahenen nav yô—kwagh shon yô ka u nengen tom wase u pasen kwagh la sha gbenda u vough.
Kwagh u Ior a Gba Se Ishima
6, 7. Ka ieren i Yesu i nyi yange i̱ na ve tom kwaghpasen na za kera, man se kav un sha gbenda ne nena?
6 Er nan ve kwaghpasen u Yesu yange za kera yum nahana? Ityôkyaa i môm yô, yange soo kwagh u ior kpishi shi waan ve ikyo kpaa. Orpasalmi ngise tsengaôron ér “mhôônom maa kôr [Yesu] a mbaatsanev man mbaibanave” kpaa. (Pasalmi 72:13) Sha mimi yô, kwaghôron u profeti ne kure sha a na vough. Bibilo ôr se kwagh u á er sha anshighe ugen la, ér: “Er A nenge a ikpelaior yô, mhôônom kôr Un a ve tsung, sha ci u i tumbul a ve, ve sambe wuee er iyôngo i i lu a orkuran i ga nahan.” (Mateu 9:36) Mba yange ve eren asorabo kpoghuloo je kpa kav ikyo i wan na la, nahan ve kporom ikyua a na.—Mateu 9:9–13; Luka 7:36–38; 19:1–10.
7 Aluer nyian ne kpa se mba wan ior ikyo er un kpa wa ior ikyo nahan yô, se kpa kwaghpasen wase una za kera. Nahan yô, er nan ve ú hidi ú tem ving ihyongo i ú soo u duen kwaghpasen la, ú hen a ishima you ú nenge er í hingir torough torough u ior vea ungwa loho u ú lu pasen ve la ga? Hen sha mbamzeyol mba ve lu a mi, mba í lu Tartor u Aôndo tseegh ua sôr ve la. Nahan kaa a iyol you wer, ú ôr kwagh a hanma or kundu kundu, gadia ú fa or u nana ungwa loho ne ve nana gema ishima ga. Or u ú ze wer ú pase nan kwagh la nana̱ lu eren msen kera ér or nana̱ va pasen nan kwaghaôndo kpa ú fa ga!
Dooshima A̱ Mgbegha Se
8. Kanyi i lu mgbeghan mbadondon mba Yesu ken ijime ve ve lu pasen loho u dedoo er Yesu kpa imba kwagh la i̱ mgbegha un ve er nahana?
8 Loho u dedoo u Yesu lu pasen la cii ú tese ior gbenda u vea er ishima i Yehova shi vea tsegha iti Na shi vea kende a hementor Na sha kpaa yô—man ka akaa a á hembe lun hange hange a á bende a orumace je ne. (Mateu 6:9, 10) Er Ter u Yesu doo un ishima yum yô, ishima mgbegha un ker nahan á tile sha mimi zan zan ku na, shi á pase ior kwagh u Tartor u ua nenge sha akaa shon a á hembe lun hange hange ne kpoghuloo. (Yohane 14:31) Mbadondon mba Yesu mba sha ayange ne kpaa, er ve kpa Aôndo a doo ve ishima, man i lu dooshima ne a lu mgbeghan ve yô, mba eren tom u pasen ior kwagh la sha gbashima je. Apostoli Yohane nger wener: “Ka dooshima u Aôndo ne, ka u se̱ kuran atindi a Na,” kwagh ne wa tindi u í we se ér se pase loho u dedoo shi se gema ior ve hingir mbahenen la kpa ker.—1 Yohane 5:3; Mateu 28:19, 20.
9, 10. Dugh mdoo u Aôndo a doo se ishima la kera yô, ka dooshima ugen u nyi ngu a mgbegha se u pasen ior kwagh kpoghuloo?
