Ú Lumun Iwasen I Yehova Kpa?
Ú Lumun Iwasen I Yehova Kpa?
“Ter ka Orwasen mo, me kera cia ga.”—MBAHEBERU 13:6.
1, 2. Er nan ve i lu hange hange u se lumun iwasen i Yehova shi se lumun ser á hemen se?
TÔÔ ase wer, ú ngu zan zende a mato hen ijiir i ú lu a vande zan her ga, man tugh za ile ou. Nahan kpa, ú ngu tswen ga, ú ngu a orgen u nan fe ijiir la tsembelee yô. Nan fa gbenda u hen ijiir la man ijiir shon vindi vindi, nahan kpa, nan wa ishima nan dondo ú ne mba yemen kure kure. Nan nenge er ú lu tsumen gbenda hungwan shin agber yô. Er nan we ú ikyo yum yô, nan ngu tesen we ape ú kar ve u hungwa shin igber ga yô. Nahan, ú venda wer nana de wasen we ga shinii? Mayange ga! Aluer ú er nahan yô, alaghga ú za er aikyôr.
2 Kape se Mbakristu kpaa, se lu sha gbenda ú ú lu ican u zan sha mi je la. Nahan, se sendegh ser se za sha ú tswene? (Mateu 7:14) Ei, Bibilo tese ér Orhemen se u hemban cii Yehova, Aôndo soo wener uumace ve zenden vea na. (Genese 5:24; 6:9) Yehova wasen mbatomov nav er ka vea zenden vea na yôô? Yehova kaa wener: “Gadia Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.” (Yesaia 41:13) Yehova wasen mba ve zenden vea na, er or u se er kwagh na ken injakwagh la nahan, shi á soo ér ve ya ikyar a na kpaa. Sha mimi yô, mô wase u vendan iwasen na je kpa nan ngu ga!
3. Se time sha mbampin mba nyi ken kwaghhenen ne?
3 Se hen igbenda i nyiin i Yehova yange wasen ior nav sha ashighe a tsuaa la ken kwaghngeren u ken ijime la. Nyian kpa, wasen ior nav sha imba igbenda laa? Se er nan ve iwasen i Yehova a lu nan se la ia bunde se ga? Se time nen sha mbampin mban. Nahan, se hemba lun a vangertiôr ser mimi je Yehova ngu Orwasen se.—Mbaheberu 13:6.
Iwasen sha Ikyev i Mbatyomov
4. Er nan ve mbacivir Aôndo nyian ne vea fatyô u lun a vangertiôr ér mbatyomov mba wasen ve?
4 Mbatyomov mba wasen ior mba Yehova nyian kpaa? Een, mba wasen ve. Kpa, nyian ne, mba gem mluyol ve hingir mluyol u or sha u va yiman mbacivir Aôndo mba mimi sha akaabo ga. Sha ashighe a i ngeren Bibilo la je kpa, mbatyomov faan geman iyol ve hingir iyol i or sha u va yiman ior ga. Akaa kpishi a yange ve eren sha ci u ior la lu akaa a uumace vea fatyô u nengen a mi ga, vough er sha ayange ne kpa se nengen a akaa a ve eren ga nahan. Nahan kpa, mbacivir Aôndo mba yange ve fa ér mbatyomov mba wasen ve la zua a ishimataver kpishi. (2 Utor 6:14–17) Kape se kpaa, i gbe u kwagh ne una taver se ishima je la.
5. Bibilo tese ér mbatyomov mba uwegh sha tom u pasen kwagh nyian nena?
5 Tom u injaa ugen ngu u u doo mbatyomov mba Yehova ishima tsung, u se kpa se lu eren yô. Kanyi tom laa? Se zua a mlumun sha mpin ne ken Mpase 14:6: “M nenge ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior.” “Icôronloho u Dedoo” ne ngu kwagh môm a “loho u Dedoo u tartor,” ú Yesu á kaa wener, “á ôr u á tser tar, sha u u̱ lu mpase hen akuraior cii; ka zum la man mkur una kuma” la. (Mateu 24:14) Nahan kpa, mbatyomov mba pasen loho ne iyol ve ga. Yesu wa zege tom ne sha ikyev i uumace. (Mateu 28:19, 20) Er se fe ser mbatyomov mba ve lu a kwaghfan shi ve lu a agee mba suen se ken tom ne nahan, kwagh ne taver se ishima ga he?
