Yehova “Ne Mba Ve Lu Keren Un La Injar”

“Or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.”—MBAHEBERU 11:6.

1, 2. Ka akaa a nyi nahan alaghga aa na mbatomov mba Yehova mbamzeyol ken ishima?

 KWASE ugen, mba yer un ér Babara, á kaa wener: “M ngu Kwaseshiada u Yehova nôngo u kuman anyom 30 hegen, kpa m nenge mer m kuma u a yilam ér Kwaseshiada ga. Shin er m er tom u pania kua ityom igen nahan kpa, akaa ne wasem u nengen mer m kuma u a yilam ér Orshiada ga.” * Keith kpa ôr kwagh nahan. Á kaa wener: “Ashighe agen yange ishima i zam iyol kpishi, gadia m nenge mer mbatomov mba Yehova mba a atôakaa kpishi a nan ve msaanyol, kpa mo yô, lu nahan ga. Tsô, ishima i gba zan mo iyol nahan m ule kpishi.”

² Kape mbatomov mba Yehova mbajighjigh mba ngise kpa ishima i zan ve iyol je la. Mba ainge kpa ishima i ze ve iyol nahan. We kpa ashighe agen ishima ka i za ú iyol nahana? Alaghga ú nenge wer mbamzeyol ta sha we, kpa anmgbianev mba u civir Aôndo a ve imôngo la yô mba ken mkpeyol shi mba zwa ahan ahan. Kwagh ne una na yô, adooga ú hen wer kwagh wou gba Yehova ishima ga shin we ú ikyo ga. Mayange je, de henen wer kape kwagh a lu ne ga. Bibilo taver se ishima ér: “[Yehova] laha shin A nyagh ican i or u ican i tser nan ga, yeren nan ishigh Nagh kpaa ga; kpa zum u nan genger imo nan yila Un la yô, [Una] ungwa.” (Pasalmi 22:24) Kwaghôron u profeti u i er  sha kwagh u Mesiya ne tese ér Yehova ongo mliam ma mba ve civir un sha jighjigh, shi ne ve injar kpaa.

3. Er nan ve se lu iyol ishô sha mbamzeyol mba tar ne ga?

³ Or môm tsô nan ngu iyol ishô sha mbamzeyol mba tar ne ga, mba ve civir Yehova je kpaa ga. Sha ci u se mba ken tar u ú lu sha ikyev i Satan Diabolo, un u a lu orihyom u Yehova u tamen la. (2 Mbakorinte 4:4; 1 Yohane 5:19) Yehova cir iyol sha mbatomov nav sha u kuran ve sha ivande ga, nahan ka ve jighilii Satan a lu anen ve vanger ye. (Yobu 1:7–12; Mpase 2:10) Nahan, gba u se za hemen u ‘wan ishima ken ican shi taver ishima sha msen u eren,’ zan zan shighe u Yehova a ver la una kar kuman shi se lu a vangertiôr ser we se ikyo kpaa. (Mbaromanu 12:12) Nahan, mayange je, se de nen ser mbamzeyol mba tar ne ve nzughul a vese se hingir u henen ser se doo Yehova Aôndo wase ishima ga ze!

Ior mba Ngise Mba Ve Ver Se Ikyav i Ishimawan Yô

4. Ter mbatomov mba Yehova mba jighjigh mba yange ve wa ishima a atsan yô.

⁴ Mbatomov mba Yehova mba sha ashighe a tsuaa la kpishi wa ishima a mbamzeyol mba vihin tsung. U tesen ikyav yô, yange ‘ishima i vihi’ Hana ker sha ci u lu ikyômkwase, nahan hen wener Aôndo gema ijime a na. (1 Samuel 1:9–11) Eliya di, Torkwase Yesebel lu keren un a ku, nahan cier un iyol kpishi tsô a sôn Yehova ér: “Kuma hegen ne; TERE, ngohol uma wam, gadia m hemba uter av ga.” (1 Utor 19:4) Apostoli Paulu kpa ishima za un iyol kpishi sha ci u myen na. Nahan a kaa wener: “Ka a saren mo u eren kwagh u dedoo yô, kwaghbo kpaa a lu a mo her.” Shi a vaa iyol wener: “Kpe ahii, mo or u gban kera nee!”—Mbaromanu 7:21–24.