9 Yesu kaa a mbadondon nav wener: “Aluer Mea doo ne ishima yô, né kuran atindi Am. Or u nan lu a atindi Am, man nan we a iko kpaa yô, ka nan je, M doo nan ishima ye.” (Yohane 14:15, 21) Nahan yô, mdoo u Yesu a doo se ishima la a̱ mgbegha se se pase ior mimi shi se kura atindi a na agenegh kpaa. Zum u Yesu nder shin mbakpenev ve lu anden hen ior la, á ande hen mbahenen nav kwagen la maa á wa Peteru kwagh ér: “Koson Mo aniyôngov Av. . . . Kuran iyôngo Yam. . . . Koson iyôngo yam.” Lu nyi ia na ve Peteru una er tom nee? Yesu tese kwagh shon ken mpin u á pine Peteru ciligh ciligh la, á pine un ér: “M hemba doon we ishima a mbana? . . . M doo u ishima? . . . M doo wee?” Sha mimi yô, ka mdoo u Yesu doo Peteru ishima la na ve hingir u pasen mbagenev kwagh kpoghuloo shi keren “iyôngo” i Yesu ape i lu la shi hingir orkuran í kpaa ye.—Yohane 21:14–17.
10 Se fa Yesu kpôô kpôô nyian er Peteru fa un nahan la ga. Kpa se gema se fa kwagh u Yesu er sha ci wase cii la doo doo je. Se doo un shima kpishi, ka nahan ve yange kpe sha er una “kav mlu u kuugh sha ci u ior cii” ye, nahan se kpa asema sagher se ker kpishi sha dooshima na ne. (Mbaheberu 2:9; Yohane 15:13) Ka se ken ishima vough er Paulu kpa lu un ken ishima nahan; á nger wener: “Dooshima u Kristu ngu mgbeghan se . . . A kpe ka sha ci u ior cii sha u mba ve lu uma yô, ve̱ de kera lu uma sha ci ve ayol a ve ga, kpa i̱ lu sha ci u Un u A kpe sha ci ve shi i nder Un kpaa la.” (2 Mbakorinte 5:14, 15) Aluer se mba eren tom u i ne se ér se pase ior kwagh kpoghuloo la a asenge shio yô, se lu tesen ser dooshima u Yesu á tese se la ngu se zegekwagh, shi un kpa a doo se ishima. (1 Yohane 2:3–5) Mayange je se er nen tom u pasen kwagh la wegh wegh inja er naagh ku Yesu a ne sha ci wase la ka beer kwagh ga.—Mbaheberu 10:29.
Kwagh Môm A̱ De Danen We Ga
11, 12. Ka sha ci u nyi Yesu va shin tara, man á ver ishima sha kwagh u yange va a na shin tar la nena?
11 Yesu ngise ôr kwagh shighe u i za a na sha ishigh ki Pontiu Pilatu la, wener: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” (Yohane 18:37) Yesu de wener kwagh môm tsô a̱ danen un u pasen mimi ga. Gadia lu ishima i Aôndo sha ci na je la.
12 Satan yange kar Yesu sha kwagh ne. Yange mba eren a er Yesu batisema kera nahan maa Satan kaa a na wener una gema un a̱ hingir shagbaor u tar ne, una na un “ityartor i sha won cii kua icivir i i” kpaa. (Mateu 4:8, 9) Shighe va kar yô, Mbayuda ér vea nan un tor. (Yohane 6:15) Mbagenev nyian vea hen ér Yesu yange una lumun shagba shin tor yô, alaghga yange ma er akaa a hemban doon sha ci u orumace. Kpa Yesu ti hen nahan ga. Hemba gban un ishima u pasen ior mimi.
13, 14. (a) Ka nyi i̱ fatyô u danen Yesu sha tom na ga? (b) Er Yesu lu a kwagh ave ga nahan kpa, lu nyi kwagh gema eree?
13 Inyaregh ki keren kpaa lu kwagh ugen u Yesu de ér a̱ dan un ga yô. Ka nahan ve lu ornyar ga ye. Ya kpa lu a mi ga. Á ôr kwagh shighe ugen la wener: “Atsôngo nga a ijô, inyon i sha ngi a aya, kpa Wan u or yô, ngu ape suur ityough ga.” (Mateu 8:20) Shighe u Yesu kpe la, lu riga na u ushoja mba Roma er ishor sha mi la tseegh lu kwagh na u injaa u Bibilo i tér kwagh sha mi ye. (Yohane 19:23, 24) Nahan kwagh ne gema tese ér Yesu yange saa a saa ishe shinii? Mayange ga!
