Wuese Nen Yehova, Ne Ikyaior!
Wuese Nen Yehova, Ne Ikyaior!
“Wuese nen TER shin tar, ne . . . ikaior kua mbayevkasev.”—PASALMI 148:7, 12.
1, 2. (a) Ka mbamyange mba nyi mbayev kpishi ve lan ga? (b) Er nan ve i doo u ikyaior ia vihi ishima ér mbamaren vev yange ve u eren akaa agen yum ga?
ASHIGHE kpishi mbayev ka ve fa akaa a i lu a na ve ian ér ve eren ga yô. Mbayev kpishi vea fatyô u ôron we anyom a vea lu ve a na ve ian i peren igbudu ve tseegh shin man ahumbe zan zan va hiden shighe u nyôron yaven, shin shighe u vea kuma u nahan mato yô. Ashighe agen yô, wanye nana hen ér hanma kwa u ka nana pine ian ér nana er kwagh je i kaa a nan ér “u ngu a kuma ga.”
2 Ne mbayev, fa nen ner aluer mbamaren mba yangen ne u eren akaa kpa, mba kuran ne a kura. Shi fa nen kpaa ner ka i doo Yehova a ven zum u ka nea ungwan imo i mbamaren enev yô. (Mbakolose 3:20) Nahan kpa, ka i lu u inja er mbamyange mban na yô, u ngu a hii uma “jim jim” ga shinii? Er u lu wanye yô, akaainjaa nga karen we, saa shighe u ú va gande or ve shinii? Imba mhen la ka u sha mi ga! Mba eren tom ugen zan a mi ave nyian u ú hembe lun a inja a hanma kwagh ugen u i sar u u eren cii yô. Mbayev, i na ne ian i eren tom shon kpa? I na a na ne ian i eren u tseegh ga, kpa i lôhô ne jighilii ér ne er tom ne, man ka Aôndo Uhembansha iyol na je a lehe ne ye!
3. Ka tom u vesen u nyi Yehova a lehe ikyaior ér ve ere, man ka mbampin mba nyi se lu timen sha mini?
3 Kanyi tom se lu ôron kwagh u ú? Ver ishima sha ivur Bibilo i kwaghhenen ne a har sha mi la, i̱ kaa ér: “Wuese nen TER shin tar, ne . . . ikaior kua mbayevkasev, utsembaiorov man mbayev kpaa.” (Pasalmi 148:7, 12) Ivur Bibilo ne ôr tom u vesen u í gbe u ú er yô, i̱ kaa ér: We u wuese Yehova. Aluer u ngu gumor yô, saan we iyol u eren tom u van Yehova a iwuese ne kpa? Saan igyumior kpishi iyol u eren tom ne. De se time sha mbampin utar, mbampin mban vea wase se, se nenge er i doo u a saan se iyol u eren tom ne yô. Mpin u hiihii yô, ka un ne: Er nan ve i gbe u ú wuese Yehova? U sha uhar yô, u wuese Yehova doo doo nena? U sha utar yô, ka hanma shighe nahan i hembe doon u ú hii u wuese Yehova?
Igyumior Ia Wuese Yehova Ér Nyi?
4, 5. (a) Pasalmi ityough 148 tese ér se mba eren kwagh u vesen u nyi? (b) Akaa a Aôndo a gbe a lamen ga shi a henen kwagh kpaa ga la nga wuese Yehova nena?
4 Ityôkyaa i vesen i i ne ve i gbe u se wuese Yehova yô, ka un a gbe akaa cii ye. Pasalmi 148 wase se u fan ser mimi je ka Yehova a gbe akaa cii ye. Tôô ase wer, ikpelaior kohol imôngo ngi wan icam, icam shon doo ungwan kpen kpen shi i maa iyol kpaa, aluer u kporom ikyua u ungwa i nahan a doo u ga he? Aluer ngi a asember a u vande fan wer ka a mimi, shi a pase akaa a injaa, a nan or iember kua ishimataver nahan, u er nena? A maa u iyol u henen icam shon, dondon ikpelaior la wan i ga he? Ka kwagh u ior kpishi vea er vough je la. Pasalmi 148 tese ér we kpa u ngu wan icam a ikpelaior imôngo, kpa icam shon hemba doon cii. Pasalmi la pase ér zegeikpelaior ngi wan icam wuese Yehova. Aluer u ôr pasalmi ne yô, u nenge a kwagh ugen u a kaha kposo yô. Kanyi kwagh laa?
