Á Yima Se Sha Mrumun U Sha Mhôôn, A Lu Sha Tom U Eren Tseegh ga
Á Yima Se Sha Mrumun U Sha Mhôôn, A Lu Sha Tom U Eren Tseegh ga
‘Ka sha jighjigh u nan i yem se ye, ka sha tom u eren ga, sha er ma or nana̱ de te ihagh ga yô.’—MBAEFESE 2:8, 9.
1. Mbakristu mba kposo a ior kpishi sha gbar u igwaakaa i ior ve eren la nena, man er nan ve ve lu kposo?
IOR mba te ihagh ainge kpishi sha igwaakaa i ve er yô, mba tem tan ave vanger sha igwaakaa shon ga. Kpa, Mbakristu yô mba eren nahan ga. Mba zeren kehen a akaa a ve er sha ishigh ki mbagenev ga, ka a lu akaa a ve er ken mcivir u mimi je kpaa. Ka saan ve iyol kpishi sha akaa a ior mba Yehova jimin cii ve zough ave ve er yô, nahan kpa, mba gem mba tenge korough ér ior ve fa akaa a ve asange asange ve er ga. Ve fa ér aluer or er kwagh sha ci u Yehova yô, ka kwagh u nan er la kwagh a hembe gban sha mi ga, kpa ka ishima i mimi i nan er kwagh shon a mi la. Nahan aluer or va zua a iyua i uma u tsôron kpa, ka sha ci u igwaakaa i nan er la ga, kpa ka sha ci u jighjigh u nan u nan man mrumun u sha mhôôn u Aôndo.—Luka 17:10; Yohane 3:16.
2, 3. Paulu yange ta ihagh sha nyi, man lu sha ci u nyi?
2 Apostoli Paulu kpa yange fa dedoo ér doo u or nana ta ihagh sha akaa a nan er ga. Yange er msen kwa tar wener, ‘saa u i ne un ken iyol’ la ma a̱ dugh ken a na kera. Nahan, Yehova gema kaa a na ér: “Mrumun u sha mhôôn Wam kuma u, gadia agee Am ka a tema hoghom hoghom ken isheer.” Paulu lumun kwagh u Yehova ôr a na ne a ahon a gban shio, nahan a kaa ér: “Me ta ihagh sha isheer saan saan sha u agee a Kristu a̱ tema ken mo yô.” Doo u se hiden a ayol a ase ijime er Paulu nahan.—2 Mbakorinte 12:7–9.
3 Yange i fa Paulu doo doo sha igwaakaa i á er ken tom u Kristu la, nahan kpa a fa er i lu sha tahav nav man un er akaa la ga yô. Nahan a ôr mkaanem man a iyol hiden ijime wener: “Mo u m hembe gban ijime ken uicighanmbaiorov cii yô, i nam mrumun u sha mhôôn ne u ôron atôatyev Loho u Dedoo u mngee u Kristu A ngee a akaa i gande u tôvon la.” (Mbaefese 3:8) Mkaanem ma Paulu man tese ér lu or u tan ihagh ga, shi lu or u tesen wener un neer perapera kpaa ga. “Aôndo hendan kwagh a mba ve gengese ayol, kpa mba ve hir ayol a ve ijime la yô, ne ve mrumun u sha mhôôn.” (Yakobu 4:6; 1 Peteru 5:5) Se mba dondon ikyav i Paulu ne sha u hiden a ayol ase ijime, nengen ayol a ase ser se hemba gban ijime ken anmgbianev asev cii kpa?
“Hanma Or Nana̱ Nengen Er Orgen Hemba Nan”
4. Ka sha nyi gbenda nahan alaghga ashighe agen a taver se u nengen ser mbagenev hemba se?
4 Apostoli Paulu wa Mbakristu kwagh wener: “De eren nen kwagh sha u wan ayol a en iko tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen er orgen hemba nan.” (Mbafilipi 2:3) Alaghga a war taver se u nengen ser orgen hemba se, hemban cii yô, aluer se mba sha ma iantom i vesen yô. Aluer taver se u hiden a ayol a ase ijime yô, adooga tsô tar ne pande tsar se gesa u gban u a dumbur ken ú nyian yum ne. Afaerenga, zum u se lu iyev la i tese se u gban gesa a anmgbianev asev mbakiriki hen ya, shin shighe u se lu ken makeranta la i tese se u gban gesa a mba se lu klase môm a ve yô. Alaghga yange i shi wan se kwagh ér se neer anumbe shin takerada u fan ken makeranta. Sha kpôô yô, u eren kwagh u dedoo sha gbashima wase cii ka kwaghbo ga. Nahan kpa, Mbakristu mba eren kwagh sha gbashima sha u keren gwa ga, kpa ka i lu sha u a wase ve kua mbagenev kpaa. Kpa, aluer hanma shighe ka saren se u eren kwagh u se ya gwa ior ve wuese se yô, kwagh la ka kwaghbo. Sha ci u nyi?