14 Kwagh u Yesu er shighe u lu uma la hemba nyityô kwagh i ornyar u wasen ior nana fatyô u eren a mbagenev cii, yem zende zende. Paulu kaa ér: “Ne fa mrumun u sha mhôôn u Ter wase Yesu Kristu la. A ngee a akaa kpa A gema A hingir Or u ibanave sha ci wen, sha u ne ne̱ gema ne̱ hingir mbanyarev sha ibanave Na la.” (2 Mbakorinte 8:9; Mbafilipi 2:5–8) Er Yesu lu a kwagh ave ga nahan kpa, á gema á bugh gbenda u mbahiden a iyol ijime vea va lu uma gbem sha won, a myen shio yô. Se wuese kwagh u á er a vese ne kpishi! Shi se ember tsung sha injar i á zough a mi sha er yange de ér kwagh môm tsô a̱ yàngè un u eren ishima i Aôndo ga yô!—Pasalmi 40:8; Aerenakaa 2:32, 33, 36.
15. Kanyi i hembe lun a inja a inyaregha?
15 Nyian ne kpa, Mbakristu mba ve lu dondon Yesu cii lumun ér inyaregh ki dan ve ga. (1 Timoteu 6:9, 10) Fan yô, ve fa er inyaregh ki ne or tem ken mkpeyol yô, kpa shi ve fa er inyaregh kia na ve uma u tsôron ga yô. Zum u Orkristu ka nana kpe yô, inyaregh ki nan lu a mi la ki kera lu nan a iwasen ga, di er Yesu kpa yange kpe ve riga na la kera lu un a iwasen ga nahan. (Orpasenkwagh 2:10, 11, 17–19; 7:12) Zum u Orkristu nan kpe yô, kwagh u ka nan lu a mi u a lu u injaa mimi yô, ka i lu ikyar i nan ye a Yehova man Yesu Kristu la.—Mateu 6:19–21; Luka 16:9.
Ahendan Yange Un Ga
16. Yesu tagher vanger a ahendan nena?
16 Ahendan yange Yesu u pasen ior mimi ga. Er fa wener tom u un lu eren shin tar la ua kure ken ku u una kpe sha u nan naagh sha ci u ior nahan kpa, á yina ishima ga cii. Paulu ôr kwagh u Yesu wener: “A taver ishima a [kon u mtsaha], A kera wa kunya iko ga sha ci u iember i i ver Un sha ishi la, A za tema sha uwegh ku yanegh ku ikônough ki Aôndo ki torough.” (Mbaheberu 12:2) Ijiir ne kaa ér Yesu “wa kunya iko ga.” Ishima za un iyol sha kwagh u mbaahendanev nengen ér un ngu la ga. Ishima na cii lu sha kwagh ugen ga, saa u eren ishima i Aôndo tseegh.
17. Ishimataver i Yesu la tese se nyi kwagha?
17 Paulu pase mtsera u ishimataver i Yesu la, maa á wa Mbakristu kwagh wener: “Ver nen ishima sha Un u A taver ishima sha imbaanyiman i mbaasorabo sha iyol Na la, sha u uma wen u ken ishima la a̱ de kera vôron ga, ishima kpaa, i̱ de yen ne ga.” (Mbaheberu 12:3) Sha mimi yô, ahendan shin tarnahan ka kwagh u nan or iyol kpen, hemban je yô nga a̱ been mayange ga yô. Shi u zeren vendan mdoom ma tar ne shighe u alaghga anngôôv asev ve lu lahan se ér se mba eren kwagh u una lu se a iwasen ga la kpa, ka kwagh u nan se iyol kpen. Kpa se ver ashe hen Yehova ser a̱ wase se er Yesu kpa ngise ver ashe hen a na nahan, shi se kange ishima gbang gbang, se ver Tartor ngu se kwagh u hiihii ken uma wase.—Mateu 6:33; Mbaromanu 15:13; 1 Mbakorinte 2:4.
