Mbampin mba Mbaôron Takerada Ne Ve Pin La

Sha ashighe a Iserael u tsuaa la, iwanger i sha ivande i yange i wanger ken Icighankpar u Hemban cii u ken tabernakel kua u ken tempel, í ashighe agen i yilan ér Shechinah la tile sha nyi?

Yehova, Ter u lun a dooshima man Orkuran u ior nav yange a tese er un lu a Iserael yô. Gbenda môm u eren kwagh ne yô, lu sha ibeenegh ki wanger wang ki ki lun hen ijiir i í civir un la.

Iwanger i sha ivande la tile sha ityou ki mlu u Yehova u i nengen a na ga la. Iwanger ne yange i lu ken Icighankpar u Hemban cii u ken tabernakel man u ken tempel u Solomon maa la. Kpa iwanger i sha ivande la tese ér ka Yehova kpôô kpôô je a lu hen ijiir la ga. Gadia Aôndo tem ken ayou a i maa sha ave ga. (2 Kroniku 6:18; Aerenakaa 17:24) Iwanger i Aôndo yange a na i wanger ken icighanjiir na hanma shighe la i na Pristi u Tamen kua Mbaiserael cii vangertiôr ér Yehova ngu kuran ve shi ngu kuren mbamgbe vev kpaa.

Shighe u i nger Bibilo i bee ica lu a gba ga la, i yilan iwanger i sha ivande ne ken zwa Shiria ér Shechinah (shekhi·nahʹ), man inja i ishemberti ne yô ér “un u a tem ker la” shin “ijiir i teman.” Ishemberti ne ngi ken Bibilo ga, kpa i zua a i̱ ken Ruamambera u ken zwa Heberu u i gem ken zwa Shiria, i yer kpaa ér Targums la.

Shighe u Yehova lu tesen Mose er una er tabernakel yô, á kaa a na ér: “Ver ijiir i nan iwom her la sha areki; areki la yô, ú wa Shiada u Me na u la ker. Me kohol we ker, Me ôr kwagh a we hen ijiir i nan iwom her la, hen atô u ucerubi uhar, mba ve lu sha areki u shiada la, Me kaa u akaa cii a Me kaa Mer Mbaiserael ve̱ er a la.” (Ekesodu 25:21, 22) Areki u i er kwagh na heen ne lu akwati u lun a akur a zenaria, u i ver ken Icighankpar u Hemban cii, ken tabernakel yô. Shi ucerubi mba sha zenaria uhar lu sha akur a Areki la.

Kpa ka han Yehova una anden ve una lamenaa? Yehova iyol na na mlumun sha mpin ne, a kaa a Mose ér: ‘Ka ken ibeen Me ande sha ijiir i nan iwom her la ye.’ (Levitiku 16:2) Ibeenegh kin yange ki tile ijiir i môm sha ahumbe ki ningir sha icighan Areki la hen atô u ucerubi mba zenaria mba uhar mbara. Nahan kpa, Bibilo kera pase er ibeenegh kira ki gba ica a ucerubi mbara, shin er ki samber yisan ve za kighir la ga.

Ibeenegh ki wanger kin ki taan iwanger ken Icighankpar u Hemban la jimin cii. Jighilii yô, lu cii iwanger i yange lu ken Icighankpar u Hemban cii je la. Shighe u Pristi u Tamen una nyôr ken icighankpar u Hemban cii la sha Iyange i Nan Iwom yô, iwanger la i wanger nahan a fatyô u nengen kera tsembelee. Gadia i lu sha ishigh ki Yehova je a tile ye.

Iwanger i sha ivande ne ngi Mbakristu a inja nyian je kpa? Apostoli Yohane yange nenge a gar sha mpase u sha mnenge u “tugh mbua kera ile ker je ga” yô. Gar la ka Yerusalem u he, u i lu Mbakristu mba i shigh ve mkurem mba i nder ve sha u ve tema tor a Yesu imôngo la. Man ka iyange shin uwer u lu tan iwanger i ken gar u sha injakwagh ne ga. Gadia iengem i Yehova Aôndo ngi wanger ker vough er ibeenegh ki wanger la kpa yange ki wanger ken Icighankpar u Hemban cii la nahan. Shi, Yesu Kristu u a lu Waniyôngo la kpa ka “imenger” i gar la. “Gar” la di gem te iwanger na i ken jijingi sha ior mba i paa ve ken akuraior cii la sha u ve zenden ken i yô, shi ve ve a averen kpaa.—Mpase 21:22–25.

Er Yehova a lu nan mbacivir un averen mgbeghaa yô, mba a vangertiôr ér ka Yehova a lu Orkuran ve shi a lu Ter ve u doonshima kpaa ye.