5. Aluer se palegh gesa u gban a mbagenev ga yô, kanyi ia er se?
5 Aluer or ngu gban gesa a mbagenev, shi nan ngu tan ihagh yô, aeren ne aa na nana nengen mbagenev ér mba a ice sha ityou ga, shi nana hingir or u moron iyol kpaa. Shi alaghga nana gba tômon mfe u mbagenev man aan a tom a ve. Anzaakaa 28:22 kaa ér: “Or u nan we bo [shin iwuhe, NW ] yô, nan kumbur sha u hingir ornyar, nan kera fa ase er ibanave ia va tser nan ga.” Shi alaghga je yô, imba or la nana kar a ishima i nan sha imanger nana er ma tom u nan kom u eren cuku tsô kpaa ga yô. Alaghga nana hii u gban ahon sha tom u mbagenev shi puun ve kpaa sha er nana zua a kwagh u kôron ave yô, imba ieren ne ka i Orkristu ga. (Yakobu 3:14–16) Kohol cii yô, ieren ne ia na or nana gba keren ér i ungwan a nan tswen.
6. Bibilo ta se icin sha kwagh u vemben ayol a ase nena?
6 Bibilo wa se Mbakristu kwagh ér: “Se̱ de kera tan ihagh sha ayol a ase ga, shi se̱ de vemben ayol a ase man se̱ de eren iwuhe ayol a ase kpaa ga.” (Mbagalatia 5:26) Apostoli Yohane ngise ôr kwagh u Orkristu ugen u lu a aeren ne yô. Yohane kaa wener: “M nger nongo u Kristu kwagh, kpa Diotrefe, u tamen a doo un ken a ven yum la, a rumun se ga. Nahan yô, aluer me va yô, me nder kwagh ne, me ôr un akaa a a lu eren la. A lam sha a vese vihi kpishi. Nahan kpaa kuma un ga, a kera nyôr a anmgbianev mbara ken ya na ga.” Doo u Orkristu nana lu a imba inja ne ga cii!—3 Yohane 9, 10.
7. Kanyi i doo u Mbakristu vea palegh hen ajiir a tom a a gbe gesa ainge kpoghuloo nee?
7 Sha mimi yô, Orkristu nana fatyô u palegh hanma inja gesa u gban cii elegh elegh ga. U tesen ikyav yô, alaghga Orkristu ngu eren tom hen ijiirtom i í gbe gesa sha kpenga u eren a ijiirtom igen yô. Aluer Orkristu nan ngu eren tom hen imba ijiir la je kpa, doo u nana eren tom u nan sha icivir man sha dooshima shi nana waan mbagenev ikyo kpaa. Shi doo u nana palegh anyighe man aeren agen a i gbe u Orkristu nana er a ga yô, shi i̱ de fe nan ér nan ngu or u gban gesa kpoghuloo ga. Shi nana̱ de henen ér ka u nana due ityough sha tom u nan lu eren la i hembe lun kwagh u vesen ga. Aluer gba u Orkristu nana lu a inja ingin nahan hen ijiirtom i nan yô, hemba doon u nana lu a i ken mcivir u Aôndo ga he?
‘De Karen Tom Wou sha Ú Orgen Ga’
8, 9. (a) Er nan ve i doo u mbatamen mba ken Kristu vea gbaan gesa ayol a ve ga? (b) Er nan ve mkaanem ma i er ken 1 Peteru 4:10 la ma lu sha ci u hanma or u civir Aôndo ciili?
