Loho U Dedoo Sha Ci U Akuraior A Sha Tar cii

“Né lu mbapasen kwagh Wam . . . zan zan á ar ken ikighir i tar je.”—AERENAKAA 1:8.

1. Er se lu mbatesen ior Bibilo yô, ka nyi kwagh se veren ishima sha mini, man ka sha ci u nyi?

 ATICA a fan ityesen nga veren ishima sha kwagh u a tesen mbayevmakeranta vev tseegh ga, nga a ver ishima sha gbenda u a tesen ve kwagh la kpaa. Ka kwagh u se kpa se eren vough je la, gadia se mba mbatesen ior mimi u ken Bibilo. Se mba veren ishima sha loho u se pasen ior la, kua gbenda u se pasen ve u la kpaa. Loho u dedoo u Tartor u Aôndo u se pasen ior la, ngu gem ga, kpa se mba gem igbenda i se pasen ior ú la. Sha ci u nyi? Sha ci u se soo u ôron ior kpishi loho ne.

2. Ka sea gema igbenda i se pasen kwagh la yô, i lu ikyav i unô se lu dondono?

² Mgem u se gem igbenda i se pasen ior loho u dedoo la tese ér se mba dondon ikyav i mbacivir Aôndo mba ngise mbara. Nenge ase ikyav i apostoli Paulu ne. A kaa ér: “Mbayuda yô, m hingir ve er Oryuda nahan . . . Mba ve lu sha atindi ga yô, m hingir ve er ka or u sha atindi ga yô . . . Aseeraior yô, m hingir ve er ka isheeror nahan sha u me kôr aseeraior yô. Ior cii m hingir ve hanma kwagh cii, sha u a lu nan nan kpaa, me yima mbagenev yô.” (1 Mbakorinte 9:19–23) Igbenda i Paulu kar sha mi sha u pasen ior loho u dedoo ne na tom na doo kpen kpen. Se kpa tom wase ua doo aluer se wa ior asange asange ikyo sha u geman igbenda i se pasen ve kwagh la sha er i̱ zua sha mbamgbe vev yô.

Zan Zan “Akighir a Tar Cii”

3. (a) Ka mtaver u nyi se tagher a mi ken tom wase u pasen kwagha? (b) Mkaanem ma ken Yesaia 45:22 la ma kuren sha mi nyian nena?

³ Ijiir i mbapasen loho u dedoo ve pasen u her la gbanger kpen kpen—inja na yô ka u vea “tser tar” cii. Nahan kwagh ne ka mtaver u vesen je ve tagher a mi ye. (Mateu 24:14) Ken derianyom u a kar la, mbacivir Yehova kpishi pase loho u dedoo kpoghuloo zan zan ar sha ajiir a he. Lu nyi i due ken tom ve nee? Tom ve ne samber sha tar cii sha gbenda u kpilighyol kpen kpen. Sha mhii u derianyom u sha ikyundu la, i lu pasen kwagh ken ityar kpuaa tseegh, kpa hegen Mbashiada mba Yehova mba eren tom kpoghuloo ken ityar 235! Sha mimi yô, mba yôôn loho u dedoo u Tartor sha “akighir a tar cii.”—Yesaia 45:22.

4, 5. (a) Ka unô ve er tom u vesen sha u samber a loho u dedoo? (b) Afishi a Mbashiada a ken ityar igen ôr ér nyi sha kwagh u anmgbianev mba ve mough ken ityar i ken won sha u va eren tom hen haregh ve laa?

