I Saan We Iyol Er U Lu Orkristu Yô!
I Saan We Iyol Er U Lu Orkristu Yô!
“U nan te ihagh yô, nana̱ ta ihagh ken Ter.”—1 MBAKORINTE 1:31.
1. Ior gema nengen kwaghaôndo ainge nena?
IOR vôr a kwaghaôndo hegen. Orgen u a tee abaver shi a tem imôngo sha kwagh u kwaghaôndo sha redio shin sha televishen yô kaa wener, kwagh kera gba ior sha kwagh u ve ne jighjigh a mi la ga. Shi kwagh u ior ve lu eren ainge ne kera bee kwaghaôndo ga cii. Gadia mbakpishiv na jighjigh a Aôndo, kpa kwagh gbe ve u nengen akaa er Aôndo a nengen á la ga.
2. (a) Er nan ve mver u ior ve lu vôron ken jijingi ne i kpiligh se iyol ga? (b) Iyolkpen ia va Mbakristu a nyi kwagh i bo?
2 Hen ior mba henen Bibilo yô, kwagh u iyol i gbe kpen ior a kwaghaôndo la kpiligh ve iyol ga cii. (Luka 18:8) I ver ishima er kwagh a lu nahan. Sha ci u kwaghaôndo u aiegh tumbur a ior shi a nzughul a ve ica gba hegen. (Mpase 17:15, 16) Hen Mbakristu mba mimi yô, kwagh u civir Aôndo asema ahar man sha gbashima ga u a gbe samber sha tar wuee ne ka kwagh u bo. Aluer se gba uwegh u nan jighjigh shi se mba civir Aôndo sha gbashima ga, mimi mba ken Bibilo mbara kpa due se ishima yô, se gba shin bo. Yesu wa se kwagh sha kwagh u gban di lun a̱ sagh a sagh la ken loho u á tindi hen Mbakristu mba ken gar u Laodishia mba sha derianyom u hiihii la, ér: “U ndôhôr ga, u tsee kpaa ga. Ma u ndôhôr, gayô, ma u tsee! . . . U sagh a sagh.”—Mpase 3:15–18.
Doo u Se Fa Ior Mba Se Lu Yô
3. Ka sha nyi man nyi nahan Mbakristu vea ta ave vanger sha ior mba ve lu?
3 Aluer ka u Mbakristu vea hendan a iyolkpen i ken jijingi yô, a gba u vea fa ior mba ve lu la a kuma ve, shi a saan ve iyol u lun kwagh u ve lu la kpaa. Er se lu mbashiren Yehova tom man mbahenen mba Kristu yô, se ôr Bibilo tsô se fa kwagh u i̱ ôr ér se mba la. I̱ kaa ér “Loho u Dedoo” u se lu pasen mbagenev ne na se mba “mbashiada” mba Yehova, shi se mba ior “mbashirentom a Aôndo imôngo.” (Mateu 24:14; Yesaia 43:10; 1 Mbakorinte 3:9) Se mba ior mba se ‘doo ayol a ase yô.’ (Yohane 13:34) Mbakristu mba mimi ka ior mba ‘ve eren tom a mkav u ken ishima, i hoghor ve u paven kwagh u dedoo a kwagh u bo’ yô. (Mbaheberu 5:14) Se mba “taan iwanger ken [tar] er asan a wanger nahan.” (Mbafilipi 2:16) Ka se nôngo sha er ‘zende wase u hen atôatyev ua lu wanger wanger yô.’—1 Peteru 2:12; 2 Peteru 3:11, 14.
4. Or u civir Yehova nana fatyô u fan or u nan lu ga la nena?
4 Shi mbacivir Yehova sha mimi fa ior mba ve lu ga yô. Ve fa ér “ve mba ior i tar ne ga” di vough er Yesu Kristu, Orhemen ve kpa lu or u tar ne ga nahan. (Yohane 17:16) Mba paleghaa a “tar” u ‘mfe ve a we ime, ve lu paleghaa a uma u Aôndo’ ne. (Mbaefese 4:17, 18) Sha nahan yô, mbadondon mba Yesu ‘venda mwe u i we Aôndo iko ga la man asaren a taregh kpaa, mba zenden tsev tsev man sha jighjigh man sha mciviraôndo kpaa ken tar u ainge ne.’—Titu 2:12.