6, 7. (a) Kanyi i tese ér mbatyomov mba suen tom u pasen kwagh nee? (b) Se er nan ve mbatyomov mba Yehova vea sue se kpee a bunde ga?
6 Ikyav i dedoo ngi i i̱ tese wang ér mbatyomov mbá suen tom ne yô. U tesen ikyav yô, ashighe agen ka se ungwa ser Mbashiada mba Yehova mba pasen kwagh yô, ve asegh sha or u nan sember eren msen ér Aôndo ma a wase nan sha er nana fa mimi yô. Kwagh ne ka kwagh u or a gba huren kera ga, gadia se mba zough a amba ne ashighe kpishi kpishi. Er mbatyomov ve lu suen tom ne yô, ior kpishi mba henen u eren kwagh u “ortyom u Sha ugen lu purugh sha kwavaôndo” ve yôô la, ér: “Cia nen Aôndo, na nen Un icivir.”—Mpase 14:7.
7 Sar ú pe mbatyomov mba Yehova mba ageegh ve sue ú wee? Aluer ka isharen you la yô, er tom u pasen kwagh ne sha afatyô wou cii. (1 Mbakorinte 15:58) Aluer se na ayol a ase sha gbashima, se mba eren tom u injaa u Yehova a ne se ne yô, mbatyomov vea wase se kpee je.
Iwasen sha Ikyev i Ortyom u Tamen
8. Ka iaven i vesen i nyi Yesu a lu sha mi sha, man kwagh ne taver se ishima nena?
8 Yehova shi ne se iwasen sha ikyev i ortyom ugen. Mpase 10:1 ôr se kwagh u ortyom “u ageegh” u “ishigh nagh lu er iyange nahan” la. A̱ shi nan kpa ortyom u i nenge a na ken mpase u sha mnenge ne lu Yesu Kristu sha ikyônough nagh ki torough ki shaav. (Mpase 1:13, 16) Yesu ngu ortyom kpôô kpôô? Een, afatyô u ôron nahan, gadia ngu ortyom u tamen. (1 Mbatesalonika 4:16) Yesu hemba ônov mba Yehova mba ken jijingi cii agee. Yehova wa akumautya a mbatyomov Nav cii sha ikyev i Yesu. Sha kpôô yô, ortyom u tamen ne ngu imbor i ageegh i wasen se. Sha nyi gbenda?
9, 10. (a) Yesu ngu “Orwasen” se shighe u se er isholibo nena? (b) Ka iwasen i nyi se fatyô u zuan a mi sha ikyav i Yesu á ver se laa?
9 Apostoli Yohane yange nger kwagh shighe u á beeyol la, wener: “Aluer anti or nana er isholibo kpaa, se mba a Orwasen hen Ter, Yesu Kristu Orperapera.” (1 Yohane 2:1) Er nan ve Yohane kaa wener Yesu ngu “Orwasen” se, hemban cii yô, shighe u se er “isholibo”? Se mba eren isholibo hanma iyange, man injar i isholibo yô, ka ku. (Orpasenkwagh 7:20; Mbaromanu 6:23) Nahan kpa, Yesu na naagh a uma na sha u paan se sha asorabo ase. Shi ngu a Ter na u mhôôn la ikyooso ikyooso, ngu zamber un ér a̱ de se asorabo ase. Gba u hanma wase yô una wase nan sha imba gbenda ne. Se zua a iwasen ne nena? Gba u se gema asema sha asorabo ase shi se zamber ser i̱ de se asorabo sha ci u naagh ku Yesu kura. Shi se palegh u eren asorabo a se de la.