⁴ Kanyi i ne ve mzehemen a lu nahana? Akaa ngee. Mbamishen mba ve ze makeranta u i yer ér Watchtower Bible School of Gilead la wase sha tom ne kpishi. Shi semberee ne kpa, iorov mba hemban 20,000 mba ve bee Makeranta u Tsaase Mbashiren Tom la kpa wase kpen kpen. Mbashiada kpishi mba ve tee inyaregh vev ve kimbi injar i girgir shin mato ve yem ken ityar i kwagh a hembe gban sha mbapasenkwagh u Tartor la kpa mba uwegh ken tom ne je ka u ôron ga. Nomso man kasev mba ken Kristu mba tangen iyol ga mban cica cii, kua agumaior man mbabeenyol man mbaukwaav kua noov man kasev kpaa cii er tom u vesen sha u pasen loho u Tartor sha tar jimin cii. (Pasalmi 110:3; Mbaromanu 10:18) Ve mban cii ve gba se kwagh je gande. Nenge ase kwagh u afishi a Mbashiada a ken ityar igen a nger sha kwagh u anmgbianev mba ve mough ken ityar i ken won ve ve ken ityar ve sha u va eren tom sha ajiir a kwagh a hembe gban sha mbapasenkwagh la.

⁵ Afishi a ken tar u Ecuador nger ér: “Mbashiada mba doonshima mban mba hemen mbagenev sha u za pasen kwagh sha ajiir a icaa shi mba  timin atôônanongo a he shi mba maan mlu u ken jijingi u anmgbianev mbanomso man mbakasev mba sha ajiir a ve lu eren tom her la kpaa.” Afishi a ken tar u Dominican Republic di nger ér: “Aluer anmgbianev mba ken ityar igen uderi imôngo mba ve lu avese heen mban yem ken ityar ve yô, atôônanongo aa kera taver ga. Doo se er ve lu avese nahan.” Afishi a ken tar ugen sha ki Ityoughkitaregh ki Yuropa kaa ér: “Atôônanongo ase kpishi hemba ngeen a anmgbianev mbakasev, ashighe agen je yô ka i nôngo u lun ve tseegh. (Pasalmi 68:11) Ve kpishi ve fa mimi ica ngi a gba ga, nahan kpa anmgbianev mbakasev mba ken ityar igen, mba ve lu a er noov ga shi ve lu upania yô mba wasen kpishi sha u tesen mbahev mban. Anmgbianev mbakasev mba ken ityar igen ne mba se a iwasen je zua ga!” Er i lu nahan u tema u hen sha kwagh u tom u za pasen loho u dedoo ken tar ugen vee? *—Aerenakaa 16:9, 10.

“Iorov Pue ken Akuraior a Hanma Zwa Cii”

6. Sekaria 8:23 ôr kwagh u a wase se u kaven mtaver u a lu sha gbaa u pasen ior mba lamen ijô kposo kposo kwagh nena?

⁶ Ijô i í ngee sha tar yum ne kpa gema ka mtaver u vesen ugen. Mkaanem ma Aôndo tsengaôron ér: “Sha ayange la, iorov pue ken akuraior a hanma zwa cii vea kôr mkaikondo u Oryuda, vea kaa er: Sé za a ven imôngo, gadia se ungwa ser, Aôndo ngu a ven.” (Sekaria 8:23) Kwaghôron u profeti ne ngu kuren sha mi sha ayange a ase ne. Iorov pue mba i er kwagh ve ne tile sha ityough ki zegeikpelaior, i í tsengeôron kwagh u i̱ ken Mpase 7:9 la. Nahan kpa, sha kwaghôron u profeti u Sekaria la yô, “iorov pue” mbara vea due di ken ityar kposo kposo tseegh tsô ga, kpa vea due ken ‘akuraior a hanma zwa cii’ kpaa. Kwagh ne ngu eren nahan je kpa? Een, ngu eren yum.

7. Ka iyenge i nyi nahan í tese ér mba pasen ior mba ken “akuraior a hanma zwa cii” loho u dedoo?

⁷ Nenge ase iyenge i ijô i í gberen ityakerada  yase ker yô. Anyom akunduahargber ken ijime, í lu gberen ityakerada yase ken ijô 90. Kpa ijô i í gberen í ker hegen hemba 400. “Wanakiriki u jighjigh man u fan kwagh” nôngo kwagh sha afatyô na cii, nahan mba gberen ityakerada nan ior ken ijô ve, kua ken ijô i cuku je kpaa. (Mateu 24:45) Ikyav i tesen yô, i gber ityakerada i i har sha Bibilo hegen ken zwa u Greenland (ka iorov 47,000 ve lamen u ye), shi i gber ken zwa u Palau (ka iorov 15,000 tseegh ve lamen u ye), kua zwa u Yap kpaa (ior mba lamen u yina 7,000).