18. Kwagh u Yesu ôr a Peteru la tese se nyi i̱ injaa?
18 Shighe u Yesu lu ôron mbahenen nav kwagh u ku na la á tese er un kange ishima gbang gbang wener, mayange una de ér kwagh môm tsô a̱ dan un ga yô. Peteru kaa a Yesu ér “Aôndo A̱ bunde kwagh la,” shi á taver un ishima á kaa ér kwagh la “a̱ de tseren We ga.” Kpa Yesu venda u ungwan nyityô kwaghwan u una tule un una kera er ishima i Yehova ga la cii. Tsô á gema á kaa a Peteru ér: “Hirem ken ijime kera, Satan, u ngum kwagh u nan gbev mbu nôngon, gadia u we iko sha akaa a a lu a Aôndo ga, saa a ior tsô.” (Mateu 16:21–23) Yô, se kpa se lu nen a ishima i vendan mbamhen mba iorov hanma shighe cii. Kpa se gema se de nen mbamhen mba Aôndo ve hemen se hanma shighe cii.
Tartor Ua Va a Mbamtsera mba Tsôron
19. Er Yesu eren uivande kpishi nahan kpa, lu nyi kwagh i̱ hemba lun tom na u vesene?
19 Yesu er uivande kpishi mba tesen ér un ngu Mesiya. A nder mbakpenev je kpaa. Ikpelaior kpishi lu van hen Yesu sha ci u ityom ne, kpa á va shin tar lu di u va eren ityom i wasen ityô tseegh tsô ga. Á va sha u una pase ior mimi yô. Yange fa wener nyityô kwagh i yolough i un er sha ci u ior cii kpa ia tsa di anshighe kpuaa tsô. Mba lu nderen ve shin mbakpenev la je kpa lu u vea hide a kpe. Nahan ka mimi u yange lu pasen ior la tseegh lu kwagh u una wase mbagenev vea zua a uma u tsôron ye.—Luka 18:28–30.
20, 21. Mbakristu mba mimi mba eren akaa a doon a ior cii, kpa ka kwagh u a hembe lun ve tamen kwagh la ga nena?
20 Mbagenev nyian mba dondon ityom i dedoo i Yesu er la sha u bughun ayouacii shin eren ityom igenegh i wasen mbaatsanev. Ashighe agenegh je yô, ka ve tôô inyaregh kpishi ve er akaa ne ye, man iniôngon ve ne doo kpishi; kpa nyityô kwagh i ve er i̱ nan ior myôhôryol cii kpa ia tsa gbem ga. Ka Tartor tseegh ua va ior a myôhôryol u tsan gbem sha won la ye. Ka nahan ve kwagh a hembe gban Mbashiada mba Yehova u pasen ior mimi u Tartor er Yesu kpa kwagh hemba gban un u pasen ior mimi nahan ye.
21 Kpa ú ngu wer, Mbakristu mba mimi mba eren ityom i dedoo ga ze. Paulu nger wener: “Er se lu a ian yô, se eren nen akaa a doon a ior cii, kpa jim je yô, ka mbananjighjigh.” (Mbagalatia 6:10) Aahe ka una er shin kwagh ka una tser mbawanndor a vese shin anmgbianev asev mba ken Kristu yô, ka se mough fese je se er “akaa a doon” a wasen ve. Nahan cii kpa, se mba hembe veren ishima sha tom u ú lu u vesen la—ka tom ú pasen ior kwagh u mimi je la.
Hen Kwagh sha Ikyav i Yesu Ver La
22. Er nan ve Mbakristu ve pasen mbawanndor a ve kwaghaôndo?
22 Paulu kaa wener: “Aluer me ôr Loho u Dedoo ga yô, kwagh á tserem.” (1 Mbakorinte 9:16) Un eren tom u pasen ior loho u dedoo la sha uhwe ga, sha ci u tom la lu tom u ua na un uma kua mba ve lu ungwan a na la kpaa. (1 Timoteu 4:16) Se kpa kape se tôô tom wase u pasen ior kwagh la vough je la. Se soo ser se wase mbawanndor a vese. Se soo ser se tese er Yehova a doo se ishima yô. Shi se soo u tesen kpaa ser Yesu doo se ishima; shi se mba a iwuese sha dooshima na u vesen u a tese se la kpaa. Sha nahan yô, se mba pasen loho u dedoo shi se mba “kera eren sha asaren a ior ga, kpa [se mba eren] sha ishima i Aôndo.”—1 Peteru 4:1, 2.
