Yehova Kor Mba Ve Suur Sha A Na Cii
Yehova Kor Mba Ve Suur Sha A Na Cii
“Erdoo Wou man mimi Wou ve̱ kuram gbem!”—PASALMI 40:11.
1. Tor Davidi yange sôn Yehova ér nyi, man zan zan hegen je Yehova ngu eren sha msen na la nena?
DAVIDI, TOR u Iserael u sha ayange a tsuaa la “ver ashe hen TER a ishima i tiaver,” nahan ishima mgbegha un ker tsô a kaa a Yehova wener a ‘ver ato her a na, A ungwa mliam nam’ kpaa. (Pasalmi 40:1) A nenge Yehova kura mba A doo ve ishima la acin imôngo. Ka nahan ve a kaa a Yehova wener a kuran un gbem ye. (Pasalmi 40:11) Er Davidi kpa a lu môm ken nomso man kasev mbajighjigh mba í er ityendezwa i “mnder u hemban doon” a ve la yô, Yehova ngu umbur un zan zan hegen sha er una va nder un shin ku yô. (Mbaheberu 11:32–35) Nahan, zayol ngu sha kwagh u mlu u ken hemen u Davidi ga cii. I nger iti na ken “ruamabera” u Yehova “u umbur akaa” la.—Malaki 3:16.
2. Ruamabera wase se u fan inja i mkor u Yehova a kor se la nena?
2 Mbajighjigh mba í er kwagh ve ken Mbaheberu ityough 11 la vande lun cii ve Yesu Kristu mase van shir shin tar ye. Nahan kpa, yange ve er sha mkaanem ma Yesu a er shin heen ne vough. Á kaa wener: “Or u uma u nan a doo nan yô, uma la una saa nan; kpa u nan ker uma u nan ihom shin tar ne yô, nana lu a mi zan zan uma u tsôron.” (Yohane 12:25) Nahan kwagh ne tese ér aluer Yehova ngu kuran se yô maa se kera ya ican ga, shin a kera tôv se a ican ga ze. Kpa mkor shon ka u ken jijingi, u Aôndo a kor se sha u se civir un sha mimi yô.
3. Ka ikyav i nyi i tese ér Yehova kura Kristu Yesu, man ka nyi i̱ dugh ken mkor u i kura un laa?
3 Yesu iyolna kpa mbaihyomov nav yange ve tôv un a ican zan zan ve va mase wuan un, kpe ku u kunya man u nyoon tsung. Aôndo vande tôndon zwa ér una kura Mesiya, nahan kpa ku na la yange u tese ér hemba Aôndo u kuran un ga. (Yesaia 42:1–6) Yesu yange er msen hen Yehova ér a̱ wase un, nahan á ungwa msen na la, di er á ungwa msen u Davidi nahan. Ka nahan ve á na un agee a tilen sha mimi dông ye, shi er Yesu kpe ku u kunya nahan kpa á nder un shin ku sha iyange i sha utar la. (Mateu 26:39) Aôndo kor Yesu nahan cii yô maa á na un uma u tsôron sha, shi ior umiliôn imôngo mba ve ne ipaa i Yesu jighjigh kpaa mba a ishimaveren i va zuan a uma u tsôron.
4. Ka ishimataver i nyi i taver Mbakristu mba i shigh ve mkurem man “iyôngo igen” laa?
4 Nyian ne kpaa se lu nen a vangertiôr ser Yehova wa iyol kegh a kegh u kuran mbacivir un, shi ngu a tahav mbu kuran ve di vough er kura Davidi man Yesu nahan. (Yakobu 1:17) Asande a anmgbianev mba Yesu mba i shigh ve mkurem mba ve shi shin tar la kpa vea fatyô u lun a vangertiôr sha ityendezwa i Yehova á er sha ci ve ne, á kaa a ve wener, i koso “dyako u hôôn ga, u fisee kpaa ga, u usen tsô kpaa ga, . . . Sha sha ci wen, ne mba i kor ne sha agee a Aôndo sha jighjigh u nan, sha u ngohol myom u i kegh iyol i ver a ver u pasen un sha iyange i masetyô” la. (1 Peteru 1:4, 5) “Iyôngo igen” i í lu a ishimaverenkeghen i va lun shin tar la kpa ia fatyô u suur sha Aôndo, kua sha ityendezwa i a er sha ikyev i orpasalmi wener: “TER, A̱ doo ne ishima, ne mba i doo Un a ven la cii” la.—Yohane 10:16; Pasalmi 31:23.