“Hunda u vesen” u Van Se a Aan a He a Eren Tom Bugh

8, 9. Kanyi i ne ve “hunda u vesen” u bugh sha ci wase, man Mbashiada udubu udubu mba eren nena sha kwagh ne?

⁸ Ainge ne, alaghga ape se lu la kera gba kpee u saa se mough se yem ken tar ugen ve se zua a ior mba lamen ijô igen mba se pase ve loho u dedoo ga. Ken anyom a a sember karen ne ior umiliôn imôngo kua mbayevese ityav kpaa yem shir ken ityar i lun a inyaregh, nahan kwagh ne na yô ior mba lamen ijô i ken ityar igen mba sha ajiir kpishi. U tesen ikyav yô, gar u Paris ken tar u France tseegh ngu a ijô kuma er 100 nahan. Ken gar u Toronto, tar u Kanada di ka ijô 125 i lamen ker ye; gar u London ken tar u Ingila kpa ngu a ijô i akuraior kposo kposo hemba 300! Kwagh ne na yô atôônanongo kpishi nga a ior mba ken ityar igen hen uharegh vev, nahan “hunda u vesen” u van se a aan a he a pasen ior mba ken akuraior a hanma zwa cii loho u dedoo bugh sha ci wase.—1 Mbakorinte 16:9.

⁹ Mbashiada udubu udubu mba henen ijô igen, nahan kwagh ne wase ve u nôngon a mtaver u a lu sha gbaa u pasen akuraior a hanma zwa loho u dedoo la. Ve kpishi ka ve zange u henen zwa ugen ga; kpa iniôngon ve ngi umen atam a dedoo kpen kpen, gadia mba wasen ushirmbaiorov kua mbayevese ityav u henen mimi u ken Mkaanem ma Aôndo, nahan saan ve iyol kpishi. Semberee ne, iyenge i ushirmbaiorov mba i er ve batisema ken mbamkohol mbavesen ken tar ugen shin Ityôtar i Yuropa ngee je nôngo u kuman iorov unyiin-ken-pue u iyenge i ior mba i er ve batisema ken tar shon la jimin cii.

10. Ú hira er tom a antakerada u Good News for People of All Nations la nan vee? (Nenge akwati u a kaa ér, “Akaa a ken Antakerada u Good News for People of All Nations la,” ngu sha peeji 32.)

¹⁰ Sha mimi yô, se mbagenev kpishi se mba sha ian i henen zwa ugen ga. Nahan kpa, se fatyô u wasen atôatyev sha u yaren tom a antakerada u he u i yer ér Good News for People of All Nations, * u a lu a loho u ken Bibilo u doon tsung ken ijô kposo kposo la. (Yohane 4:37) Ú ngu pasen ior kwagh a antakerada ne kpa?

Zum u Ior Ve Soo u Ungwan Ga Yô

11. Ka mtaver ugen u nyi se tagher a mi sha ajiir agene?

¹¹ Er Satan a lu daase a tar ne je i hembe ave a tse yô, se mba tagher a mtaver ugen kpaa—inja na yô ka ior kpuaa tseegh ve keghen ato avese  sha ajiir agen ye. Kpa, taver se er i hii ve kwagh a lu nahan ga, gadia Yesu tsengaôron ér kwagh a lu nahan. A ôr kwagh u ayange ase ne wener: “Dooshima u mbagenev kpishi una ndôhôr.” (Mateu 24:12) Sha kpôô yô, ior kpishi kera na Aôndo jighjigh ga, shi Bibilo kpa kera gba ve kwagh ga. (2 Peteru 3:3, 4) Nahan yô, ka ior kpuaa tseegh ve lu hingir mbahenen mba Kristu mba hev sha ajiir agenegh ye. Kpa, kwagh ne gema tese ér tom u anmgbianev asev mbanomso man mbakasev mba doonshima mba ken Kristu, mba ve pasen kwagh a uwegh gban shio sha ajiir shon a ior ve keghen ato ga la ngu gbilin ga. (Mbaheberu 6:10) Er nan ve u lu gbilin ga? Time sha kwagh u i nger shin heen ne.