5. Ikyav i kwaghwan u i we se ér se “ta ihagh ken Ter” la ér nyi?
5 Aluer se fa ior mba se lu la wang, shi se fa mlu wase vea Tor u Hembancii yô, kwagh la una mgbegha se se “ta ihagh ken Ter.” (1 Mbakorinte 1:31) Ka ihagh i nyi laa? Se Mbakristu mba mimi yô doo se u tan ihagh er Yehova a lu Aôndo wase yô. Ka se dondo kwagh u i we se ne, ér: “U i sar nan ka tan ihagh yô, nana̱ ta ihagh sha kwagh ne, er nan kav man shi nan fam, er Mo M lu TER u eren dedoo, u ôron ijir sha mimi man u eren perapera sha tar, gadia ka akaa ne a doom ye, kape TER A kaa ne.” (Yeremia 9:24) Se mba ‘te ihagh’ sha ian i civirigh i se lu a mi i fan Aôndo la, man er a lu yaren tom a vese u wasen mbagenev nahan.
Ka Kwagh u Ican u Lun Orkristu
6. Er nan ve ka i taver mbagenev u kuran iti i Mbakristu i í fe ve a mi la yumu?
6 Ka kwagh u ican kpishi u lun Orkristu shi kuran mlu wase la kpaa. Gumor ugen u i yese un lu Orkristu umbur shighe ugen u yange un vôr ken jijingi kpishi yô, a kaa wener: “Ashighe agen yange m hen ityôkyaa i m lu Orshiada u Yehova jim kpa m fa ga. Hii shighe u m lu iyev la je tsô i gba mi tesen mo akaa a mimi a ken Bibilo. Ashighe agen yange i lum inja er kwaghaôndo u mbashiada kaha a ukwaghaôndo mbagen ga nahan.” Mbagenev yô, alaghga ve de gurgur u tar ne kar ya tor ken a ve, mbagenev yô ka abaver, kpa mbagen yô alaghga a lu mnenge u ior mba ve cie Aôndo ga ve nengen uma la a ye tor ken a ve ye, akaa ne cii nga a kohol á na ve hungur iti ve i Mbakristu la. (Mbaefese 2:2, 3) Ashighe agen asema ka a za Mbakristu mbagenev iyol sha mlu ve nahan ve gbidye kwar sha mbamlu vev man akaa a ve soo u eren ken uma la.
7. (a) Doo u mba civir Aôndo vea karen ayol a ve nena? (b) Ka hana kwaghbo a lu?
7 Ka kwaghbo u se hiden karen ayol a ase sha ashighe ashighe? Ei. Aluer u umbur yô, apostoli Paulu yange taver Mbakristu ishima wener ve de gbe uwer u karen ayol a ve, fan kwagh u ve lu la ga. A kaa ér: “Kar nen ayol a en sha u né fa aluer nea lu ken jighjigh u nan yô, time nen ken ayol a en.” (2 Mbakorinte 13:5) Heen ne, apostoli ne lu taver ior asema ér ve nôngo sha afatyô ve cii ve fa ma kwagh u a lu kpen ve iyol ken jijingi la, sha er vea ker gbenda u been a mi kera kuaa yô. Orkristu nana nguren karen iyol i nan sha u fan shin nan ngu a jighjigh u nan her yô, a gba u nana fa aluer akaaôron a nan man aeren a nan zua sha kwagh u nan senge ér nan na jighjigh a mi la yô. Nahan kpa, aluer se mba karen iyol yase sha u za keren ‘u fan inja or i se lu’ la a Yehova shin tiônnongo u Kristu shio yô, iyol karen la ia wase se ga shi ia va se a mzeyol ken jijingi kpaa. * Mayange se soo ser sha ‘kwagh u jighjigh u nan yô, tso a ur se’ ga!—1 Timoteu 1:19.
Mbakristu kpa Ishima i Ze Ve Iyol
8, 9. (a) Mose pase myina na la nena? (b) Yehova er nan sha mlu u ishima i lu Mose ker ér un yina laa? (c) Ishima i Yehova á taver ior nav la bende a we nena?