10 Yesu kpe sha ci wase tseegh ga, kpa á ver se ikyav i vough kpaa. (1 Peteru 2:21) Ikyav i á ver se la i̱ hemen se, shi i̱ wasen se u sôron aeren a ase sha er se fatyô u palegh u eren asorabo a vesen nahan se eren ishima i Yehova Aôndo yô. Saan se iyol er se zough a imba iwasen la ga he? Yesu yange er ityendezwa a mbadondon nav ér a na ve orwasen ugen kpaa.
Iwasen sha Ikyev i Icighan Jijingi
11, 12. Jijingi u Yehova jim kanyi, jijingi ne ngu a agee nena, man er nan ve i gbe u se lu a jijingi ne nyiana?
11 Yesu tôndozwa wener: “Me sôn Ter, man Una na ne Orsurunshima ugen u Una lu a ven gbem yô, ka Jijingi u mimi u tar u fetyô u ngohol Un ga yô.” (Yohane 14:16, 17) “Jijingi u mimi” ne shin icighan jijingi ka or ga, kpa ka tahav—ka tahav mbu tomov mbu Yehova iyol na. Tahav mbu shon mbu a ikighir ga. Lu tahav mbun Yehova gba akaa sha won cii a mi, shi eren uivande mba kpilighyol shi pasen ior ishima na sha mbampase mba sha mnenge kpaa ye. Yehova kera eren akaa a kpilighyol la sha ikyev i icighan jijingi nyian ga, nahan kwagh ne tese ér se yô, jijingi la kera ngu sha ci wase ga shinii?
12 Mayange ga cii! Ka “ken ayange a masejime [a] ashighe a ican” ne i hembe doon u se lu a jijingi u Yehova cii ye. (2 Timoteu 3:1) Jijingi ne ka a na se agee a se wa ishima ken ican yô. Shi ka a wase se se lu a aeren a injaa a a wase se se seer sôsom a Yehova man anmgbianev asev mba nomso man mba kasev mba ken jijingi kpaa yô. (Mbagalatia 5:22, 23) Se zua a mtsera sha iwasen i Yehova i kpilighyol ne nena?
13, 14. (a) Hii nan ve se fatyô u lun a vangertiôr ser Yehova ne ior nav icighan jijingi na sha gbashima? (b) Ka ieren i nyi nahan se lu eren ve ia tese ér mimi je se lumun iyua i icighan jijingi ga?
13 Kwagh u hiihii yô, gba u se sôn icighan jijingi. Yesu kaa wener: “Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:13) Sha kpôô yô, Yehova ka Ter u a hembe doon cii yô. Aluer se sôn un icighan jijingi sha mimi yô, una nyume se ga cii. Nahan, se pine ase nen ayol a ase ser, se mba sen jijingi la kpa? Doo u se eren msen hanma sev se sônon un ser a̱ na se icighan jijingi na.
14 Kwagh u sha uhar yô, se mba ngohol icighan jijingi la sha u eren kwagh u a tese se la. U tesen ikyav yô: Tôô ase wer, ma Orkristu nan ngu nôngon a isharen i ka i kende ken a nan u nengen ufoto mba ijimbagh la. Nan sôn ér i na nan icighan jijingi a̱ wase nan nana palegh ieren i dang la. Shi nan ker kwaghwan hen mbatamen mba ken Kristu, nahan ve wa nan kwagh ér nana de tem a tema ga, nana palegh akaa a kenden isharen ijimbagh. (Mateu 5:29) Kpa, aluer kwagh tsô gba nan sha kwaghwan la ga, nan za hemen u nengen ufoto mbara shighe u isharen la i kende ken nan di ye? Nan ngu eren sha msen u nan sôn ér icighan jijingi a wase nan la kpa? Shin nan ngu wan a wa iyol i nan ken kwaghbo sha u vihin Icighan Jijingi u Aôndo ishima, nahan geman vendan a venda iyua i icighan jijingi laa? (Mbaefese 4:30) Sha mimi yô, gba u se cica cii se nôngo sha afatyô wase cii se ver ishima sha er se za hemen u zuan a iwasen i vesen ne hen Yehova yô.