12. Ka mbaawashima uhar mba nyi se lu a mi ve se pasen ior kwagha?

¹² Ivangeli i Mateu pase mbaawashima mba vesen uhar mba se pasen kwagh yô. U môm yô ka sha u ‘geman akuraior cii a̱ hingir mbahenen.’ (Mateu 28:19) Ugen yô ka sha u loho u Tartor la “u̱ lu mpase.” (Mateu 24:14) Mbaawashima mban cii mba hange hange, kpa u masetyô ne gema ngu a kwagh ker u a doo kpishi yô. Sha ci u nyi?

13, 14. (a) Kanyi kwagh i lu vegher u vesen u ikyav i sha mve u Kristu laa? (b) Kanyi i doo u se umbur, hemban je yô aluer se mba pasen kwagh hen haregh u i lu ior kpuaa tseegh ve keghen ato avese yôô?

¹³ Mateu, u lu môm ken mba ve nger Bibilo la kaa ér mbaapostoli yange ve pine Yesu mpin ér: “Ka nyi ia lu ikav i sha mve Wou la man i mkurtara?” (Mateu 24:3) Yesu kaa a ve ér á pase loho u dedoo sha tar cii, man tom ne ua lu vegher u vesen u ikyav shon i sha mve na man i mkurtar. Yesu lu ôron kwagh u mgem u geman ior hingir mbahenen shinii? Ei. A kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii.” (Mateu 24:14) Nahan, Yesu tese ér tom u pasen kwagh u Tartor la ua lu vegher u vesen u ikyav i mkurtar.

¹⁴ Nahan yô, er se lu pasen ior loho u dedoo u Tartor ne yô, se umbur nen ser aluer se mba geman ior hingir mbahenen hanma shighe ga je kpa, loho la ngu “mpase” hen a ve. Aluer ior kegh ato avese shin ve kegh ga kpa, ve lan kwagh u se lu eren ga, nahan yô se mba wasen u kuren kwaghôron u profeti u Yesu ne. (Yesaia 52:7; Mpase 14:6, 7) Gum Orshiada ugen shin Ityôtar i Yuropa, mba yer un ér Jordy kaa wener: “M fa er Yehova a lu yaren tom a mo u kuren mkaanem ma ken Mateu 24:14 la yô, nahan kwagh ne nam msaanyol kpishi.” (2 Mbakorinte 2:15–17) A shi nan kpa, we kpa kape i lu u vough je la.

Zum u Ior Ve Lu Hendan Avese sha ci u Loho Wase Yô

15. (a) Yesu tsenga tan mbadondon nav icin ér nyi? (b) Kanyi i wasen se u pasen ior kwagh shin er i lu hendan avese nahana?

¹⁵ Ahendan kpa ka kwagh ugen u a ne i lu se ican kpishi u pasen loho u dedoo u Tartor yô. Yesu tsenga tan mbadondon nav icin wener: “Akuraior cii aa kôr ne ihom sha ci u iti Yam.” (Mateu 24:9) I kôr mbadondon mba Yesu mba sha ayange ne ihyom, mba hendan a ve shi mba tôvon ve a ican er Mbakristu mba sha ayange a tsuaa la kpa lu nahan. (Aerenakaa 5:17, 18, 40; 2 Timoteu 3:12; Mpase 12:12, 17) Ugomoti mba ityar igenegh wa atabam sha tom ve er se lu ôron kwagh zan a mi ave ne. Kpa, Mbakristu mba mimi mba sha ajiir shon ne mba ungwan imo i Aôndo, nahan mba pasen loho u dedoo u Tartor ngeghelee. (Amoshi 3:8; Aerenakaa 5:29; 1 Peteru 2:21) Kanyi i wase ve kua Mbashiada  mbagenev sha tar jimin cii u eren kwagh nahana? Ka agee a Yehova a lu nan ve sha ikyev i icighan jijingi na la.—Sekaria 4:6; Mbaefese 3:16; 2 Timoteu 4:17.