8 Doo u Mbakristu mba ashighe agen ishima ka i va hii u zan ve iyol sha mlu ve la vea hen ér ve yô kwagh hemba a hemba ve jee? Mayange ga cii! Doo u vea fa ér ka hiin i lu or ken ishima nahan la ga. Kape mbashiada mba Aôndo mba jighjigh mba sha ayange a tsuaa la kpa luun ve ken ishima je la. Nenge ikyav sha Mose, un lu a jighjigh u kpilighyol, lu ormimi man or u civir Aôndo a ishima na i môm kpaa. Shighe u yange i na Mose tom u u lu inja er u gande un vanger yô, cie un iyol gande tsô á pine ér: ‘Mo m ngu di nyi je?’ (Ekesodu 3:11) A shi nan kpa, Mose lu henen wener, ‘Mo m gba kwagh ga!’ shin ‘Mo m yina sha ityom ne!’ Akaa yange aa lu kpishi a á na ve Mose lu henen ér un kuma sha ityom la ga yô: Kwagh u hiihii yô, yange due ken tsombor u kpan. Ugen yô, Mbaiserael kpa venda un. Shi nombor yuhwan un u lamen kpaa. (Ekesodu 1:13, 14; 2:11–14; 4:10) Lu orkuranilev, man tom ne ndôhôr Mbaigipiti ishima kpen kpen. (Genese 46:34) Kape i lu je ve a nenge ér un yina u zan ityom i Aôndo lu tindin un ér una za due a ior nav ken kpan kera je la!
9 Yehova taver Mose ishima, a na un uityendezwa uhar, hiihii yô, a kaa a na ér: “Mimi je, Me lu a we imôngo; kwagh ne una hingir we ikav, er i lu Mo M tindi u yô: zum u ú due a ior ken tar u Igipiti yô, ka hen uwo ne je né va civir Aôndo ye.” (Ekesodu 3:12) Aôndo lu kaan a wanye na u lu nurun ityô u zan ityom ne wener Una luun a na hanma shighe cii. Sha uhar yô, Yehova lu kaan ér una due a ior nav keng keng a bunde ga. Aôndo ndera suen ior nav ken ijime ka kwagh u nyian a mi ga. U nenge yô, Aôndo kaa a Mose ér a̱ ôr kwagh a Mbaiserael zum u ve zurum u nyôron ken Tar u Ityendezwa la, ér: “Taver ishima lu icihi, de cie ga, . . . gadia TER, Aôndo wou, ka Un A ze a we imôngo ye; Una kende u ga, Una undu u kpaa ga.” (Duteronomi 31:6) Shi Yosua kpaa, Yehova va taver un ishima wener: “Ma or nana fatyô u tilen sha ishigh yough sha ayange a u lu uma ne ga; . . . Me kende u ga, Me undu u kpaa ga.” (Yosua 1:5) Shi a er ityendezwa a Mbakristu ér: ‘Mayange Me undu ne ga, Me kende ne kpaa ga.’ (Mbaheberu 13:5) Se mba a or u suen se ken ijime taveraa, nahan doo u se ta ihagh ser se mba Mbakristu!
10, 11. Yange i wase Asav, Orlevi u kôron mnenge u dedoo u lu a mi ér doo u eren Yehova tom la her dông nena?
10 Hii hen shighe u Mose la, uderimbaanyomov mba karen utaan yô, Asav, Orlevi ugen u lun a mimi iyol va nger er ishima i lu zan un iyol sha kwagh u perapera na la. Zum u ican man ameen lu zan Asav iyol kpa lu nôngon ér una civir Aôndo la, a nenge ikyôr lu hemban laghen a lagh mba ve lu nahan Aôndo tar la cii. Kwagh ne bende a Asav nena? A kaa ér: “Mo yô, shi kpuaa tsô angahar a am ma a kera lu ga, shi kpuaa tsô angahar a am ma a dolough kera. Gadia m lu tômon kwagh u mbaihaghev, zum u m nenge ikôl-laghen i mbaaferev la yô.” Tsô, a gba henen ér ityôkyaa kpa ngi i lun or u civir Yehova ga. A kaa ér: “Mimi je, m gbe wanger ishima yam, man m nyian ishô iyol gbilin tsô. Gadia ka m shi yan ican didi.”—Pasalmi 73:2, 3, 13, 14.
