Ivaa Ia Fatyô U Zan Doon Ken Tar U Ainge ne
Ivaa Ia Fatyô U Zan Doon Ken Tar U Ainge ne
“Haa nen dooshima iyol, ka kwagh u maghen mlu u vough je la.”—Mbakolose 3:14.
1, 2. (a) Ka sea gema ashe sea kenger ken nongo u Kristu nahan, kanyi kwagh i̱ taver se ishima ka se nenge a mi kere? (b) Gba u mba ve vese ayol a ve la vea er nyi kwagh ve ivaa ve ia za ikyura?
NONGO u Kristu ngu a ior ker kpishi mba ve vese ayol a ve i kom anyom 10 shin 20 shin 30 shin i hembe nahan je kpaa, mba ve lu a kasev vev shin noov vev her imôngo ve eren mbi-mbi-mbi a ve ga yô. Ka sea nenge a amba ne nahan i doo se ga he? Ve mban cii ve var a kasev vev man noov vev her gbang gbang, sha ashighe a kwagh a ze ve iyol kpishi je kpaa.—Genese 2:24; Anzaakaa 18:24.
2 Aluer ú pine ior kpishi kwagh u ivaa ve yô, vea kaa a we ér mbamzeyol mba ker. Kwase ugen u tôvon sha akaa kaa ér: “Noov man kasev mba ve lu imôngo saan saan je kpa ayôôso nga de lun hen atô ve ga. Ashighe agen yô, ka ve lu zwa ahan ahan, kpa ka ashighe cii ga . . . Nahan kpa, . . . mayange je mba de ér [mtaver] u tar ne a̱ vihi ve ivaa ga.” Noov man kasev mba ve vese ayol a ve, ve lu imôngo kundu kundu cii fa u nôngon a mbamzeyol mba i gbe u vea tagher a mi kpee la, kua mbamtaver mbagenev mba̱ aluer mba a ônov yô, vea tagher a mi keng a bunde ga la kpaa. Mfe u ve mban cii ve zough a mi sha akaa kposo kposo la wase ve ve fa er dooshima u mimi a “been mayange ga” yô.—1 Mbakorinte 13:8.
3. Ka nyi i lu zan hemen sha kwagh u ivaa pavene, man ka mbampin mba nyi ve gem ve dugh sha kwagh nee?
3 Nahan cii kpa, avese agenegh umiliôn umiliôn kure vihi kpen kpen. Ibaver igen kaa ér: “Aluer í pav iyenge i noov man kasev mba ve vese ayol a ve ken tar u Amerika nyian cii avegher ahar yô, í ver ishima ér ken hemen yô vegher môm u mbara mba ve vese ayol a ve la cii vea pav ivaa ve. Tiôn u iyenge i ve mba shon mba vea pav ivaa la cii á lu ior mba ve vese kasev shin mba ve er noov i lu a kuma anyom anigheni kpaa ga yô . . . Ve mba vea pav ivaa mban kpishi aluer ve hide ve er kasev shin noov kpa a gba ve shami ga tsô shi vea pav.” Ken ityar i ngise i faan paven ivaa ga je kpa, kwagh kôr gema hegen. Ikyav i tesen yô, ken anyom a a sember karen ne ior gema paven ivaa ken tar u Japan je ishar de. Ka mbamzeyol mba nyi nahan ve ne ve ior ve lu paven ivaa? Ashighe agen mbamzeyol mba shon ka ve bende a mba ken nongo u Kristu je kpaa. Nahan kanyi ia wase noov man kasev ve ivaa ve ia doo, shin er Satan a soo ér kwagh a lu nahan ga kpaa?
Palegh Akaa a Vihin Ivaa
4. Ka akaa a nyi nahan aa fatyô u vihin ivaa?
4 Mkaanem ma Aôndo wase se u kaven akaa a a fatyô u vihin ivaa yase yô. Ikyav i tesen yô, mkaanem ma Paulu ngise ôr sha kwagh u ayange a masejime la ma pase se akaa ne. Time ase sha ma tsô ú nenge, ma kaa ér: “Ken ayange a masejime yô, ashighe a ican aa va. Gadia ior vea hingir mbawan ayol a ve iko tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve iko ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la. Nyagh ambaaior la.”—2 Timoteu 3:1–5.