5 Akaa agen kpishi a í ter ken Pasalmi 148 ér nga wuese Yehova la, ka akaa a a lamen ga shi a henen kwagh kpaa ga yô. U tesen ikyav yô, avur agen ôr ér iyange man uwer man asan kua awombo man ahumbe man iwo kua agungu cii nga wuese Yehova. Akaa a lun uma ga ne nga wuese Yehova nena? (Ivur 3, 8, 9) Nga wuese un vough er ikyon man akaauma a shin zegemnger man ishôso i sha tar i eren nahan. (Ivur 7, 9, 10) I lu nahan u kenger iyange aikighe, shighe u i̱ yem miren ve i̱ mondo i dooashe yum la vee? Shin u kenger uwer shighe u ú te tugh i wanger wang la vee? Shin u nenge ishôso numbe doo u vee? I lu nahan u kenger ijiir i dedoo kua akaa a doon a a lu her cii nahan kondo u iyol vee? Ka igbenda i akaa ne a wuese Yehova je la. Akaa a Yehova a gbe cii tese se ér ka un tswen a lu Orgbanakaa u hemban cii ye, or môm sha won hemba un agee ga, shi nan ngu a kwaghfan shin dooshima er wen nahan ga.—Mbaromanu 1:20; Mpase 4:11.
6, 7. (a) Ka akaa a i gbe, a lu a kwaghfan kpishi a nyi nahan a lu wuese Yehova? (b) Kanyi nahan ia na ve ishima ia mgbegha se u wuese Yehova? Tese ikyav.
6 Pasalmi 148 shi kaa ér akaa a i gbe, a lu a kwaghfan kpishi la kpa nga wuese Yehova. Ivur i sha uhar la kaa ér “akum” a Yehova a sha nga wuese un, ka mbatyomov je la. Ken ivur i sha 11 la, i lôhô uumace mba ve lu a tahav man ashagbaior, er utor man mbaajiriv mba shin tar cii ér ve wuese Yehova. Ka maan mbatyomov mbaageev iyol kpishi u wuese Yehova, nahan ka se uumace mba kaka ve se tôô ser se gande u wuese Yehova yee? Ken ivur i sha 12 man 13 la di i lôhô ikyaior ér ve wuese Yehova. Ka u ape wuese Yehova kpa?
7 Time ase sha ikyav ne. Tôô ase wer u ngu a ma huror, nan ngu a mfe kpishi—alaghga nan fa u eren anumbe, shin nan fa u gbanakaa, shin kuhwan ityogholough—imba huror la nahan, a saan we iyol u ôron tsombor wou man ahuraior a ou agen kwagh u nan ga he? U ôr ve kwagh u nan keng je. Yehova kpaa, aluer se hen sha akaa a a er sha ci wase la cii yô, a saan se iyol u ôron mbagenev kwagh na. U tesen ikyav yô, Pasalmi 19:1, 2, kaa ér asan a sha kwavaôndo ka a shi ôron kwagh na “nduuluu.” Aluer se time sha akaa a kpilighyol a Yehova a er la yô, mayange je se gba teman tsô ga, se ôr mbagenev kwagh u Aôndo kpee.
8, 9. Ka atôakaa a nyi nahan a tese ér Yehova soo ér se wuese unu?
8 Ityôkyaa i vesen igen i se wuese Yehova yô, ka sha ci u a na se ian ér se wuese un. Er nan ve a ne se ian ér se wuese unu? Ka sha ci u una ya icivir hen uumace shinii? Ka nahan ga. Ashighe agen se uumace ka se soo icivir, kpa se fatyô u tôôn Yehova karen sha uumace ga, sha ci u a hemba se ica je. (Yesaia 55:8) A fa iyol na shi a fa aeren a na kôr inya. (Yesaia 45:5) Nahan kpa, a soo wener se wuese un, man ka sea wuese un yô, i doo un. Sha ci u nyi? Time sha atôakaa a ahar ne. Ityôkyaa i hiihii yô, á fa wener gba u se civir un. Á gba se a isharen i ken jijingi, isharen i civir un. (Mateu 5:3) Ormaren ka nana na wanye kwaghyan u nan fe ér ka u injaa man nana nenge wanye la yan kwaghyan shon nahan i doo nan kpen kpen, kape Yehova kpaa ka una nenge sea eren sha isharen i se lu a mi i civir un la ve, i doo un je la.—Yohane 4:34.