8 Mkaanem ma Aôndo a ne i nger la ôr ieren i̱ í gbe u Mbakristu vea lu a mi er ve lu civir Aôndo yô, ma kaa ér: “Hanma or nana̱ kar tom u nan iyol i nan, ka nahan man nana lu a ityôikaa i tan ihagh ken iyol i nan tseegh, á kera lu sha kwagh u orgen ga ye.” (Mbagalatia 6:4) Mbatamen mba ken tiônnongo mba karen tom ve sha u orgen ga, sha nahan yô, mba eren tom ken ijoughave. Ka i saan ve iyol kpishi sha iwasen i hanmô ve ka nan na sha er i kpe tiônnongo cii iyol la. Nahan mba nenge ér vea gba gesa ayol a ve ga, kpa mba nenge u veren tiônnongo cii ikyav i dedoo sha er vea lu ken mzough yô.
9 Mbatamen mbagenev mba vesen a mbagen, mbagenev di hemba tsan ken tom u ortamen a mbagen shin mfe ve u marami hemba u mbagenev. Nahan alaghga vea hemban eren kwagh tsev tsev a mbagenev, shin vea hemba lun a mkav u tôvon sha kwagh a mbagen. Ka nahan ve mbatamen ve lu a ityom i eren ken nongo u Yehova kposo kposo ye. Kpa, mba karen tom ve sha u orgen ga, sha ci u mba eren sha kwaghwan u a kaa ér: “Er hanma or nan ngohol iwua i sha mrumun u sha mhôôn nahan yô, eren nen ayol a en tom a mi er mbatomov mba mimi mba sha mrumun u sha mhôôn u Aôndo sha igbenda kposo kposo la nahan.” (1 Peteru 4:10) Jighilii yô, ivur ne ngi sha ci u mbatomov mba Yehova cii, gadia hanma or u civir Aôndo yô, i na nan iyua i mfe u vough shi nan ngu eren tom u Mbakristu u pasen kwagh kpaa.
10. Se er nan ve Yehova una lumun tom u se lu eren unuu?
10 Aluer se mba eren Yehova tom sha u se kende a ayol a ase sha, se hemba mbagenev yô, Yehova una lumun tom u se lu eren un la ga, kpa aluer se mba eren un tom sha dooshima man sha ishima i môm yô una lumun u. Nahan doo u se nengen tom u se eren sha u suen mcivir u mimi la sha gbenda u vough. Or môm nana fatyô u fan er ishima i orgen i lu ker vough ga, kpa Yehova yô, “karen asema” cii. (Anzaakaa 24:12; 1 Samuel 16:7) Nahan, doo u hanma shighe yô, se pinen ayol a ase ser, ‘Ka nyi jim i lu ityôkyaa i i ne ve m eren Yehova tomo?’—Pasalmi 24:3, 4; Mateu 5:8.
Lu a Mnenge u Vough sha Ityom i Se Eren sha Jighjigh La
11. Ka mbampin mba sha kwagh u tom wase u pasen kwagh mba nyi nahan i doo u se time sha mini?
11 Aluer ka awashima u se lu a mi ve se eren Yehova tom la a hembe lun kwagh u vesen u una na ve Yehova a lumun se yô, gema di ityom i se eren la kpôô kpôô yô se nengen í nena? Aluer se mba eren tom wase u pasen kwagh la a awashima u vough yô, shi ityôkyaa ngi í ngeren ibaver i tom wase sha er se fa er se er ú je kpa? Mbampin mban ka mba injaav kpishi, sha ci u er se lu eren tom u pasen kwagh yô, se soo ser se hemba veren ishima sha ahwa a se tee u pasen kwagh la aa tom u se eren ken mcivir u Yehova kpôô kpôô la ga, shin kwagh a hemba gban se sha u zuan a ibaver i dedoo a tom wase u pasen kwagh u Mbakristu la ga.
12, 13. (a) Ka atôakaa a nyi a ne ve i ngeren ibaver i tom wase u pasen kwagha? (b) Zum u ka sea time sha ibaver i tom u pasen kwagh tar sha won cii yô, ka atôakaa a nyi ka a na ve i saan se iyoloo?