5. Or u nan ‘we iyol i nan ikyo tseegh’ nana vihi msaanyol u ken ivese i nan la nena, man Bibilo wa se kwagh sha kwagh ne nena?
5 Aluer se time sha mkaanem ma Paulu man vighe vighe yô, se nenge ser akaa a Paulu a ter a la kpishi aa fatyô u vihin ivaa kuaa je. U tesen ikyav yô, “mbawan ayol a ve iko tseegh” ka mba kwagh a hembe gban ve a ayol a ve tseegh, ve we mbagenev ikyo ga yô. Noov shin kasev mba ve we ayol a ve ikyo tseegh yô mba eren kwagh u a lu u sha ishima ve tseegh. Ka vea norom sha kwagh yô, mba hir ijime ga. Imba inja ngin nahan ia na nom man kwase vea lu imôngo saan saan je kpa? Mayange ga. Apostoli Paulu wa Mbakristu kwagh sha inja kpen kpen, man kwaghwan ne ngu sha ci u mba ve vese ayol a ve la kpaa. Á kaa wener: “De eren nen kwagh sha u wan ayol a en iko tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen er orgen hemba nan yô. Hanma or nana de kera waan akaa a nan iyol i nan iko tseegh ga, kpa nana wa akaa a mbagenev iko kpaa.”—Mbafilipi 2:3, 4.
6. Inyaregh ki soon kia fatyô u vihin ivaa nena?
6 Inyaregh ki soon kpaa kia fatyô u van a mpav hen atô u nom man kwase. Paulu ta se icin ér: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe. Gadia mishe u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.” (1 Timoteu 6:9, 10) Kwagh gema er vihi yô, noov man kasev kpishi nyian wa icin tan i Paulu ne ikyo ga. Ve tsue ve tume ken inyaregh ki keren, nahan kwagh kera fe gban ve a kasev vev shin noov vev ga, iliam i lamen ayol a ve kundu kundu kpa ban hen atô ve, shi mba kera fe lun imôngo kpaa ga.
7. Ashighe agen yô, ka ieren i nyi nahan ka i na ve nom shin kwaseya nan er idyaa?
7 Paulu shi kaa wener, mbagenev ken ayange a masejime ne vea lu “mbalun wang ga, man mbalun a dooshima ga man mba ve soo u himen iyongo kpaa ga” yô. Iceghzwa i ivesegh la ka beer kwagh ga cii; ka ibumun i ka i̱ kange nom man kwase ve lu gbekeke, ve eren kwagh sha mimi ayol a ve yô. (Malaki 2:14–16) Nahan kpa, noov mbagenev yô kasev vev kera doo ve ishima ga, ka ve shi hian a kasev mbagenev, kasev mbagenev di kpa mba eren sha zwa la. Kwase u lun anyom ikyundugber kar ugen, u nom na undu un yô pase wener, shighe u nom na lu a undu un ga la je kpa un hii u nengen avindir, sha ci u yange doo a kasev kpishi, á gbaa hian a ve tsô. Mayange fatyô u fan wener un vôso kwase yô, doo u una hian a kasev mbagenev ga ze. Ieren ne yange i̱ vihi kwase ne kpishi, nahan á yila nom na teghelee á venda kwagh u lu eren la a na. Kpa orti nômbo ikyôr zan zan va hingir u eren idya. Shin er kwase ne venda kwagh a nom na kundu kundu nahan kpa, á ungwa un her ga. Tsô, á gba ken imeen fese je, ngôôr ga cii.—Anzaakaa 6:27–29.
