“Saan Mba Ve Lu Mbaibanave ken Jijingi la Iyol”

INYON ka ia nder sha use yô, í wa amo keng, cii ve í mase purugh yemen kwaghyan u keren ye. Iyange a been yô í za cin í hide, í wa amo kpuaa maa í yav. Ashighe nga a inyon i undu shi i te aji shi i tseven ônov kpaa yô. Inyam igen kpa uma ve nôngo u lun nahan.

Kpa uumace yô mba kposo. Sha mimi yô, se mba ye kwagh shi se mba yaven shi se mba maren ônov kpaa, kpa se mbagenev kpishi akaa angan tseegh kuma se ga. Se soo u fan ityôkyaa i se lu uma jim yô. Se soo u fan mluainja u uma wase. Shi se mba a ishimaverenkeghen i akaa a ken hemen kpaa. Akaa a vesen a kwagh a gbe se sha mi ne gema tese ieren igen i̱ í lu uumace tseegh ve lu a mi yô—inja na yô, kwagh gba ve sha akaa a ken jijingi.

I Gba Se sha Inja i Mlu u Aôndo

Bibilo pase er i hii ve kwagh a gbe uumace sha akaa a ken jijingi yô, i̱ kaa ér: “Aôndo gba or sha inja i mlu Na, lu sha inja i mlu u Aôndo je A gba nan ye; lu nomsoor man kwase A gba ve ye.” (Genese 1:27) Er i gbe se “sha inja i mlu u Aôndo” yô, se fatyô u dondon aeren a Aôndo agenegh shin er isholibo man mlu wase u vough ga la a hôngor se nahan kpaa. (Mbaromanu 5:12) U tesen ikyav yô, se mba a mfe u gban akaa. Shi se wa mban a kwaghfan man ieren i mimi, shi se fatyô u eren kwagh a mbagenev sha dooshima a iyol tangen shio kpaa. Heela tseegh ga, se fatyô u henen sha kwagh u a vande eren yô shi wan iyol sha kwagh u ken hemen kpaa.—Anzaakaa 4:7; Orpasenkwagh 3:1, 11; Mika 6:8; Yohane 13:34; 1 Yohane 4:8.

Isharen yase i sha marami i civir Aôndo la tese wanger wanger ér kwagh gba se sha akaa a ken jijingi. Nahan saa se kure mgbe u i gbe se ishima u lun ikyua ikyua a Orgban wase ne sha inja keng ve se zua a msaanyol u mimi man u tsan gbem sha won ye. Yesu kaa ér, “Saan mba ve lu mbaibanave [shin kwagh a gbe ve sha akaa a] ken jijingi la iyol.” (Mateu 5:3) Kpa, doo u se wa ikyo tsung sha er a lu akaa a ken jijingi a mimi la se kure mgbe wase ne a mi ye. Inja na yô ka mimi sha kwagh u Aôndo man atindi a na man kwagh u a we ishima u eren sha ci u uumace je la. Se zua a mimi ne hana? Se zua a mi ken Bibilo.

“Ka Kwaghôron Wou Je a Lu Mimi Ye”

Apostoli Paulu ngise nger wener: “Icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange.” (2 Timoteu 3:16) Mkaanem ma Paulu man zua vea ma Yesu ôr ken msen u a er hen Aôndo ér: “Ka kwaghôron Wou je a lu mimi ye.” Se fa Kwaghôron shin Mkaanem nam man nyian ser ka Icighan Bibilo, nahan doo u se er kwagh sha inja sha u tôvon nengen aluer jighjigh wase man  aeren a ase zua sha atindi a Bibilo yô.—Yohane 17:17.

Aluer se tôô akaa a se ne jighjigh a mi la se kar sha Mkaanem ma Aôndo yô, se lu eren kwagh er ior mbangise mba ken gar u Berea kpa er nahan. Yange ve tôô akaa a Paulu tese ve la ve kar sha Ruamabera sha u vea nenge aa lu mimi yô. Luka yange wuese ior i Berea mban sha ieren ve ne, puu ve a puu ga. A kaa ér, ve “rumun kwaghôron la sha gbashima shi ve lu timen ken icighanruamabera ayange ayange sha u vea nenge shin akaa la aa lu nahan yô.” (Aerenakaa 17:11) Er atesen a kwaghaôndo a lu nzughul nzughul nyian shi kwagh u aeren a dedoo kpa a lu nahan yô, doo u se dondo ikyav i ior i Berea mba ve lu a inja i mimi la.