9 Ityôkyaa i sha uhar yô, Yehova fa ér mbagenev mba, mba i gbe u se wuese un vea ungwa yô. Apostoli Paulu nger gumor Timoteu mkaanem man ér: “Ver ishima sha iyol you man ityesen you kpaa, taver ishima sha mi. Aluer ú er nahan yô, ú yima iyol you kua shi mba ve lu ungwan we la kpaa.” (1 Timoteu 4:16) Sha mimi yô, aluer u ngu tesen mbagenev kwagh u Yehova Aôndo, shi u ngu wuese un yô, alaghga ve kpaa vea va civir Yehova. Mfe ne una wase ve vea zua a uma u tsôron.—Yohane 17:3.
10. Er nan ve i gbe hange hange u se wuese Aôndo wase?
10 Ityôkyaa igen kpa ngi i i ne ve i gbe u se wuese Yehova yô. Umbur ikyav i í vande tesen sha kwagh u huror wou u nan fe u eren akaa kpishi la. Aluer u ungwa or ngu wan nan aie iyol shin nan ngu vihin nan iti nahan u paa nan iyol ga he? Yehova kpaa i vihi un iti tar sha won cii. (Yohane 8:44; Mpase 12:9) Nahan, ior mba Yehova a doo ve ishima yô, doo ve u ôron mbagenev mimi sha kwagh na sha er vea paa un iyol yô. We kpa u soo wer u tese dooshima man iwuese you hen Yehova kpa? U soo u tesen er i lu Yehova a lu Orhemen wou, i lu Satan ga kpa? U fatyô u eren akaa ne cii aluer u ngu wuese Yehova yô. Nahan, u wuese un nena?
Gbenda u Ikyaior Igen Wuese Yehova La
11. Ka akav a i nger ken Bibilo a nyi a tese ér mbayev mba kiriki kpaa vea fatyô u wuese Yehova sha gbashima?
11 Bibilo tese ér ikyaior ngi wuese Yehova sha gbashima. U tesen ikyav yô, Mbashiria yange ve kôr wanyekwase u Iserael ugen ve yem a na uikyangen. Wankwase ne pase kwaseya na kwagh u profeti Elisha vangertiôr. Nahan i bee orvesen na angev. Kwagh ne gema er shiada i vesen sha kwagh u Yehova. Kwaghpasen na la va na ivande i er, ivande ne i er shiada i vesen sha kwagh u Yehova. (2 Utor 5:1–17) Yesu kpa pase kwagh gbar gbar shighe u lu iyev la. Ken akaa a á er shighe u lu iyev la cii ka môm tseegh Yehova a ne i nger ken Ruamabera ye. I ôr kwagh u á er shighe u lu anyom 12 la ér, yange za ken tempel ken Yerusalem, lu za lamen a mbatesen kwaghaôndo, maa á pine ve mbampin a mciem shio, nahan mfe u lu a mi sha igbenda i Yehova la kpiligh ve iyol.—Luka 2:46–49.
12, 13. (a) Er zurum u Yesu una kpe yô, a er nyi kwagh ken tempele, man kwagh la bende a ior mba ve lu her la nena? (b) Yesu yange nenge iwuese i mbayev mbakiriki la nena?