23, 24. (a) Ivande i sha kwagh u ishuuv la i̱ tese se nyi i̱ injaa? (b) Ka unô ve lu pasen ior kwagh kpoghuloo nyiana?
23 Shighe u ior ka vea laha se shin vea venda loho wase sha ishima nyoon je kpa, kwagh ne ngu a yange se u eren tom wase ga, er Yesu kpa imba kwagh ne i̱ yange un tom ga nahan. Ivande i Yesu er zum u a yila Peteru man Anderia ér ve dondo un la tese se kwagh u injaa kpishi. U ôron kwagh u ivande ne sha injakwagh yô, se fa ser aluer se ungwa imo i Yesu, se kende ukper asev sha ajiir a i lu inja er kwagh ngu ga la je kpaa, alaghga se kôr ishu kpishi. Mbakristu mba kôron ishu mbagenev kpishi kpishi er tom sha ajiir a i lu inja er kwagh ngu ga la anyom kar imôngo cii ve ve mase kôron ikpelaishu ye. Mbagenev yô yem sha ajiir a i lu kôron ishu her kpishi yô, nahan ve kpa ve kôr ikpelaishu sha ajiir la. Aluer ka nyi je se lu eren kpa, mayange je se de nen u haan ukper asev ga. Se fa ser Yesu ngu a̱ kaa ér tom u pasen ior kwagh ne í er ú hen ma ijiir i môm shin tar ne kuma, i̱ de ga.—Mateu 24:14.
24 Mbashiada mba Yehova mba ve hembe iorov miliôn ataratar la mba eren tom kpoghuloo ken ityar hemba 230 hegen. Iyoukura i uwer u Febewari 1, 2005 la ia due a ibaver i sha inyom, i̱ tom u ve er tar sha won cii ken inyom i tom i 2004 la. Ibaver ne ia tese er Yehova a lu veren tom u pasen ior kwagh la doo doo yô. Se wa nen mkaanem ma Paulu ma sagher se asema ker ma a kaa wener: “Yôô kwaghôron Na wa iyol sha mi keghen a kegh” la ken asema a ase, mà za hemen u lun se ken asema sha shighe u á mase shin sha ci u tar ungun ne la. (2 Timoteu 4:2) Se za nen hemen u pasen ior kwagh kpoghuloo zan zan saa Yehova una kaa ér se pase kuma ve.
Hii ken inyom ne je á de gberen Ibaver i Inyom i Tom i Mbashiada mba Yehova Tar Sha Won Cii la ken Iyoukura i Janawari 1 la. A gema gberen i̱ ken Iyoukura i Febewari 1 la.
Ú Fatyô u Nan Mlumun Kpa?
• Se zua a mtsera sha ityesen i Yesu tese mbahenen nav la nena?
• Yesu eren a ior mba yange pasen ve kwagh la nena?
• Kanyi ka i̱ mgbegha se ve se gba pasen ior kwagh kpoghuloo?
• Ka sha nyi igbenda nahan se ver ishima sha u eren ishima i Aôndo, se lumun ser kwagh môm a̱ dan se ga er Yesu kpa er nahana?
[Study Questions]
[Picture on page 27]
Tom wase ua za kera aluer se wa ior ikyo vough er Yesu nahan yô
[Picture on pages 28, 29]
Ka Tom u pasen ior mimi la yange ú lu kwagh u vesen u va a Yesu shin tar ne ye
[Pictures on page 29]
Mbashiada mba Yehova hemba veren ishima sha u pasen ior kwagh kpoghuloo a hanma kwagh ugen cii