5. (a) Aôndo yange ver Hana man Eliya kua Paulu doo doo nena? (b) Aluer mbamzeyol iv se ken ishima yô, Mkaanem ma Aôndo ma a sur se asema nena?

⁵ Hana man Eliya kua Paulu cii civir Yehova a ishimawan. Nahan Yehova ver ve doo doo. (1 Samuel 1:20; 2:21; 1 Utor 19:5–18; 2 Timoteu 4:8) Kpa, yange akaa za ve iyol atô kposo kposo, akaa ne va ve a ijungwen shi ve tôô ér kwagh hemba ve shi mciem gba ve iyol kpaa. Se kpa, ashighe agen mbamzeyol vea iv se ken ishima, kwagh a er nahan je kpa i de kpiligh se iyol ga. Aluer mbamzeyol ta sha we man ka u inja er u doo Yehova ishima ga yô, ú er nena? Ú fatyô u zuan a msurshima ken Mkaanem ma Aôndo. U tesen ikyav yô, se time sha kwagh u Yesu ôr ér “ice yen i sha ityou kpaa,” Yehova ôr i cii la ken ngeren u a kar la. (Mateu 10:30) Kwagh la tese ér hanma or u nan civir Yehova cii kwagh u nan gba un ishima tsung. Shi umbur injakwagh i Yesu ôr sha kwagh u mbaatsator la kpaa. Aluer atsator u a lu annyon u cuku kpa Yehova we un ikyo yô, a er nan ve una nenge sha mbamzeyol asev ga?

6. Bibilo ia sur mba ve ngee a mbamzeyol ken ishima la asema nena?

⁶ Mimi je, se uumace mba se yen ne se fatyô u doon Yehova Aôndo, Orgbanakaa u a hembe sha won cii la ishima kpa? Een, se fatyô! Avur a Bibilo nga kpishi a a ne ve se lu a vangertiôr ser kwagh wase doo un ishima yô. Aluer se mba a mkaanem ma i er ken avur la ken asema a ase yô, se fatyô u kaan er orpasalmi Davidi nahan, ser: “Zum u mbamhen ve ngeem ken ishima yô, mbamsurshima Ou nam ishima i saan saan.” (Pasalmi 94:19) De se pande se time sha mbamsurshima mba ve lu ken Mkaanem ma Aôndo mba vea wase se se hemba lun a vangertiôr ser kwagh wase gba Aôndo ishima yô. Shi vea wase se u lun a vangertiôr ser aluer se za hemen u civir un yô, una na se injar.

“Ve Hingir Kwagh” u Yehova Jim Je

7. Ka kwaghôron u profeti u taver ikyuior i Iserael i i hôngor kpishi la ishima u nyi Yehova kaa a Malaki ér á ôr ve?

⁷ Ken derianyom u sha utaan Cii man Shighe u Yesu la, Mbayuda er akaa a vihin  kpishi. Upristi ve ngohol ilev mbi gban awan hen ior ve naan naagh a mi sha atse a Yehova a nanden naagh sha mi. Mbaajiriv di ôron ijir sha mimi ga. Heela tseegh ga, ishor i kpehen man aie u eren kua anyighe man idya i eren dumbur hanma ijiir cii. (Malaki 1:8; 2:9; 3:5) Malaki ôr ikyurior i i hôngor kpishi ne kwaghôron u profeti u vesen u una va er yô. Lu u ica a gba ga tsô Yehova una zungwe ve mhôônom nahan una ngohol ve. Kwaghôron u profeti shon kaa ér: “Vea hingir kwagh Wam jim je, kape TER u akum a Sha A kaa ne, sha iyange i Me er i la; Me er a ve dedoo er or ka nan er a wan u nan u a shir nan tom dedoo nahan.”—Malaki 3:17.

8. Hii nan ve a fatyô u kaan ér kwaghôron u ken Malaki 3:17 la ngu kuren sha zegeikpelaior kpaa?

⁸ Kwaghôron u profeti u Malaki ôr la ngu kuren sha Mbakristu mba i shigh ve mkurem, ve lu iyenge 144,000, mba ve lu ikyurior i ken jijingi la nyian kpaa. Ikyurior ne i̱ “hingir kwagh” u Yehova shin “nongoior” na jim je. (1 Peteru 2:9) Shi kwaghôron u profeti u Malaki ôr la ngu kuren sha “zegeikpelaior” i i ‘til sha ishigh ki ikônough ki torough kira man sha ishigh ki Waniyôngo i i hee akondo a pupuu iyol’ la kpaa. (Mpase 7:4, 9) Zegeikpelaior ne kohol mba i shigh ve mkurem la cii mba ikyum i môm, shi mba sha ikyev i Orkuran môm, ka Yesu Kristu je la.—Yohane 10:16.