16. Yesu tese mlu u kôôsôô u tom u pasen loho u dedoo la vea jijingi u Aôndo nena?

¹⁶ Yesu ngise pase mlu u kôôsôô u hen atô u icighan jijingi u Aôndo man tom u pasen loho u dedoo zum u a kaa a mbadondon nav ér: ‘Né va ngohol agee shighe u Icighan Jijingi Una va sha a ven yô, man né lu mbapasen kwagh Wam zan zan á ar ken ikighir i tar je.’ (Aerenakaa 1:8; Mpase 22:17) Gbenda u ivur ne i er kwagh sha alô sha alô ne ka kwagh u injaa kpishi. Hiihii yô, mbahenen vea ngohol icighan jijingi, maa vea gba mi eren tom u pasen kwagh sha tar cii la. Lu sha iwasen i icighan jijingi u Aôndo tseegh mbahenen mban zua a agee a wan ishima ‘pasen akuraior cii loho u dedoo’ ye. (Mateu 24:13, 14; Yesaia 61:1, 2) Ka nahan ve, Yesu yila icighan jijingi vough ér ka “Orsurunshima [shin Orwasen, NW ]” ye. (Yohane 15:26) A kaa wener jijingi u Aôndo una tese mbahenen nav shi una hemen ve kpaa.—Yohane 14:16, 26; 16:13.

17. Icighan jijingi ka a wase se zum u se tagher a ahendan kpoghuloo nena?

¹⁷ Jijingi u Aôndo wasen se nyian zum u se tagher a ahendan kpoghuloo sha ci u tom wase u pasen ior loho u dedoo la sha nyi igbenda? Ne se agee, shi hendan a mba ve tôvon se a ican la. U tesen ikyav yô, nenge kwagh u ngise er Tor Saulu ne.

Jijingi u Aôndo Yange Un

18. (a) Mlu u Saulu yange gema kwa môm tume inya nena? (b) Saulu yange tôv Davidi a ican nena?

¹⁸ Zum u i kôr Saulu tor sha Iserael, lu tor ve u hiihii la, lu eren akaa cii sha inja, kpa ken masejime yô, a hemba Yehova ato. (1 Samuel 10:1, 24; 11:14, 15; 15:17–23) Nahan, jijingi u Aôndo kera lu a na ga. Lu hen shighe ne, í shighe Davidi mkurem ér a kar a tema tor sha ityough nagh ye, nahan jijingi u Aôndo lu a na. Ishima maa gba vihin Saulu a Davidi je gba tswamen un. (1 Samuel 16:1, 13, 14) Lu inja er Saulu una wua Davidi keng, a bunde ga nahan. Gadia Davidi lu a molo u kuhwan ityogholov tseegh, kpa Saulu lu a iwange sha uwe. Nahan er Davidi lu kuhwan molo iyange igen yô, “Saulu ker iwange la; a kaa er: Me tume Davidi je i̱ kar i̱ kôr ken kpekpe; kpa Davidi palegh kar kera kuma kwa har je.” (1 Samuel. 18:10, 11) Ayange nga kar yô, Saulu ungwa imo i wan na Yonatan, ijende i Davidi, nahan a bum ér: “Er TER A lu u uma ne, á wua [Davidi] je ga.” Kpa Saulu shi “nôngo er una tume Davidi iwange i̱ kar i̱ kôr ken kpekpe.” Kpa Davidi “palegh, a kar Saulu sha ishigh kera; iwange kar tume ken kpekpe.” Davidi yevese,  Saulu maa mough gba zendan un ijime. Hen shighe la cii, jijingi u Aôndo gba hendan kwagh a Saulu. Lu hendan a na nena?—1 Samuel 19:6, 10.