8. Kanyi ia fatyô u tuur or nana er idyaa?
8 Kpa Bibilo ta se icin wanger wanger ér se de eren idya ga! “Or u nan er idya a kwase yô, nan kav kwagh je ga, or u nan er nahan la, ka uma u nan nan lu timin ye.” (Anzaakaa 6:32) Kera cii je, ka gbe kenden or ken ishima gaegh tsô maa nan moughon nan za eren idya ga. Er Yakobu, un u lu môm ken mba yange ve nger Bibilo la á pase nahan, cii man or a er idya yô, ashighe kpishi isharen la ka i vande lun nan ken ishima, nan henen sha i̱ gbem cii ve nan va kighir nan mough nan za er idya ye. (Yakobu 1:14, 15) Nahan yô, nom shin kwase u nan er isholibo la, ka nan hii u eren mbi-mbi-mbi a kwase u nan shin nom u nan u yange nan bum ér nana lu a nan gbekeke la kure kure cii ve nan va gba ken isholibo la ye. Kpa, Yesu ngise kaa ér: “Ne ungwa er i kaa er: De eren idya ga. Kpa Mo yô, M kaan ne Mer, hanma or u nana kenger kwase sha u nana tôm un yô, nan er idya a na ken ishima je ve.”—Mateu 5:27, 28.
9. Kwaghwan u dedoo u a lu ken Anzaakaa 5:18–20 la ngu kaan ér nyi jimi?
9 Nahan yô, ka kwagh u takerada u Anzaakaa u er, i nger shiin heen ne, a lu ieren i dedoo man i mimi i or a er ye. Anzaakaa kaa ér: “Imbor you i̱ lu a iveren, ember kwase wou u sha uye la: ashim u doon ishima, morya u doon kenger; de atumba na a̱ kuma u sha ashighe cii; gba ken imeen i dooshima na gbem. Inja na nan man u gbe ken imeen i kwase ugene, wan wama, man u kuv kwase u u fe nan ga yôô?”—Anzaakaa 5:18–20.
I̱ De Torough We U Eren Ivaa Ga
10. Er nan ve i doo u se tôô shighe se fa or u se soo u vôson la vindi vindii?
10 Mbamzeyol vea fatyô u duen ken ivese aluer torough nomsoor man kwase iyol u vôson ayol a ve inja er or gba sha usu nahan yô. Alaghga mba ve soo u vôson ayol a ve la mba a kuma kwagh kpaa ga. Shin alaghga ve tôô shighe ve fa ayol a ve tsembelee ga—ve fa akaa a doon ve ishima kua akaa a vihin ve ishima ga, shi ve fa mbaawashima vev kpaa ga, shi icombor ve kpa ve tôv ve fa ga. Hemba doon u se wa ishima, se tôô shighe se fa ishiôr yase la doo doo je. Nenge ase kwagh u Yakob, wan u Isaka yange er ne. Yange er ter na kem tom anyom ataankarahar cii ve mase vôson Rahel ye. Er Rahel doo un ishima sha mimi, lu sha ci u mdoom nam mara keng ga yô, er tom ne je wa ikyo ga.—Genese 29:20–30.
11. (a) Ivaa ngi i zua unô ioro? (b) Er nan ve i doo u mba ve vese ayol a ve la vea ôron kwagh sha kwaghfana?
11 Ivaa saa di sha dooshima u hen atô u nomsoor man kwase la tseegh ga. Ivaa ngi i zua iorov uhar mba icombor ve i lu kposo shi aeren a ve man mlu ve kpa a lu kposo yô, shi ashighe kpishi mfetakerada ve kpa ngu a lu kwagh môm ga. Ashighe agenegh je yô, aeren a ve a ityôô kpa nga a kaha, shi ijô ve kpa i kaha. Ka a gande kera kera kpa, mbamnenge vev sha akaa di tsô yô mbá ve kaha keng. Gbenda u nom man kwase ve pasen mnenge ve sha kwagh la ngu hange hange ken ivese. Vea fatyô u pasen ishima ve sha kwagh sha gbenda u puun a puu ayol a ve shin sha u zeren waren ayol ve, shin a fatyô u lun sha gbenda u taver asema ayol a ve shin maan a maa ayol a ve kpaa. Sha kpôô yô, kwaghôron u mba ve vese ayol a ve ve er ayol a ve la una fatyô u nan ve ishimavihin shin nan ve mkpeyol. Kwaghôron u gban ôron gaegh la una fatyô u van a haghelaa ken ivaa.—Anzaakaa 12:18; 15:1, 2; 16:24; 21:9; 31:26.