Gbenda ugen u se fa mimi yô ka u nengen er a bende a ior mbagenev yô. (Mateu 7:17) U tesen ikyav yô, aluer or ngu eren kwagh sha mimi u ken Bibilo la yô, una na nana hemba lun nom u injaa shin ter u injaa, kwase di nana hemba lun kwaseya u injaa gayô ngô u injaa, tsombor u nan cii ua hemba lun saan saan shi nan iyol i nan kpa nana hemba zuan a mkom. Yesu kaa ér: “I saan mba ve ongo kwaghôron u Aôndo man ve eren sha mi kpaa la, iyol.”—Luka 11:28.

Mkaanem ma Yesu man umbur se kwagh u Ter na u sha ôr a Mbaiserael mba ngise la. A kaa a ve ér: “Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la. Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.” (Yesaia 48:17, 18) Sha kpôô yô, mba kwagh u dedoo man u perapera a doo ve ishima cii, kwaghôron u sha zamber ne una doo ve keng!

Mbagenev Hemba Soon Ér i ‘Ngiligh Ve Ato’

Aôndo yange ôr kwagh a Mbaiserael sha zamber gadia i tsume a ve sha atesen a ukwaghaôndo mbagenev. (Pasalmi 106:35–40) Se kpa gba u se lu tsevaa sha er a tsugh se ga yô. Paulu ngise ôr kwagh u mba ve sengen ér ve mba Mbakristu la wener: “Shighe ngu van u ior vea kera fatyô u veren ato sha ityesen i dedoo ga, vea kohol mbatesen kpishi sha asaren a ve ayol a ve sha ci u ato vande ngiligh ve yô. Vea tôô ato a ve sha kwagh u mimi la kera.”—2 Timoteu 4:3, 4.

Mbahemenev mba kwaghaôndo mba ngiligh ior ato sha u lumun aeren a a zough sha asaren a ve a bo la. Aeren amba er idya i eren man myav u nomso yaven a nomso man msôrom ma hunden nahan. Bibilo pase wanger wanger ér mba ve lumun a aeren ne man mba ve eren a kpaa “vea ya dyako u tartor u Aôndo ga.”—1 Mbakorinte 6:9, 10; Mbaromanu 1:24–32.

Sha mimi yô, saa or nana taver ishima dedoo ve nana kôr cio u kuran atindi a Bibilo ye, hemban je yô zum u mbagenev ve lu nahan nan tar yô. Kpa kwagh ne gande u or a er ga. Mbashiada mba Yehova mbagenev ngise ve lu mba man mcimbim ma bov, mbagen lu mbahunden msôrom, shin mbaidyarev shin  mba nôngon num shin mba-iv shin mbaerenaie. Nahan cii kpa, ve de ér Mkaanem ma Aôndo ma nyôr ve ken asema, shi icighan jijingi wase ve ve gema uuma vev sha er vea “zende zende u u kom Ter” yô. (Mbakolose 1:9, 10; 1 Mbakorinte 6:11) Mba lun ken bem vea Aôndo yô, ve kpa ishima gba ve shimi, ngeren ne kaa a vese ken hemen ér kwagh ne na ve ishimaverenkeghen i mimi kpaa.

Ishimaverenkeghen i Tartor

Ishimaverenkeghen i Bibilo i er sha kwagh u bem u tsôron u a lu sha ci u mbaperapera la ia kure sha mi ken Tartor u Aôndo. Yesu ôr ken msen u yange tese mbahenen nav la wener, “tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Sha mimi yô, ka Tartor u Aôndo tseegh ua na a er ishima i Aôndo shin tar ye. Sha ci u nyi? Sha ci u ka Tartor u sha, u ú lu gomoti u sha ikyev i Yesu Kristu la ú lu gbenda u Aôndo una hemen tar cii ye, gadia ngu a ian i hemen sha won cii.—Pasalmi 2:7–12; Daniel 7:13, 14.

Yesu Kristu u a lu Tor u Tartor u sha la una yima mbaperapera sha ikyev i hanma kwagh u a lu zan ve iyol cii, kua mker u isholibo i Adam er la i̱ ker ve dông la, man angev kua ku u isholibo shon i ve a mi la kpaa. Mpase 21:3, 4 kaa ér: “Nenge, tenti u Aôndo ngu hen ior . . . Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”

Bem una lu sha tar cii gbem sha won. Er nan ve se fe ser kwagh a lu nahana? Yesaia 11:9 pase ér: “[Mba vea lu ken Tartor la] vea vihi kwagh ga, vea tim kwagh sha icighanwo Wam cii kpaa ga, gadia tar ua mgbough a mfe u TER er mngerem ma ngee shin zegemnger nahan.” Sha kpôô yô, hanma or sha tar nana lu a mfe u Aôndo, shi nana ungwan imo na kpaa. Saan we iyol sha ishimaveren ne ga he? Aluer saan we iyol yô, hii ase u zuan a ‘mfe u Yehova’ u injaa la hegen je.