12 Zum u Yesu gande or la kpa á taver mbayev asema ér ve wuese Yehova. U tesen ikyav yô, er zurum u Yesu una kpe yô, a shi ken tempel ken Yerusalem gbem. Bibilo kaa ér lu eren ‘ityom i kpilighyol.’ Shi zenda ior mba ve gema icighan ijiir la hingir bar u mbaiv la ken tempel kera. Shi bugh mbaapirashe ashe shi bee mbaawanev angev kpaa. Akaa a Yesu er ne yange ma mgbegha mba ve nenge a la cii ma ve wuese Yehova kua Wan na u lu Mesiya la kpaa, hemban je yô, mbatesen kwaghaôndo. Kpa, kwagh ka a er i vihi yô, ior mba sha ayange la kpishi kwagh tsô gba ve u eren kwagh nahan ga. Mba ve nenge akaa a Yesu er la cii fa ér ka Aôndo a tindi un ye, kpa mbagenev kpishi cia mbatesen kwaghaôndo mbara, nahan ve na Yesu jighjigh ga. Kpa, ior mbagen gema lu mba ve ôr kwagh na vangertiôr yô. U fa ior mba shon kpa? Bibilo kaa ér: “Zum u upristi mba tamen man mbangeren ve nenge ityom [i Yesu] i kpiligh iyol i A er, man mbayev kpaa mba ve lu genger amo ken tempel kaan er: Hosana Wan u Davidi, yô, asema vihi ve. Ve kaa a na er: U ungwa kwagh u mban ve lu ôron ne kpa?”—Mateu 21:15, 16; Yohane 12:42.
13 Upristi mbara hen ér Yesu una yange mbayev mbara ve de wuese un ga. Kpa, Yesu cir ve zwa kpa? Ei. Á gema a kaa a ve ér: “Een Mayange ne mba a ôr kwagh u i nger la er: Ka ken zwa u anikundanev man mbamanatumba U sôr iwuese ye, gaa?” Kwagh ne tese ér iwuese i mbayev mba kiriki mban doo Yesu man Ter na. Kwagh u mbayev mban er la lu kwagh u mbaganden mba ve lu her la cii ma ve er je la. Alaghga ken asema a mbayev mbara yô, ve nenge Yesu a ibo ga. Ve nenge akaa a kpilighyol a Yesu er la, shi ve nenge er a pase kwagh gbar gbar shi lu a jighjigh u nan kpaa yô, shi ve nenge ér Aôndo doo Yesu ishima tsung kua ior nav kpaa. Alaghga ve lu henen ér Yesu ka Mesiya, “Wan u Davidi,” u i tende zwa ér ngu van la. Jighjigh u nan u mbayev mban na yô ve kure kwaghôron u profeti.—Pasalmi 8:2.
14. Agee man mfe u mbayev mba kiriki ve lu a mi la una wase ve u wuese Yehova nena?
14 Akav a se ter sha heen ne tese se nyi? A tese se ér mbayev mba kiriki vea fatyô u wuese Yehova sha gbashima. Mba a mfe u vea nenge a kwagh u a lu u mimi kpa vea fa, shi mba a ishima i ôron mbagenev kwagh u jighjigh ve sha gbashima kpaa. Shi kwagh u i er ken Anzaakaa 20:29 la kure sha ve, ivur la kaa ér: “Icivir i ikaior ka agee a ve je.” Sha mimi yô, ikyaior ngi a agee man tahav mbu vea wuese Yehova a mi yô. Nahan, ne er kwagh a agee man tahav mbu ne lu a mi la sha inja nena?
U Wuese Yehova Nena?
15. Aluer ú soo u wuese Yehova sha gbashima yô, doo u ishima you ia lu nena?
15 Ka er ishima i or i lu ker la ia na ve nana wuese Yehova tsembelee ye. Aluer u ngu wuese Yehova sha ci u ior kaa a we ér u wuese un yô, u fatyô u wuese un sha gbashima ga. Umbur tindi u a hembe lun tindi u vesen cii ne, a kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:37) Mkaanem ma Yehova ma ú henen sha tseeneke wou la wase u u fan un kpa? Aluer u ngu henen Mkaanem ma Yehova yô, ma a na una doo u ishima. Gbenda u se tese ser Yehova doo se ishima yô, ka u wuese un. Aluer ishima you ngi wang a akperan shio yô, ú fatyô u wuese Yehova a ishima i môm.
16, 17. Inja i dedoo ka i wase u wuese Yehova nena? Tese ikyav.