19. Jijingi u Aôndo kura Davidi nena?

¹⁹ Davidi yevese za kohol profeti Samuel, kpa Saulu tindi ior ér ve za kôr un. “Mbatyomov mba Saulu mbara” mba za sôôn ape Davidi yer la yô, ‘jijingi u Aôndo gba sha ve, ve gba ôron kwaghôron u profeti.’ Jijingi u Aôndo iv ken ve je ityom i í tindi ve la hungur ve kuaa. Kpa Saulu shi tindi ior mbagenev acin ahar ér ve za kôr Davidi, ve kpa lu kwagh shon môm er ve ye. Tsô Tor Saulu maa mough za hen Davidi iyol na, un kpa jijingi u Aôndo gba sha na. Icighan jijingi yange un u zan mape, a “shi didi, tugh mbura cii lu her,” nahan Davidi zua a ian yevese yem.—1 Samuel 19:20–24.

20. Ka nyi se hen ken ngeren u a er kwagh u mtev u Saulu tôv Davidi a ican laa?

²⁰ Se hen kwagh sha kwagh u Saulu man Davidi ne u a taver se ishima kpen kpen yô. Kwagh shon yô ka un ne: Mba ve tôvon mbacivir Aôndo a ican mba jijingi u Aôndo a lu hendan kwagh a ve cii vea za ikyura ga. (Pasalmi 46:11; 125:2) Yehova yange wa ishima ér Davidi a̱ lu tor u Iserael. Nahan lu u or môm nana gema awashima la ga. Sha ayange ase ne di, Yehova soo ér i̱ ‘ôr Loho u Dedoo u tartor ne’ keng. Or môm nana fatyô u bunden awashima ne ga.—Aerenakaa 5:40, 42.

21. (a) Mbaahendanev mbagenev nyian mba eren kwagh nena? (b) Se mba a vangertiôr ser nyi?

²¹ Mbahemenev mba ukwaghaôndo kua mbahemen tar mbagenev ka ve wa se mbaaie iyol shi ve tswamen se je kpaa sha er vea nôngo a yange se yô. Kpa, er Yehova ngise kura Davidi ken jijingi nahan, nyian kpa una kura ior nav. (Malaki 3:6) Yô, se mba kaan vangertiôr er Davidi kpa ôr nahan ser: ‘Ka sha Aôndo se suur ye, se cia ga, ka nyi man or á er se?’ (Pasalmi 56:11; 121:1–8; Mbaromanu 8:31) Sha iwasen i Yehova yô, se za nen hemen u wan ishima a mbamtaver mba se tagher a mi ken tom u Aôndo a ne se u pasen akuraior a hanma zwa cii loho u dedoo u Tartor u se lu eren ne.

[Footnotes]

Ú Umbur Kpa?

• Er nan ve se geman igbenda yase i pasen kwagha?

• Ka “hunda u vesen” u van se a aan a he u nyi ú bugh sha ci wase?

• Tom wase u pasen ior loho u dedoo la ngu wasen u eren nyi, kua sha ajiir a ior ve keghen ato a vese ga je kpaa?

• Er nan ve i lu kwagh u or u hendan kwagh avese môm tsô nana fatyô u yangen tom u pasen ior loho u dedoo u Tartor ne ga?

[Study Questions]

[Box on page 28]

Ve Zua a Mkom Kpishi

“Saan ve iyol, mba eren tom u Yehova imôngo sar sar.” Mkaanem man pase mlu u tsombor ugen u yange ú mough ken tar u Ishpania ú yem ken tar u Bolivia yô. Wan u hen tsombor ne u nomso yange hii zan ken tar la za wase annongo ugen. Iember i á zua a mi ken tom na la doo mbamaren nav kpishi, maa ve mough a ônov vev unyiin mba anyom ve hii 14 zan zan 25 yô, ve gba za eren tom ker. Mbayev mban utar mba eren tom u pania hegen. Semberee ne u yange hii bughun gbenda u moughon yemen ken tar u Bolivia la za Makeranta u Tsaase Mbashiren Tom la.