12, 13. Er nan ve i doo u se hen sha kwagh u ivaa eren sha mimini?
12 Nahan yô, doo u se kpe iyol se fa or u se soo u vôson nan la vindi vindi. Kwase Kristu ugen u a er nom anyom a kar imôngo hegen yô, kaa ér: “Aluer ú zua a or u ú soo wer ú vôso nan yô, hen sha anza er pue nahan aa ú soo wer ú nenge a mi ken or la yô. Aluer ú nenge a anza ataankarahar ken a nan á doon we yô, pine iyol you wer, ‘Anza atar á a mase shin la yô, er nan lu a mi ga nahan kpa me fatyô u lun a nan imôngo? Me fatyô u wan ishima a nan ayange ayange kpa?’ Aluer war taver we yô, de we ityou ga, hide shi hen a ishima you tsung.” Kpa, doo u se er kwagh ne sha mimi wase. Aluer ú soo u eren ivaa yô, fa wer a tsa sha won kpa ú zua a or u nan lu vough, aa mshi shio ga. Shi, kape we di kpa or u ú vôso la nana nenge a mbamshi ken a we je la!—Luka 6:41.
13 Aluer ú er kwase shin ú vôso nom yô, fa wer, ú kera ngu sha ian you ga. Paulu ta se iwanger sha kwagh ne, wener: “Sarem u ma ne lu a ishima i nyian ga. Or u nan lu kwav yô, ishima ka i nyian nan sha akaa a Ter, er nana er man á doo Ter yô. Kpa or u nan lu a kwase yô, ishima ka i nyian nan sha akaa a taregh, er nana er man á doo kwase u nan yô, tsô asema hingir nan ahar. Kpa kwase u nan lu kwav shin iniunkwase yô, ishima ka i nyian nan sha akaa a Ter er nana er man nana lu wang ken iyol man ken jijingi kpaa yô. Kpa u nan lu a nom yô, ishima ka i nyian nan sha akaa a taregh er nana er man á doo nom u nan yô.”—1 Mbakorinte 7:32–34.
Er i Hii Ve Avese Agen a Tse Ga Yô
14, 15. Ka akaa a nyi nahan nga a na ve nom vea kwase ve kera lu kangenaa ga?
14 Semberee ne, kwagh er kwase Kristu ugen vihi kpen kpen, nom na u ve vese ayol a ve i kom anyom 12 yô pav ivaa la yem za nyôr kwase ugen. Cii man kwagh ne a er yô, kwase ne vande nengen ajinge je kpa? Á pase wener: “Nomom yange de msen u eren kuaa. Á kôr ave sha ankwagh u cuku maa á bunde mbamkombo mba Mbakristu je, kwaghaôndo kpa kera pasen ga. Shi kera soon u lun a mo imôngo ga, á senge wener un ngu eren kwagh shin un vôr yum. Kera lamen a mo kpaa ga, kua sha akaa a ken jijingi kpaa. Kunya yange ú kôrom a na kpishi sha imba inja ngira nahan. Yange gema inja kuaa, kera lu er m fa un ve se vôso ayol a ase la ga.”
15 Ka kwase ne tseegh ga, mbagenev kpa kaa ér noov vev shin kasev vev mba ve pav ivaa a ve la yange ve vôr ken jijingi, nahan ve de Bibilo i henen kua msen u eren kpaa, shi ve de u zan mbamkombo mba Mbakristu kpaa. Inja na yô, noov man kasev kpishi mba ve pav a kasev vev shin noov vev la, de ér ikyaryan ve a Yehova i̱ vihi. Nahan kwagh kera gbaan ve sha akaa a ken jijingi ga. Shi ve de u nengen Yehova ér ka Aôndo u uma. Ityendezwa i í er sha kwagh u tar u he u perapera la kpa hingir ve gbilin kwagh. Ashighe agen je yô, nom shin kwase u nan kera til sha mimi ga ne, ka nan hii u vôron ken jijingi cii ve nan va hii u duen za tsan a or ken won ye.—Mbaheberu 10:38, 39; 11:6; 2 Peteru 3:13, 14.