Yehova Kor Se ken Jijingi
5, 6. (a) Aôndo kor ior nav sha ayange ne nena? (b) Mlu u mba i shigh ve mkurem la vea Yehova ngu nena, man gema mba ve lu a ishimaveren i va lun shin tar la di ye?
5 Igbenda ngi i Yehova a lu kuran ior nav ken jijingi sha ayange ne yô. Yehova cirin a cir iyol sha ve ér tôvacan shin mbamzeyol mbagenev shin uaahe mba ve de ishar nyian ne ve de benden a ve ga ze, nahan kpa a wase ve shi a taver ve asema sha mimi sha er vea za hemen u lun vea na kangenaa yô. Kwagh u vesen u a ne ve ve lu a Aôndo kangenaa yô, ka mne u ve ne jighjigh a ipaa i Aôndo a ne sha ci u uumace sha dooshima la. Mbagen ken Mbakristu mba jighjigh mban ka mba Aôndo a tsough ve sha icighan jijingi na ér ve za tema tor a Kristu sha yô. Aôndo tsua ve mba ônov nav mba perapera mba ken jijingi. Mkaanem man kure sha ve vough, ma kaa ér: “A yima se A due a vese ken tahav mbu imev kera A nyôr a vese ken tartor u Wan Na u doon ishima. Ka ken a Na man se lu a mpaa ye, ka mde u asorabo je la.”—Mbakolose 1:13, 14.
6 Mbakristu mba jighjigh mbagenev umiliôn imôngo kpaa i taver ve asema ér ve kpa vea zua a mtsera sha ipaa i Aôndo a ne sha ci wase ne. I kaa a vese ér: “Wan u or kpaa va sha u i̱ er Un tom ga kpa ka sha ci u Una er, man sha u Una na uma Na a̱ hingir ipaan sha ci u ior kpishi.” (Marku 10:45) Mbakristu mban mba veren ashe gbenda u va lun uma sha shighe u “mlu u engem u lun a ikangenev ga u ônov mba Aôndo” la. (Mbaromanu 8:21) Er ve lu keghen shighe la yô, ve ver ishima sha ikyar i ve ye a Aôndo la, shi mba nôngon sha gbashima ér vea seer sôsom a na kpaa.
7. Ka sha igbenda i nyi nahan Yehova a kor ior nav sha u i kpe ve iyol ken jijingi?
7 Ityesen i i gbe inya mayange ga i Yehova a ne ior nav la ka gbenda môm ú a kor ve sha u i kpe ve iyol ken jijingi yô. Ityesen ne ngi wasen ve u seer zuan a mfe u vough. Yehova shi kôôm ior nav sha Mkaanem nam man sha ikyev i nongo na kua icighan jijingi na kpaa. Ior mba Aôndo mba dondon akaawan a “wanakiriki u jighjigh man u fan kwagh” a lu wan ve la, nahan mba er mba tsombor môm nahan tar sha won jimin cii. Ve due sha ajiir kposo kposo, shi mbamlu vev kpa mba kposo kposo, nahan kpa, nongo u wanakiriki ne ngu nengen sha ugbayol vev mba ken jijingi shi ka a gba hange hange u vea nenge sha ugbayol vev mba sha iyol kpaa ve er nahan vough.—Mateu 24:45.
8. Ka vangertiôr u nyi Yehova a lu a mi sha mbacivir unuu, man kwagh ne taver ve ishima nena?
8 Yehova yange kura Yesu sha atsan a mbaihyomov nav er un la ga, nyian kpaa kor Mbakristu nahala ga. Kpa kwagh ne tese ér ishima vihi Aôndo a ve ga. Kpa gema tese ér Aôndo ngu a vangertiôr ér mbacivir un vea sue un sha ikyaa i vesen i i bende a hanma or sha won cii la. (Yobu 1:8–12; Anzaakaa 27:11) Mayange je Yehova una ta mbacivir un sha mimi kera ga, “gadia kwagh u mimi doon TER ishima, man shi te mba i doo Un a ve la kera ga. . . . koson ve gbem.”—Pasalmi 37:28.
Erdoo man Mimi u Aôndo Kor Ior Nav
9, 10. (a) Mimi u Yehova kor ior nav nena? (b) Bibilo tese ér Yehova kor mba ve civir un sha mimi la sha erdoo na nena?