12 Nenge ase kwagh u takerada u í yer ér Organized to Do Jehovah’s Will la u er ne. Ú kaa ér: “Yange kwagh gba mbadondon Yesu Kristu mba sha ayange a tsuaa la kpishi sha kwagh u ibaver i mzehemen u tom ve u pasen ior kwaghaôndo la. (Marku 6:30) I ôr se ken takerada u Aerenakaa ér icighan jijingi sen sha mbahenen mba Yesu er iorov 120 nahan sha iyange i Pentekosti. Shighe kar deghôô yô, mbahenen seer hingir iorov 3,000, shi ve va seer hingir iorov 5,000. . . . (Aerenakaa 1:15; 2:5–11, 41, 47; 4:4; 6:7) A shi nan kpa, mseer u mbahenen ne na ve ishima i taver kpen kpen!” Nyian kpa, ka sha ityôkyaa ne Mbashiada mba Yehova ve ngeren ibaver i tom ve u pasen kwagh u ve eren tar sha won cii ne ye; mba eren tom ne sha tindi u Yesu wa ve la, á kaa ér: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Ibaver i tom u pasen kwagh la ka i tese se sha mimi er i lu eren tom ne tar sha won cii yô. Ka i tese ajiir a i gbe u a tindi mbapasen kwagh her man ityakerada i a tindi a mi hen ajiir ne, man kwagh u i gbe u a er ve a seer pasen kwagh her kpaa yô.
13 Nahan, ibaver i tom u pasen kwagh i se ne ne ka i wase se se fa er se seer eren tom u pasen loho u dedoo u Tartor ne tsembelee yô. Kwagh ugen yô, ka sea ungwa ibaver i tom i anmgbianev asev ve lu eren ken ityar igen nahan ishima ka i taver se ga he? Ka sea ungwa ibaver ser ior mba seer tar sha won cii nahan i saan se iyol kpishi, ishima ka i seer taver se u shilen tom u pasen kwaghaôndo ne hemban ave a tse, shi ka se lu a vangertiôr ser Yehova ngu veren tom wase doo doo. Shi ka i saan se iyol kpishi sha ci u se fa ser ibaver i tom wase kpa ngi ken ibaver i tom u pasen kwagh tar sha won cii la! Aluer i tôô ibaver i tom wase i kar sha ibaver i tom u pasen kwagh i anmgbianev tar sha won cii yô, ibaver yase gba ikyev ga. Nahan kpa Yehova nenge kwagh u se er yô. (Marku 12:42, 43) Umbur wer, a ibaver i tom wou u pasen kwagh shio yô, ibaver i tom u pasen kwagh tar sha won cii ia gba kpen.
14. Dugh tom u pasen ior kwagh shi tesen ve la kera yô, ka akaa agen a nyi nahan se eren sha u civir Yehova?
14 Nahan kpa, ka akaa kpuaa a hanma Orshiada u nan tsegh iyol i nan sha ci u Yehova nan eren sha u civir un la tseegh i ngeren ken ibaver i tom u nan u pasen kwagh la ye. U tesen ikyav yô, mba ngeren Bibilo i henen sha tseeneke wase hanma shighe la ken ibaver yase ga, shi mba ngeren mbamkombo mba tiônnongo mba se ze man mbamlumun mba se ne sha mbampin ken mbamkombo mbara ga, kua iwasen i se ne anmgbianev man uiyua mba se eren sha u suen tom u pasen kwagh u Tartor tar sha won cii la kpaa ga, shi akaa agen kpa nga a i ngeren ken ibaver i tom wase ga yô. Wasen yô kape ibaver i tom wase u pasen kwagh ne ka i wase se u seer eren tom u pasen kwagh sha ishima i tseen a uwegh gban shio je la, nahan kpa doo u se lu a mnenge u vough sha kwagh u ibaver i tom wase u pasen kwagh ne. Doo u se fa ser ka sha ibaver yase i dedoo i tom wase u pasen kwagh la keng se zua a uma u tsôron ga.
“Eren Akaa a Dedoo”
15. Shin er ityom yase tseegh ia yima se ga nahan kpa ngi hange hange nena?
15 Shin er ityom yase tseegh ia yima se ga nahan kpa, ngi hange hange. Ka nahan ve, i kaa ér Mbakristu mba “nongoior sha ci Na iyol Na, mba asema a tsee ve u eren akaa a dedoo” ye, shi ka nahan ve i we ve kwagh ér ‘ve taver ayol a ve asema u lun a dooshima man aeren shin ityom i dedoo’ kpaa ye. (Titu 2:14; Mbaheberu 10:24) Yakobu, u a lu môm ken mba ve nger Bibilo la kpa kaa wener: “Er iyol i lun a jijingi ga i lu kpenegh yô, kape jighjigh u nan u lun a aeren [shin ityom; NW ] ga di kpaa, a lu kpenegh nahan la.”—Yakobu 2:26.