9. Er nan ve ior mba Yehova ve ‘hingir un kwagh’ u injaa?

⁹ Yehova nengen mba ve tsough u civir un la nena? Er i er ken Malaki 3:17 nahan, á tôô ve vough er ter u dooshima ka nan tôô wan u nan nahan. Ior mba Yehova doo un ishima tsung je yô, a kaa ér ve “hingir kwagh” na jim je. I gema ishember ne ken Ubibilo mbagen ér “ikyagh yagh ki injaagh.” Er nan ve Yehova a tee mba ve civir un gede gede nahana? Ityôkyaa yô, ngu Aôndo u wuese kwagh. (Mbaheberu 6:10) Undun mba ve civir un a ishima i môm la ga, shi a tôô ve ér mba un kwagh u injaa.

10. Yehova kor ior nav nena?

¹⁰ Ú umbur ma kwagh u injaa u ú lu a mi, u a doo ú ishima tsung kpa? Ú we iyol sha mi ga he? Kape Yehova a eren a ior mba ve “hingir kwagh” na jim je la. Kpa, Yehova kor ior nav sha hanma ican man aahe cii ga. (Orpasenkwagh 9:11) Kpa, mba ve civir Yehova sha jighjigh cii, ngu a tahav mbu kuran ve ken jijingi, man una kura ve kpaa. Ne ve tahav mbu vea fatyô u wan ishima a nyityô ican i ve tagher a mi cii. (1 Mbakorinte 10:13) Sha nahan yô, Mose ngise kaa a Mbaiserael, ior mba Aôndo mba sha ashighe a tsuaa la ér: “Taver ishima lu icihi, . . . gadia TER, Aôndo wou, ka Un A ze a we imôngo ye; Una kende u ga, Una undu u kpaa ga.” (Duteronomi 31:6) Yehova ne ior nav injar. Gadia, ve “hingir kwagh” na jim je.

Yehova Ne “Mba Ve Lu Keren Un la Injar”

11, 12. Aluer se fa ser Yehova ne se injar yô, kwagh ne una wase se se lu a akperan sha kwagh u mlu wase a na ga nena?

¹¹ Yehova ne mba ve civir un injar. Kwagh ne kpa tese ér kwagh ve gba un ishima. Yehova kaa a Mbaiserael ér: “Karem nen ase sha kwagh ne, kape TER u akum a Sha A kaa ne, tsô Mea bugh ne aan a Sha, Mea haa ne iveren, je ia neer á haa inya” ga yô. (Malaki 3:10) Ken masejime yô, Yehova una va na mba ve civir un injar i uma u tsôron. (Yohane 5:24; Mpase 21:4) Injar i a fatyô u tôôn igen karen  sha i ga ne tese ér dooshima u Yehova man naagh nagh hemba cii. Shi kwagh ne tese ér kwagh u mbacivir un gba un ishima sha mimi. Aluer se fa ser Yehova ne se injar wuee yô, se lu a akperan sha kwagh u mlu wase vea na ga. Yehova iyol na kaa a vese ér se nenge un ér un ngu or u nan se injar. Paulu nger ér: “Or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.”—Mbaheberu 11:6.

¹² Jighilii yô, ka injar i Yehova a tende zwa u nan se la i ne ve se civir un ga kpa se mba civir un ser a doo se ishima. Kpa, u se lun a ishimaveren ser se zua a injar ka kwaghbo ga, shin tese ér ka mtsera je se lu keren ga. (Mbakolose 3:23, 24) Yehova ka a kar a ishima a na mba ve civir un sha gbashima la injar, sha ci u ve doo un ishima shi kwagh ve gba un ishima kpaa.

13. Hii nan ve naagh ku ipaa ku Yehova a ne sha ci wase la ku lu kwagh u vesen u hemban cii u a tese ér se doo un ishima?