9 Davidi ngise er msen u i nger un ken Pasalmi 40 la, á kaa wener erdoo u Yehova man mimi na a kura un. Mimi u Yehova man mdoo u perapera a doo un ishima la na yô, á pase se atindiakaa a na wang. Mba ve kor atindiakaa a Yehova yô, a wase ve kpen kpen, a kura ve sha atsan man mciem man mbamzeyol mbagenev kpishi mba ior mba ve peren atindi a na ve zou a mi la. U tesen ikyav yô, aluer se palegh mcimbim ma bov ma man kua msôrom ma man kpishi man ijimba i eren shi se de u eren uma u pilagh yô, se kura iyol yase kua ior asev mba doon se ishima sha mbamzeyol mba vihin tsung. Mba ve kaha ve undu gbenda u mimi u Yehova er Davidi kpa ngise kaha undu ú sha ashighe agen nahan je kpa, vea fatyô u lun a vangertiôr ér Aôndo ngu ‘ijiir i yeren’ sha ci u mbaasorabo mba ve gem asema yô. Ve mban vea fatyô u ôron a Aôndo saan saan ér: “U kuram sha mzeyol.” (Pasalmi 32:7) Nenge imba erdoo u Aôndo a vese ne sha wono!
10 Ikyav igen i tesen erdoo u Aôndo a vese yô, ka i̱ ne, á wa mbacivir un kwagh ér ve de ye ikyar a tar ne ga, gadia shi ciôn tsô a tim ú kera. Bibilo kaa a vese ér: “Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga. Gadia akaa a a lu shin tar cii, isharen i iyolough, man isharen i ashee man ihagh i uma ne, ka a Ter ga, ka a taregh tsô.” Aluer se ungwa kwaghwan ne se haa iyol er ka ikyondo nahan ga, kpa se er sha mi yô, se yima iyol yase gbem sha won, gadia Bibilo shi i kaa a vese ér: “Man tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:15–17.
De M-er u sha Inja man Mkav kua Kwaghfan Ve Kura Ú
11, 12. Pase er m-er u sha inja man mkav kua kwaghfan vea kura se yô.
11 Icighan jijingi ngise mgbegha Solomon, wan u Davidi nger mkaanem ma ma lu shin heen ne, ôr kwagh u hanmaor u nan soo ér Aôndo a lumun nan yô, á kaa wener: “M-er u sha inja una kuran we, mkav kpaa una kumban we.” A shi a kaa ér: “Zua a kwaghfan, . . . De te un kera ga, tsô una kura u, rumun un, tsô una koso u.”—Anzaakaa 2:11; 4:5, 6.
12 Aluer se mba gbidyen kwar sha akaa a se henen ken Mkaanem ma Aôndo yô, kwagh ne tese ér se mba yaren tom a m-er u sha inja. Kwargbidyen sha kwagh ua wase se se seer zuan a mkav, mkav ne una wase se u veren ishima sha akaa a a hembe lun a inja yô. Kwagh ne ngu hange hange, gadia se mbagenev kpishi se fa er ior ka vea norom u eren akaa a a lu a inja ga, shin ka vea er á a mfe shio je kpa ve tagher a mbamzeyol kpishi yô, man alaghga se kpa imba kwagh ne vande eren se, ka nahan ve se lan ga ye. Tar u Satan ngu meen se sha u se hemba veren ishima sha uyôughyôughmbaakaav kua shagba man tahav, kpa Yehova yô, taver se asema ér se ver ishima sha akaa a ken jijingi a a hembe lun a inja yô. Aluer se hemba veren ishima sha akaa a taregh a akaa a ken jijingi yô, aa fatyô u vihin tsombor wase, shi aa vihi ikyaryan yase a mbagenev, shi se kan shio u eren sha akaa a ken jijingi a se we ishima u eren la kpaa. Aluer kwagh hemba gban or sha akaa a taregh yô, nana sunda kwagh u vihin kpishi je, di er Yesu lu kaa nahan, wener: “Aluer or a zua a tar cii, man uma u nan una gema á saa nan yô, á doo nan sha nyi?” (Marku 8:36) Nahan, kwaghfan una wase se se er sha kwaghwan u Yesu a we se ne, ér: “Vande keren nen tartor Na man perapera Na, man akaa ne cii á seer ne a ye.”—Mateu 6:33.
Hôn u Or Wan Iyol i nan Ikyo Tseegh La
13, 14. Inja i or wan iyol i nan ikyo tseegh ér nyi, man er nan ve i doo u se lu a imba ieren ne ga?