16. Kanyi igen i hembe lun a inja a ityom yase, kpa doo u se palegh nyi?
16 Er ityom yase i dedoo i lu hange hange nahan kpa awashima u se lu a mi ve se eren í la hemba kan kwagh u hange hange cii. Nahan yô, doo u se tôvon ayol a ase hanma shighe sha er se fa awashima u se lu a mi ve se eren kwagh yô. Or môm nana fatyô u fan awashima u mbagenev ve lu a mi ve ve lu eren ma kwagh jighilii ga, nahan doo u se palegh u nan mbagenev ibo gaegh. I pine se mpin ér, “we, u ngu nyi man u ne wanye u orgen ibo?” Shi i na mlumun wang ér, “shin una tile, shin una gba kpaa ka kwagh u ter na je.” (Mbaromanu 14:4) Yehova, un u a lu Ter wase la, kua Kristu Yesu, u i ver un Orjir la, vea ôr se ijir sha ityom yase tseegh ga, kpa vea ôr se ijir sha mbaawashima asev mba se lu a mi ve se eren ityom shon la, man aan a se lu a mi a eren Yehova tom la, kua gbenda u se tesen dooshima shi se ne ayol a ase u civir Aôndo la kpaa. Apostoli Paulu kaa ér: ‘Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô, or u nan pasen kwaghôron u mimi la jighilii’ yô. Nahan aluer se nôngo sha gbashima er i we se Mbakristu kwagh nahan shin sea nôngo ga kpa, ka Yehova man Kristu Yesu tseegh vea na se ibo shin vea na se ishô sha mimi ye.—2 Timoteu 2:15; 2 Peteru 1:10; 3:14.
17. Er se lu nôngon sha gbashima ser se eren kwagh u dedoo nahan, er nan ve i doo u se umbur kwagh u i ôr ken Yakobu 3:17 laa?
17 Yehova kighir se ér se er kwagh u a gande se agee ken inya ga. Yakobu 3:17 kaa ér “kwaghfan u a dugh Sha yô,” ‘norom ikaa ga.’ Ú nenge wer, u dondon Yehova sha ieren ne ka u eren kwagh sha kwaghfan shi eren kwagh u mimi ga he? Nahan, doo u se hanger ser se er kwagh u a gande se agee ken inya, shin anmgbianev asev ve er kwagh u a gande ve vanger ga.
18. Aluer se mba nengen ityom yase i se eren sha jighjigh la man mrumun u sha mhôôn u Yehova la sha gbenda u vough yô, kwagh ne una na se lu a ishimaveren ser nyi?
18 Aluer se mba nengen ityom yase i se eren sha jighjigh, kua mrumun u sha mhôôn u Yehova la sha gbenda u vough yô, kwagh ne una wase se se za hemen u lun a iember i í pav mbacivir Yehova sha mimi í ver kposo la. (Yesaia 65:13, 14) Aluer kwagh u se lu eren la una vese ga kpa, mver u Yehova a lu veren ior nav jimin cii doo doo ne una na a saan se iyol. Nahan se sônon nen Aôndo “sha msen man sha mzamber a ishughun” ser a̱ wase se se civir un sha gbashima. Aluer se mba eren nahan yô, “bem u Aôndo u a gande hanma mfe wase cii una kura asema a [ase] man mbamhen [asev] ken Kristu Yesu” kpee, a bunde ga. (Mbafilipi 4:4–7) Sha mimi yô, mfe u se fe ser a yima se sha ityom yase tseegh ga, kpa a yima se sha mhôônom ma Yehova kpaa la sur se ishima shi taver se ishima kpen kpen!
Ú Fatyô u Pasen Er i Hii Ve Mbakristu
• ve te ihagh sha akaa a ve eren ga kpa?
• ve gbe gesa a mbagenev ga kpa?
• ve ne ibaver i tom ve u Mbakristu u pasen kwagh la kpa?
• ve ne anmgbianev vev ibo gaegh ga kpa?
[Study Questions]
[Picture on page 23]
‘Mrumun u sha mhôôn Wam kuma ú’
[Pictures on pages 24, 25]
Ka saan mbatamen iyol sha iniôngon i hanma ve nan nenge sha u i kpe tiônnongo iyol la
[Pictures on pages 26, 27]
Aa ibaver i tom wou u pasen kwagh shio yô, ibaver i tom u pasen kwagh tar sha won cii ia gba kpen