16. Kanyi ka i wase ivaa i taveraa?
16 Nahan kpa, orgen u un vea kwase na ve lu imôngo saan saan yô, kaa ér ve yô, ivaa ve doo sha ci u ve taver ken jijingi. Mba eren msen imôngo shi mba henen kwagh kpa imôngo. Or shon kaa nahan wener: “Se mba er Bibilo imôngo. Shi se mba dugh kwaghaôndo u pasen kpa imôngo. Ka i saan se iyol u eren akaa agenegh kpa imôngo.” Nahan ieren ve ne tese se wanger wanger ér: Aluer nom man kwase kôr ikyar a Yehova yô, kwagh ne una taver ivaa ve la kpen kpen je.
Lu a Inja i Mimi shi Lamen a Ikyar Ú Kpaa
17. (a) Ka akaa a vesen ahar a nyi nga a na ve ivaa i doo? (b) Paulu ôr kwagh u dooshima u Mbakristu la nena?
17 Akaa agen ahar kpa nga, a nga a na ve ivaa i doo yô; akaa shon yô ka: inja i mimi man kwaghôron. Nomsoor man kwase ka vea soo ayol a ve tsung je dooshima ve la una yeghen a yegh yô, mba fe nengen a vegher u bo u or u nan doo ve ishima kpishi la ga. Amba ne ashighe agen ka a vôso ayol a ve a ishimaveren ér hanma kwagh una za a doo, sha ci u alaghga ken takerada u ve er shin ma senema u ve nenge la yô, kwagh er nahan. Kpa, ka vea vôson ayol a ve shighe a karen yô ve hii u nengen er kwagh a lu nahan keng ga yô. Nahan ashighe agen yô, mbamshi shin aeren a kiriki a doon ga la nga a hingir mbamzeyol mba vesen hen atô ve. Aluer kwagh er nahan yô, doo u Mbakristu vea lu a ityamegh ki jijingi ki ki kou dooshima kpa ker la. (Mbagalatia 5:22, 23) Sha kpôô yô, dooshima ngu a tahav kpen kpen, kpa ka dooshima u hen atô u nomsoor man kwase la ga, ka u Mbakristu la. Paulu ôr kwagh u imba dooshima u Mbakristu la, wener: “Dooshima we ishima, lu sar sar, . . . keren kwagh na iyol na tsô ga, nyoon ishima ga, koson kwagh u bo ken ishima ga. . . . Dooshima we ishima a akaa cii; un ne jighjigh sha akaa cii, luun a ishimaverenkeghen sha akaa cii, taver ishima sha akaa cii.” (1 Mbakorinte 13:4–7) Sha kpôô yô, dooshima u mimi we ishima a mbamyina mba ior mbagenev. Shi veren ishima ér or nana lu vough, a mshi shio ga ze.—Anzaakaa 10:12.
18. Kwaghôron una fatyô u taver ikyaryan i nom man kwase nena?
18 Kwaghôron kpa ngu hange hange. Aluer nom man kwase vea sember vôson ayol a ve shin vea vôso ayol a ve anyom aa kar imôngo je kpa, doo u vea lamen ayol a ve shi vea keghen ato a ikyar ve kpaa. Nom ugen kaa wener: “Mo man kwase wam ka se pase ishima yase sha kwagh gbar gbar, kpa ka i lu ken bem.” Mba ve vese ayol a ve ve lu imôngo ayange a kar la, ka ve hen u keghen ato a kasev vev shin noov vev, nahan ka vea kenger a kenger noov vev shin kasev vev tseegh kpa maa ve fa kwagh u ve soo je. Inja na yô, noov man kasev mba ve er ivaa ve lu imôngo saan saan cii, anyom nga a nguren karen yô ve fa ayol a ve kpishi, nahan a mkaanem shio je kpa nom ngu a fa ishima i kwase na sha kwagh, kwase di kpa nahan. Kasev mbagenev kaa ér ka vea lamen a noov vev kpa mba keghen ato a ve ga. Noov mbagenev di kpa wa̱r kasev vev ér ka shighe u ka vea lu a ian ga la keng, ka i hemba maan kasev vev iyol u lamen a ve ye. Kwaghôron ka ieren i sha mhôôn man i sha mkav kpaa. Kwaghôron u injaa ka kwagh u doon u mayange noov man kasev vea de u eren ga yô.—Yakobu 1:19.