13 Hanmaor orumace yô, i maa nan a isharen i wan iyol i nan ikyo, nahan ka kwaghbo u or wan iyol i nan ikyo ga. Kpa, aluer or de isharen ne man akaa a a gbe nan ishima la hemba nan hanma kwagh yô, kape kwaghbo a lu je la. Nahan, aluer se soo ser se kura ikyar yase a Yehova yô, á wa se kwagh ér se de we iyol yase ikyo tseegh ga. Or u nan we iyol i nan ikyo tseegh yô, “ka or u kwagh a gbe nan a mkpeyol u nan shi nan we mbamgbe mba nan ikyo tseegh, u nan keren mtsera u orgen ga saa u nan tseegh yô.” Ka ieren i ior kpishi ve eren nyian ne ga he? I tsengaôron ken Bibilo ér, “ken ayange a masejime” a tar u bo u Satan ne, “ior vea hingir mbawan ayol a ve iko tseegh.”—2 Timoteu 3:1, 2.
14 Mbakristu fa ér aluer ve mba eren sha tindi u i we ken Bibilo ér ve waan mbagenev ikyo, shi ve doo ve ishima er iyol ve nahan la yô, mba eren kwagh u dedoo. (Luka 10:27; Mbafilipi 2:4) Alaghga mbagenev kpishi vea nenge ér ka hange hange u wan mbagenev ikyo ga. Kpa, aluer se soo ser ivese yase i doo, shi i saan hanma or hen tsombor iyol, shi se lu vea ahuraior ase doo doo yô, gba hange hange u se waan mbagenev ikyo. Nahan, mayange je or u civir Yehova sha mimi nana̱ de lumun ér isharen i nan i sha gbaaôndo i wan iyol i nan ikyo la i ya tor ken nan, nahan i̱ yange nan u veren ishima sha akaa a hembe lun hange hange la ga. Gba u nana hemba veren ishima sha u eren Yehova, Aôndo u nan civir la tom.
15, 16. (a) Aluer or ngu wan iyol i nan ikyo tseegh yô, ieren ne ia na nana hingir nyi oro, man ka unô i tese ikyav sha ve? (b) Sha mimi yô, aluer or ngu nan mbagenev ibo gaegh yô, nana lu van a nyi sha iyol i nana?
15 Aluer or ngu wan iyol i nan ikyo tseegh yô, ieren ne ia na nana tôô ken ishima i nan ér nan neer perapera, nahan nana hingir or u hanger sha kwagh, shi nana lu or u moron iyol kpaa. Bibilo ôr sha inja nahan ér: “We or u ka u gba nan or ibo tsô ne, wea lu nan nan kpaa u ngu a ityôkwagh i lun a ishô ga gadia kwagh u u lu nan orgen ibo sha mi la, we iyol you kpaa u ngu a ibo sha mi, gadia we u u lu nan ibo la kpaa u ngu eren akaa angara je.” (Mbaromanu 2:1; 14:4, 10) Mbahemenev mba kwaghaôndo mba sha ayange a Yesu la tôô ken asema a ve ér ve neer perapera, nahan ve puu Yesu kua mbadondon nav kpa sha mi. Yange ve tôô ér ve mba mbaajiriv. Er kwagh tsô gba ve u nengen a mbamyen vev ga yô, ve ôr ayol a ve ijir ve kure.
16 Yuda, ordondon u Yesu u yange nenge un mker la, lu a ieren i nan mbagenev ibo gaegh. Zum u ve tema kwaghyan ken Betani yô, Maria, ingyôr i Lasaru shighe Yesu mkurem, kwagh ne vihi Yuda kpen kpen. Tsô á ôr sha ishima vihin wener: “Ka nyi man i tee mkurem man i yam sule deri utar i ne mbaatsanev ga?” Ijiir i í er kwagh na ne shi kaa ér: “A kaa nahan, kpa lu sha ci u a wa mbaatsanev iko ga, kpa lu sha ci u un lu ormbaiv yô, man er a tilin ikpanyar yô, a dughun kwagh u i we kimi la.” (Yohane 12:1–6) Mayange je, se dondo nen ieren i Yuda man i mbahemenev mba kwaghaôndo la ga, gadia ve ngôôr nan mbagenev ibo ga, kpa lu mtsaha je ve lu van a mi sha ayol a ve ye.
17. Ôr akav a a tese kwaghbo u a lu sha ieren i hagher sha kwagh shin ieren i kehen se ken ishima kpishi la.