Iwasen sha Ikyev i Mkaanem ma Aôndo
15. Se er nan ve se tese ser se tôô Bibilo ser ka beerkwagh ga?
15 Bibilo ndera wasen mbacivir Yehova mba jighjigh uderimbaanyomov imôngo hegen. Nahan, mayange je se tôô Bibilo ser ka beerkwagh ga, kpa se nenge i ser ka kwagh u wasen se kpishi je. Gba u se nôngo kwagh kpoghuloo ve se zua a iwasen i Bibilo i ne se la ye. Gba u se nôngo i hingir ikye yase u ôron Bibilo hanma shighe.
16, 17. (a) Pasalmi 1:2, 3 pase injar i se zua a mi sha u ôron atindi a Aôndo nena? (b) Pasalmi 1:3 tese ér gba u se er tom kpoghuloo nena?
16 Pasalmi 1:2, 3 ôr kwagh u or u nan civir Aôndo ér: “Atindi a TER ka kwagh u gban nan ishima, shi ka atindi a Na nan zeren henen a ken ishima tugh kua tetan kpaa ye. Nan ngu er kon u i môôr hen ukungômbamngerev, u u um sha shighe u u yô, ika i u kpaa ngi usu ga; hanma kwagh u nan eren kpaa, nana kure un vough.” Ú zua a kwagh u avur ne a lu ôron kpa? Aluer ú ôr a sha laa laa yô, ú hen wer nga ôron kwagh u ijiir i doonashe, ape i lu her kundu kundu—er ape kon u gbe mure hen kpemnger nahan. Nenge er imba ijiir la ia kpe iyol u memen her atetan sha wono! Kpa, pasalmi ne ngu ôron se kwagh u ijiir i memen ga. Ngu ôron se kwagh u tom u eren kpoghuloo. Inja nena?
17 Fa wer, kon u i lu ôron kwagh u ú ne ka kon u ú kar ishima tsô ú gba menden hen kungômnger, ú gbe mure ga. Kpa, ka kon u umen atam, ú í “môôr” ú hen ijiir i dedoo— “hen ukungômbamngerev” yô. Kpa, a er nan ve kon môm tseegh ua mende hen ukungômbamngerev imôngo? Orsule u nan lee sule ikyon nana fatyô u gban mbaakpa mbamngerev ken sule u nan sha er ikyon injaa i nan lee la ia zuan a mngerem yô. En-heen, kwagh ne wanger hegen ve! Aluer se mba zuan a mkpeyol ken jijingi er kon u i er kwagh u ú la yô, ka sha ci u tom u mbagenev ve er kpoghuloo u wasen se la. Se mba ken nongo ú ú lu nan se mngerem ma mimi ma wang yô, nahan kpa, ka u se gba teman a tema ga. Gba u se maan mngerem ma injaam man, sha u gbidyen kwar sha akaa a se lu henen la, shi tôvon sha a sha er se shiishi Mkaanem ma Aôndo ken asema ase yô. Aluer se mba eren nahan yô, se kpaa se ume atam a dedoo.
18. Kanyi i gbe u se er ve se zua a mlumun mba Bibilo i ne sha mbampin aseva?
18 Aluer se mba a Bibilo man se koso i se mba ôron ga yô, ia wase se sha ma gbenda môm ga. Shi Bibilo ka takerada u ahir—ú aluer se tôô i̱ shighe u kwagh a ze se iyol se kusu ashe se gba bughun bughun i tsô maa se zua a mlumun sha kwagh u a ze se iyol la ker je ga. Shighe u se soo u tsuan kwagh u se er yô, gba u se ker ‘mfe u Aôndo,’ inja er se mba keren akaa a injaa a a lu shin atô inya nahan. (Anzaakaa 2:1–5) Ashighe kpishi ka i gba u se time ken Ruamabera vighe vighe shi se tôv sha kwagh u se hen la vindi vindi sha er se zua a akaawan a a wase se sha mbamzeyol asev yô. Se mba a ityakerada i i har sha Bibilo kpishi i ia wase se u tôvon sha kwagh yô. Aluer se mba ôron ityakerada ne sha gbashima sha u keren kwaghfan u a lu ken Mkaanem ma Aôndo la yô, nahan se lu ngohol iwasen i Yehova a lu wasen se la.