11 Nahan Asav sôr mzeyol ne nena? A tuna ér kwagh za iyol gaa? Ei. A er msen hen Aôndo er se er ken Pasalmi u sha 73 la nahan. Kwagh u yange mase yiman Asav je yô, ka zende na u á za ken icighanjiir la. Er lu ken tempel yô, a mase kaven ér kwagh môm hemba mcivir u civir Aôndo ga. Hidi gbe nengen akaa a ken jijingi sha gbenda u dedoo yô, a mase kaven er Yehova a ker kwagh u bo ihyom man er shighe a va kuma vough tsô una tim mbaaferev kera nahan. (Pasalmi 73:17–19) Asav hidi lun a mnenge u vough yô, a taver mlu na u lun or u civir Yehova la. A kaa a Aôndo ér: “M ngu a We gbem, U kôrom sha uwegh agh ku yanegh. Ú hemen mo sha mhen Wou, ken masetyô yô, Ú ngohol mo, Ú za a mo ken icivir.” (Pasalmi 73:23, 24) Asav hingir saan saan shi zua a mkom ken ishima sha u lun vea Aôndo na kpaa.—Pasalmi 34:2.
Ve Fa Ior Mba Ve Lu La Kuma Ve
12, 13. Tese akav a ior mba ken Bibilo mba yange doo ve u yan ikyar a Aôndo la.
12 Gbenda môm u se taver mlu wase u se lu Mbakristu ne yô, ka u karen mlu wase shi dondon jighjigh u mba civir Aôndo mba ican yange ia er ve nan nan kpa i doo ve u lun azende a Aôndo la. Nenge ikyav sha Yosev, wan u Yakob. Shighe u lu yev la je tsô, i tee un ken kpan, i yam un i yem a na ken Igipiti, ica a ter na u cian Aôndo la. I dugh un shin ikyum i ter na sha, nahan a undu mkpeyol u ya na. Shighe u Yosev lu ken Igipiti la, kera lu a orjime ga, shi lu tagher ishigh a mbamzeyol mba karen aeren a na a dedoo man mlu na u cian Aôndo la kpaa. Nahan kpa, a nôngo sha afatyô na cii a kura mlu na u lun or u civir Aôndo la, shi a undu kwagh u a fa ér ka u shami la ma shighe môm kpaa ga cii. Kunya kôr un u pasen er ishima i lu un ker la ga, á tôô ér ka ian i civirigh je un lu a mi i lun or u civir Yehova je kuan ken tar u kpan kpaa ye.—Genese 39:7–10.
13 Ka tse anyom deri anigheni yô, kwagh er hen ya u Naaman, kurutya u tor u Shiria. Wankwase u kpeghee ugen ken Iserael u lu ken uikyangen hen ya u Naaman yô hungur a iti na i lun wanyekwase u civir Yehova la ga. Iyange igen ian due i una er shiada yô, tsô á cia ga, a er shiada i dedoo sha ci u Yehova, á kaa a ve ér Elisha ka profeti u Aôndo u mimi. (2 Utor 5:1–19) Shi ka tse yô, Tor Yoshia lu wanye je kpa cia wener tar na vihi yum ga, a wa atindi a kwaghaôndo kpo kpo kpo a hiden a mcivir u mimi, je yô a hide a sôr tempel u Aôndo kpaa shi a hide a ityô na Iserael gba civir Yehova her er ve vanden eren kera nahan. Kwagh u jighjigh na man mciviraôndo na doo un kpishi. (Kroniku u sha 2, ityough 34 man 35) Daniel man azende a na a Mbaheberu atar lu ken Babilon, kpa ve hungur a iti ve i ve mba mbacivir Yehova la ga, i kighir ve shi i mee ve sha igbenda kposo kposo kpa ve tile sha mimi her. Kwagh ne tese wang je ér kunya kôr ve u lun mbacivir Yehova ga. —Daniel 1:8–20.
I̱ Doo U Er Ú Lu Orkristu Yô
14, 15. U se tan ihagh ser se mba Mbakristu la wa nyi man nyi kere?
14 Ior mba civir Aôndo mban za ikyura sha ci u yange i doo ve u eren ishima i Aôndo. Se nyian di ye? Kanyi se er ve se ta ihagh ser se mba Mbakristu?
15 Hiihii yô, se tese ser se mba a iwuese sha er se lu nongo a ior mba i yer ve sha iti i Yehova, man sha iveren i se zough a mi hen Aôndo la. Aôndo lan ior mba ve lu mba nav ga. Apostoli Paulu lu uma sha shighe u anzughul a kwaghaôndo dumbur yum la, nahan á nger wener: “Ter fa mba Nav.” (2 Timoteu 2:19; Numeri 16:5) Ka i doo Yehova a mba ve lu “mba Nav” la. A kaa ér: ‘U nan bende a ven yô, nan bende a hongorshe Wam je.’ (Sekaria 2:8) Kwagh ne tese wang je ér se doo Yehova ishima. Nahan, mlu wase vea na har sha mdoo u a doo se ishima tsung la. Paulu kaa ér: “Aluer Aôndo Una doo or ishima yô, nan kpaa Aôndo fa nan.”—1 Mbakorinte 8:3.