Angelica, anmgbian u kwase u lun anyom 30, u ken tar u Kanada u á lu eren tom u pasen kwagh sha Ityoughkitaregh ki Yuropa yô kaa ér, “mbamtaver ngee, kpa er m lu wasen ior sha u pasen ve kwagh yô, m zua a mkom. Doom kpishi er Mbashiada mba m lu hen ijiir ve ne ka ve shi sughun mo sha iwasen i m lu wasen ve la nahan.”

Anmgbianev mba kasev uhar mba lun ngô môm mba ken tar u Amerika, mba ve zulum anyom 30 yô mba pasen kwagh ken tar u Dominican Republic. Ve kaa ér, “yange gba u a hoghol se a aeren a ityôô atô kposo kposo, nahan kpa se wa ishima se za hemen a tom wase. Kwagh ne na yô, mba se henen Bibilo a ve utaankaruhar mba zan mbamkombo hegen.” Anmgbianev mba kasev mban yange ve wase u nengen sha annongo u mbapasenkwagh u Tartor hen geri ugen u tiônnongo lu ga yô.

Laura, anmgbian u kwase u a zulum anyom 30 yô ngu eren tom u pasen loho u dedoo ken tar ugen hemba anyom anyiin hegen. A kaa ér: “M venda u lun a akaa hambe hambe sha apera je. Kwagh ne wase anmgbianev mbagenev u fan er i lu ibanave i̱ ne or lu a akaa kpuaa keng ga, kpa i lu ishima i nan man kwaghfan kpaa yô. M zua a iember kpishi sha u wasen mbagenev, hemban je yô agumaior, nahan mbamtaver mba m lu tagher a mi sha ci u m ngu eren tom ken tar u ú lu u wam ga ne cii, beem kwagh ga. Mayange me gema tom u m lu eren heen ne me ta kera sha ci u kwagh ugen ga. Er Yehova a ne ian ér m lu heen yô, lun yam je ne.”

[Box/Picture on page 32]

Akaa a ken Antakerada u Good News for People of All Nations La

Antakerada u Good News for People of All Nations la ngu a loho sha hanma peeji ken ijô 92. Í nger loho ne ú ôr kwagh a hanma or jighilii. Nahan zum u ú ne orya loho ne wer nana ôr yô, ka inja er ka we jighilii ú lu lamen a nan nahan.

Í kpera foto u ityar kposo kposo sha igbende i antakerada ne, vegher u ken atô la. Yar tom a foto ne, ôr kwagh a orya sha gbenda u nana kegh ato a we yô. Tese nan tar u ne lu her la sha foto shon, maa kaa a nan wer nana tese ú tar u nan dugh her yô. Aluer ú er nahan yô, alaghga kwagh ne una wase nan u lamen a we a mciem shio.

Kwaghngeren u a lu ken mhii u antakerada ne la tér akaa kposo kposo a se er sha er se wase ior mba lamen zwa ugenegh u se fe ga la doo doo yô. Ôr akaa ne vighe vighe, shi dondo á vough vough kpaa.

I nger ijô kposo kposo kua agbengerabaacaa a a til sha ityough ki ijô shon kpaa ken atineakaa a antakerada ne. Kwagh ne una wase ú u fan agbengerabaacaa a a til sha ijô kposo kposo a ka i nger sha trak man ityakerada yase igen kpaa la.

[Picture]

Ú ngu yaren tom a antakerada ne sha u pasen ior kwagh kpa?

[Pictures on page 29]

Ityakerada yase i Bibilo ngi ken ijô hemba 400 hegen

GHANA

PHILIPPINES

LAPLAND (SWEDEN)

[Pictures on pages 30, 31]

Ú fatyô u za eren tom ape kwagh a hembe gban sha mbayôôn angwe u Tartor kpa?

ECUADOR

DOMINICAN REPUBLIC