¹³ Kwagh u hemban cii u a tese ér kwagh u uumace gba Yehova ishima tsung yô, ka naagh ku ipaa ku i ne sha ci wase la. Apostoli Yohane nger wener: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yohane 3:16) Naagh ku ipaa ku Yesu la tese wanger wanger ér mhen u mbagenev ve henen ér se gba kwagh sha ishigh ki Yehova ga shi se doo un ishima kpaa ga la ka u vough ga. Sha kpôô yô, aluer Yehova kimbi injar zegenan sha ityough yasegh sha u nan Wan na u môm môm ér a paa se yô, kwagh ne tese ér se doo un ishima tsung je.

14. Kanyi i̱ tese ér ipaa lu Paulu zege kwagha?

¹⁴ Nahan aluer ú ngu henen wer ú gba kwagh ga yô, hen sha kwagh u ipaa la. Tôô wer ipaa la ka iyua i Yehova a ne ú jighilii yô. Kape apostoli Paulu tôô ken ishima na vough je la. Aluer ú umbur yô, á vaa iyol wener: “Kpe ahii, mo or u gban kera nee!” A shi á za hemen wener: “I̱ wuese Aôndo sha Yesu Kristu Ter wase!” u ‘m doo Un ishima man A gem A ne iyol Na sha ci wam’ la. (Mbaromanu 7:24, 25; Mbagalatia 2:20) Kwagh u Paulu ôr ne tese ér lu kenden a iyol na sha ga. Kpa, lu a vangertiôr ér kwagh na gba Yehova ishima kpishi. We kpaa, doo u ú fa wer ipaa la ka iyua i Aôndo a ne ú, vough er Paulu kpa fa nahan. Yehova ka Oryiman u a lu a agee shi a ne mbacivir un injar yô.

Wa Ikyo sha “Ayom” a Satan

15–17. (a) Diabolo ngu yaren tom a mhen u ior ve henen ér ve gba kwagh ga la nena? (b) Ka ishimataver i nyi se zua a mi sha kwagh u Yobu?

¹⁵ Nahan kpa, alaghga a taver we u lumun wer mbamsurshima mba ken Mkaanem ma Aôndo a ne i nger la mba sha ci wou kpaa. Shin alaghga ú hen wer mbagenev vea fatyô u zuan a injar i uma u tsôron ken tar u he u Aôndo una va a mi la, kpa we yô, u fatyô ga. Aluer ka u nahan yô, kanyi i doo u ú eree?

¹⁶ Alaghga ú fa kwaghwan u Paulu wa Mbaefese ne, á kaa a ve ér: “Huwa nen ikav mbi utyav mbi Aôndo cii iyol sha u né fatyô u tilen dông hendan a ayom a diabolo yô.” (Mbaefese 6:11) Aluer se hen sha ayom a Satan yô, alaghga kwagh u una hii van se ken ishima yô, a lu uyôughyôughmbaakaav man ijimba, man a lu shami je. Mba civir Aôndo mba ngise man mba sha ayange ne kpishi gba ken imeen ne. Nahan kpa, doo u se fa ser Satan ngu a ayom agen kpaa, ngu meen ior ér ve hen ér ve doo Yehova Aôndo ishima ga.

¹⁷ Diabolo fa u yaren tom a mhen ne sha u yangen ior u civir Aôndo. Umbur mkaanem ma Bildadi ôr a Yobu la. A kaa a na wener: ‘Á er nan man or nana lu perapera sha ishigh ki Aôndo? Shin á er nan man or u kwase a mar nan, nana lu wanger wangeraa? Nenge, uwer je kpaa u wanger ga, asan kpaa nga wang sha ishigh Nagh ga, man hire or, u nan lu ijôô, kua wan u or u nan lu anyigôô’ ne ye he! (Yobu 25:4–6; Yohane 8:44) Nenge er mkaanem man yange ma a na Yobu una ule sha wono? Nahan, mayange je, de ne Satan ian  wer a na ú iyolkpen ga. Kpa nôngo fa ayom a na sha er ú wa agoyol u seer taver ishima eren kwagh u vough yô. (2 Mbakorinte 2:11) Yobu yô, Yehova yange kôôm mhen na la, kpa gema na un injar sha ishimataver na la, hide un a akaa na a a saa la cii kwa har.—Yobu 42:10.

Yehova “Hemba Ishima Yase”

18, 19. “Aôndo hemba ishima yase” inja nena, man á “fa akaa cii” nena?