Á Ôrou Loho u Tartor la Nahan Ú Ungwa Kpa?

Aôndo una vihi ityom i Satan cica cii shi una tese ior igbenda Na i perapera sha ikyev i  Tartor. Kape i lu ve Tartor la lu kwagh u vesen u Yesu ôron ior je la. A kaa ér: “Ka u Me ôr Loho u Dedoo u tartor u Aôndo . . . keng, gadia ka sha ci u nahan je i tindim ye.” (Luka 4:43) Kristu yange kaa a mbahenen nav ér ve pase mbagenev loho shon. (Mateu 28:19, 20) A tsengaôron wener: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Mkur shon nangem hegen. Nahan gba hange hange u a ôr mbaasemaamimi loho u dedoo u waren uma ne!

Orgen mba yer iti na ér Albert, yange ungwa loho u Tartor zum u Mbashiada mba Yehova hii u henen Bibilo a kwase na man wan na yô. Sha hiihii la, Albert soo u ungwan ga. Nahan a kaa a fada ugen u hen ningir ve ér a̱ va lam a kwase na man wan na, a pon mbaaie mba Mbashiada ken igbar. Kpa fada ne soo u wan uwegh sha kwagh la ga. Nahan iyange igen yô, Mbashiada mban lu henen Bibilo a kwase na kua wan na maa Albert va tema her sha er una pon mbaaie vev mbara iyol na yô. Kpa i hen di kwagh môm tseegh tsô maa un kpa nyôr kwaghhenen la, a soo u zuan a mlumun sha akaa kposo kposo. Ayange nga kar yô, a pase er i hii ve yange un hii u henen kwagh a ve yô. A kaa ér: “Akaa a ve lu ôron la lu akaa a yange vande saren mo u fan yô.”

Lu hen shighe ne Albert hii u kuren mgbe na u ken jijingi ye. A vaa afanyô sha kwagh ne ga cii. Mimi u ken Bibilo wase un u fan kwagh u lu vanden keren ér una fa yô—ka mbee u ifer man anyighe u a ngee ken tar kua ishimaverenkeghen i akaa a ken hemen je la. Mimi u Bibilo wase un u zuan a bem. Ú ngu zuan a mkom sha mgbe wou u ken jijingi kpa? Time ase sha mbampin mba i nger ken akwati u a lu sha peeji 5 la. Aluer ú soo u zuan a iwanger sha mbampin mban seer yô, a doo Mbashiada mba Yehova kpishi u tan we iwanger.

[Box/Pictures on page 5]

Ú Ngu Zuan A Mkom Sha Mgbe Wou U Ken Jijingi Kpa?

Ú ngu zuan a mkom sha akaa a ken jijingi a i ôron we la kpa? Ôr ase mbampin mba i nger shin heen ne, nahan nenge aluer ú fatyô u nan mbamlumun sha mi vough yô.

□ Ka an nan lu Aôndo, man iti na ér ana?

□ Ka an nan lu Yesu Kristu? Er nan ve Yesu yange kpe? Ku na la ua wase ú nena?

□ Diabolo ngu kpa? Aluer ngu yô, á due hana?

□ Kanyi ka i er se zum u se kpe laa?

□ Kanyi i lu awashima u Aôndo sha ci u tar man uumacee?

□ Kanyi i lu Tartor u Aôndo?

□ Kanyi i lu atindi a Aôndo sha kwagh u aeren a wang-na?

□ Kanyi tom Aôndo a ne nom man kwase ér ve eren hen tsomboro? Ka atindiakaa a Bibilo a nyi a ne tsombor ú hembe lun a msaanyolo?

Aluer ú fa mlumun sha ma mpin u í pin sha heen ne ga yô, ôr i na u antakerada u a kaa ér, Kanyi Aôndo a Soo her Avese? la. Ka Mbashiada mba Yehova ve gber u ye. I gber u ken ijô je war kuman 300 nahan. Antakerada ne ôr kwagh sha atineakaa a vesen a ken Bibilo kuma 16 shi a na mbamlumun mba ve har sha Ruamabera sha mbampin mba i pin sha heen ne cii.

[Pictures on page 3]

Kwagh gba uumace sha akaa a ken jijingi, kpa annyamev yô ka nahan ga

[Picture on page 4]

“Vea kohol mbatesen kpishi sha asaren a ve ayol a ve sha ci u ato vande ngiligh ve”—2 Timoteu 4:3

[Picture on page 6]

Tartor u Aôndo u sha ikyev i Mesiya la ua va a bem u tsôron