16 Doo u ú vande henen sha ieren you cii ve u mase henen sha kwagh u ú ôr or ye. Luun er wankwase u Iserael u yange i kôr un kpan sha ayange a Elisha la lu wanyekwase u hembanato, u nan or môm icivir ga, shin u lun inja jighilii ga nahan, u hen wer Mbashiria mba ve kôr un kpan la ma ve kegh ato ma ve ungwa kwagh u ôr ve sha kwagh u profeti u Yehova la kpa? Alaghga ma ve kegh ga. Nyian kpaa, aluer u ngu wanye u hembanato ga, u ngu jighilii, shi u ngu a inja i dedoo yô, a doo ior u keghen ato a we shighe u ú lu pasen ve kwagh yô. (Mbaromanu 2:21) Time sha ikyav ne.
17 Yange i kighir wanyekwase ugen u a lu anyom 11 ken makeranta ken tar u Portugal ér a er uiniongo mba imo ishima na i Bibilo i̱ tsaase i la i lumun a mi ga yô. Nahan a pase tica na sha icivir er i hii ve un eren uiniongo mban ga yô, kpa a gema a laha un a laha. Hii hen shighe la je, tica ne zer heen un, kaan un akaa sha ikyaa i kwaghaôndo na. Er lu lahan un nahan kpa, a za hemen u nan un icivir. Anyom nga kar yô, anmgbian u kwase ne nyôr tom u pasen kwagh hanma shighe. Anmgbian u kwase ne yange za mkohol u vesen ugen, er lu nengen er i lu eren ior batisema yô, ashe gber un sha kwase ugen u vande kaven yô. Lu tica na la. Nahan ve kuve ayol a ve, ve gba vaan, tsô a kaa a anmgbian u kwase ne ér inja na i dedoo la ngi a hungur un ga. Orshiada u Yehova ugen yange va pase un kwagh, nahan a ôr un ér yange un lu a wanyemakeranta ugen lu a inja i dedoo. Fese je maa i hii Bibilo i henen a na, tsô a hingir u fan mimi. Sha kpôô yô, inja i dedoo ka gbenda u dedoo u wuese Yehova.
18. Aluer taver wanyekwaor u pasen mbagenev kwagh u Bibilo i er shi pasen ve kwagh u Yehova Aôndo yô, kanyi i doo u nana ere?
18 Ashighe agen ka i taver we u pasen mbagenev ken makeranta akaa a u ne jighjigh a mi laa? Aluer ka nahan yô, u ngu tswen ga, igyumior igen kpaa ka i taver ve. Kpa, ka we iyol you u bugh gbenda ve, mbagenev vea pine u mpin sha kwagh u ú ne jighjigh a mi la ye. U tesen ikyav yô, aluer i yange u pasen kwagh ken makeranta wou ga yô, u fatyô u van a Bibilo man ityakerada i i har sha Bibilo va ôron ken makeranta shighe u i dugh ahumbe shin ma shighe ugen u ian i dugh yô. Er ú lu ôron i yô, alaghga mbayevmakeranta mbagen vea nenge nahan vea pine u ér u ôr ve kwagh u ú lu ôron la. Aluer u ôr ve kwagh u dedoo u ú zough a mi ken takerada u ú lu ôron la yô, kwagh la una bugh u gbenda u dedoo u hiin kwaghpasen. Pine ve ve ôr u kwagh u ve ne jighjigh a mi yô. Kegh ato a ve zulee, nahan pase ve kwagh u ú hen ken Bibilo yô. Saan ikyaior kpishi i i lu wuese Yehova la iyol sha er ve fe un yô.
19. Kanyi ikyaior ia er ve ia pase kwagh sha uya uya doo doo?
19 Gbenda u u hembe doon u wuese Yehova yô, ka u pasen kwagh sha uya uya. Wea lu a hii u pasen kwagh ga yô, er nan u we ago a hiin ga? Aluer u ngu vanden eren tom u pasen kwagh ne yô, akaa agen nga a i gbe u ú er shinii? U tesen ikyav yô, aluer hanma shighe u ú dugh kwagh pasen yô, ka u zer pasen ior itinekwaghôron i môm sha hanma ya u ú ze her cii yô, a doo u ú seer nyôôso kwaghpasen wou, u fatyô u pinen mbamaren ou ve wase u, gayô pinen anmgbianev mbagenev mba ve tse ken tom u pasen kwagh yô. Shi fa u yaren tom a Bibilo tsema tsema, man gbenda u dedoo u henen kwagh a ior mba u hidi u za henen Bibilo a ve la, shi fa u hiin Bibilo i henen a ior kpaa. (1 Timoteu 4:15) Aluer u dondo igbenda ne sha er u seer wuese Yehova yô, tom wou u pasen kwagh ua za ikyura, shi a saan we iyol u eren u kpaa.