19. (a) Er nan ve zamber a lu kwagh u taver kpishi? (b) Kanyi kwagh ngi i tuur se ve se zamber a or u se er nan kwaghbo la ser nana ya se anyi?
19 Ashighe agen yô, kwaghôron ngu a kua zamber kpaa. Zamber ka kwagh u taver kpishi. Saa or nana hiden a iyol ijime keng ve nana fatyô u lumun ibo sha kwagh u nan er ye. Kpa, sha mimi yô, ieren ne ngi i na ivaa i hemba taver a taver cii! Zamber u mimi kpe iyol, ngu a bunde ayôôso shi a wase nom man kwase ve de ayol a ve kwaghbo sha mimi shi ve sôr kwagh u a ve ve a ayôôso la kpaa. Paulu kaa wener: “Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la.”—Mbakolose 3:13, 14.
20. Mbakristu mba lun a kasev vev shin noov vev kundu kundu ken uyaav vev man sha ishigh ki mbagenev kpaa nena?
20 Shi, gba u nom man kwase vea wasen ayol a ve; kwagh ne kpa ngu hange hange ken ivese. Doo u noov man kasev mba ken Kristu vea na ayol a ve jighjigh shi vea suur sha ikyar ve kpaa. Mô ve tsô nana de tulen ugen hiden a nan ijime ga, inja na yô, nana de eren kwagh u una na nom u nan shin kwase u nan nana hen ér nan wa telegh ga. Doo u a fa ne noov ér ne mba ior mba wuese kasev enev, ne kasev kpa doo u a fa ne nahan; mayange de lun nen ior mba puun a puu kasev enev shin noov enev ga. (Anzaakaa 31:28b) Sha mimi yô, doo u se heen kasev asev shin noov asev sha u eren asenge a doon ga a ve ga. (Mbakolose 4:6) Ka sea pasen mba se vese ve la hanma shighe ser ve doo se ishima yô, mlu u se lu kangenaa la ngu a hemba taver a taver cii. Aluer ú ovur nomou shin kwase wou uwegh iyol, gayô ú yila un iti i sha dooshima tseegh kpa una kav er ú lu kaan a na wer: “Ú doom ishima. Doom kpishi er se lu imôngo nahan” yô. Akaa a i er sha heen ne cii nga a na ivaa i doo shi a wase ivaa i za ikyura ken tar u ainge ne kpaa. Kwaghngeren u a dondo ne una pase se akaa agenegh kpaa, shi una seer ôron se akaawan a ken Ruamabera a se er ve ivaa yase ia doo yô. *
[Footnote]
^ Aluer ú soo u zuan a iwanger seer yô, za ôr takerada u Kwaghmyer u Msaanyol hen Tsombor la, ka Mbashiada mba Yehova ve gber ú ye.
Ú Fatyô u Pasen Kpa?
• Ka akaa a nyi nahan nga a vihi ivaa?
• Er nan ve ivaa i eren torough torough la i lu kwagh u dedoo ga?
• Mlu u ken jijingi u mba ve vese ayol a ve la ngu a bende a ivaa ve nena?
• Ka akaa a nyi nahan nga a na ivaa i taver dông nô?
[Study Questions]
[Picture on page 18]
Ivaa saa di sha dooshima u hen atô u nomsoor man kwase la tseegh ga
[Pictures on page 20]
Aluer nom man kwase taver ken jijingi, shi mba ikyua a Yehova kpaa yô, ivaa ve ia doo