Iwasen sha Ikyev i Mba Se Civir a Ve Imôngo La
19. (a) Hii nan ve se fatyô u kaan ser akaa a i ngeren ken Iyoukura man Awake! la ka iwasen i Yehova a ne se sha ikyev i anmgbianev asev mba nan jighjigh a vese imôngo? (b) Ka iwasen i nyi ú er kwagh u i nger ken Iyoukura man Awake! ve ú zough a mini?
19 Mbacivir Yehova ndera wasen ayol a ve ka kwagh u nyian a mi ga. Yehova de u wasen se sha ikyev i anmgbianev asev nyiana? Mayange ga cii. Alaghga ú umbur ma shighe u yange kwagh gba ú ve, anmgbianev mba civir a we imôngo wase ú sha shighe vough yô. U tesen ikyav yô, ú fatyô u umbur ngeren mba ken Iyoukura shin Awake! mba ú er ve ve sur ú ishima sha shighe vough shin ve wase ú u sôron ma mzeyol shin hemban akaa a hendan a jighjigh wou u nan la kpa? Yehova na ú iwasen la sha ikyev i “wanakiriki u jighjigh man u fan kwagh” u a tsough un sha u a naan se “kwaghyan sha ashighe ashighe” la.—Mateu 24:45–47.
20. Ka sha igbenda i nyi nahan mbatamen mba ken Kristu ve lu ior mba i ne ve lu “uiwua”?
20 Nahan kpa, ashighe kpishi anmgbianev mba se civir Aôndo a ve imôngo la ka ve wase se jighilii. Alaghga ortamen ken tiônnongo nan na kwaghôron kôr se sha mtema, shin nan va sôr se nan wa se kwagh, nahan kwagh la wase se shighe u kwagh a tsur se yô, shin nan wa se kwagh kundu kundu, nahan kwagh la wase se u nyôôso ape se lu gban ijime la, tsô se hemba kwagh u a lu zan se iyol la. Kwase Kristu ugen u wuese kwagh, ôr kwagh u iwasen i ortamen ugen na un wener: “Yange se due kwaghpasen imôngo, nahan á taver mo ishima ér m ôr un zayol wam. Hen tugh mbu kpernan m due kwaghpasen a na la, m sôn Yehova mer ma m shi zough a or u me pase nan mzeyol wam yô. Nahan, kper nan sev mbu aven yô, anmgbian ne wam kwagh kundu kundu. Á ôrom er i lu Yehova a lu wasen mo anyom a karen ne nahan. Doom kpishi er Yehova a tindi ortamen ne á va wem kwagh nahan.” Igbenda i mbatamen ve ne se iwasen i í tér ne cii tese ér, mbatamen mba ken Kristu mba ior mba i ne ve lu “uiwua” mba Yehova á ver ve sha ikyev i wan na Yesu Kristu sha u ve taver se ishima sha gbenda u zan ken uma la yô.—Mbaefese 4:8.
21, 22. (a) Mba ken tiônnongo ka vea er tom sha kwaghwan u i nger ken Mbafilipi 2:4 la nahan, kanyi ka i ere? (b) Er nan ve erdoo u eren a or sha akaa a kiriki kpa i lu kwagh u injaa?
21 Dugh mbatamen kera yô, gba u Mbakristu mba jighjigh mbagenev kpaa vea eren sha tindi u i we ér hanma or “nana de kera waan akaa a nan iyol i nan iko tseegh ga, kpa nana wa akaa a mbagenev iko kpaa” la. (Mbafilipi 2:4) Zum u mba ken tiônnongo ka vea er sha kwaghwan ne yô, hanma or nan hingir u eren erdoo. Se tese ikyav sha kwagh ne sha aahe u vihin tsung u yange er tsombor ugen yô. Orya u tsombor ne tôô wan na u kwase u kiriki ve za kasua. Mba ngur hiden yô, ve va er aikyôr sha gbenda. Wan na la maa sar ku; un di vihi iyol keghelee. Yange i hungwa un gambe je kpa, lu kwagh u una kôr ma kwagh môm a ve ga sha ci u a gba iwan. Nahan ishima za kwase na iyol tsung je lu kwagh u una nenge sha nom na tswen ga. Nahan, orgen vea kwase na kua a or u er aikyôr la vea kwase na, za nenge sha ve usati imôngo.