17 Mbakristu mbagenev sha ayange a tsua la iin er Yuda nahan ga, kpa kwagh ka a er i vihi yô, mbagenev ken ve gba ken to u ihyagh i kaan, nahan ve hingir mbahagher sha akaa. Yakobu yange ôr kwagh ve ér, ‘mba tan ihagh sha imbwase ve i kaan.’ Shi a kaa wener: “Imbaihagh ne cii ka ifer je.” (Yakobu 4:16) Aluer kehe se ken ishima je se mba tan ihagh sha akaa a se er shin sha tom u se eren ken tiônnongo yô, se mba wan iyol yase ken kwaghbo. (Anzaakaa 14:16) Umbur kwagh u apostoli Peteru er la, yange kehe un ken ishima sha shighe ugen la ngee gande, je yô ta ave vanger wener: “Shin er ve cii á na ve anzughul sha kwagh Wou kpaa, mo yô, mayange á nam anzughul ga! . . . Shin a lu u m̱ kpe a We imôngo keng kpaa, mayange me nyiman We ga.” Sha mimi yô, se mba a kwagh môm u se ta ave vanger a mi ga. Nyityôkwagh i se lu a mi cii ka sha erdoo u Yehova se lu a mi ye. Aluer se fa kwagh ne nahan yô, mayange se hagher sha kwagh ga.—Mateu 26:33–35, 69–75.
18. Yehova nengen iyolgengese nena?
18 I wa se kwagh ér: “Ken ijime i iyolgengese yô, ka mtim, ken ijime i iceen ka mgbe.” Er nan ve i er kwagh nahana? Yehova kaa nahan wener: “Iyolmoron man iceen yô, . . . m vende.” (Anzaakaa 8:13; 16:18) Kape i lu ve ishima vihi Yehova a “ishima i gban gesa i tor u Ashiria man ihagh i ashe na a kenden sha la” je ne! (Yesaia 10:12) Yehova yange tsaha un sha ihagh na la. Shighe kera shi ica ga tsô, a ôr tar u Satan ne cii ijir, kua mbahemenev mba tar ne mbagengeseyol man mba tan ave vanger, mba i nengen a ve kua mba i nengen a ve ga mbara cii. Nahan mayange je se dondo nen ieren i norom ikyaa sha kwagh i mbaihyomov mba Yehova ve lu a mi la ga.
19. Ka sha nyi gbenda nahan mbatomov mba Aôndo vea fatyô u tan ihagh kpa shi vea hiden a ayol a ve ijime?
19 Mbakristu mba mimi vea fatyô u tan ihagh ér mba mbatomov mba Yehova. (Yeremia 9:24) Nahan cii kpa, doo u vea hiden a ayol a ve ijime. Sha ci u nyi? Ityôkyaa yô, “ior ca ca ve er isholibo nahan kera mba a iengem i Aôndo ga.” (Mbaromanu 3:23) Nahan, aluer se soo ser se za hemen u lun mbatomov mba Yehova yô, se lu nen a inja i apostoli Paulu kpa lu a mi la, á kaa wener, “Kristu Yesu va shin tar sha u yiman mbaasorabo,” a mase kuren wener “man ken ve yô, ka mo m hembe ye.”—1 Timoteu 1:15.
20. Yehova kor ior nav nyian nena, man una kura ve ken hemen nena?
20 Ior mba Yehova tôô mcivir u Aôndo hemba ve mbamgbe vev, man saan ve iyol u eren nahan. Nahan se mba a vangertiôr ser Yehova una de u kuran se ken jijingi ga. Shi zum u Yehova una va a zegecan la kpa, una kura ior nav ken jijingi tseegh ga, una de ér kwaghbo môm a er ve ga. Shighe u vea nyôr ken tar u he la, vea ger amo a ahan zwa, vea kaa ér: “Nenge, ngun ka Aôndo wase u se lu veren ashe Na ser, A̱ va yima se je ne; ka TER je u se lu veren ashe Na; sé lu nen saan saan, sé ember nen myom Na.”—Yesaia 25:9
Baver Wer Kpa?
• Yehova yange kura Davidi man Yesu Kristu nena?
• Yehova kor ior nav nyian nena?
• Er nan ve i doo u se hemban wan iyol yase ikyo ga?
• Ka sha nyi gbenda nahan se fatyô u tan ihagh kpa se hiden a ayol a ase ijime?
[Study Questions]
[Picture on page 17]
Yehova yange kura Davidi man Yesu nena?
[Pictures on page 19]
Aôndo kor ior nav ken jijingi nyian nena?
[Pictures on page 20]
Se fatyô u tan ihagh ser se mba civir Yehova, kpa doo u hanma shighe yô se hiden a ayol ase ijime