16, 17. Ka sha ci u nyi mbayev man mbaganden mba ve lu Mbakristu cii vea ta ihagh a dyako ve i̱ ken jijingi laa?
16 Doo u agumaior a i yese á, á lu Mbashiada mba Yehova vea kar ayol a ve vea nenge aluer mlu u ve lu ikyooso ikyooso a Aôndo la na mba hemban taver a taver ken jijingi kpa vea fa yô. Ka kwagh u vea gba suur di sha jighjigh u nan u mbamaren vev tseegh tsô ga. Paulu nger kwagh sha kwagh u hanma or u nan civir Aôndo ér: ‘Nana tile, shin nana gba kpaa ka kwagh u ter u nan je.’ A za hemen ér: “Hanmô wase nana va ôr Aôndo kwagh u nan iyol i nan je.” (Mbaromanu 14:4, 12) Sha mimi yô, u gban di civir Yehova tsô wer mbamaren ou mba civir un la una fatyô u wasen we u yan ikyar i tsan vea Aôndo ga.
17 Yehova ndera lun a mbashiada nav ka kwagh u nyian ga. Ve hii sha shighe u orjighjigh Abel la je, tsa war kuman anyom dubu ataratar, zan zan va ar sha shighe u “zegeikpelaior” i Mbashiada mba ainge ne zan zan kar za kure sha ikpelaior i civir Yehova i ia va ya dyako u tsôron la. (Mpase 7:9; Mbaheberu 11:4) Se mba ior mba ve sember nyôron gôgô nongo u mbacivir Aôndo sha mimi ne. Sha mimi yô, se mba a dyako i ken jijingi i doon je gande!
18. Aeren a ase a dedoo la pav se ver kposo a tar ne nena?
18 U lun Orkristu la shi wa anza a dedoo man akaa a nga a na ve i fa se ér se mba Mbakristu la kpa ker. Ka “Gbenda” la tseegh ú lu gbenda u uma man u sha ishima i Aôndo ye. (Aerenakaa 9:2; Mbaefese 4:22–24) Mbakristu ka ve ‘kar akaa cii, ve kôr u dedoo la gbang je.’ (1 Mbatesalonika 5:21) Se fa mkposo u kwaghaôndo u Kristu man tar u ú lu paleghaa a Aôndo ne kuma se. Yehova pav mcivir u mimi man u aiegh wang je. A pase kwagh ne sha zwa u profeti Malaki wener: “Né gema né kav mkposo u orperapera a iferor, man u or u civir Aôndo a or u civir Un ga la.”—Malaki 3:18.
19. Kanyi kwagh Mbakristu mba mimi vea tsa a er ga?
19 Er i doo u suur sha Yehova ken tar u ú saa ishe ne nahan, kanyi ia wase se se za hemen u tan ihagh ken Aôndo wase shi fan ser se mba Mbakristu? Se zua a mbamhen mba wasen se ken ngeren u ken hemen la. Er ú lu timen sha akaa ne je, fa wer: A shi didi kpa Mbakristu mba mimi vea vôr u civir Aôndo ga.
[Footnote]
^ Heen ne, ka mlu wase u ken jijingi la tseegh i lu ôron kwagh teren ye. Aluer asande a ior agen nga a angev mbu ken ityou yô, doo u vea za ker icigh hen ior mba ve ser twer yô.
Baver We Kpa?
• Mbakristu vea “ta ihagh ken Ter” nena?
• Kwagh u Mose man Asav la tese u nyi?
• Ka ior mba i er kwagh ve ken Bibilo mba hana yange doo ve u eren Aôndo tomo?
• U se tan ihagh ser se mba Mbakristu la wa nyi man nyi kere?
[Study Questions]
[Picture on page 6]
Sha anshighe ugen la, akperan gba Mose ken ishima sha mlu na
[Pictures on page 7]
Kunya kôr mbacivir Yehova mba tsuaa mbara a mlu ve ga