22 Nahan kpa, ka u eren erdoo a ior shighe u aahe a er ve la shi nan ayol ase u wasen ve tseegh i lu erdoo ga. Ashighe agen or ka nan na se iwasen sha ankwagh u kiriki kpaa. Or ka nana er erdoo avese sha ankwagh u kiriki kpa, se wuese, shin ka nahan ga? Ú fatyô u umbur ashighe agen a anmgbian u kwase shin u nomso yange nan lam a we kundu kundu shin nan er erdoo a we nahan kwagh la wase ú sha shighe u ú soo la vough kpa? Yehova we se ikyo sha imba gbenda ne ashighe kpishi kpishi.—Anzaakaa 17:17; 18:24.
23. Yehova nengen iniôngon i sé nôngon ser se wase ayol a ase la nena?
23 Ú soo wer Yehova a wase mbagenev sha ikyev you wee? We kpa ú ngu a ian i wasen mbagenev. A doo Yehova kpishi sha iniôngon you i wasen mbagenev la. Á ôr ken Mkaanem nam ér: “Or u nan zungu mbaatsanev mhôônom yô, nan pwar TER kwagh je, nahan Un kpaa Una na nan sha ieren i nan i dedoo la.” (Anzaakaa 19:17) Aluer se na ayol ase se mba wasen anmgbianev asev mbanomso man mba kasev yô, se zua a msaanyol kpishi. (Aerenakaa 20:35) Kpa, aluer se mba kwagh wase, se mba biishi a ior ga yô, se zua a imba msaanyol ne ga, shi se zua a ishimataver i or ka nana wase se ve se zua a mi la kpaa ga. (Anzaakaa 18:1) Nahan se zaan nen mbamkombo mba Kristu nduuruu sha er se taver asema ayol a se yô.—Mbaheberu 10:24, 25.
24. Er nan ve se de ser ishima i za se iyol sha ci u se nenge uivande mba ngise Yehova er la ga?
24 Doo se kpishi u henen sha igbenda i Yehova á wasen se la ga he? Yehova kera eren ivande sha ayange a ase ne sha u kuren mbaawashima nav er ngise eren nahan la ga, nahan kpa, ka u se za ishima yase iyol ga. Yehova na se akaa a hange hange a a wase se ve se za hemen u nan jighjigh her dông yô. Shi aluer se tile sha jighjigh wase u nan taveraa, se za hemen u taver ishima yô, se nenge er Yehova una er akaa a kpilighyol man a dedoo a i gbe tar je a lu a er ga yô! Nahan, se kange nen ishima se lumun nen iwasen i Yehova a lu wasen se sha dooshima ne, shi se yar nen tom a akaa a a er sha u wasen se la, aluer se er nahan yô, se tese ser se lumun mkaanem ma ivur i sha inyom i 2005, ma ma kaa ér: “Iwasen yam yô, ia va sha TER” la.—Pasalmi 121:2.
Pase Ase Mhen Wou
Yehova ne se iwasen i kwagh a gbe se a mi nyian la—
• sha ikyev i mbatyomov nena?
• sha ikyev i icighan jijingi nena?
• sha ikyev i Mkaanem ma a ne i nger la nena?
• sha ikyev i anmgbianev mba nan jighjigh a vese imôngo la nena?
[Study Questions]
[Picture on page 14]
Doo u se fa ser mbatyomov mbá suen tom u pasen kwagh
[Picture on page 17]
Yehova una fatyô u taver se ishima sha ikyev i ma or u nan jighjigh a vese imôngo