Doo u Ú Hii u Wuese Yehova Hanma Shighe?
20. Er nan ve i doo u ikyaior ia hen ér ve mba iyev yô ve yina u wuese Yehova ga?
20 Mbamlumun mba i ne sha mbampin mba utar mba i tim sha mi ken kwaghhenen ne cii, mlumun u sha mpin u masejime ne hemba taver ga cii. Ungwa ase mlumun u Bibilo i ne jighilii ne: “Umbur u A gbe u la sha ayange a iyev ou.” (Orpasenkwagh 12:1) Sha mimi yô, ka hegen u se lu iyev ne i lu shighe u se hii u wuese Yehova ye. Alaghga u hen wer: “M ngu anye yum, m ngu a kuma u me wuese Yehova ga. M ngu a fa kwagh ga. Me kegh zan zan saa shighe u me bee iyol ve.” Umbur wer, ka we tswen u hii henen nahan ga. U tesen ikyav yô, Yeremia yange kaa a Yehova wener: “Tere, AÔNDO! M fa u ôron kwagh dedoo ga, gadia mo m ngu wanye je.” Kpa, Yehova taver un ishima, kaa a na ér a de cie ga. (Yeremia 1:6, 7) Se kpaa, aluer se mba wuese Yehova yô, ityôkyaa ngi i se lu a mciem ga. Aluer nyityôkwagh ia er se je kpa Yehova una kar a mi kera.—Pasalmi 118:6.
21, 22. Er nan ve i kar ikyaior i i wuese Yehova la sha avuree, man mkar u i kar ve sha avure ne ka kwagh u taver or ishima nena?
21 Se mba taver ne ikyaior asema ser: De yen nen asema u civir Yehova ga. Ka hegen u ne lu iyev ne je i hembe doon u ne er tom u hemban doon u i lu eren tar sha won cii ne ye. Aluer ne mba eren tom ne yô, ne lu imôngo a tsombor u vesen u Yehova u sha man u shin tar, u u lu wuese un la. Doo Yehova kpishi er we kpaa u lu ken tsombor ne nahan. Ver ase ishima sha mkaanem ma orpasalmi ôr a Yehova ne, a kaa ér: “Ior Ou vea na nagh sha ayol a ve sha asema a dedoo je sha iyange i ikumutya You, a uicighanmbaakondov iyol, sha mve u use; er avure a lu nahan kape ikaior You ia va la.”—Pasalmi 110:3.
22 Iyange ka ia due pepe ia ta sha avure nahan i doo kenger ga he? Ka a ndôôr sha ikya wuee, a engem i doo kenger kpen kpen. Yehova tôô ne ikyaior i ne lu civir un sha jighjigh ken ashighe a ican ne vough er avure nahan. Nahan, aluer ne tsua u wuese un yô, a saan un iyol kpen kpen. (Anzaakaa 27:11) Nahan, ne ikyaior, wuese nen Yehova a agee a en cii!
Ú Na Mlumun Wer Nyi?
• Ka atôakaa a nyi a ne ve i doo u se wuese Yehova?
• Ka akav a i tér ken Bibilo a nyi nahan a tese ér ikyaior ia fatyô u wuese Yehova dedoo?
• Ikyaior ia wuese Yehova nyian nena?
• Ka hanma shighe nahan i doo u mbayev mba kiriki vea hii u wuese Yehova, man er nan ve i doo u vea hii sha shighe laa?
[Study Questions]
[Pictures on page 15]
Aluer ma huror wou ngu a mfe kpishi nahan, u ôr mbagenev kwagh u nan ga he?
[Picture on page 17]
A doo mba u henen makeranta a ve la u fan akaa a u ne jighjigh a mi la
[Picture on page 18]
Wea soo u nyôôso gbenda u ú eren tom u pasen kwagh yô, pine mba ve tse ken tom u pasen kwagh ve wase ú