¹⁸ Sha mimi yô, aluer ishimayinan ya tor ken a vese yô, a taver se u hemban i̱. Nahan kpa, jijingi u Yehova una wase se se za hemen u “yôhôr . . . hanma kwagh u taven u i kende a mi sha, sha u yisan kwaghfan u Aôndo” cii. (2 Mbakorinte 10:4, 5) Aluer ka lun we inja er ú gba kwagh ga man mhen ne ngu nôngon u yan tor ken we yô, hen sha mkaanem ma apostoli Yohane man. Á kaa wener: “Sha kwagh ne yô, sé fa er se lu ken mimi man sea pever asema ase sha ishigh Nagh, gadia aluer ishima ia na se ibo yô, Aôndo hemba ishima yase man A fa akaa cii kpaa.”—1 Yohane 3:19, 20.

¹⁹ Inja i kwaghôron u i er ér “Aôndo hemba ishima yase” la ér nyi? Ashighe agen ishima ia na se ibo, hemban cii je yô, zum u se umbur akaa a shami ga, shin akaa a kpeegh a se er yô. Shin alaghga aeren a se vese a mi la aa na yô, se hen akaa a kpeegh sha iyol yase kpishi, adooga se hen ser nyityô kwagh i se er cii Yehova una lumun a mi ga. Apostoli Yohane taver se ishima ér mayange je Yehova una er kwagh nahan ga! Yehova we akaa a kpeegh a se eren la ken ishima ga, kwagh hembe gban un a ishima i dedoo i se lu a mi i eren kwagh la. A fa mbamhen asev man mbaawashima asev kpaa. Davidi nger wener: “A fa mlu wase, A umbur er se lu vuulevu je yô.” (Pasalmi 103:14) Sha mimi yô, Yehova fa kwagh wase hemba se ayol a ase!

“Tsar u Tor u Engem” man “Idyer i Tor”

20. Kwaghôron u profeti u Yesaia ôr ér ior mba Yehova mba sha ashighe a tsuaa la vea hide ken tar ve la tese er á nengen ior nav nena?

²⁰ Yehova yange tindi profeti Yesaia ér a ôr ior nav mba sha ashighe a tsuaa la ér ve lu a ishimaveren ér vea hide ken tar ve. Er ve lu shir ken tar u Babilon ve lu gbuu yô, lu loho u ua sur ve asema shi ua taver ve asema je ne! Yehova tsenga fan wener shighe u vea hide ken tar ve yô, a kpe ve iyol. Nahan a kaa a ve wener: “[U] lu tsar u tor u engem ken uwegh ku TER, man idyer i tor ken uwegh ku Aôndo wou.” (Yesaia 62:3) Er ivur ne i er nahan, Yehova yange er ior nav ve lu a icivir shi ve engem ashe kpaa. Iserael u á lu ikyurior na i ken jijingi nyian ne kpa kape á er a ve vough je la. Ka inja er a kende ve sha ér hanma or nana kenger ve i doo nan nahan.

21. A er nan ve ú lu a vangertiôr wer Yehova una na ú injar sha ishima i ú taver u lu civir un sha jighjigh laa?

²¹ Jighilii yô, kwaghôron u profeti ne kure sha mba i shigh ve mkurem la, nahan kpa a gema a tese icivir i Yehova a ne hanma or u nan civir un cii yô. Nahan, zum u ishima i wanger we ker sha kwagh u mlu wou ga yô, umbur wer er ú yen nahan kpa, kwagh wou gba Yehova ishima tsung, ú ngu un er “tsar u tor u engem” man “idyer i tor” nahan. Nahan, za hemen u eren ishima na sha gbashima, sha er a saan un iyol yô. (Anzaakaa 27:11) Aluer ú za hemen u eren nahan yô, ú lu a vangertiôr wer Yehova una na ú injar sha er ú taver ishima ú lu civir un sha jighjigh yô!

[Footnote]

Ú Umbur Kpa?

• Ka sha nyi gbenda nahan sé “hingir kwagh” u Yehova jim je?

• Er nan ve i lu a inja u se fa ser Yehova ne mba ve civir un la injar?

• Ka “ayom” a Satan a nyi i gbe u se palegha?

• Yehova “hemba ishima yase” sha nyi gbenda?

[Study Questions]

[Pictures on page 22]

Paulu

Eliya

Hana

[Picture on page 24]

Mkaanem ma Aôndo iv a mbamsurshima kpishi